1 Thiab nim no Anpinadais hais rau lawv tias: Kuv xav kom nej to taub tias Vajtswv tus kheej yuav nqis los nrog noob neej nyob, thiab yuav los txhiv nws cov neeg dim.

2 Thiab vim nws nyob ua neej ntawm sab cev nqaij daim tawv ces yuav muab nws hu ua Vajtswv Leej Tub, thiab vim tau ywj nws cev nqaij daim tawv ua raws li Leej Txiv lub siab nyiam, nws yog Leej Txiv thiab Leej Tub—

3 Hu ua Leej Txiv, vim nws tau xeeb los ntawm Vajtswv lub hwj chim, thiab hu ua Leej Tub, vim yog sab cev nqaij daim tawv; yog li ntawd thiaj los ua Leej Txiv thiab Leej Tub—

4 Thiab nkawd yog ib tug Vajtswv, muaj tseeb tiag, yog kiag Leej Txiv uas Nyob Mus Ib Txhis ntawm lub ntuj thiab lub ntiaj teb.

5 Thiab yog li ntawd vim cev nqaij daim tawv ywj rau tus Ntsuj Plig, los sis Leej Tub ywj rau Leej Txiv, uas yog ib tug Vajtswv, nws tiv kev haub ntxias, thiab tsis kam qaug rau kev haub ntxias, tiam sis cia nws tus kheej raug thuam, thiab nplawm, thiab ntiab tawm, thiab nws cov neeg tsis yuav nws.

6 Thiab tom qab txhua yam no, tom qab ua ntau yam txuj ci tseem ceeb loj nyob hauv noob neej, nws yuav raug coj, muaj tseeb tiag, twb zoo ib yam li Yaxayas tau hais tias, coj ib yam li ib tug yaj hais tsis tau lus los rau tus neeg txiav plaub, nws thiaj tsis qhib nws lub qhov ncauj.

7 Muaj tseeb tiag, zoo li ntawd nws yuav raug coj mus, raug ntsia saum ntoo khaub lig, thiab raug tua, cev nqaij daim tawv yuav raug txoj kev tuag, Leej Tub lub siab nyiam yuav ywj rau Leej Txiv lub siab nyiam.

8 Thiab li no Vajtswv ua rau kev tuag tej hlua tu, vim nws kov yeej kev tuag; muab hwj chim rau Leej Tub los pab daws noob neej—

9 Nws tau nce mus rau saum ntuj ceeb tsheej, muaj ntsoov lub siab hlub tshua; muaj puv npo kev khuv leej rau noob neej; sawv hauv nruab nrab ntawm lawv thiab kev txim lij; tau ua rau kev tuag tej hlua tu, nws tau ris lawv tej kev ua phem thiab lawv tej kev ua txhaum rau nws tus kheej, tau txhiv lawv dim, thiab tau them tej nqi ntawm txoj kev txim lij.

10 Thiab nim no kuv hais rau nej, leej twg yuav hais txog nws tej tiam neeg tom ntej? Saib seb, kuv hais rau nej tias, thaum nws tus ntsuj plig raug txi rau kev txhaum nws yuav pom nws cov tub ki. Thiab nim no nej yuav hais li cas? Thiab leej twg yuav ua nws cov tub ki?

11 Saib seb kuv hais rau nej tias, txhua tus uas tau hnov cov yaj saub tej lus, muaj tseeb tiag, tag nrho cov yaj saub dawb huv uas tau qhia tej yuav muaj los yav tom ntej txog tus Tswv txoj kev los—kuv hais rau nej tias, tag nrho cov uas tau ua raws li lawv tej lus, thiab ntseeg tias tus Tswv yuav txhiv nws cov neeg dim, thiab tos ntsoov rau hnub uas yuav zam lawv tej kev txhaum ntawd, kuv hais rau nej tias, cov no yog nws cov tub ki, los sis lawv yog cov uas yuav tau Vajtswv lub nceeg vaj los ua lawv tug.

12 Vim cov no yog cov uas nws tau ris lawv tej kev txhaum; cov no yog cov uas nws tau tuag rau lawv, tau txhiv lawv dim ntawm lawv tej kev ua txhaum. Thiab nim no, lawv tsis yog nws cov tub ki los?

13 Muaj tseeb tiag, thiab cov yaj saub, txhua tus uas tau qhib qhov ncauj qhia tej yuav muaj los yav tom ntej, uas tsis tau poob mus rau kev ua txhaum, kuv hais txog tag nrho cov yaj saub dawb huv txij puag thaum lub ntiaj teb chiv keeb, lawv tsis yog nws cov tub ki los? Kuv hais rau nej tias lawv yog nws cov tub ki.

14 Thiab cov no yog cov uas tshaj tawm kev thaj yeeb, uas coj tej moo zoo los; uas tshaj tawm kev cawm seej; uas hais rau Xi-oos hais tias, Nej tus Vajtswv kav!

15 Thiab auj lawv txhais ko taw zoo nkauj kawg nyob rau saum tej roob!

16 Thiab ntxiv, cov uas tseem tab tom tshaj tawm kev thaj yeeb lawv txhais ko taw zoo nkauj kawg nyob rau saum tej roob!

17 Thiab ntxiv, cov uas yuav tshaj tawm kev thaj yeeb txij no mus, muaj tseeb tiag, txij lub caij no mus thiab mus ib txhis li lawv txhais ko taw zoo nkauj kawg nyob rau saum tej roob!

18 Thiab saib seb, kuv hais rau nej tias, tsis tas li no xwb. Tus uas nws txhais ko taw zoo nkauj kawg nyob rau saum tej roob yog tus uas coj tej moo zoo los, uas yog tus tsim kev thaj yeeb, muaj tseeb tiag, nws twb yog tus Tswv, tus uas tau txhiv nws cov neeg dim; muaj tseeb tiag, tus uas tau pub kev cawm seej rau nws cov neeg;

19 Yog hais tias, tsis yog los ntawm kev txhiv dim uas nws tau ua rau nws cov neeg, uas tau npaj txij puag thaum ntuj tsim teb raug los, kuv hais rau nej tias, yog tsis yog li no ces, tib neeg sawv daws yeej yuav raug piam sij.

20 Tiam sis saib seb, kev tuag tej hlua yuav tu, thiab Leej Tub yuav kav, thiab muaj hwj chim tswj cov tuag; yog li ntawd, nws ua rau cov tuag sawv rov los.

21 Thiab muaj ib txoj kev sawv rov los, twb yog thawj thawj txoj kev sawv rov los; muaj tseeb tiag, twb yog ib txoj kev sawv rov los ntawm cov uas tau nyob yav tas lawm, thiab cov tseem nyob ziag no, thiab cov uas tseem yuav nyob yav tom ntej, kom txog thaum Khetos sawv rov los—vim yuav muab nws hu li no.

22 Thiab nim no, txoj kev sawv rov los ntawm tag nrho cov yaj saub, thiab tag nrho cov uas ntseeg cov yaj saub tej lus, los sis tag nrho cov uas tau ua raws li Vajtswv tej lus txib, yuav sawv los thaum thawj zaug kev sawv rov los; yog li ntawd, lawv yog thawj txoj kev sawv rov los.

23 Lawv sawv los nyob nrog Vajtswv tus uas tau txhiv lawv dim; yog li ntawd lawv tau txoj sia nyob mus ib txhis los ntawm Khetos, tus uas tau ua rau kev tuag tej hlua tu.

24 Thiab cov no yog cov uas muaj feem nyob hauv thawj txoj kev sawv rov los; thiab cov no yog cov uas tuag ua ntej Khetos los, thaum lawv tsis tau paub, thaum tsis tau tshaj tawm kev cawm seej rau lawv. Thiab xws li no tus Tswv txum tim lawv rov qab los; thiab lawv muaj feem nyob hauv thawj txoj kev sawv rov los, los sis tau txoj sia nyob mus ib txhis, vim tus Tswv tau txhiv lawv dim.

25 Thiab cov me nyuam yaus los kuj tau txoj sia nyob mus ib txhis thiab.

26 Tiam sis saib seb, thiab cia li ntshai, thiab cia li tshee hnyo rau Vajtswv, vim tsim nyog nej yuav tshee hnyo; vim tus Tswv yuav tsis muab ib tug twg txhiv dim uas ntxeev siab tawm tsam nws thiab tuag thaum lawv tseem muaj kev txhaum; muaj tseeb tiag, twb yog tag nrho cov uas tau piam sij thaum lawv tseem muaj kev txhaum txij puag thaum lub ntiaj teb chiv keeb los, cov uas txhob txwm ntxeev siab tawm tsam Vajtswv, cov uas paub Vajtswv tej lus txib, thiab tsis ua raws li tej lus txib ntawd; cov no yog cov uas tsis muaj feem nyob hauv thawj txoj kev sawv rov los.

27 Yog li ntawd puas tsim nyog nej cia li tshee hnyo? Vim kev cawm seej yuav tsis los rau tus uas zoo li ntawd; vim tus Tswv tsis tau txhiv tus uas zoo li ntawd dim; muaj tseeb tiag, thiab tus Tswv txhiv tsis tau tus uas zoo li ntawd dim; vim nws tsis muaj cuab kav xyeej nws tus kheej; vim nws tsis muaj cuab kav xyeej kev txim lij thaum kev txim lij txiav txim los.

28 Thiab nim no kuv hais rau nej tias lub sij hawm yuav los uas tus Tswv cov tub qhe yuav tshaj tawm tus Tswv txoj kev cawm seej rau txhua haiv neeg, txhua xeem neeg, txhua yam lus, thiab txhua yam neeg.

29 Muaj tseeb tiag, tus Tswv es, koj cov neeg zov nyas yuav tsa lawv lub suab; lawv yuav hu nkauj nrog lub suab ua ke; vim lawv yuav pom tim ntsej tim muag, thaum tus Tswv yuav coj Xi-oos rov qab los.

30 Cia li tsa suab nrog kev xyiv fab; cia li hu nkauj ua ke, nej tej chaw puas tsuaj ntawm Yeluxalees; vim tus Tswv tau nplij nws cov neeg, nws tau txhiv Yeluxalees dim.

31 Tus Tswv tau thws nws txhais npab dawb huv rau txhua haiv neeg lub qhov muag pom; thiab tib neeg tag nrho thoob ntiaj teb yuav pom peb tus Vajtswv txoj kev cawm seej.