1 Thiab tau muaj tias tom qab vaj ntxwv Leehais tau hais lus rau nws cov neeg tas, vim nws hais ntau yam rau lawv thiab tsuas yog muaj ob peb yam kuv thiaj tau muab sau rau hauv phau ntawv no xwb, nws qhia rau nws cov neeg txhua yam txog lawv cov kwv tij uas nyob hauv thaj av Xalahelas.

2 Thiab nws hais kom Amoos sawv ntsug rau ntawm cov neeg coob coob, thiab qhia rau lawv tag nrho tej uas tau tshwm sim rau lawv cov kwv tij txij li lub sij hawm uas Xeenas tau ncaim ntawm thaj av los txog rau lub sij hawm uas nws tus kheej tawm ntawm thaj av tuaj.

3 Thiab nws kuj qhia rau lawv txog tej lus kawg uas vaj ntxwv Npeyamis tau qhia lawv, thiab piav tej ntawd rau vaj ntxwv Leehais cov neeg, xwv kom lawv yuav to taub tag nrho tej lus uas nws tau hais.

4 Thiab tau muaj tias tom qab nws tau ua tag nrho txhua yam no, vaj ntxwv Leehais cia cov neeg coob coob mus, thiab hais kom lawv txhua tus rov qab mus tom lawv tsev.

5 Thiab tau muaj tias nws txib kom muab cov phiaj uas ntim nws cov neeg phau ceev xwm txheej txij li lub caij uas lawv tau ncaim thaj av Xalahelas, coj los rau Amoos, xwv kom nws tau nyeem.

6 Nim no, tom qab kiag uas Amoos tau nyeem phau ceev xwm txheej tas, tus vaj ntxwv xav paub seb nws puas muaj peev xwm txhais tej lus, thiab Amoos qhia rau nws hais tias nws tsis muaj peev xwm.

7 Thiab tus vaj ntxwv hais rau nws tias: Vim kuv nyuaj siab txog kuv cov neeg tej kev txom nyem, kuv txib kom plaub caug peb leeg ntawm kuv cov neeg cia li taug kev mus lawm tom hav zoov, xwv kom tej zaum lawv thiaj yuav nrhiav tau thaj av Xalahelas, xwv kom peb yuav thov tau peb cov kwv tij kom coj peb dim tawm ntawm kev ua qhev.

8 Thiab lawv tau ploj rau hauv hav zoov tau ntau hnub, tiam sis lawv tseem rau siab, thiab nrhiav tsis tau thaj av Xalahelas tiam sis tau rov qab los rau thaj av no, tom qab mus rau hauv ib thaj av uas muaj dej ntau, mus pom ib thaj av uas muaj neeg tej pob txha, thiab pob txha tsiaj qus, thiab kuj muaj tej tsev uas piam lawm txhua yam, vim lawv nrhiav tau ib thaj av uas tau muaj neeg nyob coob npaum li cov neeg Ixayees.

9 Thiab lawv nqa tau nees nkaum plaub daim phiaj, uas yog tseem kub, uas ntim cov lus sau puv nkaus, los ua tim khawv tias tej uas lawv tau hais yeej muaj tseeb.

10 Thiab saib seb, lawv kuj nqa tau tej daim thaiv hauv siab, uas loj dav, thiab yog tooj dag thiab yog tooj liab, thiab yog tej uas zoo kawg nkaus.

11 Thiab ntxiv, lawv nqa tau ib co ntaj, uas tej ko ntaj tau piam tas lawm, thiab tej hniav ntaj tau khub xeb tuab; thiab twb tsis muaj ib tug twg nyob hauv thaj av uas muaj peev xwm txhais tau cov lus los sis cov ntawv uas sau nyob saum cov phiaj. Yog li ntawd kuv thiaj hais rau koj tias: Koj txhais puas tau?

12 Thiab kuv hais rau koj ntxiv tias: Koj puas paub muaj leej twg uas yuav txhais tau? Vim kuv xav kom muab cov ceev xwm txheej no txhais los ua peb cov lus; vim, tej zaum, cov ceev xwm txheej yuav qhia tau rau peb txog ib co seem tshuav ntawm cov neeg uas tau puas tsuaj, uas yog cov uas tau sau cov ceev xwm txheej no; los sis, tej zaum, cov ceev xwm txheej yuav qhia tau rau peb txog cov neeg uas tau puas tsuaj no; thiab kuv xav paub vim li cas lawv raug puas tsuaj.

13 Nim no Amoos hais rau nws tias: Kuv yeej muaj cuab kav qhia koj, auj vaj ntxwv, txog ib tug txiv neej uas muaj peev xwm txhais tau cov ceev xwm txheej; vim nws muaj tej yam uas nws siv coj los ntsia, thiab txhais tau txhua yam ceev xwm txheej thaum ub; thiab qhov ntawd yog ib qho txiaj ntsim los ntawm Vajtswv. Thiab tej yam ntawd yog hu ua cov cuab yeej txhais lus, thiab tsis muaj leej twg muaj cuab kav ntsia tau hauv tej yam ntawd tsuas yog Vajtswv txib nws xwb, ntshai tsam nws ho siv coj los saib tej yam uas tsis tsim nyog rau nws saib thiab ua rau nws piam sij. Thiab txhua tus uas Vajtswv txib kom ntsia hauv tej yam ntawd, tus ntawd yog hu ua tus pom tau.

14 Thiab saib seb, tus vaj ntxwv ntawm cov neeg uas nyob hauv thaj av Xalahelas yog tus uas Vajtswv txib kom ua tej yam no, thiab yog tus uas muaj lub txiaj ntsim zoo kawg nkaus no uas los ntawm Vajtswv.

15 Thiab tus vaj ntxwv hais tias tus pom tau tseem ceeb dua tus yaj saub.

16 Thiab Amoos hais tias tus pom tau yog tus txais kev tshwm sim thiab kuj yog ib tug yaj saub thiab; thiab tsis muaj neeg muaj tau ib lub txiaj ntsim tseem ceeb dua no, tsuas yog nws tau Vajtswv lub hwj chim xwb, uas tsis muaj leej twg tau; tiam sis ib tug neeg yeej muaj tau hwj chim loj uas yog Vajtswv muab rau nws.

17 Tiam sis tus pom tau muaj peev xwm paub txog tej yam uas tag los lawm, thiab kuj paub txog tej yam uas yuav muaj los, thiab los ntawm cov txhais lus yuav muab txhua yam ua kom tshwm sim los, los sis, hais kom meej zog, yuav muab tej yam uas nraim nkoos ua kom tshwm sim los, thiab yuav ua kom tej yam uas muab zais lawm tawm los rau qhov kaj, thiab los ntawm cov txhais lus, yuav muab tej yam uas tsis tau paub ua kom paub, thiab kuj yuav muab tej yam ua kom paub, uas yog hais tias tsis muaj cov txhais lus ces yuav paub tsis tau.

18 Xws li no Vajtswv tau muab ib qho cuab yeej xwv kom tib neeg, los ntawm kev ntseeg, yuav ua tau tej txuj ci tseem ceeb loj; yog li ntawd tib neeg thiaj hloov los ua ib lub txiaj ntsim tseem ceeb rau nws tej neeg zej zog.

19 Thiab nim no, thaum Amoos tau hais tej lus no tag lawm tus vaj ntxwv zoo siab kawg li, thiab ua Vajtswv tsaug, hais tias: Paub tseeb hais tias yeej muaj ib qho txuj ci tseem ceeb uas neeg paub tsis txog nyob hauv cov phiaj no, thiab cov cuab yeej txhais lus no yog Vajtswv tau npaj kom los nthuav tawm tag nrho tej txuj ci uas neeg paub tsis txog ntawd rau noob neej.

20 Auj tej yam uas tus Tswv ua yeej zoo kawg nkaus, thiab nws ua siab ntev heev rau nws cov neeg; muaj tseeb tiag, thiab noob neej dig muag thiab tsis txawj to taub tiag tiag; vim lawv tsis nrhiav laj lim tswv yim, thiab lawv tsis xav cia laj lim tswv yim kav lawv!

21 Muaj tseeb tiag, lawv zoo li ib pab yaj qus uas khiav tawm ntawm tus neeg yug yaj mus, thiab khiav ri niab, thiab raug caum, thiab raug tej tsiaj qus tom hav zoov dua noj.