1 Nim no thaum Mauxiyas tau ua li no tas nws xa xov mus thoob plaws hauv thaj av, rau tag nrho cov neeg, xav paub seb lawv xav kom leej twg los ua lawv tus vaj ntxwv.

2 Thiab tau muaj tias cov neeg lub suab teb, hais tias: Peb xav kom koj tus tub Aloos los ua peb tus vaj ntxwv thiab peb tus thawj coj.

3 Nim no Aloos twb mus rau pem thaj av Nifais lawm, yog li ntawd vaj ntxwv Mauxiyas muab tsis tau lub nceeg vaj cob rau nws; thiab Aloos los kuj tsis kam txais lub nceeg vaj; thiab Mauxiyas cov tub tsis muaj leej twg kam los kav lub nceeg vaj.

4 Yog li ntawd vaj ntxwv Mauxiyas tau xa xov mus rau cov neeg dua; muaj tseeb tiag, nws twb sau ib co lus xa mus rau cov neeg. Thiab nov yog tej lus uas nws tau sau, hais tias:

5 Saib seb, auj nej uas yog kuv cov neeg es, los sis kuv cov kwv tij es, vim kuv saib nej rau nqi zoo li ntawd, kuv thov kom nej yuav xav txog qhov xwm txheej uas tau hu nej los ntaus tswv yim—vim nej xav muaj ib tug vaj ntxwv.

6 Nim no kuv tshaj tawm rau nej tias tus uas muaj cai txais tau lub teb chaws tsis kam txais, thiab tsis kam los kav lub teb chaws.

7 Thiab nim no yog hais tias muab lwm tus los hloov nws chaw, saib seb kuv ntshai tsam yuav pib muaj kev sib cav sib ceg nyob hauv nej. Thiab tsis muaj leej twg paub tsam kuv tus tub, tus uas lub teb chaws yog nws li, ho npau taws thiab ntxias cov neeg no ib txhia mus lawv nws qab, uas yuav ua rau muaj kev ua rog thiab kev sib cav sib ceg nyob hauv nej, uas yog qhov pib ua kom muaj nqaij ntuag ntshav nrog ntau thiab muab tus Tswv txoj kev ua yuam kev, muaj tseeb tiag, thiab ua kom coob leej tus ntsuj plig puas tsuaj mus.

8 Nim no kuv hais rau nej tias cia peb muaj laj lim tswv yim thiab xav txog tej yam no, vim peb tsis muaj cai ua kom kuv tus tub puas tsuaj mus, thiab peb kuj tsis muaj cai rhuav lwm tus yog hais tias ho xaiv tau tus ntawd los pauv nws qhov chaw.

9 Thiab yog hais tias kuv tus tub tig rov qab mus rau nws txoj kev muab hlob thiab tej uas tsis muaj qab hau nws yuav thim tej lus uas nws tau hais, thiab los txeeb nws txoj cai kav lub teb chaws, uas yuav ua rau nws thiab cov neeg no ua kev txhaum ntau.

10 Thiab nim no cia peb muaj laj lim tswv yim thiab ntsia tom hauv ntej rau tej yam no, thiab ua qhov uas kom muaj kev thaj yeeb rau cov neeg no.

11 Yog li ntawd kuv yuav ua nej tus vaj ntxwv hauv kuv lub neej uas tseem tshuav; txawm li ntawd los, cia peb xaiv tsa ib co neeg txiav txim, los txiav txim rau cov neeg no raws li peb txoj kev cai; thiab peb yuav muab cov neeg no tej kev noj nyob kho ua tshiab, vim peb yuav xaiv tsa cov neeg uas muaj tswv yim los ua cov neeg txiav txim, cov uas yuav txiav txim rau cov neeg no raws li Vajtswv tej lus txib.

12 Nim no qhov uas Vajtswv txiav txim rau ib tug neeg yeej zoo dua li neeg txiav txim, vim Vajtswv tej kev txiav txim yeej ncaj tas mus li, tiam sis neeg tej kev txiav txim tsis ncaj tas mus li.

13 Yog li ntawd, yog ua tau es nej muaj cov neeg ncaj ncees los ua nej tej vaj ntxwv, cov uas los txhim tsa Vajtswv tej kev cai, thiab txiav txim rau cov neeg no raws li nws tej lus txib, muaj tseeb tiag, yog hais tias nej muaj cov neeg los ua nej tej vaj ntxwv uas ua tau ib yam li kuv txiv Npeyamis tau ua rau cov neeg no—Kuv hais rau nej tias, yog muaj zoo li no tas mus li ces yuav tsim nyog rau nej muaj vaj ntxwv los kav nej tas mus li.

14 Thiab kuv tus kheej los twb tau ua hauj lwm tas lub dag lub zog thiab lub hwj chim uas kuv muaj, los qhia nej txog Vajtswv tej lus txib, thiab los txhim tsa kev thaj yeeb thoob plaws rau hauv thaj av, xwv kom tsis txhob muaj kev ua rog los sis kev sib cav sib ceg, tsis muaj kev ua tub sab tub nyiag, thiab tsis muaj kev tua txeeb tej khoom, thiab tsis muaj kev tua neeg, thiab tsis muaj ib yam dab tsi ntawm kev ua phem;

15 Thiab tus uas tau ua kev phem, tus ntawd kuv twb rau txim rau nws raws li txoj kev txhaum uas nws tau ua, raws li txoj kev cai uas peb cov yawg koob tau muab rau peb.

16 Nim no kuv hais rau nej tias, vim neeg tag nrho yeej tsis ncaj ces tsis tsim nyog kom nej muaj ib tug vaj ntxwv los sis coob tus vaj ntxwv los kav nej.

17 Vim saib seb, ib tug vaj ntxwv phem ua tau rau cov neeg ua phem ntau heev, muaj tseeb tiag, thiab kev puas tsuaj loj kawg nkaus!

18 Muaj tseeb tiag, nco ntsoov txog vaj ntxwv Nau-as, nws txoj kev phem thiab nws txoj kev qias, thiab nws cov neeg tej kev phem thiab tej kev qias. Saib seb txoj kev puas tsuaj loj kawg nkaus tau los rau lawv; thiab twb vim yog lawv tej kev ua phem cov Neeg Lamas thiaj coj tau lawv mus rau kev ua qhev.

19 Thiab yog tias tsis yog los ntawm tus uas Tsim lawv, tus uas paub tag nrho ib puas tsav yam, txoj kev los pab, ces ntshe lawv yeej yuav nyob ua qhev los txog nim no, thiab ua li no los twb vim yog lawv txoj kev hloov siab lees txim tiag tiag.

20 Tiam sis saib seb, nws tau coj lawv dim vim lawv txo hwj chim rau nws; thiab vim lawv thov nws kawg siab kawg ntsws, nws thiaj tau coj lawv dim ntawm kev ua qhev; thiab xws li no tus Tswv ua hauj lwm nrog nws lub hwj chim nyob rau tag nrho txhua txhia yam hauv noob neej, ncav nws txhais npab ntawm kev hlub tshua rau cov uas tso siab rau nws.

21 Thiab saib seb, nim no kuv hais rau nej, nej yuav tshem tsis tau ib tug vaj ntxwv uas ua phem tawm ntawm nws lub rooj theej kiab tsuas yog los ntawm kev sib ntaus sib tua hnyav, thiab kev nqaij ntuag ntshav nrog ntau.

22 Vim saib seb, nws muaj nws tej phooj ywg uas ua phem, thiab nws ceev nws tej tub zov nyas nyob ib puag ncig nws; thiab nws muab tej kev cai ntawm cov uas kav ncaj ncees ua ntej nws dua pov tseg; thiab nws muab Vajtswv tej lus txib tsuj rau hauv qab xib taws;

23 Thiab nws tsim dua kev cai tshiab, thiab xa tej kev cai ntawd mus rau nws cov neeg, muaj tseeb tiag, tej kev cai uas ua raws li nws tus kheej tej kev phem; thiab cov uas tsis ua raws li nws tej kev cai nws ua kom raug puas tsuaj; thiab cov uas ntxeev siab tawm tsam nws, nws yuav xa nws cov tub rog mus ua rog tawm tsam lawv, thiab yog nws ua tau nws yuav ua kom lawv puas tsuaj; thiab zoo li no ib tug vaj ntxwv uas tsis ncaj ncees yuav hloov tag nrho tej kev ncaj ncees.

24 Thiab nim no saib seb kuv hais rau nej, tsis tsim nyog kom tej kev qias zoo li ntawd los rau nej.

25 Yog li ntawd, nej cia li xaiv cov neeg txiav txim los ntawm cov neeg no lub suab, xwv kom nej yuav raug txiav txim raws li tej kev cai uas peb cov yawg koob tau muab rau nej, uas yog tej kev cai raug, thiab yog tej uas tus Tswv txhais tes tau muab rau lawv.

26 Nim no tsis muaj ntau zaus uas cov neeg feem coob lub suab xav tau dab tsi uas tsis yog; tiam sis muaj ntau zaus uas cov neeg feem tsawg xav tau qhov tsis yog; yog li ntawd nej yuav tau ua raws li qhov no thiab muab qhov no ua nej txoj kev cai—siv cov neeg lub suab los ua nej tej hauj lwm.

27 Thiab yog thaum lub sij hawm los txog uas cov neeg lub suab ho xaiv kev ua phem, ces thaum ntawd yog lub caij uas Vajtswv tej kev txiav txim yuav los rau nej; muaj tseeb tiag, thaum ntawd yog lub caij uas nws yuav los xyuas nej nrog kev puas tsuaj loj ib yam li nws twb tau los xyuas thaj av no lawm.

28 Thiab nim no yog nej muaj cov neeg txiav txim, thiab lawv tsis txiav txim rau nej raws li txoj kev cai uas tau muab, nej muaj peev xwm hais kom ib tug neeg txiav txim uas siab zog txiav txim rau lawv.

29 Yog nej cov neeg txiav txim uas siab zog txiav txim tsis ncaj ncees, nej hais kom ob peb tug ntawm nej cov neeg txiav txim uas qes zog tuaj sib sau ua ke, thiab lawv yuav txiav txim rau nej cov neeg txiav txim uas siab zog, raws li cov neeg lub suab.

30 Thiab kuv txib kom nej ua tej yam no nrog txoj kev hwm tus Tswv; thiab kuv txib kom nej ua tej yam no, thiab kom nej tsis txhob muaj vaj ntxwv; xwv kom yog cov neeg no ua kev txhaum thiab kev phem, tus Tswv yuav tso tej kev txhaum thiab kev phem ntawd rau saum lawv tus kheej lub taub hau.

31 Vim saib seb kuv hais rau nej tias, neeg coob leej tej kev txhaum yog ua los ntawm lawv cov vaj ntxwv tej kev ua phem; yog li ntawd tus Tswv yuav tso lawv tej kev ua phem rau saum lawv cov vaj ntxwv lub taub hau.

32 Thiab nim no kuv tsis xav kom muaj txoj kev tsis sib txig no ntxiv nyob hauv thaj av no, qhov tseem ceeb ces yog nyob hauv kuv cov neeg no; tiam sis kuv xav kom thaj av no yog ib thaj av ywj pheej, thiab kom txhua tus neeg muaj cai thiab muaj sam xeeb sib xws, kom ntev npaum li uas tus Tswv pom zoo cia rau peb nyob thiab tau thaj av los ua peb ntiag tug, muaj tseeb tiag, twb ntev npaum li uas tseem muaj peb cov xeeb leej xeeb ntxwv nyob rau hauv thaj av.

33 Thiab vaj ntxwv Mauxiyas sau ntau yam ntxiv rau lawv, nthuav hlo rau lawv tag nrho ib tug vaj ntxwv uas ncaj ncees tej kev nyuaj siab thiab tej teeb meem, muaj tseeb tiag, tag nrho tej kev txhawj ntawm sab ntsuj plig rau lawv cov neeg, thiab tag nrho cov neeg tej kev yws rau lawv tus vaj ntxwv; thiab nws piav txhua yam rau lawv.

34 Thiab nws hais rau lawv tias tej yam no yuav tsum tsis txhob muaj; tiam sis lub nra yuav tsum muab faib rau tag nrho cov neeg, xwv kom txhua tus neeg yuav ris nws feem.

35 Thiab nws kuj muab tag nrho tej uas tsis zoo nthuav rau lawv, tej uas lawv yuav tau ua, yog tias lawv muaj ib tug vaj ntxwv uas tsis ncaj ncees kav lawv;

36 Muaj tseeb tiag, tag nrho tus vaj ntxwv uas tsis ncaj ncees tej kev ua phem thiab tej kev qias, thiab tag nrho tej kev ua rog, thiab tej kev sib cav sib ceg, thiab tej kev nqaij ntuag ntshav nrog, thiab txoj kev ua tub sab tub nyiag, thiab txoj kev tua txeeb tej khoom, thiab txoj kev sib daj sib deev, thiab txhua yam kev phem uas suav tsis txheeb—qhia rau lawv tias tej yam no yuav tsum tsis txhob muaj, qhia tias tej yam no twb tsis raws li Vajtswv tej lus txib.

37 Thiab nim no tau muaj tias, tom qab vaj ntxwv Mauxiyas xa tej yam no mus rau cov neeg lawv tau tig los ntseeg qhov tseeb ntawm nws cov lus.

38 Yog li ntawd lawv tso qhov uas lawv xav muaj ib tug vaj ntxwv tseg, thiab cia siab heev tias txhua tus neeg yuav muaj cai sib xws nyob thoob plaws hauv thaj av; muaj tseeb tiag, thiab txhua tus neeg txaus siab ris nws tus kheej tej kev txhaum.

39 Yog li ntawd, tau muaj tias lawv txoos lawv tus kheej ua ke tuaj ua tej pab thoob plaws hauv thaj av, tuaj tawm lawv lub suab saib leej twg yuav los ua lawv cov neeg txiav txim, los txiav txim rau lawv raws li txoj kev cai uas tau muab rau lawv; thiab lawv zoo siab heev vim yog txoj kev nyob ywj pheej uas tau muab pub rau lawv.

40 Thiab lawv txoj kev hlub Mauxiyas muaj zog tuaj; muaj tseeb tiag, lawv saib nws tsim txiaj tshaj txhua tus neeg; vim lawv tsis ntsia nws zoo li ib tug nom uas nrhiav kev nplua nuj, muaj tseeb tiag, txoj kev nplua nuj uas ua rau tus ntsuj plig lwj; vim nws tsis tau yuam kom lawv them nyiaj rau nws, thiab nws tsis nyiam kev nqaij ntuag ntshav nrog; tiam sis nws txhim tsa kev thaj yeeb nyob rau hauv thaj av, thiab nws cia rau nws cov neeg dim ntawm txhua yam kev ua qhev; yog li ntawd lawv saib nws tsim txiaj heev, muaj tseeb tiag, tshaj qhov yuav ntsuas tau.

41 Thiab tau muaj tias lawv xaiv tsa cov neeg txiav txim los kav lawv, los sis los txiav txim rau lawv raws li txoj kev cai; thiab lawv ua li no nyob thoob plaws hauv thaj av.

42 Thiab tau muaj tias lawv tsa Amas los ua thawj tus thawj txiav txim, thiab nws yog tus pov thawj hlob, vim nws txiv tau muab lub luag hauj lwm no rau nws, thiab muab nws ua tus saib xyuas txhua yam dej num ntawm lub koom txoos.

43 Thiab nim no tau muaj tias Amas tau taug mus raws tus Tswv tej kev, thiab nws ua raws li tus Tswv tej lus txib, thiab nws txiav txim ncaj ncees; thiab muaj kev thaj yeeb tsis tu ncua nyob thoob plaws hauv thaj av.

44 Thiab xws li no cov neeg txiav txim txoj kev kav pib nyob thoob plaws hauv thaj av Xalahelas, nyob hauv tag nrho cov neeg uas hu ua cov Neeg Nifais; thiab Amas yog thawj tus thiab tus thawj txiav txim.

45 Thiab nim no tau muaj tias nws txiv tuag, thaum nws muaj yim caum ob xyoos, thiab nws ua neej nyob kom ua tau raws li Vajtswv tej lus txib.

46 Thiab tau muaj tias Mauxiyas kuj tau tuag, tom qab nws kav tau peb caug peb xyoos, thaum nws muaj rau caum peb xyoos; uas suav tag nrho, tsib puas thiab cuaj xyoos txij thaum Lihais ncaim Yeluxalees.

47 Thiab cov Neeg Nifais cov vaj ntxwv txoj kev kav los xaus li no; thiab Amas lub neej los xaus li no, nws yog tus uas tsa lawv lub koom txoos.