1 Thiab nim no tau muaj tias Amoos thiab vaj ntxwv Leehais pib sab laj nrog cov neeg saib lawv yuav ua li cas thiaj coj tau lawv dim ntawm kev ua qhev; thiab nkawd txib kom tag nrho cov neeg sib sau lawv tus kheej tuaj ua ke; thiab nkawd ua li no xwv kom nkawd tau cov neeg lub suab txog qhov ntawd.

2 Thiab tau muaj tias lawv nrhiav tsis tau kev coj kom lawv dim ntawm kev ua qhev, tsuas yog hais tias lawv coj lawv cov poj niam thiab me nyuam, thiab lawv tej pab tsiaj, thiab lawv tej tsiaj txhu, thiab lawv tej tsev pheeb suab ntaub, thiab khiav mus rau hauv hav zoov; vim cov Neeg Lamas muaj coob heev, yog hais tias Leehais cov neeg xav ua kom lawv tus kheej dim ntawm kev ua qhev los ntawm kev siv ntaj riam, lawv yuav tsis muaj peev xwm tawm tsam cov Neeg Lamas.

3 Nim no tau muaj tias Nkide-oos mus sawv ntawm tus vaj ntxwv lub xub ntiag, thiab hais rau nws tias: Nim no auj vaj ntxwv es, koj twb mloog kuv cov lus los txog txij no, ntau zaus thaum uas peb sib ntaus sib tua nrog peb cov kwv tij, cov Neeg Lamas.

4 Thiab nim no auj vaj ntxwv es, yog koj xav hais tias kuv yog ib tug tub qhe uas tsim nqi, los sis yog koj tau mloog kuv cov lus hlo li los txog nim no, thiab kuv cov lus twb pab koj, zoo ib yam li ntawd kuv thov kom koj mloog kuv cov lus zaum no, thiab kuv yuav ua koj tus tub qhe thiab coj cov neeg no dim tawm ntawm kev ua qhev.

5 Thiab tus vaj ntxwv cia rau nws hais lus. Thiab Nkide-oos hais rau nws tias:

6 Saib seb txoj kev tom qaum tsev, mus nraum sab ntsa loog, uas nyob ntawm lub nroog sab nraud. Cov Neeg Lamas, los sis cov Neeg Lamas cov tub zov kev, qaug cawv thaum tsaus ntuj; yog li ntawd cia peb xa ib zaj lus tshaj tawm mus rau tag nrho cov neeg no kom lawv sau lawv tej tsiaj thiab tej tsiaj txhu los ua ke, xwv kom lawv yuav tav tau tej tsiaj ntawd mus rau hauv hav zoov thaum tsaus ntuj.

7 Thiab kuv yuav mus raws li koj lo lus txib thiab them se cawv txiv hmab zaum kawg rau cov Neeg Lamas, thiab lawv yuav qaug cawv; thiab peb yuav mus txoj kev uas tsis muaj neeg paub uas nyob sab laug ntawm lawv lub yeej thaum lawv qaug cawv thiab tsaug zog.

8 Yog li no peb yuav khiav mus rau hauv hav zoov nrog peb cov poj niam thiab cov me nyuam, peb tej tsiaj, thiab peb tej tsiaj txhu; thiab peb yuav mus ze ntawm thaj av Sailos tej ciaj ciam.

9 Thiab tau muaj tias tus vaj ntxwv mloog Nkide-oos cov lus.

10 Thiab vaj ntxwv Leehais txib kom nws cov neeg sau lawv tej tsiaj los ua ke; thiab nws xa se cawv txiv hmab mus rau cov Neeg Lamas; thiab nws kuj xa cawv txiv hmab ntau ntxiv, ua ib qho khoom plig rau lawv; thiab lawv haus tej cawv txiv hmab uas vaj ntxwv Leehais tau xa mus rau lawv yam qhuas ntxhias.

11 Thiab tau muaj tias vaj ntxwv Leehais cov neeg tau khiav thaum tsaus ntuj mus rau hauv hav zoov nrog lawv tej tsiaj thiab lawv tej tsiaj txhu, thiab lawv mus ze ntawm thaj av Sailos tej ciaj ciam hauv hav zoov, thiab lawv lug kev mus rau thaj av Xalahelas, uas yog Amoos thiab nws cov kwv tij coj lawv.

12 Thiab lawv nqa tag nrho lawv tej kub, thiab tej nyiaj, thiab lawv tej khoom uas muaj nuj nqis, tej uas lawv ris taus, thiab lawv tej khoom noj nrog lawv, mus rau hauv hav zoov; thiab lawv yeej meem mus ntxiv.

13 Thiab tom qab ntau hnub nyob hauv hav zoov lawv los txog hauv thaj av Xalahelas, thiab los koom nrog Mauxiyas cov neeg, thiab los zwm rau nws.

14 Thiab tau muaj tias Mauxiyas tos txais lawv nrog kev xyiv fab; thiab nws kuj tau txais lawv tej ceev xwm txheej, thiab tej ceev xwm txheej uas Leehais cov neeg nrhiav tau.

15 Thiab nim no tau muaj tias thaum cov Neeg Lamas pom tias Leehais cov neeg tau khiav tawm ntawm thaj av thaum tsaus ntuj, lawv xa ib pab tub rog mus rau hauv hav zoov mus caum lawv;

16 Thiab tom qab lawv mus caum lawv tau ob hnub, lawv tsis muaj cuab kav taug lawv tej hneev taw ntxiv lawm; yog li ntawd lawv poob zoo nyob hauv hav zoov.