1 Kuv, Xeenas, tau kawm tag nrho cov Neeg Nifais yam lus, thiab tau paub txog thaj av Nifais, los sis thawj thaj av uas yog peb cov yawg koob li qub txeeg qub teg, thiab tau raug xa ua ib tug tub nyiag xov mus pem cov Neeg Lamas mus nyiag xov txog lawv cov tub rog, xwv kom peb cov tub rog yuav tuaj tau rau lawv thiab ua kom lawv puas tsuaj—tiam sis thaum kuv pom tej yam uas zoo nyob hauv lawv kuv tau xav tias tsis tsim nyog ua kom lawv puas tsuaj.

2 Yog li ntawd, kuv nrog kuv cov kwv tij sab laj nyob tom hav zoov vim kuv xav kom peb tus thawj coj ua ib txoj kev sib yeem nrog cov Neeg Lamas; tiam sis vim nws yog ib tug neeg nruj neeg tsiv thiab nyiam tua neeg, nws txib kom muab kuv tua pov tseg; tiam sis los ntawm kev sib ntaus sib tua kuv thiaj li dim; vim txiv tawm tsam txiv, thiab kwv tij tawm tsam kwv tij, mus txog thaum feem coob ntawm peb cov tub rog raug puas tsuaj tas nyob rau hauv hav zoov; thiab peb cov uas tsis tuag tau rov qab mus rau thaj av Xalahelas, mus qhia zaj dab neeg ntawd rau lawv cov poj niam thiab lawv cov me nyuam.

3 Thiab tsis tas li ntawd, vim kuv xav tau peb cov yawg koob thaj av los ua kuv tug, thiaj tau sau tag nrho cov uas xav mus pem nyob hauv thaj av, thiab tau rov pib mus rau hauv hav zoov mus rau pem thaj av; tiam sis peb tau raug kev tshaib nqhis thiab kev txom nyem heev; vim peb qeeb nco txog tus Tswv peb tus Vajtswv.

4 Txawm li ntawd los, tom qab peb mus rau ub rau no tau ntau hnub nyob hauv hav zoov peb rub peb cov tsev pheeb suab ntaub nyob rau ntawm qhov chaw uas peb cov kwv tij tau raug tua, uas nyob ze rau peb cov yawg koob thaj av.

5 Thiab tau muaj tias kuv thiab kuv plaub tug tub rog tau rov mus rau hauv lub nroog, mus ntsib tus vaj ntxwv, xwv kom kuv paub txog tus vaj ntxwv tus cwj pwm, thiab xwv kom kuv paub tias kuv thiab kuv cov neeg puas yuav mus nyob tau hauv thaj av yam muaj kev thaj yeeb.

6 Thiab kuv mus ntsib tus vaj ntxwv, thiab tau khi lus nrog kuv tias kuv mus nyob tau hauv thaj av Lihais-Nifais, thiab thaj av Sailos.

7 Thiab nws kuj txib kom nws cov neeg tawm ntawm thaj av mus, thiab kuv thiab kuv cov neeg mus nyob rau hauv thaj av xwv kom tau thaj av los ua peb tug.

8 Thiab peb pib ua vaj tse, thiab kho tej ntsa loog ntawm lub nroog, muaj tseeb tiag, twb kho tej ntsa loog ntawm lub nroog Lihais-Nifais, thiab lub nroog Sailos.

9 Thiab peb pib ncaws teb, muaj tseeb tiag, twb siv txhua yam noob, siv tej noob pob kws, thiab txhuv liab, thiab nplej ua mov ci, thiab siv noob ne-as, thiab siv noob se-as, thiab siv txhua yam noob txiv ntoo; thiab peb tau pib huaj vam thiab vam meej nyob hauv thaj av.

10 Nim no twb yog vaj ntxwv Lamas txoj kev txawj haub txawj ntxias, kom coj tau kuv cov neeg ua qhev, nws thiaj muab thaj av tso rau peb mus nyob.

11 Yog li ntawd tau muaj tias, tom qab peb tau nyob hauv thaj av tau kaum ob xyoos, vaj ntxwv Lamas pib txhawj, ntshai tsam kuv cov neeg muaj zog tuaj nyob hauv thaj av, thiab tsam cov neeg Lamas yuav tsis muaj hwj chim kov yeej lawv thiab coj lawv los ua qhev.

12 Nim no lawv yog ib co neeg tub nkeeg thiab pe dab pe mlom; yog li ntawd lawv xav coj peb los ua qhev, xwv kom lawv yuav tau noj los ntawm tej hauj lwm uas peb tej tes ua; muaj tseeb tiag, xwv kom lawv yuav tau noj tej yaj tom peb tej teb.

13 Yog li ntawd tau muaj tias vaj ntxwv Lamas tau pib txhaub nws cov neeg kom lawv sib ntaus nrog kuv cov neeg; yog li ntawd pib muaj tej kev ua rog thiab tej kev sib cav sib ceg nyob hauv thaj av.

14 Vim, nyob rau xyoo kaum peb ntawm kuv txoj kev kav nyob hauv thaj av Nifais, nyob rau puag nram sab qab teb ntawm thaj av Sailos, thaum kuv cov neeg tseem tab tom pub dej thiab pub zaub rau lawv tej tsiaj, thiab ncaws lawv tej teb, muaj cov tub rog Lamas coob heev tuaj tawm tsam lawv thiab pib tua lawv, thiab txeeb lawv tej tsiaj, thiab tej pob kws uas nyob tom lawv tej teb.

15 Muaj tseeb tiag, thiab tau muaj tias tag nrho cov uas tsis raug tua khiav los rau hauv lub nroog Nifais, thiab tau thov kom kuv pab tiv thaiv lawv.

16 Thiab tau muaj tias kuv tau muab hneev, thiab xub, ntaj thiab liag, thiab qws, thiab hlua fiav, thiab txhua yam cuab yeej ua rog uas peb muaj peev xwm tsim tau rau lawv, thiab kuv thiab kuv cov neeg tau mus tawm tsam cov Neeg Lamas ua rog.

17 Muaj tseeb tiag, nrog tus Tswv lub zog peb tau mus ua rog tawm tsam cov Neeg Lamas; kuv thiab kuv cov neeg tau sib zog thov tus Tswv xwv kom nws yuav coj peb dim ntawm peb cov yeeb ncuab tes, vim ua rau peb tsim los nco txog thaum tus Tswv coj peb cov yawg koob dim.

18 Thiab Vajtswv tau hnov peb lub suab taij thiab tau teb peb tej lus thov; thiab peb tau mus nrog nws lub hwj chim; muaj tseeb tiag, peb tau mus tawm tsam cov Neeg Lamas, thiab nyob hauv ib hnub thiab ib hmos peb tua peb txhiab thiab plaub caug peb leeg tuag; peb tau tua lawv txog rau thaum peb ntiab tau lawv tawm ntawm peb thaj av.

19 Thiab kuv, tus kheej, nrog kuv txhais tes kiag, tau pab faus lawv cov neeg tuag. Thiab saib seb, ua rau peb tu siab heev thiab quaj nyiav uas ob puas thiab xya caum cuaj leeg ntawm peb cov kwv tij raug tua tuag.