1 Thiab nim no, tom qab nws hais lus rau cov neeg tas, vaj ntxwv Npeyamis xav tias tsim nyog uas nws yuav sau lub npe ntawm tag nrho cov uas tau khi lus nrog Vajtswv hais tias lawv yuav ua raws li nws tej lus txib.

2 Thiab tau muaj tias tsis tshuav ib tug neeg hlo li, tsuas yog tshuav cov me nyuam yaus, uas tsis tau khi lus thiab tsis tau ris Khetos lub npe.

3 Thiab ntxiv, tau muaj tias thaum vaj ntxwv Npeyamis tau hais tag txhua yam no, thiab tau tsa nws tus tub Mauxiyas ua ib tug saib xyuas thiab ib tug vaj ntxwv rau nws cov neeg, thiab tau muab txhua yam kev lav ris ntsig txog lub teb chaws rau nws, thiab kuj tau tsa cov pov thawj los qhia cov neeg, xwv kom lawv thiaj yuav hnov thiab paub Vajtswv tej lus txib, thiab txhaub kom lawv nco txog txoj kev lav lus uas lawv tau lav, nws tso cov neeg coob coob ntawd mus, thiab lawv rov qab, txhua tus, nrog lawv tsev neeg, mus rau tom lawv tej tsev.

4 Thiab Mauxiyas pib pauv nws txiv qhov chaw los kav. Thiab nws pib kav thaum nws hnub nyoog muaj peb caug xyoo, suav tag nrho, kwv yees li plaub puas thiab xya caum rau xyoo txij thaum Lihais ncaim Yeluxalees.

5 Thiab vaj ntxwv Npeyamis nyob peb xyoos ntxiv ces nws tuag.

6 Thiab tau muaj tias vaj ntxwv Mauxiyas tau taug mus raws tus Tswv tej kev, thiab tau ua raws li nws tej kev txiav txim thiab nws tej kev cai, thiab tau ua raws li nws tej lus txib ua txhua yam txhua tsav uas tus Tswv txib nws ua.

7 Thiab vaj ntxwv Mauxiyas tau hais kom nws cov neeg mus ncaws teb. Thiab nws tus kheej los, kuj tau mus ncaws teb thiab, xwv kom nws thiaj yuav tsis muab lub nra hnyav rau nws cov neeg ris, kom nws yuav ua raws nraim li nws txiv tau ua txhua yam. Thiab tsis muaj kev sib cav sib ceg nyob hauv tag nrho nws cov neeg tau peb xyoos.