1 Thiab nim no vaj ntxwv Mauxiyas txib kom tag nrho cov neeg tuaj sib sau ua ke.

2 Nim no Nifais cov me nyuam tsis tshua muaj coob, los sis ntawm Nifais cov xeeb leej xeeb ntxwv tsis tshua muaj coob, npaum li Xalahelas cov neeg, uas yog Mules ib tug xeeb leej xeeb ntxwv, thiab cov uas nrog Xalahelas tuaj rau hauv hav zoov.

3 Thiab Nifais cov neeg thiab Xalahelas cov neeg tsis coob npaum li cov Neeg Lamas; muaj tseeb tiag, lawv twb tsis coob npaum li ib nrab.

4 Thiab nim no tag nrho Nifais cov neeg tau tuaj sib txoos ua ke, thiab tag nrho Xalahelas cov neeg, thiab lawv sib sau ua ke tuaj ua ob pab.

5 Thiab tau muaj tias Mauxiyas nyeem, thiab txib kom nyeem, Xeenas cov ceev xwm txheej rau nws cov neeg; muaj tseeb tiag, nws nyeem Xeenas cov neeg tej ceev xwm txheej, txij li lub sij hawm thaum lawv ncaim thaj av Xalahelas mus txog rau thaum lawv rov qab los.

6 Thiab nws kuj nyeem Amas thiab nws cov kwv tij zaj, thiab tag nrho lawv tej kev txom nyem, txij li lub sij hawm thaum lawv ncaim thaj av Xalahelas mus txog lub sij hawm lawv rov qab los.

7 Thiab nim no, thaum Mauxiyas nyeem tej ceev xwm txheej ntawd tas, nws cov neeg uas nyob hauv thaj av xav tsis tas thiab xav tsis thoob.

8 Vim lawv tsis paub yuav xav li cas; vim thaum lawv pom cov uas tus Tswv tau coj dim ntawm kev ua qhev lawv muaj kev xyiv fab heev kawg li.

9 Thiab ntxiv, thaum lawv xav txog lawv cov kwv tij uas raug cov Neeg Lamas muab tua lawv muaj kev tu siab puv npo, thiab los ntau lub kua muag ntawm kev tu siab.

10 Thiab ntxiv, thaum lawv xav txog Vajtswv txoj kev zoo, thiab nws lub hwj chim uas coj Amas thiab nws cov kwv tij dim ntawm cov Neeg Lamas tes thiab ntawm kev ua qhev, lawv tsa lawv tej suab thiab ua Vajtswv tsaug.

11 Thiab ntxiv, thaum lawv xav txog cov Neeg Lamas, uas yog lawv cov kwv tij, txog lawv tej kev txhaum thiab kev qias, lawv muaj kev mob thiab kev ntxhov siab puv npo rau cov Neeg Lamas tej ntsuj plig txoj kev noj qab nyob zoo.

12 Thiab tau muaj tias Amuloos thiab nws cov kwv tij cov me nyuam, cov uas tau coj cov Neeg Lamas tej ntxhais los ua poj niam, tsis txaus siab rau tej uas lawv txiv tau ua, thiab lawv tsis kam tis npe raws li lawv txiv ntxiv lawm, yog li ntawd lawv tis Nifais lub npe rau lawv tus kheej, xwv kom yuav hu lawv ua Nifais cov me nyuam thiab muab lawv suav nrog cov Neeg Nifais.

13 Thiab nim no tau muab tag nrho Xalahelas cov neeg tau suav nrog cov Neeg Nifais, thiab ua li no los vim yog txoj cai kav lub teb chaws tsuas yog muab rau cov uas yog Nifais cov xeeb leej xeeb ntxwv xwb.

14 Thiab tau muaj tias thaum Mauxiyas hais lus thiab nyeem rau cov neeg tas lawm, nws thov kom Amas los hais lus rau cov neeg thiab.

15 Thiab Amas tau hais rau lawv, thaum lawv sib txoos ua ke coob coob, thiab nws mus ntawm ib pab rau ib pab, qhuab qhia cov neeg txog kev hloov siab lees txim thiab kev ntseeg tus Tswv.

16 Thiab nws ntuas Leehais cov neeg thiab nws cov kwv tij, tag nrho cov uas tau khiav dim ntawm kev ua qhev, kom lawv nco ntsoov tias twb yog tus Tswv uas coj lawv dim.

17 Thiab tau muaj tias tom qab Amas tau qhia cov neeg ntau yam, thiab tau xaus hais lus rau lawv, vaj ntxwv Leehais xav ua kev cai raus dej; thiab tag nrho nws cov neeg los kuj xav kom muab lawv ua kev cai raus dej thiab.

18 Yog li ntawd, Amas tau mus rau hauv dej thiab tau muab lawv ua kev cai raus dej; muaj tseeb tiag, nws tau muab lawv ua kev cai raus dej mus raws li nws tau ua rau nws cov kwv tij nyob rau hauv cov dej Maumoos; muaj tseeb tiag, thiab tag nrho cov uas nws tau muab ua kev cai raus dej tau los zwm rau Vajtswv lub koom txoos; thiab qhov no los vim yog lawv ntseeg Amas tej lus.

19 Thiab tau muaj tias vaj ntxwv Mauxiyas cia rau Amas tsa kom muaj koom txoos nyob thoob plaws hauv thaj av Xalahelas; thiab cia nws muaj hwj chim tsa cov pov thawj thiab cov xib hwb rau txhua lub tsev koom txoos.

20 Nim no tau ua li no vim yog muaj neeg coob heev uas ib tug xib hwb yuav kav tsis tau lawv tag nrho; thiab lawv txhua tus twb tsis muaj peev xwm hnov Vajtswv txoj lus nyob hauv ib qho chaw sab laj.

21 Yog li ntawd lawv sib txoos tuaj ua ke nyob hauv txawv pab pawg, uas hu ua tej ceg koom txoos; txhua ceg koom txoos muaj cov pov thawj thiab cov xib hwb, thiab txhua tus pov thawj qhia txoj lus raws li tau muab rau nws los ntawm Amas lub qhov ncauj.

22 Thiab yog li ntawd, txawm tias muaj ntau ceg koom txoos los lawv yog tib lub koom txoos xwb, muaj tseeb tiag, twb yog Vajtswv lub koom txoos; vim twb tsis tshaj tawm dab tsi nyob hauv tag nrho tej ceg koom txoos tsuas yog tshaj tawm kev hloov siab lees txim thiab kev ntseeg Vajtswv xwb.

23 Thiab nim no muaj xya ceg koom txoos nyob hauv thaj av Xalahelas. Thiab tau muaj tias txhua tus uas xav los ris Khetos lub npe, los sis Vajtswv lub npe, cov ntawd tau los koom Vajtswv tej ceg koom txoos;

24 Thiab lawv hu ua Vajtswv cov neeg. Thiab tus Tswv pub nws tus Ntsuj Plig nplua mias los rau lawv, thiab lawv tau koob hmoov, thiab vam meej nyob hauv thaj av.