1 Thiab nim no, tau muaj tias Amas, tus uas tau khiav tawm ntawm vaj ntxwv Nau-as cov tub qhe, tau hloov siab lees txim rau nws tej kev txhaum thiab tej kev ua phem, thiab tau mus ntsiag to rau hauv cov neeg, thiab pib qhia Anpinadais tej lus—

2 Muaj tseeb tiag, txog tej uas yuav muaj los, thiab kuj qhia txog txoj kev sawv rov los ntawm cov tuag, thiab txoj kev txhiv dim ntawm cov neeg, uas yuav muaj los ntawm Khetos lub hwj chim, thiab kev tsim txom, thiab kev tuag, thiab nws txoj kev sawv rov los thiab txoj kev nce mus rau saum ntuj ceeb tsheej.

3 Thiab nws tau qhia tag nrho cov uas kam mloog nws cov lus. Thiab nws qhia lawv yam ntsiag to, xwv kom vaj ntxwv Nau-as thiaj tsis paub txog tej no. Thiab coob leej tau ntseeg nws cov lus.

4 Thiab tau muaj tias tag nrho cov uas ntseeg nws tau mus rau tom ib qho chaw uas hu ua Maumoos, uas yog tus vaj ntxwv tis npe rau, uas nyob ntawm tej ciaj ciam ntawm thaj av uas tej lub sij hawm los sis tej lub caij raug tej tsiaj qus dhia puas tsuaj tas.

5 Nim no, muaj ib lub pas dej txhawv nyob hauv qhov chaw Maumoos, thiab Amas mus so rau qhov chaw ntawd, uas muaj ib koog me nyuam ntoo nyob ze ntawm lub pas dej, uas yog nws qhov chaw nkaum vaj ntxwv Nau-as cov tub qhe thaum nruab hnub.

6 Thiab tau muaj tias tag nrho cov uas ntseeg nws mus mloog nws cov lus nyob rau qhov chaw ntawd.

7 Thiab tau muaj tias tom qab ntau hnub muaj ib pab neeg coob sib sau tuaj ua ke rau ntawm qhov chaw Maumoos, tuaj mloog Amas cov lus. Muaj tseeb tiag, tag nrho cov uas ntseeg nws cov lus tau sib sau tuaj ua ke, tuaj mloog nws. Thiab nws tau qhia lawv, thiab tau tshaj tawm rau lawv txog txoj kev hloov siab lees txim, thiab txoj kev txhiv dim, thiab txoj kev ntseeg tus Tswv.

8 Thiab tau muaj tias nws hais rau lawv tias: Saib seb, ntawm no yog cov dej Maumoos (vim cov dej yog hu li no) thiab nim no, vim nej xav los rau hauv Vajtswv pab yaj, thiab los ua nws cov neeg, thiab ib leeg txaus siab ris ib leeg tej nra, xwv kom tej nra thiaj li sib;

9 Muaj tseeb tiag, thiab txaus siab nyuaj siab nrog cov uas nyuaj siab; muaj tseeb tiag, thiab nplij cov uas xav tau kev nplij siab, thiab ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw uas nej nyob, kom txog hnub tuag, xwv kom Vajtswv yuav txhiv nej dim, thiab suav nej nrog cov uas nyob hauv thawj txoj kev sawv rov los, xwv kom nej yuav tau txoj sia nyob mus ib txhis—

10 Nim no kuv hais rau nej tias, yog hais tias qhov no yog qhov uas nej lub siab xav tau, puas muaj dab tsi ua rau nej tsis yeem ua kev cai raus dej los ntawm tus Tswv lub npe, los ua pov thawj rau nws hais tias nej tau khi lus nrog nws, hais tias nej yuav ua hauj lwm rau nws thiab ua raws li nws tej lus txib, xwv kom nws yuav pub nws tus Ntsuj Plig nplua mias ntau ntxiv rau nej?

11 Thiab nim no thaum cov neeg hnov cov lus no, lawv npuaj tes rau kev xyiv fab, thiab qw hais tias: Qhov no yog qhov uas peb lub siab xav tau.

12 Thiab nim no tau muaj tias Amas coj Helas, nws yog thawj tug, thiab mus sawv rau hauv dej, thiab thov, hais tias: Auj tus Tswv es, pub koj tus Ntsuj Plig nplua mias los rau koj tus tub qhe, xwv kom nws yuav ua txoj hauj lwm no nrog lub siab dawb huv.

13 Thiab thaum nws hais cov lus no tas, tus Tswv tus Ntsuj Plig tau los rau nws, thiab nws hais tias: Helas, kuv muab koj ua kev cai raus dej, muaj txoj cai los ntawm tus Vajtswv uas Muaj Hwj Chim Tag Nrho, kom ua tim khawv tias koj tau khi lus los ua hauj lwm rau nws kom txog thaum koj tuag ntawm sab cev nqaij daim tawv; thiab thov kom muaj tus Tswv tus Ntsuj Plig nplua mias los rau koj; thiab thov kom nws pub txoj sia nyob mus ib txhis rau koj, los ntawm Khetos txoj kev txhiv dim, tus uas nws tau npaj txij thaum ntuj tsim teb raug.

14 Thiab tom qab Amas hais cov lus no tas, Amas thiab Helas nkawd muab nkawd tus kheej raus rau hauv dej; thiab nkawd sawv thiab tawm hauv dej los zoo siab hlo, vim nkawd muaj tus Ntsuj Plig puv npo.

15 Thiab ntxiv, Amas coj lwm tus, thiab mus rau hauv dej zaum ob, thiab muab nws ua kev cai raus dej ib yam li thawj tug, tsuas yog nws tsis muab nws tus kheej raus rau hauv cov dej ntxiv lawm xwb.

16 Thiab nws muab txhua tus uas tau mus rau ntawm qhov chaw Maumoos ua kev cai raus dej zoo li no; thiab lawv muaj kwv yees li ob puas thiab plaub leeg; muaj tseeb tiag, thiab lawv tau ua kev cai raus dej nyob hauv cov dej Maumoos, thiab muaj Vajtswv txoj kev tshav ntuj puv npo.

17 Thiab tau hu lawv ua Vajtswv lub koom txoos, los sis Khetos lub koom txoos, txij lub sij hawm ntawd los. Thiab tau muaj tias txhua tus uas tau ua kev cai raus dej los ntawm Vajtswv lub hwj chim thiab txoj cai tau koom nrog nws lub koom txoos.

18 Thiab tau muaj tias Amas, vim nws muaj Vajtswv txoj cai, nws tsa cov pov thawj; twb tsa ib tug pov thawj los qhuab qhia ib pab uas muaj tsib caug leej, thiab los qhia lawv txog tej yam ntawm Vajtswv lub nceeg vaj.

19 Thiab nws txib kom lawv tsis txhob qhia ib yam dab tsi tsuas yog tej yam uas nws tau qhia xwb, thiab tej uas tau hais los ntawm cov yaj saub dawb huv lub qhov ncauj.

20 Muaj tseeb tiag, nws twb txib kom lawv tsis txhob tshaj tawm txog ib yam dab tsi tsuas yog tshaj tawm txog kev hloov siab lees txim thiab kev ntseeg tus Tswv, tus uas tau txhiv nws cov neeg dim.

21 Thiab nws txib kom lawv tsis txhob muaj kev sib cav sib ceg ib leeg rau ib leeg, tiam sis lawv yuav tsum ntsia tom ntej nrog tib lub qhov muag, muaj tib txoj kev ntseeg thiab tib txoj kev ua kev cai raus dej, muab lawv lub siab sib khi ua ke los ntawm kev koom siab koom ntsws thiab los ntawm kev ib leeg hlub ib leeg.

22 Thiab nws txib kom lawv qhia zoo li no. Thiab lawv los ua Vajtswv cov me nyuam zoo li no.

23 Thiab nws txib kom lawv yuav tsum hwm hnub caiv, thiab hwm kom hnub ntawd dawb huv, thiab kom lawv yuav tsum ua tus Tswv lawv tus Vajtswv tsaug txhua hnub.

24 Thiab nws kuj txib kom cov pov thawj uas nws tau tsa yuav tsum siv lawv txhais tes los khwv rau lawv tus kheej tau noj tau haus.

25 Thiab lawv tshwj tseg cia ib hnub ntawm txhua lub lim tiam, uas lawv sib sau ua ke tuaj qhia cov neeg, thiab tuaj teev tiam tus Tswv lawv tus Vajtswv, thiab ntxiv, lawv sib sau tuaj ua ke txhua lub sij hawm uas lawv muaj cuab kav ua tau.

26 Thiab kom cov pov thawj tsis txhob tos kom cov neeg khwv rau lawv tau noj tau haus; tiam sis rau lawv tej hauj lwm lawv yuav tau txais Vajtswv txoj kev tshav ntuj, xwv kom lawv yuav muaj zog ntawm tus Ntsuj Plig zuj zus tuaj, thiab muaj Vajtswv txoj kev txawj ntse, xwv kom lawv yuav qhia nrog Vajtswv lub hwj chim thiab txoj cai.

27 Thiab ntxiv Amas txib kom cov neeg ntawm lub koom txoos yuav tsum faib lawv tej khoom, txhua tus raws li qhov uas nws muaj; tus uas muaj ntau zog tus ntawd yuav tsum faib ntau zog; thiab tus uas muaj tsawg yuav tsum hais kom tus ntawd muab tsawg xwb; thiab tus uas tsis muaj, yuav tsum muab rau tus ntawd.

28 Thiab li no lawv yuav tsum faib lawv tej khoom raws li lawv lub siab nyiam thiab tej kev xav zoo rau ntawm Vajtswv, thiab rau cov pov thawj uas ho txom nyem, muaj tseeb tiag, thiab rau txhua tus uas txom nyem thiab liab qab.

29 Thiab nws hais li no rau lawv, vim yog Vajtswv txib; thiab lawv tau taug kev ncaj ncees rau tus Tswv, ib leeg faib rau ib leeg tsis hais sab cev nqaij daim tawv los sis sab ntsuj plig raws li lawv tej kev txom nyem thiab kev xav tau.

30 Thiab nim no tau muaj tias lawv ua txhua yam no nyob hauv Maumoos, muaj tseeb tiag, nyob ntawm cov dej Maumoos, nyob hauv cov hav zoov uas nyob ze cov dej Maumoos; muaj tseeb tiag, qhov chaw Maumoos, cov dej Maumoos, tej hav zoov Maumoos, zoo nkauj kawg rau cov uas tau los paub lawv tus Txhiv Dim nyob rau ntawd; muaj tseeb tiag, thiab lawv tau koob hmoov ntau kawg, vim lawv yuav hu nkauj qhuas nws mus ib txhis li.

31 Thiab tau ua tej yam no nyob ntawm tej ciaj ciam ntawm thaj av, xwv kom vaj ntxwv Nau-as thiaj tsis paub txog tej yam no.

32 Tiam sis saib seb, tau muaj tias vaj ntxwv Nau-as, vim tau pom ib qho txawv txav nyob hauv cov neeg, xa nws cov tub qhe tuaj soj lawv. Yog li ntawd nyob rau hnub uas lawv sib sau ua ke tuaj mloog tus Tswv txoj lus thiaj ua rau vaj ntxwv Nau-as paub txog lawv.

33 Thiab nim no vaj ntxwv Nau-as hais tias Amas tab tom txhaub kom cov neeg ntxeev siab tawm tsam nws; yog li ntawd nws xa nws cov tub rog tuaj ua kom lawv puas tsuaj.

34 Thiab tau muaj tias lwm tus tau ceeb toom Amas thiab tus Tswv cov neeg txog qhov uas vaj ntxwv Nau-as cov tub rog yuav tuaj; yog li ntawd lawv nqa lawv tej tsev pheeb suab ntaub thiab coj lawv tsev neeg thiab khiav mus rau hauv hav zoov.

35 Thiab lawv muaj kwv yees li plaub puas thiab tsib caug leej.