1 Thiab nim no, tau muaj tias tom qab vaj ntxwv Mauxiyas tau muaj kev thaj yeeb tsis tu ncua tau peb xyoos, nws xav paub txog cov neeg uas tau mus nyob pem thaj av Lihais-Nifais, los sis nyob hauv lub nroog Lihais-Nifais; vim txij li lub sij hawm thaum lawv tau ncaim ntawm thaj av Xalahelas mus, nws cov neeg twb tsis tau hnov xov dab tsi txog lawv hlo li; yog li ntawd, nws cov neeg ua rau nws ntxhov siab vim lawv pheej nug nws tsis tu ncua.

2 Thiab tau muaj tias vaj ntxwv Mauxiyas tau txib kom kaum rau tus txiv neej uas muaj zog mus lawm pem thaj av Lihais-Nifais, mus nug txog lawv cov kwv tij.

3 Thiab tau muaj tias tag kis lawv tau pib mus ped, muaj ib tug hu ua Amoos nrog lawv mus thiab, nws yog ib tug neeg muaj zog thiab muaj peev xwm, thiab yog Xalahelas ib tug xeeb ntxwv; thiab nws kuj yog lawv tus thawj coj.

4 Thiab nim no, lawv tsis paub txoj kev nyob hauv hav zoov uas lawv yuav tsum mus kom mus txog pem thaj av Lihais-Nifais; yog li ntawd lawv mus rau ub rau no nyob rau hauv hav zoov, twb muaj plaub caug hnub uas lawv mus rau ub rau no.

5 Thiab thaum lawv mus rau ub rau no tau plaub caug hnub lawv los txog ib lub pov roob, uas nyob sab qaum teb ntawm thaj av Sailos, thiab lawv rub lawv cov tsev pheeb suab ntaub nyob qhov ntawd.

6 Thiab Amoos coj nws peb tug kwv tij, thiab lawv lub npe yog Amalej, Helees, thiab Heem, thiab lawv mus rau nram thaj av Nifais.

7 Thiab saib seb, lawv ntsib tus vaj ntxwv ntawm cov neeg uas nyob hauv thaj av Nifais, thiab nyob hauv thaj av Sailos; thiab tus vaj ntxwv cov tub zov rooj vag tau koos vij vog lawv, thiab coj lawv mus, thiab khi lawv, thiab muab lawv tso rau hauv lub tsev kaw.

8 Thiab tau muaj tias tom qab lawv raug kaw tau ob hnub, tus vaj ntxwv cov tub zov rooj vag coj lawv los rau ntawm tus vaj ntxwv, thiab muab lawv tej hlua daws; thiab lawv sawv ntawm tus vaj ntxwv xub ntiag, thiab tus vaj ntxwv tau cia, los yog tau txib, kom lawv teb cov lus nug uas nws yuav nug lawv.

9 Thiab nws tau hais rau lawv tias: Saib seb, kuv yog Leehais, Nau-as tus tub, Nau-as yog Xeenas tus tub, tus uas tau tawm pem thaj av Xalahelas tuaj txais thaj av no, uas yog lawv cov yawg koob thaj av, tus uas cov neeg lub suab tau muab tsa ua ib tug vaj ntxwv.

10 Thiab nim no, kuv xav paub vim li cas nej tau tuaj ze lub nroog tej ntsa loog yam tsis ntshai kiag li, thaum kuv thiab kuv cov tub zov rooj vag nyob ntawm rooj vag sab nraud?

11 Thiab nim no, rau qhov no kuv thiaj tau cia nej nyob xwb, xwv kom kuv yuav nug nej, tsis li ces kuv twb kom kuv cov tub zov rooj vag muab nej tua. Nej muaj cai hais lus.

12 Thiab nim no, thaum Amoos pom tias tus vaj ntxwv tau cia nws hais lus, nws tau txav zog mus thiab tau khoov ntshis rau tus vaj ntxwv; thiab sawv dua los nws tau hais tias: Auj vaj ntxwv es, kuv ua Vajtswv tsaug kawg nkaus uas hnub no kuv tseem muaj sia nyob, thiab koj tseem cia rau kuv hais lus; thiab kuv yuav ua tib zoo hais lus nrog kev muaj peev xwm;

13 Vim kuv paub tseeb tias yog koj paub kuv koj yuav tsis cia kuv sia tej hlua khi no. Vim kuv yog Amoos, thiab yog Xalahelas ib tug xeeb ntxwv, thiab tau tawm nram thaj av Xalahelas tuaj nrhiav peb cov kwv tij, cov uas Xeenas coj tawm ntawm thaj av ntawd.

14 Thiab nim no, tau muaj tias tom qab Leehais hnov Amoos cov lus, nws zoo siab heev, thiab hais tias: Nim no, kuv paub tseeb tias kuv cov kwv tij uas nyob hauv thaj av Xalahelas tseem muaj txoj sia nyob. Thiab nim no, kuv yuav xyiv fab; thiab tag kis kuv yuav ua kom kuv cov neeg xyiv fab thiab.

15 Vim saib seb, peb ua qhev rau cov Neeg Lamas, thiab them se uas yog ib qho se uas hnyav heev li. Thiab nim no, saib seb, peb cov kwv tij yuav coj peb dim tawm ntawm peb txoj kev ua qhev, los sis tawm ntawm cov Neeg Lamas txhais tes, thiab peb mam ua peb cov kwv tij tej tub qhe; vim yuav zoo kom peb ua qhev rau cov Neeg Nifais dua li them se rau tus vaj ntxwv ntawm cov Neeg Lamas.

16 Thiab nim no, vaj ntxwv Leehais txib nws cov tub zov rooj vag kom lawv tsis txhob khi Amoos los sis nws cov kwv tij ntxiv lawm, tiam sis txib kom lawv mus rau tim lub pov roob uas nyob sab qaum teb ntawm Sailos, thiab coj Amoos cov kwv tij los rau hauv lub nroog, xwv kom lawv thiaj yuav tau noj thiab tau haus, thiab tau so lawv tus kheej ntawm lawv tej kev khwv taug kev tuaj; vim lawv tau raug kev txom nyem ntau yam; lawv tau yoo tshaib yoo nqhis, thiab sab lim.

17 Thiab nim no, tau muaj tias nyob rau tag kis vaj ntxwv Leehais xa ib zaj lus tshaj tawm mus thoob plaws rau nws cov neeg, xwv kom lawv thiaj yuav sib sau ua ke rau tom lub tuam tsev tuaj mloog cov lus uas nws yuav hais rau lawv.

18 Thiab tau muaj tias thaum lawv tau sib sau tuaj ua ke, nws tau hais rau lawv li no, hais tias: Auj nej, uas yog kuv cov neeg, tsa nej lub taub hau thiab txais kev nplij siab; vim saib seb, twb yuav txog lub sij hawm lawm, los sis tshuav tsis ntev, uas peb yuav tsis tau ua qhev rau peb cov yeeb ncuab ntxiv lawm, txawm hais tias peb tau sib zog tawm tsam lawv, uas twb pab tsis tau dab tsi; txawm li ntawd los kuv cia siab tias tseem tshuav ib txoj kev uas tseem yuav ua tau.

19 Yog li ntawd, cia li tsa nej lub taub hau, thiab zoo siab, thiab tso siab rau Vajtswv, tso siab rau tus Vajtswv uas yog Anplaham thiab Ixaj thiab Yakhauj tus Vajtswv; thiab kuj yog tus Vajtswv uas coj cov neeg Ixayees tawm ntawm Iyiv teb chaws los, thiab ua kom lawv mus ko taw hla tus Dej Hiav Txwv Liab saum av qhuav, thiab muab manas pub lawv noj xwv kom lawv yuav tsis piam sij nyob hauv roob moj sab qhua; thiab nws tau ua ntau yam ntxiv rau lawv.

20 Thiab ntxiv, tib tug Vajtswv ntawd tau coj peb cov yawg koob tawm ntawm thaj av Yeluxalees, thiab tau ceev thiab tsom kwm nws cov neeg los txog nim no; thiab saib seb, vim yog peb tej kev ua phem thiab tej kev qias es nws thiaj tau ua rau peb los ua qhev.

21 Thiab nej tag nrho ua tim khawv hnub no, hais tias Xeenas, tus uas raug tsa los ua vaj ntxwv rau cov neeg no, vim nws xav xav tau nws cov yawg koob thaj av los ua nws tug, yog li ntawd thiaj raug dag los ntawm vaj ntxwv Lamas txoj kev txawj haub thiab txawj ntxias, tus uas tau sib yeem nrog vaj ntxwv Xeenas, thiab tau muab ib feem ntawm thaj av rau hauv vaj ntxwv Xeenas tes, uas twb yog lub nroog Lihais-Nifais, thiab lub nroog Sailos; thiab thaj av uas nyob ib cheeb tsam ntawd—

22 Thiab vaj ntxwv Lamas ua tag nrho tej no, rau lub hom phiaj kom coj tau cov neeg no ua tauj los sis ua qhev. Thiab saib seb, nyob rau lub sij hawm no peb them se rau cov Neeg Lamas tus vaj ntxwv, npaum li uas peb muab ib nrab ntawm peb tej pob kws, thiab peb tej nplej, thiab tag nrho peb tej noob qoob noob loo txhua txhia yam, thiab ib nrab ntawm peb tej yaj thiab peb tej tsiaj txhu uas yug tshiab; thiab cov neeg Lamas tus vaj ntxwv yuam kom peb muab ib nrab ntawm txhua yam uas peb muaj los sis yog peb li, los sis muab peb txoj sia.

23 Thiab nim no, qhov no tsis yog ib qho hnyav heev los? Thiab qhov no, tsis yog peb txoj kev txom nyem loj heev los? Nim no saib seb, muaj ntau yam uas tsim nyog ua rau peb nyuaj siab.

24 Muaj tseeb tiag, kuv hais rau nej, muaj ntau yam uas tsim nyog ua rau peb nyuaj siab; vim saib seb muaj peb cov kwv tij pes tsawg leej uas tau raug tua, thiab lawv cov ntshav tau nrog yam tsis muaj nuj nqis, thiab txhua yam vim yog kev ua phem.

25 Vim yog hais tias cov neeg no tsis tau poob mus rau kev ua txhaum, ces ntshe tus Tswv twb tsis cia kom txoj kev phem loj no los rau lawv. Tiam sis saib seb, lawv tsis mloog nws tej lus; tiam sis muaj kev sib cav sib ceg nyob hauv lawv, twb npaum li uas lawv rov sib tua lawv.

26 Thiab lawv tau muab tus Tswv ib tug yaj saub tua; muaj tseeb tiag, yog ib tug neeg uas Vajtswv xaiv tseg, tus uas tau qhia rau lawv txog lawv tej kev phem thiab kev qias, thiab qhia txog ntau yam uas yuav muaj los yav tom ntej, muaj tseeb tiag, twb hais txog Khetos txoj kev yuav los.

27 Thiab vim nws hais rau lawv tias Khetos yog tus Vajtswv, Leej Txiv ntawm txhua yam, thiab hais tias nws yuav los yug muaj tus yam ntxwv zoo li tib neeg, thiab yog tus yam ntxwv li uas tau siv los tsim tib neeg thaum chiv keeb; los yog hais tias, nws hais tias tau tsim tib neeg muaj tus yam ntxwv zoo li Vajtswv, thiab hais tias Vajtswv yuav nqis los rau hauv noob neej, thiab los txais yuav cev nqaij daim tawv thiab roj ntsha rau nws, thiab yuav mus rau hauv lub ntiaj teb—

28 Thiab nim no, vim nws hais li no, lawv tau muab nws tua; thiab lawv tau ua ntau yam ntxiv uas ua rau Vajtswv txoj kev npau taws los rau lawv. Yog li ntawd, leej twg ho xav tsis tas hais tias lawv raug ua qhev, thiab hais tias lawv raug tej kev txom nyem uas mob heev?

29 Vim saib seb, tus Tswv tau hais tias: Kuv yuav tsis pab kuv cov neeg thaum lub sij hawm lawv ua txhaum; tiam sis kuv yuav cuam tshuam lawv tej kev xwv kom lawv tsis txhob vam meej; thiab tej uas lawv ua yuav zoo li yog cav dawm taw rau lawv.

30 Thiab nws hais ntxiv tias: Yog kuv cov neeg yuav tseb kev vuab tsuab, lawv yuav sau cov npluag nplej ntawm kev vuab tsuab ntawd nyob hauv lub khaub zig cua; thiab qhov xaus ntawd yog toj taug.

31 Thiab nws hais ntxiv tias: Yog kuv cov neeg yuav tseb kev vuab tsuab lawv yuav sau tej cua uas tuaj pem sab hnub tuaj, uas coj kev puas tsuaj tam sim ntawd.

32 Thiab nim no, saib seb, twb tau muaj raws li tus Tswv tej lus cog tseg lawm, thiab nej twb raug nplawm thiab raug txom nyem.

33 Tiam sis yog nej yuav tig rov qab mus cuag tus Tswv kawg siab kawg ntsws, thiab tso siab rau nws, thiab rau siab ntso ua hauj lwm rau nws, yog nej ua li no, nws yuav, raws li nws lub siab nyiam thiab siab xav, coj nej dim tawm ntawm kev ua qhev.