1 Nim no muaj ib qho chaw nyob hauv Seloos uas cov Neeg Lamas tej ntxhais tuaj sib sau ua ke hu nkauj, thiab seev cev, thiab ua kom lawv zoo siab.

2 Thiab tau muaj tias muaj ib hnub lawv ib pab uas tsawg tuaj sib sau ua ke hu nkauj thiab seev cev.

3 Thiab nim no vaj ntxwv Nau-as cov pov thawj, vim lawv txaj muag rov qab mus rau tom thaj av Nifais, muaj tseeb tiag, thiab kuj ntshai tias cov neeg yuav muab lawv tua, yog li ntawd lawv thiaj tsis kam rov qab mus rau lawv tej poj niam thiab tej me nyuam.

4 Thiab vim lawv nyob rau hauv hav zoov, thiab lawv pom cov Neeg Lamas tej ntxhais, lawv thiaj nkaum thiab ntsia lawv;

5 Thiab thaum cov Neeg Lamas tej ntxhais ob peb leeg tuaj sib sau ua ke seev cev, lawv tawm ntawm lawv tej chaw nkaum los thiab txhom cov Neeg Lamas tej ntxhais thiab coj lawv mus rau hauv hav zoov; muaj tseeb tiag, lawv coj nees nkaum plaub leeg ntawm cov Neeg Lamas tej ntxhais mus rau hauv hav zoov.

6 Thiab tau muaj tias thaum cov Neeg Lamas paub tias lawv tej ntxhais ploj lawm, lawv npau taws rau Leehais cov neeg, vim lawv xav tias ntshe yog Leehais cov neeg.

7 Yog li ntawd lawv xa lawv cov tub rog tuaj; muaj tseeb tiag, twb yog cov Neeg Lamas tus vaj ntxwv uas coj nws cov neeg; thiab lawv tuaj rau pem thaj av Nifais ua kom Leehais cov neeg puas tsuaj.

8 Thiab nim no Leehais tuaj saum tus pej thuam pom lawv, nws twb tau pom tag nrho lawv tej kev npaj ua rog; yog li ntawd nws sib sau nws cov neeg tuaj ua ke, thiab nkaum tos lawv nyob hauv tej nras thiab hauv hav zoov.

9 Thiab tau muaj tias thaum cov Neeg Lamas tuaj txog, Leehais cov neeg pib tawm ntawm lawv tej chaw nkaum los tawm tsam lawv, thiab pib muab lawv tua.

10 Thiab tau muaj tias npluav rog tab tom yog ib npluav uas mob kawg nkaus, vim lawv sib tua zoo li tej tsov ntxhuav tom lawv tej tsiaj noj.

11 Thiab tau muaj tias Leehais cov neeg pib raws cov Neeg Lamas khiav ua ntej lawv; tiam sis lawv twb tsis coob npaum li ib nrab ntawm cov Neeg Lamas. Tiam sis lawv tua kom ceev lawv txoj sia, thiab lawv cov poj niam, thiab lawv cov me nyuam; yog li ntawd lawv sib zog sib tua yam li tej zaj.

12 Thiab tau muaj tias Leehais cov neeg pom cov Neeg Lamas tus vaj ntxwv nyob nrog lawv cov neeg tuag; tiam sis nws tseem tsis tau tuag, nws raug mob thiab nws cov neeg tso nws tseg rau hauv av, vim nws cov neeg khiav tawm nrawm heev li.

13 Thiab lawv coj nws thiab qhwv nws tej qhov txhab, thiab coj nws mus rau Leehais, thiab hais tias: Saib seb, nov yog cov Neeg Lamas tus vaj ntxwv; vim nws mob nws tau qaug nrog lawv cov neeg tuag, thiab lawv tau tso nws tseg; thiab saib seb, peb coj nws los rau koj; thiab nim no cia peb muab nws tua.

14 Tiam sis Leehais hais rau lawv tias: Nej tsis txhob tua nws, tiam sis coj nws los ntawm no xwv kom kuv pom nws. Thiab lawv coj nws los. Thiab Leehais hais rau nws tias: Yog vim li cas es nej thiaj tuaj ua rog tawm tsam kuv cov neeg? Saib seb, kuv cov neeg twb tsis tau rhuav kev lav lus uas kuv lav rau koj; yog li ntawd, vim li cas koj thiaj li rhuav tej lus uas koj lav rau kuv cov neeg?

15 Thiab nim no tus vaj ntxwv hais tias: Kuv tau rhuav tej lus uas tau lav vim koj cov neeg tau nyiag kuv cov neeg tej ntxhais; yog li ntawd, kuv npau taws kuv thiaj tau hais kom kuv cov neeg tuaj ua rog tawm tsam koj cov neeg.

16 Thiab nim no Leehais twb tsis tau hnov dab tsi txog tej xwm no; yog li ntawd nws hais tias: Kuv yuav tshawb hauv kuv cov neeg thiab txhua tus uas tau ua tej no yuav raug piam sij. Yog li ntawd nws hais kom tshawb nrhiav nyob hauv nws cov neeg.

17 Nim no thaum Nkide-oos hnov tej no, vim nws yog vaj ntxwv tus thawj tub rog, nws txav zog mus thiab hais rau tus vaj ntxwv tias: Kuv thov koj txhob rawm maj, thiab tsis txhob tshawb hauv cov neeg no, thiab tsis txhob liam tej no rau lawv.

18 Puas yog koj tsis nco qab txog koj txiv cov pov thawj, uas cov neeg no nrhiav kev ua kom puas tsuaj? Thiab tsis yog lawv nyob tom hav zoov los? Thiab lawv tsis yog cov uas tau nyiag cov Neeg Lamas tej ntxhais los?

19 Thiab nim no, saib seb, thiab qhia tej yam no rau tus vaj ntxwv, xwv kom nws yuav qhia rau nws cov neeg kom lawv tsis txhob npau taws rau peb; vim saib seb lawv tab tom npaj tuaj tawm tsam peb; thiab saib seb peb kuj tsis muaj coob.

20 Thiab saib seb, lawv tuaj nrog lawv tej tsoom tub rog coob; thiab tsuas yog hais tias tus vaj ntxwv hais kom lawv tsis txhob npau taws rau peb, tsis li ces peb yuav tsum piam sij.

21 Vim tsis tau muaj raws li Anpinadais tej lus los, tej uas nws tau qhia tej yuav muaj los yav tom ntej tawm tsam peb—thiab tag nrho tej no vim yog peb tsis mloog tus Tswv tej lus, thiab tsis tig ncaim ntawm peb tej kev ua phem?

22 Thiab nim no cia peb daws tus vaj ntxwv txoj kev chim, thiab peb ua kom tau li tej lus uas peb tau lav rau nws; vim peb ua qhev yuav zoo dua peb tas peb txoj sia; yog li ntawd, cia peb tsis txhob ua kom muaj nqaij ntuag ntshav nrog ntau ntxiv.

23 Thiab nim no Leehais qhia rau cov Neeg Lamas tus vaj ntxwv txhua yam ntsig txog nws txiv, thiab cov pov thawj uas tau khiav mus rau hauv hav zoov, thiab muab qhov uas txhom cov Neeg Lamas tej ntxhais tso rau lawv.

24 Thiab tau muaj tias tus vaj ntxwv thiaj tsis chim rau Leehais cov neeg; thiab nws hais rau lawv tias: Cia peb mus ntsib kuv cov neeg, tsis txhob nqa ntaj riam; thiab kuv cog lus rau koj nrog kev lav lus hais tias kuv cov neeg yuav tsis tua koj cov neeg.

25 Thiab tau muaj tias lawv raws cov Neeg Lamas tus vaj ntxwv qab, thiab mus ntsib cov Neeg Lamas, tsis nqa ntaj riam. Thiab tau muaj tias lawv mus ntsib cov Neeg Lamas; thiab cov Neeg Lamas tus vaj ntxwv nyo hau rau lawv, thiab thov kom zam rau Leehais cov neeg.

26 Thiab thaum cov Neeg Lamas pom Leehais cov neeg, pom tias lawv tsis nqa ntaj riam, lawv muaj kev khuv leej rau lawv thiab tsis npau taws rau lawv, thiab rov qab mus rau tom lawv thaj av nrog lawv tus vaj ntxwv nrog kev thaj yeeb.