1 Thiab ntxiv kuv cov kwv tij, kuv xav kom nej mloog, vim kuv muaj qee yam ntxiv hais rau nej; vim saib seb, kuv muaj tej yam qhia rau nej txog tej uas yuav muaj los.

2 Thiab Vajtswv ib tug tim tswv tau ua rau kuv paub tej yam uas kuv yuav qhia nej. Thiab nws hais rau kuv tias: Sawv; thiab kuv tau sawv, thiab pom nws sawv ntsug ntawm kuv xub ntiag.

3 Thiab nws hais rau kuv tias: Sawv, thiab mloog cov lus uas kuv yuav qhia koj; vim saib seb, kuv los tshaj rau koj tej moo zoo siab ntawm txoj kev xyiv fab heev.

4 Vim tus Tswv tau hnov koj tej lus thov, thiab tau ntsuas koj txoj kev ncaj ncees, thiab tau xa kuv los tshaj rau koj kom koj yuav zoo siab; thiab kom koj yuav tshaj rau koj cov neeg, kom lawv yuav muaj kev xyiv fab puv npo thiab.

5 Vim saib seb, lub sij hawm yuav los, thiab tshuav tsis deb lawm, tus uas muaj hwj chim, tus Tswv uas Muaj Hwj Chim Loj Tshaj Plaws uas kav, yav tag los, thiab tseem kav nyob tag nrho ib txhiab mus tag nrho ib txhis, yuav nqis saum ntuj ceeb tsheej los nrog noob neej nyob, thiab yuav los nyob hauv ib lub cev av, thiab yuav tawm mus xyuas tib neeg, ua tej txuj ci tseem ceeb zoo kawg, xws li kho cov neeg muaj mob, tsa cov neeg tuag, ua rau cov neeg ceg tawv mus taus kev, cov neeg dig muag rov pom kev, thiab cov neeg lag ntseg rov hnov lus, thiab kho txhua yam kab mob kev nkeeg.

6 Thiab nws yuav ntiab tej dab phem tawm, los sis tej ntsuj plig phem uas nyob hauv noob neej lub siab.

7 Thiab xyuas seb, nws yuav raug tej kev ntxias, thiab kev mob ntawm cev nqaij daim tawv, kev tshaib, kev nqhis, thiab kev sab, ntau tshaj li neeg nyiaj taus, tsuas yog raug kev tuag xwb; vim saib seb, ntshav tawm hauv txhua lub qhov hws los, vim nws txoj kev ntxhov siab rau nws cov neeg tej kev phem thiab kev qias yuav hnyav npaum li ntawd.

8 Thiab nws yuav hu ua Yexus Khetos, Vajtswv Leej Tub, Leej Txiv ntawm lub ntuj thiab lub ntiaj teb, tus Tsim txhua yam txij thaum chiv keeb los; thiab nws niam yuav hu ua Maivliag.

9 Thiab xyuas seb, nws los rau nws cov neeg, xwv kom txoj kev cawm seej yuav los tau rau noob neej los ntawm txoj kev ntseeg nws lub npe; thiab txawm yog tom qab txhua yam li no los lawv tsuas xav tias nws yog ib tug txiv neej xwb, thiab hais tias nws muaj dab phem, thiab yuav nplawm nws, thiab yuav muab nws ntsia rau saum ntoo khaub lig.

10 Thiab hnub peb nws yuav sawv hauv qhov tuag rov qab los; thiab saib seb, nws sawv txiav txim rau neeg ntiaj teb; thiab saib seb, yuav ua tag nrho txhua yam no xwv kom ib txoj kev txiav txim ncaj ncees yuav muaj los rau noob neej.

11 Vim saib seb, thiab nws cov ntshav kuj theej rau tej kev txhaum ntawm cov uas tau poob los ntawm Adas txoj kev ua txhaum, cov uas tau tuag es tsis paub Vajtswv lub siab nyiam ntsig txog lawv, los sis cov uas tsis paub tias lawv ua txhaum.

12 Tiam sis kev txom nyem, kev txom nyem raug tus uas paub tias nws ntxeev siab tawm tsam Vajtswv! Vim txoj kev cawm seej yuav tsis los rau ib tug uas ua li ntawd tsuas yog los ntawm kev hloov siab lees txim thiab kev ntseeg tus Tswv Yexus Khetos xwb.

13 Thiab tus Tswv uas yog Vajtswv tau xa nws cov yaj saub dawb huv los rau tag nrho noob neej, los tshaj tej yam no rau txhua xeem neeg, txhua haiv neeg, thiab txhua yam lus, xwv kom txhua tus uas ntseeg tias Khetos yuav los, cov ntawd thiaj yuav tau txais kev zam txim rau lawv tej kev txhaum, thiab yuav zoo siab nrog txoj kev xyiv fab uas loj kawg nkaus, zoo ib yam li nws twb tau los nrog lawv nyob lawm.

14 Tiam sis tus Tswv uas yog Vajtswv tau pom tias nws cov neeg yog ib co neeg tawv ncauj, thiab nws tsa ib txoj kev cai rau lawv, uas yog Mauxes txoj kev cai.

15 Thiab ntau lub cim, thiab ntau yam txuj ci uas xav tsis thoob, thiab ntau hom cim, thiab ntau yam piv txwv uas nws tau ua rau lawv pom, txog nws txoj kev los; thiab cov yaj saub dawb huv los kuj tau qhia rau lawv txog nws txoj kev los thiab; thiab lawv tseem ua lawv lub siab tawv qhawv, thiab tsis to taub tias Mauxes txoj kev cai twb tsis muaj qab hau dab tsi tsuas yog los ntawm txoj kev theej txhoj ntawm nws cov ntshav xwb.

16 Thiab txawm yog tias cov me nyuam yaus muaj peev xwm ua txhaum los yuav cawm tsis tau lawv dim; tiam sis kuv hais rau koj tias lawv tau koob hmoov; vim saib seb, ib yam li los ntawm Adas, los sis los ntawm txoj kev ntuj tsawb teb tsim, lawv cia li poob, ib yam li ntawd Khetos cov ntshav theej rau lawv tej kev txhaum.

17 Thiab tsis tas li ntawd, kuv hais rau koj tias, yuav tsis muaj dua lwm lub npe los sis lwm txoj kev los sis lwm tus txheej txheem uas txoj kev cawm seej yuav los tau rau noob neej, tsuas yog los ntawm Khetos lub npe, tus Tswv uas Muaj Hwj Chim Loj Tshaj Plaws.

18 Vim saib seb nws txiav txim, thiab nws txoj kev txiav txim yeej ncaj; thiab tus me nyuam mos yuav tsis piam sij yog nws tuag thaum tseem mos liab; tiam sis tib neeg haus kev raug txim rau lawv tus kheej tsuas yog lawv txo hwj chim thiab hloov los ua zoo li me nyuam yaus xwb, thiab ntseeg tias txoj kev cawm seej tau los, thiab tab tom los, thiab yuav los, los ntawm Khetos, tus Tswv uas Muaj Hwj Chim Loj Tshaj Plaws cov ntshav uas theej txhoj.

19 Vim tus neeg ntawm sab cev nqaij daim tawv yog ib tug yeeb ncuab rau Vajtswv, thiab ib txwm yog txij thaum Adas poob los, thiab yuav yog, mus ib txhiab thiab ib txhis, tsuas yog nws ywj rau tus Vaj Ntsuj Plig Dawb Huv tej kev tshoov siab, thiab tso tus neeg ntawm sab cev nqaij daim tawv tseg thiab los ua ib tug neeg dawb huv los ntawm tus Tswv Khetos txoj kev theej txhoj, thiab hloov los ua zoo li ib tug me nyuam, mloog lus, muaj siab mos siab muag, txo hwj chim, ua siab ntev, muaj kev hlub puv npo, txaus siab ua txhua yam uas tus Tswv pom tias tsim nyog muab rau nws ua, ib yam li ib tug me nyuam yaus txaus siab ua txhua yam rau nws txiv.

20 Thiab tsis tas li ntawd, kuv hais rau koj tias, lub sij hawm yuav los thaum txoj kev paub txog tus Cawm Seej yuav nthuav mus thoob plaws rau txhua haiv neeg, txhua xeem neeg, txhua yam lus, thiab txhua yam neeg.

21 Thiab saib seb, thaum lub sij hawm ntawd los, yuav tsis muaj ib tug twg uas tsis muaj txim nyob ntawm Vajtswv xub ntiag, tsuas yog cov me nyuam yaus xwb, tsuas yog los ntawm txoj kev hloov siab lees txim thiab muaj kev ntseeg tus Tswv uas yog Vajtswv tus uas Muaj Hwj Chim Loj Tshaj Plaws lub npe.

22 Thiab txawm yog lub sij hawm no los, thaum koj twb tau qhia rau koj cov neeg tej yam uas tus Tswv koj tus Vajtswv tau txib kom koj qhia, txawm li ntawd los Vajtswv tsis tau pom tias lawv tsis muaj txim, tsuas yog raws li tej lus uas kuv tau hais rau koj.

23 Thiab nim no kuv tau hais tej lus uas tus Tswv uas yog Vajtswv tau txib kom kuv hais.

24 Thiab tus Tswv hais li no tias: Tej lus no yuav nyob ruaj nrees ua tim khawv tseeb tawm tsam cov neeg no, nyob rau hnub txiav txim; yog li ntawd lawv yuav raug txiav txim, txhua tus neeg raws li tej uas lawv ua, seb lawv ua zoo, los sis lawv ua phem.

25 Thiab yog tias lawv ua phem ces lawv yuav raug coj mus pom qhov phem ntawm lawv tej kev txhaum thiab kev qias, uas ua rau lawv nkaum ntawm tus Tswv xub ntiag mus rau hauv kev nyuaj siab thiab kev tsim txom tsis txawj kawg, ntawm qhov chaw uas lawv yuav tawm rov qab los tsis tau; yog li ntawd lawv tau haus kev raug txim rau lawv tej ntsuj plig.

26 Yog li ntawd, lawv tau haus tawm ntawm lub khob ntawm Vajtswv txoj kev npau taws, uas txoj kev txim lij tsis muaj cai thim rau lawv ib yam li tsis muaj cai thim qhov uas Adas yuav tsum poob vim yog nws noj lub txiv uas txwv tsis pub noj; yog li ntawd, kev hlub tshua tsis muaj cai txhiv tau lawv ib zaug ntxiv mus ib txhis li.

27 Thiab lawv txoj kev tsim txom zoo li ib lub pas hluav taws thiab leej faj, uas tus nplaim cig tsis txawj tuag, thiab cov pa taws nce mus ib txhiab thiab ib txhis li. Tus Tswv tau txib kuv hais li no. Amees.