1 Thiab nim no, tau muaj tias thaum vaj ntxwv Npeyamis tau hais cov lus uas Vajtswv tus tim tswv tau qhia rau nws tas lawm, nws tsa muag ntsia ib puag ncig rau cov neeg coob coob, thiab saib seb lawv tau vau rau hauv av, vim txoj kev hwm tus Tswv tau los rau lawv.

2 Thiab lawv tau saib lawv tus kheej pom tias lawv muaj lub siab nyiam sab cev nqaij daim tawv, uas twb tsis tsim txiaj li tej plua av. Thiab lawv sawv daws ua ib lub suab qw nrov nrov, hais tias: Auj thov muaj kev hlub tshua, thiab muab Khetos cov ntshav los theej txhoj xwv kom peb yuav tau txais kev zam txim rau peb tej kev txhaum, thiab kom peb lub siab hloov ua dawb huv; vim peb ntseeg Yexus Khetos, Vajtswv Leej Tub, tus uas tau tsim lub ntuj thiab lub ntiaj teb, thiab tag nrho txhua yam; tus uas yuav nqis los nrog noob neej nyob.

3 Thiab tau muaj tias tom qab lawv tau hais cov lus no tus Tswv tus Ntsuj Plig tau los rau lawv, thiab lawv muaj kev xyiv fab puv npo, vim lawv tau txais kev zam txim rau lawv tej kev txhaum, thiab tau muaj kev kaj siab lug hauv nruab siab, vim yog txoj kev ntseeg heev uas lawv muaj rau Yexus Khetos tus uas yuav los, raws li tej lus uas vaj ntxwv Npeyamis tau hais rau lawv.

4 Thiab vaj ntxwv Npeyamis rov qhib nws lub qhov ncauj dua thiab pib hais rau lawv, hais tias: Kuv cov phooj ywg thiab kuv cov kwv tij, kuv xeem neeg thiab kuv cov neeg es, kuv xav kom nej rov mloog dua, xwv kom nej yuav hnov thiab to taub kuv cov lus tseem tshuav uas kuv yuav hais rau nej.

5 Vim saib seb, yog hais tias kev paub txog Vajtswv txoj kev zoo nyob rau lub sij hawm no tau tsa nej los paub txog nej tej kev tsis muaj qab hau, thiab nej tej kev tsis muaj nuj nqis thiab txoj kev poob—

6 Kuv hais rau nej, yog nej tau los paub txog Vajtswv txoj kev zoo, thiab nws lub hwj chim uas loj tshaj txhua yam, thiab nws laj lim tswv yim, thiab nws lub siab ntev, thiab nws txoj kev ua siab ntev nyiaj rau noob neej; thiab, txoj kev theej txhoj uas tau npaj txij thaum ntuj tsim teb raug los, xwv kom txoj kev cawm seej thiaj yuav los rau tus uas yuav tso siab rau tus Tswv, thiab rau siab ntso ua raws li tus Tswv tej lus txib, thiab ua tsis tu ncua raws li txoj kev ntseeg mus kom kawg nws txoj sia, kuv hais txog txoj sia ntawm lub cev uas txawj ploj txawj tuag—

7 Kuv hais tias, tus neeg no yog tus uas yuav tau txais txoj kev cawm seej, los ntawm txoj kev theej txhoj uas tau npaj txij thaum ntuj tsim teb raug los rau tib neeg txhua tus, cov uas nyob txij thaum Adas txoj kev poob, los sis cov uas nyob tam sim no, los sis cov uas tseem yuav muaj, mus txog thaum lub ntiaj teb kawg.

8 Thiab nov yog txoj kev uas kev cawm seej yuav los. Thiab tsis muaj lwm txoj kev cawm seej tsuas yog txoj uas tau hais no xwb; thiab tsis muaj ib txoj kev twg uas yuav cawm neeg dim taus tsuas yog tib txoj kev uas kuv tau qhia rau nej.

9 Cia li ntseeg Vajtswv; ntseeg tias muaj nws, thiab ntseeg tias nws tsim txhua yam, tag nrho saum ntuj ceeb tsheej thiab hauv ntiaj teb; ntseeg tias nws muaj laj lim tswv yim tag nrho, thiab muaj hwj chim tag nrho, saum ntuj ceeb tsheej thiab hauv ntiaj teb; ntseeg tias tib neeg yeej tsis to taub txhua yam uas tus Tswv muaj peev xwm to taub.

10 Thiab ntxiv, ntseeg tias nej yuav tsum hloov siab lees txim rau nej tej kev txhaum thiab tso kev txhaum pov tseg, thiab cia li txo nej lub hwj chim rau Vajtswv; thiab ua siab tseeb tiag thov kom nws zam nej lub txim; thiab nim no, yog hais tias nej ntseeg tag nrho txhua yam no nej cia li ua tib zoo ua tej yam no.

11 Thiab kuv rov hais rau nej dua ib yam li kuv tau hais ua ntej lawm, hais tias vim nej tau los paub txog Vajtswv lub yeeb koob, los sis yog tias nej tau paub txog nws txoj kev zoo thiab tau saj nws txoj kev hlub, thiab tau txais ib txoj kev zam txim rau nej tej kev txhaum, uas ua rau nej tej ntsuj plig muaj kev xyiv fab loj kawg nkaus, txawm li ntawd los kuv xav kom nej nco ntsoov, thiab nco txog tas mus li, Vajtswv txoj kev tshav ntuj, thiab nej tej kev tsis muaj qab hau, thiab nws txoj kev zoo thiab kev ua siab ntev nyiaj rau nej, cov uas tsis muaj nqis, thiab txo nej lub hwj chim kom kawg siab kawg ntsws, niaj hnub hu ntsoov tus Tswv lub npe, thiab sawv khov kho ntseeg qhov uas yuav los, uas tus tim tswv lub qhov ncauj tau hais.

12 Thiab saib seb, kuv hais rau nej tias yog nej ua li no nej yuav xyiv fab tas mus li, thiab yuav muaj Vajtswv txoj kev hlub puv npo, thiab txais kev zam txim rau nej tej kev txhaum tas mus li; thiab nej txoj kev paub txog lub yeeb koob ntawm tus uas tau tsim nej yuav loj hlob, los sis kev paub txog qhov uas ncaj thiab tseeb yuav loj hlob.

13 Thiab nej yuav tsis muaj ib lub siab xav ua kom lwm tus raug mob, tiam sis yuav xav nyob kaj siab lug, thiab muab rau txhua tus tib neeg raws li tej uas yog nws ntiag tug.

14 Thiab nej yuav tsis cia kom nej cov me nyuam tshaib plab, los sis liab qab; thiab nej yuav tsis cia kom lawv ua txhaum Vajtswv tej kev cai, thiab sib ntaus thiab sib ceg nrog lwm tus, thiab ua hauj lwm rau tus dab phem, tus uas yog tus tswv ntawm kev txhaum, los sis tus uas yog tus ntsuj plig phem uas peb cov yawg koob tau hais txog, vim nws yog ib tug yeeb ncuab rau txhua yam kev ncaj ncees.

15 Tiam sis nej yuav qhia kom lawv taug mus raws li tej kev tseeb thiab kev ua tiag tiag; nej yuav qhia kom lawv ib leeg hlub ib leeg, thiab ib leeg pab ib leeg.

16 Thiab ntxiv, nej tus kheej los yuav pab cov uas xav tau nej txoj kev pab; nej yuav faib nej tej khoom rau tus uas txom nyem; thiab nej yuav tsis cia tus neeg thov khawv thov nej yam tsis muaj txiaj ntsim, thiab ntiab nws tawm mus kom piam sij.

17 Tej zaum nej yuav hais tias: Tus neeg ntawd tau ua rau nws tus kheej raug kev nyuaj siab; yog li ntawd kuv yuav nkaum kuv txhais tes, thiab yuav tsis muab kuv cov zaub mov rau nws, thiab tsis faib kuv tej khoom rau nws xwv kom nws thiaj tsis txom nyem, vim nws tej kev raug txim yeej ncaj—

18 Tiam sis kuv hais rau nej, auj neeg es, tus uas ua li no tus ntawd yeej yuav tsum hloov siab lees txim; thiab tsuas yog tias nws hloov siab lees txim rau tej uas nws tau ua tsis li ces nws yuav piam sij mus ib txhis li, thiab yuav tsis muaj ib qho chaw nyob hauv Vajtswv lub nceeg vaj.

19 Vim saib seb, tsis yog peb txhua tus puav leej yog neeg thov khawv los? Tsis yog peb txhua tus vam khom rau tib tug Neeg, uas yog Vajtswv, kom txais txhua yam khoom uas peb muaj, tag nrho tej zaub mov thiab tej ris tsho, thiab kub, thiab nyiaj, thiab txhua txhia yam kev nplua nuj uas peb muaj txhua nrho los?

20 Thiab saib seb, lub sij hawm no los, nej tseem tab tom hu txog nws lub npe, thiab thov kom txais kev zam txim rau nej tej kev txhaum. Thiab nws puas cia kom nej thov yam tsis muaj txiaj ntsim? Tsis yog li ntawd; nws tau pub nws tus Ntsuj Plig nplua mias los rau nej, thiab tau ua rau nej lub siab muaj kev xyiv fab puv npo, thiab tau ua rau nej qhov ncauj qos ua nej tsis muaj peev xwm nrhiav tau lus hais, nej txoj kev xyiv fab yeej loj npaum li ntawd.

21 Thiab nim no, yog hais tias Vajtswv, tus uas tau tsim nej, tus uas nej vam khom rau nej txoj sia thiab rau txhua yam uas nej muaj thiab nej yog, twb pub rau nej txhua yam uas nej thov uas ncaj ncees, nrog txoj kev ntseeg, ntseeg ntsoov tias nej yuav tau txais, auj yog li ntawd, nej yeej yuav tsum faib tej khoom uas nej muaj ib leeg rau ib leeg.

22 Thiab yog hais tias nej txiav txim rau tus neeg uas thov nej tej khoom xwv kom nws tsis txhob piam sij, thiab rau txim rau nws, haj yam tsim nyog rau txim rau nej npaum li cas vim nej khuv xim nej tej khoom, uas tsis yog nej li tiam sis yog Vajtswv li, tus uas nej txoj sia los yog nws li thiab; thiab txawm li ntawd los nej twb tsis tau thov, thiab tsis tau hloov siab lees txim rau tej uas nej tau ua.

23 Kuv hais rau nej tias, kev txom nyem yuav raug tus neeg ntawd, vim nws tej khoom yuav piam sij nrog nws mus; thiab nim no, kuv hais tej no rau cov uas nplua nuj vim muaj tej khoom ntawm ntiaj teb no.

24 Thiab ntxiv, kuv hais rau cov neeg pluag, nej cov uas tsis muaj tiam sis twb muaj txaus siv, xwv kom nej yuav nyob ib hnub dhau ib hnub; kuv hais tag nrho nej cov uas xyeej cov neeg thov khawv, vim nej tsis muaj; kuv xav kom nej hais hauv nej lub siab tias: Kuv tsis pub rau nws vim yog kuv tsis muaj, tiam sis yog kuv muaj kuv yeej yuav pub rau nws.

25 Thiab nim no, yog tias nej hais li no nyob hauv nej lub siab nej yuav nyob tsis muaj txim, tsis li ntawd nej yuav raug txim; thiab qhov nej raug txim yog ib qho ncaj vim nej mus ntshaw tej uas nej tsis tau txais.

26 Thiab nim no, rau lub hom phiaj ntawm tej yam no uas kuv tau hais rau nej—xws li, rau lub hom phiaj kom txais tau kev zam txim rau nej tej kev txhaum ib hnub dhau ib hnub, xwv kom nej yuav taug kev yam tsis muaj txim ntawm Vajtswv xub ntiag—kuv xav kom nej faib nej tej khoom rau cov neeg pluag, txhua tus tib neeg raws li tej uas nws muaj, xws li pub cov neeg tshaib plab noj, muab khaub ncaws rau cov neeg liab qab hnav, saib xyuas cov neeg muaj mob thiab pab kom lawv dim pa, ntawm sab ntsuj plig thiab sab cev nqaij daim tawv, raws li lawv tej kev xav tau.

27 Thiab saib xyuas kom ua txhua yam no raws li laj lim tswv yim thiab kev muaj txheej txheem; vim tsis tsim nyog kom ib tug neeg khiav nrawm dua li qhov nws muaj zog. Thiab ntxiv, tsim nyog kom nws rau siab, xwv kom nws thiaj yuav yeej tau nqi zog; yog li ntawd, yuav tsum ua txhua yam raws li kev muaj txheej txheem.

28 Thiab kuv xav kom nej nco ntsoov tias, nej leej twg uas qiv ib yam khoom ntawm nws tus neeg zej zog yuav tsum xa rov qab yam uas nws tau qiv, raws li nws pom zoo, yog tsis li ntawd nej yuav ua txhaum; thiab tej zaum nej yuav ua rau nej tus neeg zej zog ua txhaum thiab.

29 Thiab thaum kawg no, kuv tsis muaj peev xwm qhia nej txhua yam uas yuav ua rau nej ua txhaum; vim muaj ntau txoj kev thiab ntau hom, twb muaj ntau heev ua rau kuv suav tsis txheeb.

30 Tiam sis kuv qhia tau rau nej npaum li no, hais tias yog nej tsis xyuas nej tus kheej, thiab nej tej kev xav, thiab nej tej lus, thiab tej uas nej ua, thiab ua raws li Vajtswv tej lus txib, thiab yeej meem ntseeg tej uas nej tau hnov txog qhov uas peb tus Tswv yuav los, kom mus txog thaum nej txoj sia kawg, nej yeej yuav piam sij. Thiab nim no, auj neeg es, nco ntsoov, thiab tsis txhob piam sij.