1 Thiab yog li ntawd peb muaj peev xwm pom tias noob neej lub siab cuav thiab tsis ruaj khov npaum li cas; muaj tseeb tiag, peb muaj peev xwm pom tias los ntawm tus Tswv txoj kev zoo uas tsis txawj kawg nws yeej foom koob hmoov thiab ua kom vam meej rau cov uas tso siab rau nws.

2 Muaj tseeb tiag, thiab peb pom tias kiag thaum lub sij hawm uas nws ua rau nws cov neeg vam meej, muaj tseeb tiag, hais txog kev ua kom lawv tej qoob loo tom liaj teb, lawv tej pab yaj thiab lawv cov tsiaj txhu, thiab tej kub, thiab tej nyiaj dawb, thiab tag nrho txhua yam muaj nuj nqis huv tib si thiab tej paj ntaub, muaj ntau ntxiv tuaj; thiab tseg lawv txoj sia, thiab cawm lawv dim ntawm lawv cov yeeb ncuab tes; thiab ua kom lawv cov yeeb ncuab lub siab muag xwv kom lawv tsis txhob tuaj ua rog tawm tsam lawv; muaj tseeb tiag, thiab lub ntsiab yog li no, ua txhua yam kom nws cov neeg noj qab nyob zoo thiab muaj kev zoo siab; muaj tseeb tiag, thaum ntawd twb yog lub sij hawm uas lawv ua lawv lub siab tawv, thiab hnov qab txog tus Tswv lawv tus Vajtswv, thiab muab Tus Dawb Huv tsuj rau hauv lawv qab xib taws—muaj tseeb tiag, thiab li no los twb vim yog lawv txoj kev tau zoo, thiab lawv txoj kev vam meej heev.

3 Thiab yog li ntawd peb pom tias yog tus Tswv tsis siv tej kev txom nyem los qhuab ntuas nws cov neeg, muaj tseeb tiag, yog nws tsis cia kev tuag thiab kev ntshai, thiab kev tshaib nqhis and txhua yam kab mob phem, los xyuas lawv, ces lawv twb tsis nco qab txog nws.

4 Auj noob neej yuav ruam, thiab muaj plhus, thiab phem, thiab ua li dab phem ua, thiab nrawm mus ua phem, thiab qeeb los ua zoo ua luaj; muaj tseeb tiag, cas yuav nrawm ua luaj mus mloog tus niag phem tej lus, thiab muab lawv lub siab tso rau tej khoom uas tsis muaj nuj nqis ntawm lub ntiaj teb!

5 Muaj tseeb tiag, cas yuav nrawm ua luaj rau txoj kev muab hlob; muaj tseeb tiag, cas yuav nrawm ua luaj mus khav txiv, thiab ua txhua yam kev phem; thiab cas lawv yuav qeeb ua luaj nco txog tus Tswv lawv tus Vajtswv, thiab cuab pob ntseg rau nws tej lus ntuas, muaj tseeb tiag, cas yuav qeeb ua luaj los taug tej kev ntawm kev txawj ntse!

6 Saib seb, lawv tsis xav kom tus Tswv lawv tus Vajtswv, tus uas tau tsim lawv, yog tus uas tswj thiab kav lawv; txawm hais tias nws muaj kev zoo ntau heev thiab kev hlub tshua rau lawv los, lawv tseem muab nws tej lus ntuas saib yam tsis muaj nuj nqis, thiab lawv tsis xav kom nws yog tus coj lawv kev.

7 Auj noob neej txoj kev tsis muaj nqis loj npaum li cas; muaj tseeb tiag, lawv twb tsis muaj nqis li tej hmoov av ntawm lub ntiaj teb.

8 Vim saib seb, tej hmoov av ntawm lub ntiaj teb tseem txawj txav mus rau ub rau no, txawj sib faib ua ob sab, thaum peb tus Vajtswv uas muaj hwj chim thiab kav ib txhis txib kom ua li ntawd.

9 Muaj tseeb tiag, saib seb thaum nws lub suab hu, tej toj thiab tej roob twb tshee hnyo thiab qeeg nkaws.

10 Thiab los ntawm lub suab lub hwj chim tej toj roob tawg ntsoog ntxaws, thiab hloov los ua tiaj, muaj tseeb tiag, twb zoo li ib lub hav.

11 Muaj tseeb tiag, los ntawm lub hwj chim ntawm nws lub suab tag nrho lub ntiaj teb twb co qeg txoog;

12 Muaj tseeb tiag, los ntawm lub suab lub hwj chim, ua rau lub hauv paus twb qeeg, mus ti nkaus hauv plawv.

13 Muaj tseeb tiag, thiab yog nws hais rau lub ntiaj teb tias—Txav—lub ntiaj teb yeej txav.

14 Muaj tseeb tiag, yog nws hais rau lub ntiaj teb tias—Koj cia li tig rov qab, kom ncua tau hnub ntev ntau teev—yuav muaj li ntawd;

15 Thiab yog li ntawd, raws li nws txoj lus lub ntiaj teb tig rov qab, thiab rau tib neeg ces zoo li lub hnub nyob twj ywm tsis txav; muaj tseeb tiag, thiab saib seb, yeej muaj li no; vim yeej tseeb tias yog lub ntiaj teb txav thiab tsis yog lub hnub txav.

16 Thiab saib seb, kuj tib yam, yog nws hais rau cov dej uas tob heev tias—Cia li qhuav mus—yuav muaj li ntawd.

17 Saib seb, yog nws hais rau lub roob no tias—Cia li sawv, thiab los tim no thiab vau rau saum lub nroog ntawd, kom muab lub nroog ntawd faus—saib seb yuav muaj li ntawd.

18 Thiab saib seb, yog ib tug neeg muab ib qho nyiaj txiag zais rau hauv av, thiab tus Tswv yuav hais tias—Cia qhov nyiaj txiag ntawd raug foom tsis zoo, vim yog tus neeg uas muab zais ntawd txoj kev ua phem—saib seb, qhov nyiaj txiag ntawd yuav raug foom tsis zoo.

19 Thiab yog tus Tswv yuav hais tias—Koj raug foom tsis zoo, xwv kom txhob muaj leej twg nrhiav tau koj txij lub sij hawm no mus lawm yav tom ntej thiab mus ib txhis—saib seb, yuav tsis muaj leej twg tau qhov nyiaj txiag ntawd txij ntawd mus thiab mus ib txhis.

20 Thiab saib seb, yog tus Tswv yuav hais rau ib tug neeg tias—Vim yog koj txoj kev ua phem, koj yuav raug foom tsis zoo mus ib txhis—yuav muaj li ntawd.

21 Thiab yog tus Tswv yuav hais tias—Vim yog koj tej kev ua phem koj yuav raug txiav tawm ntawm kuv xub ntiag mus—nws yeej yuav ua kom muaj li ntawd.

22 Thiab kev txom nyem yuav raug tus uas nws yuav hais li no rau, vim tus uas ua kev phem yuav raug zoo li no, thiab nws yuav tsis dim; yog li ntawd, xwv kom muaj li no, kom tib neeg yuav txais kev cawm dim, thiaj tau tshaj tawm txoj kev hloov siab lees txim.

23 Yog li ntawd, cov uas yuav hloov siab lees txim thiab mloog tus Tswv lawv tus Vajtswv lub suab tau koob hmoov; vim cov no yog cov uas tus Tswv yuav cawm dim.

24 Thiab raws li Vajtswv txoj kev zoo tag nrho, thov kom nws cia rau tib neeg los hloov siab lees txim thiab ua tej yam zoo, xwv kom yuav txum tim tau tej txiaj ntsim ntawm sab ntsuj plig rau lawv raws li lawv txoj kev ntseeg nws, raws li tej yam lawv ua.

25 Thiab kuv xav kom tus Tswv cawm txhua tus neeg dim. Tiam sis peb twb nyeem lawm tias nyob rau hnub tseem ceeb thiab kawg ntawd yuav muaj ib txhia uas yuav raug muab ntiab tawm, muaj tseeb tiag, cov uas yuav raug ntiab tawm ntawm tus Tswv xub ntiag mus;

26 Muaj tseeb tiag, cov uas yuav raug xa mus rau ib qho chaw uas muaj kev nyuaj siab tsis txawj kawg, kom muaj raws li tej lus uas hais tias: Cov uas tau ua zoo yuav tau txoj sia uas kav ib txhis; thiab cov uas tau ua phem yuav tau kev raug txim kav ib txhis. Thiab yeej muaj li ntawd. Amees.