1 Thiab nim no thaum vaj ntxwv Nau-as hnov tej lus no, nws hais rau nws cov pov thawj tias: Coj tus neeg no mus, thiab muab nws tua; nws muaj tus xwm txheej dab tsi rau peb, vim nws yog ib tus neeg vwm.

2 Thiab lawv txav zog mus thiab npaj txhom nws; tiam sis nws tiv tau lawv, thiab hais rau lawv tias:

3 Tsis txhob tuav kuv, vim Vajtswv yuav nplawm nej yog nej xuas tes ntsiab nthos kuv, vim kuv tsis tau qhia zaj xov uas tus Tswv xa kuv tuaj qhia; thiab kuv twb tsis tau qhia nej txog tej uas nej nug kom kuv qhia; yog li ntawd, Vajtswv yuav tsis cia kom kuv raug puas tsuaj nyob rau lub sij hawm no.

4 Tiam sis kuv yuav tsum ua kom tiav tej lus txib uas Vajtswv tau txib kuv; thiab vim yog kuv tau qhia qhov tseeb rau nej, nej thiaj npau taws rau kuv. Thiab ntxiv, vim yog kuv tau hais Vajtswv txoj lus nej thiaj tau txiav txim rau kuv tias kuv yog neeg vwm.

5 Nim no tau muaj tias tom qab Anpinadais hais tej lus no, vaj ntxwv Nau-as cov neeg thiaj tsis muaj cuab kav xuas lawv tes ntsiab nthos nws, vim tus Tswv tus Ntsuj Plig nyob nrog nws; thiab nws lub ntsej muag ci ntsa iab kawg nkaus li, ib yam li Mauxes thaum nyob saum lub roob Xinais, thaum tab tom sib tham nrog tus Tswv.

6 Thiab nws hais lus nrog lub hwj chim thiab txoj cai uas los ntawm Vajtswv; thiab nws hais nws tej lus ntxiv, hais tias:

7 Nej pom tias nej tsis muaj hwj chim tua kuv, yog li ntawd kuv yuav hais kom tas kuv zaj xov. Muaj tseeb tiag, thiab kuv paub tias kuv zaj xov hlais raug nej nruab siab vim kuv qhia qhov tseeb rau nej txog nej tej kev ua phem.

8 Muaj tseeb tiag, thiab kuv tej lus ua rau nej xav tsis tag thiab xav tsis thoob, thiab ua rau nej npau taws.

9 Tiam sis kuv qhia kom tas kuv zaj xov; thiab tom qab ntawd kuv yuav mus qhov twg los tsis tseem ceeb, tsuas yog hais tias kuv txais kev cawm dim.

10 Tiam sis kuv qhia npaum li no rau nej, qhov uas nej ua rau kuv, tom qab no, yog ib lub cim thiab ib tug yam ntxwv rau tej uas yuav muaj los.

11 Thiab nim no kuv nyeem rau nej Vajtswv tej lus txib uas tseem tshuav, vim kuv paub tias tsis tau muab tej lus txib ntawd sau rau hauv nej lub siab; kuv paub tias feem ntau ntawm nej lub neej, nej tsuas yog kawm thiab qhia kev ua phem.

12 Thiab nim no, nej nco qab tias kuv twb hais rau nej hais tias: Nej yuav tsum tsis txhob puab mlom rau nej, los sis ib yam dab tsi uas zoo li tej uas nyob saum ntuj, los sis tej uas nyob hauv lub ntiaj teb, los sis tej uas nyob hauv dej uas nyob hauv lub ntiaj teb sab haud.

13 Thiab ntxiv: Nej yuav tsum tsis txhob pe tej mlom ntawd, thiab tsis txhob teev tiam lawv; vim kuv, tus Tswv uas yog nej tus Vajtswv yog ib tug Vajtswv uas kub siab lug, uas los xyuas cov yawg koob tej kev ua phem rau saum cov me nyuam, mus rau tiam neeg peb thiab tiam neeg plaub ntawm cov uas ntxub kuv;

14 Thiab muab kev hlub tshua rau txhiab txhiab tug uas hlub kuv thiab ua raws li kuv tej lus txib.

15 Nej yuav tsum tsis txhob muab tus Tswv nej tus Vajtswv lub npe hais ua dog ua dig; vim tus uas muab nws lub npe hais ua dog ua dig, tus Tswv yuav tsis suav tias tus ntawd tsis muaj txim.

16 Nco ntsoov hnub caiv, hwm hnub caiv kom dawb huv.

17 Nej muaj rau hnub los khwv, thiab los ua tag nrho nej tej hauj lwm;

18 Tiam sis hnub xya, hnub caiv ntawm tus Tswv nej tus Vajtswv, nej yuav tsum tsis txhob ua ib yam hauj lwm dab tsi, nej, los sis nej cov tub, los sis nej cov ntxhais, nej cov tub qhe, los sis nej cov ntxhais qhev, los sis nej tej tsiaj txhu, los sis tej qhua uas nyob sab hauv nej vaj tsev;

19 Vim tus Tswv siv rau hnub los tsim lub ntuj thiab lub ntiaj teb, thiab dej hiav txwv, thiab tag nrho tej uas nyob hauv; yog li ntawd tus Tswv foom koob hmoov rau hnub caiv, thiab ua rau hnub ntawd dawb huv.

20 Hwm nej niam thiab nej txiv, xwv kom nej yuav muaj sia nyob ntev hauv thaj av uas tus Tswv nej tus Vajtswv muab rau nej.

21 Nej yuav tsum tsis txhob tua neeg.

22 Nej yuav tsum tsis txhob deev luag poj luag txiv. Nej yuav tsum tsis txhob ua tub sab tub nyiag.

23 Nej yuav tsum tsis txhob ua tim khawv cuav tawm tsam nej cov neeg zej zog.

24 Nej yuav tsum tsis txhob ntshaw nej tus neeg zej zog lub vaj lub tsev, nej yuav tsum tsis txhob ntshaw nej tus neeg zej zog tus poj niam, los sis nws tus tub qhe, los sis nws tus ntxhais qhev, los sis nws tus nyuj, los sis nws tus zag, los sis ib yam dab tsi uas yog nej tus neeg zej zog li.

25 Thiab tau muaj tias tom qab Anpinadais hais cov lus no tag, nws hais rau lawv tias: Nej puas tau qhia rau cov neeg no hais tias lawv yuav tsum ua raws li tag nrho tej yam no thiaj li yuav ua raws li tej lus txib no?

26 Kuv hais rau nej tias, Tsis tau qhia; yog hais tias nej twb qhia lawm, ces tus Tswv yuav tsis txib kom kuv tuaj qhia tej kev phem uas yuav muaj los yav tom ntej rau cov neeg no.

27 Thiab nim no nej hais tias kev cawm seej yog los ntawm Mauxes txoj kev cai. Kuv hais rau nej tias tam sim no tseem tsim nyog rau nej coj Mauxes txoj kev cai; tiam sis kuv hais rau nej tias, lub sij hawm twb yuav los uas tsis tas coj Mauxes txoj kev cai ntxiv lawm.

28 Thiab tsis tas li ntawd, kuv hais rau nej tias, txoj kev cawm seej tsis yog los ntawm Mauxes txoj kev cai xwb; thiab txawm hais tias muaj Mauxes txoj kev cai, yog hais tias tsis muaj txoj kev theej txhoj, uas Vajtswv tus kheej yuav ua theej nws cov neeg tej kev txhaum thiab kev ua phem, ces lawv yeej yuav zam tsis dhau kev piam sij.

29 Thiab nim no kuv hais rau nej tias yeej tsim nyog muaj ib txoj kev cai muab rau cov neeg Ixayees, muaj tseeb tiag, twb yog ib txoj kev cai uas nruj heev; vim lawv yog ib co neeg tawv ncauj, nrawm ua kev phem, thiab qeeb nco txog tus Tswv lawv tus Vajtswv;

30 Yog li ntawd thiaj muaj ib txoj kev cai muab rau lawv, muaj tseeb tiag, yog ib txoj kev cai ntawm tej kev ua thiab ntawm tej kab ke, yog ib txoj kev cai uas lawv yuav tsum coj nraim ib hnub dhau ib hnub, pab kom lawv nco txog Vajtswv thiab lawv tej dej num uas ua rau nws.

31 Tiam sis saib seb, kuv hais rau nej tias, tag nrho tej yam no yog tej lub cim ntawm tej uas yuav muaj los.

32 Thiab nim no, lawv puas to taub txoj kev cai? Kuv hais rau nej tias, Tsis to taub, tsis yog lawv tag nrho to taub txoj kev cai; thiab qhov no yog vim lawv ua lawv lub siab tawv qhawv; vim lawv tsis to taub hais tias tsis muaj ib tug neeg twg yuav txais kev cawm dim tsuas yog los ntawm Vajtswv txoj kev txhiv dim xwb.

33 Vim saib seb, Mauxes tsis tau qhia tej yuav muaj los yav tom ntej rau lawv ntsig txog tus Mexiyas yuav los, thiab qhia tias Vajtswv yuav txhiv nws cov neeg dim los? Muaj tseeb tiag, thiab tag nrho cov yaj saub uas tau qhia tej yuav muaj los yav tom ntej txij thaum ntuj tsim teb raug—lawv tsis tau hais txog tej yam no los?

34 Lawv tsis tau hais tias Vajtswv tus kheej yuav nqis los nrog noob neej nyob, thiab los yug ua tib neeg, thiab tawm mus nrog lub hwj chim loj nyob rau hauv lub ntiaj teb no los?

35 Muaj tseeb tiag, thiab lawv tsis tau hais tias nws yuav ua kom cov neeg tuag sawv rov los, thiab hais tias nws, tus kheej, yuav raug kev tsim txom thiab kev txom nyem no los?