1 Thiab nim no tau muaj tias thaum Anpinadais tau hais tej lus no tas, vaj ntxwv Nau-as txib kom cov pov thawj txhom nws thiab txib kom muab nws tua.

2 Tiam sis tau muaj ib tug nyob hauv lawv uas muaj npe hu ua Amas, nws kuj yog Nifais ib tug xeeb ntxwv. Thiab nws yog ib tug neeg hluas, thiab nws ntseeg tej lus uas Anpinadais tau hais, vim nws paub txog txoj kev ua phem uas Anpinadais tau ua tim khawv nkaug lawv; yog li ntawd nws pib thov vaj ntxwv Nau-as kom nws tsis txhob npau taws rau Anpinadais, tiam sis kom cia nws tawm mus nrog kev kaj siab.

3 Tiam sis vaj ntxwv Nau-as haj yam npau taws heev, thiab txib kom muab Amas ntiab tawm ntawm lawv mus, thiab xa nws cov tub qhe mus raws Amas xwv kom lawv tua tau nws.

4 Tiam sis nws khiav dim ntawm lawv thiab mus nkaum xwv kom lawv nrhiav tsis tau nws. Thiab thaum nws mus nkaum tau ntau hnub, nws muab tag nrho tej lus uas Anpinadais tau hais sau cia.

5 Thiab tau muaj tias vaj ntxwv Nau-as txib kom nws cov tub zov nyas los vij Anpinadais thiab txhom nws; thiab lawv muab nws khi thiab muab nws pov rau hauv lub tsev kaw.

6 Thiab tom qab peb hnub, uas tau sab laj nrog nws cov pov thawj, nws txib kom coj Anpinadais rov qab los ntawm nws.

7 Thiab nws hais rau nws tias: Anpinadais, peb nrhiav tau ib txoj kev liam txim tawm tsam koj, thiab koj tsim nyog tuag.

8 Vim koj hais tias Vajtswv tus kheej yuav nqis los nrog noob neej nyob; thiab nim no, vim qhov no koj yuav raug muab tua yog hais tias koj tsis thim tag nrho tej lus phem uas koj tau hais txog kuv thiab kuv cov neeg.

9 Nim no Anpinadais hais rau nws tias: Kuv hais rau koj, kuv yuav tsis thim tej lus uas kuv tau hais rau koj ntsig txog cov neeg no, vim tej lus ntawd yeej muaj tseeb; thiab xwv kom koj yuav paub qhov tseeb ntawm tej lus ntawd kuv thiaj li cia kuv tus kheej poob rau hauv koj tes.

10 Muaj tseeb tiag, thiab kuv yuav raug mob kom mus txog thaum tuag, thiab kuv yuav tsis thim kuv tej lus, thiab tej lus ntawd yuav nyob ruaj nrees ua tim khawv nkaug nej. Thiab yog hais tias nej tua kuv, ces nej ua rau tus tsis txhaum nqaij ntuag ntshav nrog, thiab qhov no kuj yuav nyob ruaj nrees ua tim khawv nkaug nej thaum txog hnub kawg.

11 Thiab nim no vaj ntxwv Nau-as twb yuav luag tso nws, vim nws ntshai Anpinadais tej lus; vim nws ntshai tias tsam Vajtswv tej kev txiav txim yuav los raug nws.

12 Tiam sis cov pov thawj tsa lawv lub suab tawm tsam nws, thiab pib liam nws, hais tias: Nws saib tsis taus tus vaj ntxwv. Yog li ntawd lawv txhaub tus vaj ntxwv kom npau taws rau nws, thiab tus vaj ntxwv muab nws rau luag xwv kom nws yuav raug muab tua.

13 Thiab tau muaj tias lawv ntes nws thiab muab nws khi, thiab muab tw taws los nplawm nws daim tawv nqaij, muaj tseeb tiag, twb mus txog thaum yuav tuag.

14 Thiab nim no thaum tej nplaim taws pib kub nws, nws qw rau lawv hais tias:

15 Saib seb, ib yam li nej tau ua rau kuv, ib yam li ntawd yuav muaj tias nej cov tub ki yuav ua rau coob leej raug tsim txom ib yam li kuv raug, twb yuav raug hluav taws hlawv kom tuag; thiab li no los twb vim yog lawv ntseeg tus Tswv lawv tus Vajtswv txoj kev cawm seej.

16 Thiab yuav muaj tias nej yuav raug txhua yam kab mob kev nkeeg vim yog nej tej kev ua phem.

17 Muaj tseeb tiag, thiab nej yuav raug nplawm txhua txhia sab, thiab yuav raug raws khiav thiab tawg khiav ri niab mus rau ub rau no, zoo ib yam li ib pab tsiaj qus uas raug tej tsiaj qus thiab heev raws khiav.

18 Thiab nyob rau hnub ntawd nej yuav raug raws tua, thiab nej yuav raug nej cov yeeb ncuab ntes, thiab thaum ntawd nej yuav raug tsim txom, ib yam li kuv raug, raug hluav taws hlawv kom tuag.

19 Vajtswv ua li no pauj rau cov uas ua rau nws cov neeg puas tsuaj. Auj Vajtswv es, txais kuv tus ntsuj plig.

20 Thiab nim no, thaum Anpinadais tau hais cov lus no tas, nws vau hlo, nws tau tuag vim raug hluav taws hlawv; muaj tseeb tiag, nws tuag vim yog nws tsis kam xyeej Vajtswv tej lus txib, nws tau muab nws txoj sia ua lub cim nias rau qhov tseeb ntawm nws tej lus.