1 Thiab nim no, tau muaj tias thaum vaj ntxwv Npeyamis hais li no rau nws cov neeg, nws xa xov mus rau lawv, xav paub saib nws cov neeg puas ntseeg tej lus uas nws tau hais rau lawv.

2 Thiab lawv sawv daws qw ua ib lub suab hais tias: Muaj tseeb tiag, peb ntseeg tag nrho tej lus uas koj tau hais rau peb; thiab peb kuj paub tias tej lus ntawd yeej tseeb thiab tiag, vim yog tus Tswv uas Muaj Hwj Chim Loj Tshaj Plaws tus Ntsuj Plig, uas ua rau peb hloov loj heev, los sis hloov peb lub siab, xwv kom peb tsis txhob muaj siab xav ua phem ntxiv, tiam sis xav ua zoo tsis tu ncua mus li.

3 Thiab peb, peb tus kheej, los ntawm Vajtswv txoj kev zoo uas nyob mus ib txhis, thiab tej uas nws tus Ntsuj Plig tau qhia, kuj tau pom tej yam tseem ceeb uas yuav muaj los; thiab yog tias tsim nyog, peb muaj peev xwm qhia tau txhua yam txog tej yuav muaj los yav tom ntej.

4 Thiab yog txoj kev ntseeg uas peb tau ntseeg tej yam uas peb tus vaj ntxwv tau hais rau peb es thiaj ua rau peb muaj txoj kev txawj ntse tseem ceeb no, peb thiaj xyiv fab nrog kev xyiv fab nplua mias.

5 Thiab peb txaus siab khi lus nrog peb tus Vajtswv los ua li nws lub siab nyiam, thiab ua raws li nws tej lus txib ua txhua yam uas nws yuav txib kom peb ua, tag nrho peb lub neej uas tseem tshuav, xwv kom peb tsis txhob coj tau txoj kev tsim txom uas tsis muaj hnub kawg los rau peb tus kheej, ib yam li tus tim tswv tau hais, xwv kom peb tsis txhob haus los ntawm lub khob ntawm Vajtswv txoj kev npau taws.

6 Thiab nim no, tej lus no yog tej lus uas vaj ntxwv Npeyamis xav hnov los ntawm lawv; thiab yog li ntawd nws hais rau lawv tias: Nej tau hais tej lus uas kuv xav hnov; thiab txoj kev khi lus uas nej tau khi yog ib txoj kev khi lus uas ncaj ncees.

7 Thiab nim no, vim yog kev khi lus uas nej tau khi ces yuav muab nej hu ua Khetos cov me nyuam, nws cov tub, thiab nws cov ntxhais; vim saib seb, hnub no nws los ua nej leej txiv ntawm sab ntsuj plig; vim nej hais tias nej lub siab tau hloov los ntawm kev ntseeg nws lub npe; yog li ntawd, nej thiaj yug los ntawm nws thiab tau peem tsheej los ua nws cov tub thiab nws cov ntxhais.

8 Thiab los ntawm lub npe no ua rau nej ywj pheej, thiab tsis muaj lwm lub npe uas yuav ua tau rau nej ywj pheej. Tsis muaj lwm lub npe uas yuav coj tau kev cawm seej los; yog li ntawd, kuv xav kom nej ris Khetos lub npe, tag nrho nej cov uas tau khi lus nrog Vajtswv tias nej yuav mloog lus mus kom txog thaum kawg nej txoj sia.

9 Thiab yuav muaj tias txhua tus uas ua li no yuav tau nyob rau ntawm Vajtswv sab tes xis, vim nws yuav paub lub npe uas siv los hu nws; vim yuav hu nws los ntawm Khetos lub npe.

10 Thiab nim no yuav muaj tias, tus uas tsis ris Khetos lub npe ces yeej yuav siv lwm lub npe los hu tus ntawd; yog li ntawd nws yuav pom tias nws nyob rau ntawm Vajtswv sab tes laug.

11 Thiab kuv kuj xav kom nej nco ntsoov tias, lub npe no yog lub npe uas kuv tau hais tias kuv yuav muab rau nej uas yuav tsis raug rho tawm ib zaug li, tsuas yog los ntawm kev ua txhaum xwb; yog li ntawd, ceev faj kom nej txhob ua txhaum, xwv kom lub npe tsis txhob raug rho tawm hauv nej lub siab mus.

12 Kuv hais rau nej, kuv xav kom nej nco ntsoov sau lub npe no cia rau hauv nej lub siab tas mus li, xwv kom nej txhob nyob rau ntawm Vajtswv sab tes laug, tiam sis kom nej yuav hnov thiab paub lub suab uas yuav hu nej, thiab, lub npe uas nws yuav siv los hu nej.

13 Vim ib tug tib neeg puas paub tus tswv uas nws tsis tau ua hauj lwm rau, thiab tus uas yog ib tug qhua rau nws, thiab nyob deb ntawm tej kev xav thiab tej lub hom phiaj ntawm nws lub siab?

14 Thiab ntxiv, ib tug tib neeg puas yuav coj nws tus neeg zej zog tus zag los, thiab tu nws? Kuv hais rau nej tias, Yeej tsis coj; ntshe nws twb tsis cia tus zag ntawd nrog nws pab tsiaj noj zaub, tiam sis lawv kom nws khiav mus, thiab ntiab kom nws tawm mus. Kuv hais rau nej tias, nej yeej zoo ib yam li ntawd yog tias nej tsis paub lub npe uas siv los hu nej.

15 Yog li ntawd, kuv xav kom nej nyob ruaj nrees thiab khov kho, ua ntau yam zoo tas mus li, xwv kom Khetos, tus Tswv uas yog Vajtswv tus uas Muaj Hwj Chim Loj Tshaj Plaws, yuav muab nej khi ua nws li, xwv kom tus Tswv yuav coj nej mus rau saum ntuj ceeb tsheej, xwv kom nej yuav muaj txoj kev cawm seej uas kav ib txhis thiab txoj sia nyob mus ib txhis, los ntawm laj lim tswv yim, thiab lub hwj chim, thiab txoj kev txim lij, thiab txoj kev hlub tshua ntawm tus uas tau tsim txhua yam, nyob saum ntuj thiab hauv ntiaj teb, tus uas yog Vajtswv siab tshaj txhua tus. Amees.