1 Thiab tau muaj tias tom qab li ob xyoos Anpinadais tau pauv khaub ncaws ntsej muag tuaj nrog lawv nyob, xwv kom lawv tsis paub nws, thiab pib qhia tej yuav muaj los yav tom ntej nyob hauv lawv, hais tias: Tus Tswv tau txib kuv li no, hais tias—Anpinadais, cia li mus thiab qhia tej yuav muaj los yav tom ntej rau kuv cov neeg, vim lawv ua lawv lub siab ntsws tawv qhawv tsis mloog kuv tej lus; lawv tsis tau hloov siab lees txim ntawm lawv tej kev ua phem; yog li ntawd, kuv yuav los xyuas lawv nrog kuv txoj kev npau taws, muaj tseeb tiag, nrog kuv txoj kev npau taws heev kuv yuav los xyuas lawv thaum lawv ua kev phem thiab kev qias.

2 Muaj tseeb tiag, kev txom nyem raug tiam neeg no! Thiab tus Tswv hais rau kuv tias: Xyab koj txhais tes thiab qhia tej yuav muaj los yav tom ntej hais tias: Tus Tswv hais li no, yuav muaj tias tiam neeg no, vim yog lawv tej kev ua phem, yuav raug coj mus ua qhev, thiab yuav raug ntaus ntawm plhu; muaj tseeb tiag, thiab yuav raug neeg raws, thiab yuav raug tua; thiab tej dav noj nyuj uas nyob saum nruab ntug, thiab tej dev, muaj tseeb tiag, thiab tej tsiaj qus, yuav dua lawv tej nqaij noj.

3 Thiab yuav muaj tias vaj ntxwv Nau-as txoj sia yuav muaj nuj nqis ib yam li ib ce tsoos tsho uas nyob hauv ib lub cub tawg kub kub; vim nws yuav paub tias kuv yog tus Tswv.

4 Thiab yuav muaj tias kuv yuav siv tej kev txom nyem uas mob heev, muaj tseeb tiag, kev tshaib nqhis thiab tej kab mob phem, los nplawm kuv cov neeg no; thiab kuv yuav ua kom lawv quaj tas hnub.

5 Muaj tseeb tiag, thiab kuv yuav ua kom muaj nra hnyav nog rau saum lawv nraub qaum; thiab lawv yuav raug cab li ib tug nees luav uas hais tsis tau lus.

6 Thiab yuav muaj tias kuv yuav xa lawg los rau lawv, thiab tej lawg ntawd yuav ntaus lawv; thiab lawv kuj yuav raug tej cua sab hnub tuaj nplawm; thiab tej kab ntsaum kuj yuav nkag los rau lawv tej av, thiab noj lawv tej qoob loo.

7 Thiab tej kab mob phem yuav nplawm lawv—thiab kuv yuav ua txhua yam no vim yog lawv tej kev ua phem thiab tej kev qias.

8 Thiab yuav muaj tias tsuas yog lawv hloov siab lees txim xwb, tsis li ces kuv yuav ua kom lawv puas tsuaj huv tib si tawm ntawm lub ntiaj teb mus; tiam sis lawv yuav tseg ib phau ceev xwm txheej cia tom qab lawv tas sim neej no, thiab kuv yuav tsom kwm phau ceev xwm txheej no rau lwm haiv neeg uas tuaj nyob hauv thaj av; muaj tseeb tiag, kuv yuav ua li no xwv kom kuv qhia tau cov neeg no tej kev qias rau lwm haiv neeg. Thiab Anpinadais tau qhia tej yuav muaj los yav tom ntej ntau yam tawm tsam cov neeg no.

9 Thiab tau muaj tias lawv npau taws rau nws; thiab lawv txhom nws thiab muab nws khi cab mus rau vaj ntxwv Nau-as, thiab hais rau vaj ntxwv Nau-as hais tias: Saib seb, peb coj tau tus txiv neej no tuaj rau koj, tus uas tau qhia ntsig txog tej kev phem uas yuav muaj los yav tom ntej rau koj cov neeg, thiab hais tias Vajtswv yuav ua kom lawv puas tsuaj.

10 Thiab nws kuj qhia ntsig txog tej kev phem uas yuav muaj los yav tom ntej rau koj txoj sia, thiab hais tias koj txoj sia yuav zoo li ib ce tsoos tsho uas nyob hauv ib lub cub tawg uas cig hlob hlob.

11 Thiab ntxiv, nws hais tias koj yuav zoo li tej quav nyab npleg, twb zoo li tej quav nyab npleg qhuav tom teb, uas raug tej tsiaj qus khiav saud thiab tsuj hauv qab xib taws.

12 Thiab ntxiv, nws hais tias koj yuav zoo li tej paj pos tawg, uas thaum tawg nra, yog cua tuaj ntsawj, yuav raug ntsawj mus rau hauv thaj av. Thiab nws ua txuj hais tias tus Tswv tau hais tej ntawd. Thiab nws hais tias txhua yam no yuav los rau koj yog koj tsis hloov siab lees txim, thiab muaj tej no twb vim yog koj tej kev ua phem.

13 Thiab nim no, auj vaj ntxwv es, koj tau ua kev phem loj npaum li cas, los sis koj cov neeg tau ua tej kev txhaum loj npaum li cas, es Vajtswv thiaj yuav rau txim thiab tus txiv neej no thiaj yuav txiav txim rau peb?

14 Thiab nim no, auj vaj ntxwv es, saib seb, peb tsis muaj txim dab tsi, thiab koj, auj vaj ntxwv es, tsis tau ua txhaum; yog li ntawd, tus txiv neej no tau dag txog koj, thiab nws tau qhia tej yuav muaj los yav tom ntej uas tsis muaj qab hau.

15 Thiab saib seb, peb muaj zog khov kho, peb yuav tsis ua qhev, los sis raug peb cov yeeb ncuab txhom mus; muaj tseeb tiag, thiab koj tau vam meej nyob hauv thaj av, thiab koj tseem yuav vam meej ntxiv.

16 Saib seb, ntawm no yog tus txiv neej ntawd, peb coj nws tuaj rau koj tes; koj ua rau nws raws li koj nyiam.

17 Thiab tau muaj tias vaj ntxwv Nau-as txib kom muab Anpinadais tso rau hauv lub tsev kaw; thiab nws txib kom cov pov thawj sib sau tuaj ua ke xwv kom nws yuav sab laj nrog lawv saib nws yuav ua li cas rau Anpinadais.

18 Thiab tau muaj tias lawv hais rau vaj ntxwv Nau-as tias: Coj nws los ntawm no xwv kom peb thiaj tau nug nws; thiab vaj ntxwv Nau-as txib kom coj Anpinadais los rau lawv.

19 Thiab lawv pib nug nws, seb lawv puas muaj cuab kav ua rau nws hais txawv dhau los, xwv kom lawv thiaj yuav muaj tej yam los liam nws; tiam sis nws teb lawv yam tsis zais li, thiab nres tau tag nrho lawv tej lus nug, muaj tseeb tiag, ua rau lawv yoob; vim nws tiv tau tag nrho lawv tej lus nug, thiab ua rau lawv tsis paub hais lawv tej lus.

20 Thiab tau muaj tias muaj ib tug ntawm cov pov thawj hais rau nws tias: Muaj lub ntsiab li cas ntawm tej lus uas tau muab sau cia, thiab tej uas peb cov yawg koob tau qhia, hais tias:

21 Tus uas txhais ko taw zoo nkauj kawg nyob rau saum tej roob yog tus uas coj tej moo zoo los; uas tshaj tawm kev thaj yeeb, uas coj tej moo zoo los; uas tshaj tawm kev cawm seej; uas hais rau Xi-oos hais tias, Nej tus Vajtswv kav;

22 Koj tej neeg zov nyas yuav tsa lawv lub suab; lawv yuav hu nkauj nrog lub suab ua ke; vim lawv yuav pom tim ntsej tim muag thaum tus Tswv yuav coj Xi-oos rov qab los;

23 Cia li tsa suab nrog kev xyiv fab; cia li hu nkauj ua ke, nej tej chaw puas tsuaj ntawm Yeluxalees; vim tus Tswv tau nplij nws cov neeg, nws tau txhiv Yeluxalees dim;

24 Tus Tswv tau thws nws txhais npab dawb huv rau txhua haiv neeg lub qhov muag pom, thiab cov neeg tag nrho thoob ntiaj teb yuav pom peb tus Vajtswv txoj kev cawm seej?

25 Thiab nim no Anpinadais hais rau lawv tias: Nej puas yog pov thawj, thiab ua txuj qhia cov neeg no, thiab ua txuj hais tias nej to taub lub txiaj ntsim qhia tej yuav muaj los yav tom ntej, thiab ho xav kom kuv qhia saib tej yam no muaj ntsiab li cas no los?

26 Kuv hais rau nej tias, kev txom nyem raug nej vim nej ntxeev tus Tswv tej kev! Yog nej to taub tej yam no, nej twb tsis qhia raws li nej to taub; yog li ntawd, nej tau ntxeev tus Tswv tej kev.

27 Nej twb tsis ua kom nej lub siab yuav to taub; yog li ntawd, nej thiaj tsis muaj tswv yim. Yog li ntawd, nej qhia dab tsi rau cov neeg no?

28 Thiab lawv hais tias: Peb qhia Mauxes txoj kev cai.

29 Thiab nws hais rau lawv ntxiv tias: Yog nej qhia Mauxes txoj kev cai vim li cas nej ho tsis ua raws li txoj kev cai? Vim li cas nej ho tso nej lub siab rau tej kev nplua nuj? Vim li cas nej ho sib daj sib deev thiab siv nej lub dag zog nrog niam ntiav, muaj tseeb tiag, thiab ua rau cov neeg no ua txhaum, thiaj ua rau tus Tswv xa kuv tuaj qhia tej yuav muaj los yav tom ntej tawm tsam cov neeg no, muaj tseeb tiag, twb yog ib txoj kev phem loj heev tawm tsam cov neeg no?

30 Nej tsis paub tias kuv hais qhov tseeb no los? Muaj tseeb tiag, nej yeej paub tias kuv hais qhov tseeb; thiab tsim nyog nej ntshai tshee hnyo rau ntawm Vajtswv.

31 Thiab yuav muaj tias nej yuav raug nplawm vim nej tej kev ua phem, vim nej hais tias nej qhia Mauxes txoj kev cai. Thiab nej paub dab tsi txog Mauxes txoj kev cai? Kev cawm seej puas yog los ntawm Mauxes txoj kev cai? Nej hais li cas?

32 Thiab lawv teb thiab hais tias kev cawm seej yog los ntawm Mauxes txoj kev cai.

33 Tiam sis nim no Anpinadais hais rau lawv tias: Kuv paub tias yog nej ua raws li Vajtswv tej lus txib ces yuav cawm nej dim; muaj tseeb tiag, yog nej ua raws li tej lus txib uas tus Tswv muab rau Mauxes saum lub roob Xinais, hais tias:

34 Kuv yog tus Tswv nej tus Vajtswv, tus uas tau coj nej tawm ntawm teb chaws Iyiv, tawm ntawm lub tsev ua qhev.

35 Nej yuav tsum tsis txhob muaj lwm tus Vajtswv uas tsis yog kuv.

36 Nej yuav tsum tsis txhob puab mlom rau nej, los sis ib yam dab tsi uas zoo li tej uas nyob saum ntuj, los sis tej uas nyob hauv lub ntiaj teb.

37 Nim no Anpinadais hais rau lawv tias, Nej puas tau ua txhua yam no? Kuv hais rau nej tias, Tsis tau, nej tsis tau ua. Thiab nej puas tau qhia cov neeg no tias lawv yuav tsum ua txhua yam no? Kuv hais rau nej tias, Tsis tau, nej tsis tau qhia.