1 Muaj tseeb tiag, Yaxayas tau hais tias: Leej twg ntseeg tej uas peb hais, thiab tus Tswv tau ua nws txhais npab tshwm sim los rau leej twg?

2 Vim nws yuav loj hlob rau ntawm Vajtswv zoo li ib tus kaus mos, thiab zoo li ib tug cag uas nrhau tawm hauv av qhuav tuaj; nws tsis muaj lub cev ntaj ntsug zoo saib thiab tsis muaj tus yam ntxwv zoo nyiam; thiab thaum peb pom nws tsis zoo nraug txaus peb xav tau nws.

3 Tib neeg saib tsis taus thiab muab nws tso tseg; nws yog ib tug neeg muaj kev nyuaj siab, thiab paub kev tu siab; thiab zoo li peb nraim peb lub ntsej muag ntawm nws; tib neeg saib tsis taus nws, thiab peb saib nws tsis rau nqi.

4 Twb yog nws ris peb tej kev nyuaj siab, thiab nqa peb tej kev tu siab mus; tiam sis peb tseem xav tias nws raug mob, Vajtswv rau txim rau nws, thiab nws raug kev txom nyem.

5 Tiam sis nws raug mob rau peb tej kev ua txhaum, nws doog ntshav rau peb tej kev ua phem; qhov uas nws raug txim yog kom peb tau nyob kaj siab lug; thiab nws tej tawv nqaij siav yog kho kom peb zoo.

6 Peb txhua tus, zoo li tej yaj, tau mus yuam kev; peb txhua tus nyias tig mus nyias txoj kev; thiab tus Tswv tau muab tag nrho peb tej kev ua phem tso rau nws.

7 Nws raug tsim txom, thiab nws raug txom nyem, tiam sis nws twb tsis qhib nws lub qhov ncauj; cov neeg coj nws zoo li coj ib tug me nyuam yaj mus rau tus neeg tua yaj, thiab ib yam li ib tug yaj hais tsis taus lus los rau cov neeg txiav plaub nws thiaj tsis qhib nws lub qhov ncauj.

8 Tib neeg coj nws tawm hauv lub tsev kaw thiab tawm hauv kev txiav txim; thiab leej twg yuav hais txog nws tej tiam neeg tom ntej? Vim tib neeg muab nws txiav tawm ntawm lub teb chaws ntawm cov neeg ciaj; vim kuv cov neeg tej kev ua txhaum nws thiaj raug mob.

9 Thiab nws cia nws qhov ntxa nrog cov neeg phem, thiab nrog cov neeg nplua nuj thaum nws tuag; vim nws tsis tau ua phem dab tsi, thiab tsis muaj lus dag ntxias los ntawm nws lub qhov ncauj.

10 Tiam sis tus Tswv txaus siab cia rau nws doog ntshav; tus Tswv tau ua rau nws raug kev nyuaj siab; thaum koj muab nws txoj sia los txi rau kev txhaum nws yuav pom nws cov tub ki, nws yuav ua kom nws lub neej ntev, thiab tus Tswv txoj kev zoo siab yuav vam meej nyob hauv nws txhais tes.

11 Nws yuav pom kev txom nyem ntawm nws tus ntsuj plig, thiab yuav txaus siab; los ntawm nws txoj kev txawj ntse kuv tus tub qhe ncaj ncees yuav kho tau ntau tus kom tsis muaj txim; vim nws yuav ris lawv tej kev ua phem.

12 Yog li ntawd kuv yuav faib ib feem rau nws zoo li faib rau cov muaj hwj chim, thiab nws yuav faib tej khoom rau cov uas muaj zog; vim nws tau muab nws txoj sia tso rau kev tuag; thiab nws raug suav nrog cov ua txhaum; thiab nws ris ntau tus tej kev txhaum, thiab ua kev pab daws cov ua txhaum.