1 Thiab nim no tau muaj tias thaum Nifais tau hais cov lus no tas lawm, saib seb, muaj cov neeg uas yog cov neeg txiav txim, cov uas kuj zwm rau Nkadi-atoos pab neeg ntsiag to, thiab lawv npau taws, thiab lawv qw nrov nrov tawm tsam nws, hais rau cov neeg hais tias: Vim li cas nej thiaj tsis txhom tus neeg no thiab coj nws tawm los, xwv kom nws yuav raug txim raws li txoj kev txhaum uas nws tau ua?

2 Vim li cas nej thiaj ntsia tus neeg no, thiab mloog nws hais lus cem tawm tsam cov neeg no thiab tawm tsam peb txoj kev cai?

3 Vim saib seb, Nifais tau hais rau lawv txog txoj kev tsis ncaj ntawm lawv txoj kev cai; muaj tseeb tiag, Nifais tau hais ntau yam uas muab sau tsis tau cia; thiab nws twb tsis hais ib yam dab tsi uas tsis raws li Vajtswv tej lus txib.

4 Thiab cov neeg txiav txim ntawd npau taws rau nws vim nws tau hais tseeb rau lawv txog tej uas lawv ua ntsiag to ntawm kev tsaus ntuj; txawm li ntawd los, lawv twb tsis kam xuas tes ntsiab nthos nws, vim lawv ntshai nyob tsam cov neeg yuav qw nrov nrov tawm tsam lawv.

5 Yog li ntawd lawv qw rau cov neeg, hais tias: Vim li cas nej thiaj cia tus txiv neej no hais lus cem tawm tsam peb? Vim saib seb nws rau txim rau tag nrho cov neeg no, uas twb yog rau txoj kev puas tsuaj; muaj tseeb tiag, thiab hais tias peb tej nroog loj no yuav raug tshem ntawm peb mus, xwv kom peb yuav tsis muaj tug nyob rau hauv lawv.

6 Thiab nim no peb paub hais tias qhov no yeej muaj tsis tau, vim saib seb, peb muaj hwj chim, thiab peb tej nroog loj heev, yog li ntawd peb cov yeeb ncuab yeej tsis muaj hwj chim kov yeej peb.

7 Thiab tau muaj tias lawv txhaub cov neeg kom npau taws tawm tsam Nifais zoo li no, thiab tsa kev sib cav sib ceg nyob hauv lawv; vim muaj ib co uas qw hais tias: Cia tus txiv neej no nws nyob nws, vim nws yog ib tug neeg zoo, thiab tej uas nws hais yeej yuav muaj los tsuas yog peb hloov siab lees txim xwb;

8 Muaj tseeb tiag, saib seb, tag nrho tej kev txiav txim, tej uas nws ua tim khawv rau peb, yuav los raug peb; vim peb paub tias nws ua tim khawv tseeb rau peb ntsig txog peb tej kev ua phem. Thiab saib seb tej ntawd muaj ntau, thiab nws yeej paub zoo txog tag nrho tej uas yuav raug peb ib yam li nws paub txog peb tej kev ua phem;

9 Muaj tseeb tiag, thiab saib seb, yog tias nws tsis yog ib tug yaj saub ces nws twb tsis muaj peev xwm ua tim khawv ntsig txog tej yam no.

10 Thiab tau muaj tias cov neeg uas nrhiav kev ua kom Nifais puas tsuaj, vim yog lawv txoj kev ntshai, raug yuam lawv thiaj tsis xuas tes ntsiab nthos nws; yog li ntawd nws pib rov hais lus dua rau lawv, vim nws pom tias ib txhia pom zoo rau nws, npaum li uas lawv cov uas tseem tshuav thiaj ntshai.

11 Yog li ntawd nws raug txhib kom hais ntxiv rau lawv hais tias: Saib seb, kuv cov kwv tij, puas yog nej tsis tau nyeem hais tias Vajtswv twb muab hwj chim rau ib tug txiv neej, uas twb yog Mauxes, kom nplawm cov dej ntawm tus Dej Hiav Txwv Liab, thiab cov dej ntawd tau faib hlo rau ob sab, cov neeg Ixayees, uas yog peb cov poj koob yawm txwv, thiaj hla dhau los saum av qhuav, thiab cov dej nphau los npog cov neeg Iyiv cov tub rog thiab muab lawv nqos?

12 Thiab nim no saib seb, yog hais tias Vajtswv twb muab hwj chim li ntawd rau tus txiv neej no, es vim li cas nej tseem sib cav nyob hauv nej tus kheej, thiab hais tias Vajtswv twb tsis muab hwj chim rau kuv xwv kom kuv thiaj yuav paub txog tej kev txiav txim uas yuav los rau nej tsuas yog nej yuav hloov siab lees txim xwb?

13 Tiam sis, saib seb, tsis yog nej xyeej kuv tej lus xwb, tiam sis nej kuj xyeej tag nrho tej lus uas peb cov yawg koob tau hais, thiab tej lus uas tus txiv neej no tau hais, uas yog Mauxes, tus uas Vajtswv tau muab hwj chim loj heev rau, muaj tseeb tiag, tej lus uas nws tau hais txog tus Mexiyas txoj kev los.

14 Muaj tseeb tiag, puas yog nws tsis tau ua tim khawv tias Vajtswv Leej Tub yuav los? Thiab ib yam li nws muab tus nab tooj tsa kom siab nyob rau hauv roob moj sab qhua, tus uas yuav los kuj yuav raug muab tsa kom siab tib yam li ntawd.

15 Thiab tag nrho cov uas yuav ntsia tus nab ntawd yuav muaj sia nyob, twb ib yam li ntawd tag nrho cov uas yuav ntsia Vajtswv Leej Tub nrog txoj kev ntseeg, muaj siab xav ua zoo, kuj yuav muaj sia nyob tib yam, uas twb yog mus rau txoj sia uas nyob mus ib txhis.

16 Thiab nim no saib seb, tsis yog Mauxes ua tim khawv txog tej yam no xwb, tiam sis tag nrho cov yaj saub dawb huv thiab, txij li nws lub caij los mus rau Anplaham lub caij.

17 Muaj tseeb tiag, thiab saib seb, Anplaham pom txog nws txoj kev los, thiab muaj kev kaj siab puv nkaus thiab zoo siab.

18 Muaj tseeb tiag, thiab saib seb kuv hais rau nej tias, tsis yog Anplaham thiaj paub tej yam no xwb, tiam sis muaj coob leej ua ntej Anplaham uas Vajtswv hu los ntawm Vajtswv tus txheej txheem; muaj tseeb tiag, uas twb yog raws li nws Leej Tub tus txheej txheem; thiab ua li no xwv kom yuav ua rau cov neeg paub, ntau txhiab xyoo ua ntej nws txoj kev los, hais tias kev txhiv dim yuav los rau lawv.

19 Thiab nim no kuv xav kom nej paub tias, txij puag thaum Anplaham lub caij los tau muaj ntau tus yaj saub ua tim khawv txog tej yam no; muaj tseeb tiag, saib seb, tus yaj saub Xenos tau ua tim khawv yam tsis ntshai kiag; vim qhov ntawd nws thiaj tau raug tua.

20 Thiab saib seb, Xenoj; thiab Eexiyas, thiab Yaxayas, thiab Yelemis los kuj ua tim khawv, (Yelemis twb yog tus yaj saub uas ua tim khawv txog Yeluxalees txoj kev puas tsuaj) thiab nim no peb twb paub tias Yeluxalees tau puas tsuaj raws li Yelemis tej lus. Auj yog li ntawd, vim li cas Vajtswv Leej Tub thiaj yuav tsis los, raws li Yelemis txoj kev qhia tej yuav muaj los yav tom ntej?

21 Thiab nim no nej puas yuav cam tias Yeluxalees twb puas tsuaj lawm? Nej puas yuav hais tias Xedekiyas cov tub twb tsis raug tua, tag nrho tsuas yog tshuav Mules xwb? Muaj tseeb tiag, puas yog nej twb tsis pom tias Xedekiyas cov tub ki twb nyob nrog peb, thiab lawv raug ntiab tawm ntawm thaj av Yeluxalees? Tiam sis saib seb, tsis tas li no xwb—

22 Peb tus yawg koob Lihais raug ntiab tawm ntawm Yeluxalees vim nws ua tim khawv txog tej yam no. Nifais los kuj ua tim khawv txog tej yam no, thiab yuav luag tag nrho peb cov yawg koob, uas twb yog los txog rau lub sij hawm no; muaj tseeb tiag, lawv ua tim khawv txog Khetos txoj kev los, thiab tau tos ntsoov, thiab zoo siab txog lub caij uas nws yuav los.

23 Thiab saib seb, nws yog Vajtswv, thiab nws nyob nrog lawv, thiab nws tau ua nws tus kheej tshwm sim los rau lawv, ces nws txhiv lawv dim; thiab lawv muab yeeb koob rau nws, vim yog tej uas tseem yuav los.

24 Thiab nim no, vim nej twb paub tej no thiab tsis muaj peev xwm xyeej tej no tsuas yog nej yuav dag xwb, yog li ntawd hais txog qhov no nej ua txhaum, vim nej tau xyeej tag nrho tej no, txawm hais tias nej twb tau txais ntau yam pov thawj; muaj tseeb tiag, nej twb tau txais tag nrho txhua yam, tsis hais tej uas nyob saum ntuj ceeb tsheej, thiab tag nrho tej uas nyob hauv lub ntiaj teb, los ua tim khawv tias tej no muaj tseeb.

25 Tiam sis saib seb, nej tau xyeej qhov tseeb, thiab ntxeev siab tawm tsam nej tus Vajtswv dawb huv; thiab nyob rau lub sij hawm no, nej twb tsis kam khaws tej yam uas muaj nqis cia rau nej tus kheej saum ntuj ceeb tsheej, qhov chaw uas tsis muaj dab tsi ua tau kom ua lwj ua liam, thiab qhov chaw uas tsis muaj dab tsi uas tsis dawb huv yuav los, tiam sis nej tab tom tum txoj kev npau taws rau nej tus kheej rau hnub uas txiav txim.

26 Muaj tseeb tiag, twb yog lub sij hawm no uas nej tab tom siav rau txoj kev puas tsuaj uas kav ib txhis, vim yog nej tej kev tua neeg thiab nej tej kev deev nkauj nraug thiab tej kev phem; muaj tseeb tiag, thiab tsuas yog nej hloov siab lees txim xwb tsis li ces tej ntawd yuav los rau nej sai sai.

27 Muaj tseeb tiag, saib seb nim no tej ntawd twb nyob ntawm nej lub qhov rooj; muaj tseeb tiag, nej cia li mus lawm tom lub rooj txiav txim, thiab tshawb nrhiav; thiab saib seb, nej tus thawj txiav txim twb raug tua, thiab nws pw tsau nws cov ntshav; thiab nws tus kwv, tus uas nrhiav kev los zaum saum lub rooj txiav txim, yog tus uas muab nws tua.

28 Thiab saib seb, nkawd ob leeg puav leej zwm rau nej pab neeg ntsiag to, pab uas tus tsim yog Nkadi-atoos thiab tus niag phem uas nrhiav kev ua rau tib neeg tej ntsuj plig puas tsuaj.