1 Nim no tau muaj tias tom qab Mauxiyas cov tub tau ua txhua yam no, lawv coj ib co neeg tsis coob nrog lawv thiab rov qab mus cuag lawv txiv, vaj ntxwv Mauxiyas, thiab thov kom nws cia lawv, nrog cov uas lawv tau xaiv, mus lawm pem thaj av Nifais xwv kom lawv tau mus tshaj tawm tej uas lawv tau hnov thiab xwv kom lawv faib tau Vajtswv txoj lus rau lawv cov kwv tij, cov Neeg Lamas—

2 Xwv kom tej zaum lawv yuav coj tau cov Neeg Lamas los paub tus Tswv lawv tus Vajtswv, thiab qhia kom lawv ntseeg txog lawv cov yawg koob txoj kev ua phem; thiab xwv kom tej zaum lawv yuav kho tau cov Neeg Lamas txoj kev ntxub cov Neeg Nifais, xwv kom yuav coj tau lawv los muaj kev xyiv fab rau tus Tswv lawv tus Vajtswv, xwv kom lawv ib leeg yuav los ua phooj ywg rau ib leeg, thiab xwv kom txhob muaj kev sib cav sib ceg ntxiv nyob hauv txhua thaj av uas tus Tswv lawv tus Vajtswv tau muab rau lawv.

3 Nim no lawv xav mus tshaj tawm txoj kev cawm seej rau txhua tus neeg, vim lawv tiv tsis taus qhov uas yuav cia ib tug neeg tus ntsuj plig piam sij; muaj tseeb tiag, thaum xav txog qhov uas ib tug neeg tus ntsuj plig yuav nyiaj kev tsim txom uas tsis muaj qhov kawg twb ua rau lawv qeeg thiab tshee hnyo.

4 Thiab tus Tswv tus Ntsuj Plig tau tshoov lawv lub siab li no, vim lawv yog cov neeg ua txhaum uas phem tshaj plaws. Thiab los ntawm nws txoj kev hlub tshua uas tsis muaj hnub kawg, tus Tswv pom tias tsim nyog yuav tseg lawv txoj sia; txawm li ntawd los, lawv raug kev ntxhov siab ntau ntawm sab ntsuj plig vim yog lawv tej kev ua phem, lawv raug kev txom nyem ntau thiab ntshai tsam Vajtswv muab lawv ntiab tawm mus ib txhis li.

5 Thiab tau muaj tias lawv thov lawv txiv tau ntau hnub xwv kom lawv yuav tau mus rau pem thaj av Nifais.

6 Thiab vaj ntxwv Mauxiyas tau mus thiab nug tus Tswv saib puas tsim nyog cia nws cov tub mus rau hauv cov Neeg Lamas mus tshaj tawm txoj lus.

7 Thiab tus Tswv hais rau Mauxiyas hais tias: Cia lawv mus, vim muaj coob leej yuav ntseeg lawv cov lus, thiab lawv yuav tau txoj sia nyob mus ib txhis; thiab kuv yuav coj koj cov tub kom lawv dim ntawm cov Neeg Lamas tes.

8 Thiab tau muaj tias Mauxiyas cia lawv mus thiab ua raws li lawv thov.

9 Thiab lawv tau mus rau hauv hav zoov mus tshaj tawm txoj lus rau hauv cov Neeg Lamas; thiab kuv yuav sau ib zaj txog tej uas lawv ua tom qab no mus.

10 Nim no vaj ntxwv Mauxiyas tsis muaj leej twg uas nws tso tau lub teb chaws rau kav, vim nws cov tub tsis muaj leej twg kam txais lub teb chaws.

11 Yog li ntawd nws nqa cov ceev xwm txheej uas tau muab sau rau saum cov phiaj toog, thiab Nifais cov phiaj, thiab tag nrho tej uas nws tau ceev thiab tshwj tseg cia raws li Vajtswv tej lus txib, tom qab nws tau muab cov ceev xwm txheej txhais thiab sau cia uas nyob saum cov phiaj kub uas yog cov neeg Leehais nrhiav tau, uas yog Leehais txhais tes muab rau nws;

12 Thiab nws ua li no los vim yog nws cov neeg xav paub heev; vim lawv xav xav paub heev txog cov neeg uas tau raug puas tsuaj lawm.

13 Thiab nim no nws siv ob lub pob zeb uas yog muab khi rau hauv ob daim npoo ntawm ib lub kauj los txhais cov phiaj kub.

14 Nim no twb npaj tej yam no txij thaum chiv keeb los lawm, thiab tau muab tej yam no cev ntawm ib tiam neeg mus rau ib tiam, rau lub hom phiaj txhais lus;

15 Thiab tus Tswv txhais tes tau ceev thiab tshwj tseg cia tej yam no, xwv kom nws yuav qhia tau rau txhua tus neeg uas nyob hauv thaj av txog nws cov neeg tej kev ua phem thiab kev qias;

16 Thiab tus uas tau tej yam no, tus ntawd yog hu ua tus pom tau, raws li txheej puag thaum ub.

17 Nim no tom qab Mauxiyas txhais cov ceev xwm txheej no tas, saib seb, nws qhia ib zaj txog cov neeg uas tau raug puas tsuaj lawm, txij thaum lawv raug puas tsuaj rov qab mus txog rau thaum puab tus pej thuam siab siab, thaum lub sij hawm tus Tswv ua rau cov neeg nyias tsis nkag siab nyias yam lus thiab lawv tawg khiav ri niab mus thoob plaws hauv lub ntiaj teb, muaj tseeb tiag, thiab twb yog txij thaum ntawd rov qab mus txog rau thaum tsim Adas.

18 Nim no zaj no ua rau Mauxiyas cov neeg nyuaj siab heev, muaj tseeb tiag, lawv muaj kev tu siab puv npo; txawm li ntawd los kuj ua rau lawv muaj kev txawj ntse ntau, uas ua rau lawv zoo siab.

19 Thiab yuav muab zaj no sau cia tom qab no; vim saib seb, twb tsim nyog rau txhua tus neeg paub txog tej uas tau muab sau cia rau hauv zaj no.

20 Thiab nim no, ib yam li kuv tau hais rau nej, tom qab vaj ntxwv Mauxiyas tau ua tej yam no, nws nqa cov phiaj toog, thiab tag nrho tej uas nws tau khaws tseg, thiab muab cob rau Amas, tus uas yog Amas tus tub; muaj tseeb tiag, tag nrho cov ceev xwm txheej, thiab cov cuab yeej txhais lus, thiab muab tej ntawd rau nws, thiab txib nws kom nws ceev thiab tsom kwm tej ntawd, thiab txib kom nws ceev ib phau ceev xwm txheej txog cov neeg, thiab muab cev ntawm ib tiam neeg mus rau ib tiam, ib yam li tau muab cev txij thaum Lihais ncaim Yeluxalees.