1 Thiab nim no tau muaj tias Xeenas muab lub nceeg vaj tso rau Nau-as, ib tug ntawm nws cov tub; yog li ntawd Nau-as pib pauv nws qhov chaw los kav; thiab Nau-as tsis taug mus raws nws txiv tej kev.

2 Vim saib seb, nws tsis ua raws li Vajtswv tej lus txib, tiam sis nws taug raws li nws tus kheej lub siab xav. Thiab nws muaj ntau tus poj niam thiab niam yau. Thiab nws tau ua rau nws cov neeg ua txhaum, thiab ua tej uas tus Tswv pom tias yog tej yam txaus ntxub. Muaj tseeb tiag, thiab lawv tau sib daj sib deev thiab ua txhua yam kev phem.

3 Thiab nws tsub se ib feem tsib ntawm txhua yam uas lawv muaj, ib feem tsib ntawm lawv tej kub thiab ntawm lawv tej nyiaj, thiab ib feem tsib ntawm lawv tej hlau xiv, thiab ntawm lawv tej tooj liab, thiab ntawm lawv tej tooj dag thiab lawv tej hlau; thiab ib feem tsib ntawm lawv tej thav tsiaj; thiab kuj ib feem tsib ntawm tag nrho lawv tej qoob loos.

4 Thiab nws tau ua tag nrho tej no los txhawb pab nws tus kheej, thiab nws cov poj niam thiab nws cov niam yau; thiab nws cov pov thawj, thiab lawv cov poj niam thiab lawv cov niam yau; nws tau hloov lub nceeg vaj tej kev noj nyob xws li no.

5 Vim nws rho tawm tag nrho cov pov thawj uas nws txiv tau tsa, thiab tau tsa cov tshiab los pauv lawv tej chaw, cov uas khav theeb vim lawv lub siab muab hlob.

6 Muaj tseeb tiag, thiab xws li no lawv tau noj tau haus txhawb nqa lawv txoj kev tub nkeeg, thiab lawv txoj kev pe dab pe mlom, thiab lawv tej kev sib daj sib deev, los ntawm tej se uas vaj ntxwv Nau-as tau tsub rau nws cov neeg; xwv li no cov neeg tau khwv kawg nkaus los txhawb pab kev ua phem.

7 Muaj tseeb tiag, thiab cov neeg kuj pib pe dab pe mlom, vim vaj ntxwv Nau-as thiab tej pov thawj tau siv tej lus dag thiab tej lus uas tsis muaj qab hau los ntxias lawv; vim lawv tau hais tej lus uas ntxias dag rau cov neeg li no.

8 Thiab tau muaj tias vaj ntxwv Nau-as ua ntau lub tsev uas zoo nkauj thiab dav; thiab nws muab tej ntoo uas zoo, thiab txhua yam muaj nuj nqis, uas yog kub, thiab nyiaj, thiab hlau, thiab tooj dag, thiab hlau xiv, thiab tooj liab, los tsab zam tej tsev ntawd;

9 Thiab nws kuj tau ua ib lub tsev huab tais uas dav heev rau nws tus kheej, thiab ib lub rooj theej kiab nyob rau hauv lub tsev ntawd, tag nrho puav leej yog ntoo zoo thiab yog muab kub thiab nyiaj thiab tej yam uas muaj nuj nqis los tsab zam.

10 Thiab nws kuj tau txib nws cov tub zog siv tej ntoo zoo, thiab tooj liab, thiab tooj dag los ua txhua yam nyob hauv tej ntsa loog sab hauv ntawm lub tuam tsev.

11 Thiab nws muab tseem kub los tsab zam tej rooj zaum uas tau tseg cia rau cov pov thawj hlob, uas nyob siab tshaj lwm cov rooj zaum; thiab nws txib kom ua ib daim txiag txij hauv siab rau ntawm lawv xub ntiag, xwv kom lawv yuav tau tso cev thiab tso caj npab rau saud thaum lawv hais tej lus dag thiab tej lus tsis muaj qab hau rau nws cov neeg.

12 Thiab tau muaj tias nws ua ib tug pej thuam nyob ze ntawm lub tuam tsev; muaj tseeb tiag, ib tug pej thuam siab heev, twb siab kawg nkaus uas thaum nws sawv rau saum tus pej thuam ntawd nws muaj peev xwm saib pom tag nrho thaj av Sailos, thiab kuj pom thaj av Seloos, uas yog cov Neeg Lamas nyob; thiab nws muaj peev xwm ntsia pom tag nrho tej thaj av nyob ib puag ncig.

13 Thiab tau muaj tias nws txib kom ua ntau lub tsev nyob rau hauv thaj av Sailos; thiab nws txib kom ua ib tug pej thuam loj rau ntawm lub pov roob uas nyob sab qaum teb ntawm thaj av Sailos, uas yog ib qho chaw nyob rau Nifais cov xeeb leej xeeb ntxwv thaum lawv khiav tawm ntawm thaj av; thiab nws siv tej nyiaj txiag, uas nws tau los ntawm tej se uas nws sau ntawm nws cov neeg zoo li no.

14 Thiab tau muaj tias nws muab nws lub siab tso rau nws tej kev nplua nuj, thiab nws siv nws lub sij hawm ua neej luam thuam nrog nws cov poj niam thiab nws cov niam yau; thiab nws cov pov thawj los kuj siv lawv lub sij hawm nrog cov niam ntiav.

15 Thiab tau muaj tias nws cog vaj txiv hmab nyob thoob plaws hauv thaj av; thiab nws ua ib lub qhov tsuam cawv txiv hmab, thiab ua cawv txiv hmab nplua mias; thiab yog li ntawd nws los ua ib tug neeg quav cawv, thiab nws cov neeg los tib yam.

16 Thiab tau muaj tias cov Neeg Lamas pib tuaj tawm tsam nws cov neeg, tawm tsam cov uas tsawg, thiab tua lawv tom lawv tej teb, thiab thaum lawv tseem tab tom zov lawv tej tsiaj.

17 Thiab vaj ntxwv Nau-as xa cov tub zov rooj vag mus thoob plaws thaj av kom cov Neeg Lamas tsis txhob tuaj; tiam sis nws xa neeg tsis txaus, thiab cov Neeg Lamas tuaj tawm tsam lawv thiab tua lawv, thiab raws lawv tej tsiaj ntau pab tawm hauv thaj av mus; yog li ntawd cov Neeg Lamas pib ua rau lawv puas tsuaj, thiab ua raws li lawv txoj kev ntxub vaj ntxwv Nau-as cov neeg.

18 Thiab tau muaj tias vaj ntxwv Nau-as xa nws tej pawg tub rog mus tawm tsam lawv, thiab ua rau lawv thim rov qab, los sis vaj ntxwv Nau-as tej pawg tub rog ua rau lawv thim rov qab ib ntus; yog li ntawd, vaj ntxwv Nau-as tej pawg tub rog rov qab los yam zoo siab hlo vim lawv kov yeej cov Neeg Lamas.

19 Thiab nim no, vim lawv kev yeej loj zaum no lawv khav theeb vim lawv lub siab muab hlob; lawv tau khav txog lawv tus kheej lub zog, hais tias lawv tsib caug leej twb kov yeej cov Neeg Lamas txhiab leej; thiab lawv tau khav li no, thiab nyiam txo ntshav, thiab nyiam ua rau lawv cov kwv tij nqaij ntuag ntshav nrog, thiab qhov no twb vim yog txoj kev phem ntawm lawv tus vaj ntxwv thiab cov pov thawj.

20 Thiab tau muaj tias muaj ib tug txiv neej nrog lawv nyob uas muaj npe hu ua Anpinadais; thiab nws mus rau hauv lawv, thiab pib qhia tej yuav muaj los yav tom ntej, hais tias: Saib seb, tus Tswv hais li no, thiab nws tau txib kuv li no, hais tias, Cia li mus thiab hais rau cov neeg no, tus Tswv hais li no—Kev txom nyem yuav raug cov neeg no, vim kuv tau pom lawv tej kev qias, thiab lawv tej kev phem, thiab lawv tej kev sib daj sib deev; thiab tsuas yog hais tias lawv hloov siab lees txim, tsis li ces kuv yuav los xyuas lawv nrog kuv txoj kev npau taws.

21 Thiab tsuas yog hais tias lawv hloov siab lees txim thiab tig mus cuag tus Tswv lawv tus Vajtswv, tsis li ces, saib seb, kuv yuav tso lawv mus rau hauv lawv cov yeeb ncuab tes; muaj tseeb tiag, thiab yuav coj lawv mus ua qhev; thiab lawv yuav raug kev tsim txom los ntawm lawv cov yeeb ncuab tes.

22 Thiab yuav muaj tias lawv yuav paub tias kuv yog tus Tswv lawv tus Vajtswv, thiab yog ib tug Vajtswv uas kub siab lug, los xyuas kuv cov neeg tej kev ua phem.

23 Thiab yuav tau muaj tias tsuas yog cov neeg no hloov siab lees txim thiab tig rov qab mus cuag tus Tswv lawv tus Vajtswv, tsis li ces lawv yuav raug coj mus ua qhev; thiab yuav tsis muaj leej twg tso tau lawv dim, tsuas yog tus Tswv uas yog tus Vajtswv uas Muaj Hwj Chim Tag Nrho.

24 Muaj tseeb tiag, thiab yuav muaj tias thaum lawv thov kuv, kuv yuav qeeb hnov lawv tej lus thov; muaj tseeb tiag, thiab kuv yuav cia kom lawv cov yeeb ncuab nplawm lawv.

25 Thiab tsuas yog hais tias lawv hloov siab lees txim nrog txoj kev muab ntaub tsaj los npua thiab tsuab tshauv los nphoo, thiab sib sib zog thov tus Tswv lawv tus Vajtswv, tsis li ces kuv yuav tsis hnov lawv tej lus thov, thiab kuv yuav tsis coj lawv dim tawm ntawm lawv tej kev txom nyem; thiab tus Tswv hais li no, thiab nws tau txib kuv li no.

26 Nim no tau muaj tias thaum Anpinadais tau hais tej lus no rau lawv, lawv npau taws rau nws, thiab nrhiav kev txo nws txoj sia; tiam sis tus Tswv coj nws dim ntawm lawv tes.

27 Nim no thaum vaj ntxwv Nau-as hnov tej lus uas Anpinadais tau hais rau cov neeg, nws kuj npau taws thiab; thiab nws hais tias: Anpinadais yog leej twg, es nws ho yuav txiav txim rau kuv thiab kuv cov neeg, los sis tus Tswv yog leej twg, es ho yuav coj kev txom nyem loj li ntawd los rau kuv cov neeg?

28 Kuv txib nej mus coj Anpinadais los ntawm no, xwv kom kuv yuav muab nws tua, vim nws tau hais tej yam no los txhaub kuv cov neeg kom ib leeg npau taws rau ib leeg, thiab kom muaj kev sib cav sib ceg nyob hauv kuv cov neeg; yog li ntawd kuv yuav muab nws tua pov tseg.

29 Nim no cov neeg qhov muag dig; yog li ntawd lawv ua lawv lub siab tawv qhawv tawm tsam Anpinadais tej lus, thiab txij li lub sij hawm ntawd mus lawv nrhiav kev txhom nws. Thiab vaj ntxwv Nau-as ua nws lub siab tawv qhawv tawm tsam tus Tswv txoj lus, thiab nws tsis hloov siab lees txim rau nws tej kev ua phem.