1 Nim no tau muaj tias coob leej ntawm tiam neeg uas tab tom loj hlob tsis to taub vaj ntxwv Npeyamis tej lus, vim lawv tseem yog me nyuam yaus thaum lub sij hawm nws hais rau nws cov neeg; thiab lawv tsis ntseeg lawv cov yawg koob tej kab lis kev cai.

2 Lawv tsis ntseeg tej uas tau hais txog kev sawv rov los ntawm cov tuag, thiab lawv kuj tsis ntseeg tias Khetos yuav los.

3 Thiab nim no vim lawv tsis ntseeg lawv thiaj tsis muaj peev xwm to taub Vajtswv txoj lus; thiab lawv lub siab tawv qhawv.

4 Thiab lawv tsis kam ua kev cai raus dej; thiab lawv kuj tsis kam koom nrog lub koom txoos. Thiab lawv yog ib co neeg txawv xws li ntawm lawv txoj kev ntseeg, thiab nyob zoo li ntawd mus li, twb muaj lub siab nyiam sab cev nqaij daim tawv thiab muaj kev txhaum; vim lawv tsis kam thov tus Tswv lawv tus Vajtswv.

5 Thiab nim no thaum lub sij hawm uas Mauxiyas kav teb kav chaw, cov uas tsis ntseeg twb tsis muaj coob li ib nrab ntawm Vajtswv cov neeg; tiam sis vim muaj kev tsis sib haum xeeb ntawm cov kwv tij lawv thiaj muaj coob ntxiv tuaj.

6 Vim tau muaj tias los ntawm lawv tej lus dag ntxias lawv coj tau coob leej mus yuam kev, cov uas nyob hauv koom txoos, thiab ua rau lawv ua txhaum ntau yam; yog li ntawd tsim nyog tias cov uas ua txhaum, uas yog nyob hauv lub koom txoos, yuav tsum raug cov ntseeg tej kev qhuab ntuas.

7 Thiab tau muaj tias cov uas ua txhaum raug coj los rau cov pov thawj, thiab cov xib hwb coj lawv los rau cov pov thawj; thiab cov pov thawj coj lawv los rau Amas, uas yog tus pov thawj hlob.

8 Nim no vaj ntxwv Mauxiyas tau muab txoj cai kav lub koom txoos rau Amas.

9 Thiab tau muaj tias Amas tsis paub yuav ua li cas rau lawv; tiam sis muaj coob tus tim khawv nkaug lawv; muaj tseeb tiag, cov neeg tau sawv thiab ua tim khawv txog lawv tej kev ua phem ntau heev.

10 Nim no thaum yav tas los twb tsis tau muaj ib yam zoo li no tshwm sim nyob hauv lub koom txoos li; yog li ntawd Amas ntxhov siab ntawm nws sab ntsuj plig, thiab nws txib kom coj lawv mus cuag vaj ntxwv Mauxiyas.

11 Thiab nws hais rau tus vaj ntxwv tias: Saib seb, nov yog coob leej uas peb tau coj tuaj rau koj, cov uas raug lawv cov kwv tij liam; muaj tseeb tiag, thiab lawv cov kwv tij tau pom lawv ua ntau yam phem. Thiab lawv tsis kam hloov siab lees txim rau lawv tej kev ua phem; yog li ntawd peb tau coj lawv tuaj rau koj, xwv kom koj yuav txiav txim rau lawv raws li lawv tej kev txhaum.

12 Tiam sis vaj ntxwv Mauxiyas hais rau Amas tias: Saib seb, kuv yuav tsis txiav txim rau lawv; yog li ntawd kuv cia lawv rau koj txiav txim.

13 Thiab nim no Amas tus ntsuj plig rov qab ntxhov siab dua; thiab nws mus thov tus Tswv saib nws yuav ua li cas ntsig txog qhov xwm no, vim nws ntshai tias tsam nws ua txhaum rau Vajtswv pom.

14 Thiab tau muaj tias tom qab nws thov Vajtswv kawg siab kawg ntsws, tus Tswv lub suab los rau nws hais tias:

15 Koj tau koob hmoov, Amas, thiab cov uas ua kev cai raus dej nyob hauv cov dej Maumoos tau koob hmoov. Koj tau koob hmoov vim yog koj txoj kev ntseeg heev, txawm tias yog kuv tus tub qhe Anpinadais tej lus xwb.

16 Thiab lawv tau koob hmoov, vim yog lawv txoj kev ntseeg heev txawm tias yog tej lus uas koj tau hais rau lawv xwb.

17 Thiab koj tau koob hmoov vim koj tau tsa ib lub koom txoos nyob hauv cov neeg no; thiab kuv yuav tsa kom lawv sawv, thiab lawv yuav ua kuv cov neeg.

18 Muaj tseeb tiag, cov neeg no uas txaus siab ris kuv lub npe tau koob hmoov; vim yuav muab lawv hu los ntawm kuv lub npe; thiab lawv yog kuv cov neeg.

19 Thiab vim koj tau nug kuv ntsig txog tus neeg ua txhaum, koj tau koob hmoov.

20 Koj yog kuv tus tub qhe; thiab kuv khi lus rau koj tias koj yuav tau txoj sia nyob mus ib txhis; thiab koj yuav ua hauj lwm rau kuv thiab tawm mus los ntawm kuv lub npe, thiab yuav sau kuv cov yaj los ua ke.

21 Thiab tus uas yuav mloog kuv lub suab yuav yog kuv tus yaj; thiab tus ntawd koj yuav txais los rau hauv lub koom txoos, thiab tus ntawd kuv kuj yuav txais tib yam.

22 Vim saib seb, lub no yog kuv lub koom txoos; tus uas ua kev cai raus dej yuav tsum ua kev cai raus dej rau txoj kev hloov siab lees txim. Thiab tus uas koj txais yuav tsum ntseeg kuv lub npe; thiab kuv yuav zam txim dawb paug rau nws.

23 Vim twb yog kuv uas ris neeg ntiaj teb tej kev txhaum; vim twb yog kuv uas tau tsim lawv; thiab twb yog kuv uas tseg ib qho chaw nyob ntawm kuv sab xis rau tus uas ntseeg mus txog thaum kawg.

24 Vim saib seb, yuav muab lawv hu los ntawm kuv lub npe; thiab yog lawv paub kuv lawv yuav tawm los, thiab yuav tau ib qho chaw nyob mus ib txhis ntawm kuv sab xis.

25 Thiab yuav muaj tias thaum lub suab raj hlau nrov zaum ob thaum ntawd cov uas ib txwm tsis paub kuv yuav tawm los thiab yuav sawv ntawm kuv xub ntiag.

26 Thiab thaum ntawd lawv yuav paub tias kuv yog tus Tswv lawv tus Vajtswv, paub tias kuv yog lawv tus Txhiv Dim; tiam sis lawv tsis kam txais kev txhiv dim.

27 Thiab thaum ntawd kuv yuav lees rau lawv tias kuv ib txwm tsis paub lawv; thiab lawv yuav ncaim mus rau hauv hluav taws uas cig tsis txawj tuag uas yog npaj rau tus dab phem thiab nws cov tim tswv.

28 Yog li ntawd kuv hais rau koj tias, tus uas tsis kam hnov kuv lub suab, tus ntawd koj tsis txhob txais los rau hauv kuv lub koom txoos, vim kuv yuav tsis txais tus ntawd thaum txog hnub kawg.

29 Yog li ntawd kuv hais rau koj tias, Cia li mus; thiab tus uas ua txhaum tawm tsam kuv, koj yuav tsum txiav txim rau tus ntawd raws li tej kev txhaum uas nws tau ua; thiab yog hais tias nws lees nws tej kev txhaum rau koj thiab kuv, thiab rau siab ntso hloov siab lees txim tiag tiag, koj yuav tsum zam txim rau tus ntawd, thiab kuv kuj yuav zam txim rau nws thiab.

30 Muaj tseeb tiag, thiab txhua zaus uas kuv cov neeg yuav hloov siab lees txim kuv yuav zam txim rau lawv tej kev txhaum uas lawv ua txhaum rau kuv.

31 Thiab nej ib leeg kuj yuav tsum zam txim rau ib leeg tej kev txhaum; vim kuv hais tseeb rau koj tias, tus uas tsis zam txim rau nws cov neeg zej zog tej kev txhaum thaum nws hais tias nws hloov siab lees txim, tus ntawd twb ua rau nws tus kheej raug txim.

32 Nim no kuv hais rau koj tias, Cia li mus; thiab tus uas tsis kam hloov siab lees txim rau nws tej kev txhaum, tsis txhob suav tus ntawd nrog kuv cov neeg; thiab yuav tsum ua li no txij lub sij hawm no mus.

33 Thiab tau muaj tias thaum Amas hnov tej lus no nws muab tej no sau cia xwv kom nws yuav tau tej lus no, thiab xwv kom nws yuav txiav txim tau rau cov neeg ntawm lub koom txoos raws li Vajtswv tej lus txib.

34 Thiab tau muaj tias Amas tau mus thiab txiav txim rau cov uas raug txhom vim kev ua phem, raws li tus Tswv txoj lus.

35 Thiab txhua tus uas hloov siab lees txim ntawm lawv tej kev txhaum thiab lees tej kev txhaum ntawd, cov ntawd nws muab suav nrog cov neeg ntawm lub koom txoos;

36 Thiab cov uas tsis kam lees lawv tej kev txhaum thiab tsis kam hloov siab lees txim rau lawv tej kev ua phem, tsis muab cov ntawd suav nrog cov neeg ntawm lub koom txoos, thiab lawv tej npe raug muab rho tawm.

37 Thiab tau muaj tias Amas kav tag nrho tej xwm txheej ntawm lub koom txoos; thiab lawv pib rov qab muaj kev thaj yeeb thiab vam meej heev thaum ua tej dej num ntawm lub koom txoos, thiab lawv taug kev ceev faj zoo rau Vajtswv, thiab lawv tau txais coob leej, thiab muab coob leej ua kev cai raus dej.

38 Thiab nim no Amas thiab cov uas nrog nws ua hauj lwm saib xyuas lub koom txoos tau ua tag nrho tej yam no, thiab lawv rau siab tag nrho taug kev, thiab lawv qhia Vajtswv txoj lus txog txhua yam, thiab lawv raug txhua yam kev txom nyem, vim lawv raug tsim txom los ntawm tag nrho cov uas tsis zwm rau Vajtswv lub koom txoos.

39 Thiab lawv ntuas lawv cov kwv tij; thiab lawv kuj raug qhuab ntuas, txhua tus los ntawm Vajtswv txoj lus, raws li nws tej kev txhaum, los sis rau tej kev txhaum uas nws tau ua, thiab Vajtswv txib kom lawv thov Vajtswv tsis tut sis tseg, thiab ua nws tsaug rau tag nrho txhua yam.