1 Thiab nim no tau muaj tias cov uas tsis ntseeg tej kev tsim txom lub koom txoos tau muaj ntau heev uas ua rau cov ntseeg pib yws yws, thiab yws rau lawv cov thawj coj txog tej xwm txheej; thiab lawv yws rau Amas. Thiab Amas piav tej teeb meem rau lawv tus vaj ntxwv, Mauxiyas. Thiab Mauxiyas sab laj nrog nws cov pov thawj.

2 Thiab tau muaj tias vaj ntxwv Mauxiyas xa ib zaj lus tshaj tawm mus thoob plaws rau thaj av ib puag ncig txwv tsis pub kom ib tug uas tsis ntseeg tsim txom cov uas zwm rau Vajtswv lub koom txoos.

3 Thiab tau muaj ib lo lus txib nruj mus rau thoob plaws tag nrho tej ceg koom txoos txwv tsis pub muaj kev tsim txom nyob hauv lawv, kom muaj kev sib txig rau txhua tus neeg;

4 Kom lawv tsis txhob cia kev muab hlob los sis kev khav txiv los cuam tshuam lawv txoj kev thaj yeeb; kom txhua tus neeg saib nws tus neeg zej zog zoo ib yam li nws tus kheej, thiab kom lawv siv lawv tus kheej txhais tes los khwv rau lawv noj.

5 Muaj tseeb tiag, thiab tag nrho lawv cov pov thawj thiab cov xib hwb yuav tsum siv lawv tus kheej txhais tes los khwv rau lawv noj, nyob hauv tag nrho txhua lub caij tsuas yog thaum muaj mob, los sis thaum txom nyem heev xwb; thiab thaum lawv ua tej yam no, lawv tau Vajtswv txoj kev tshav ntuj nplua mias.

6 Thiab pib muaj kev thaj yeeb ntau nyob hauv thaj av; thiab cov neeg pib muaj coob tuaj, thiab pib khiav ri niab mus thoob plaws lub teb chaws, muaj tseeb tiag, mus rau sab qaum teb thiab sab qab teb, rau sab hnub tuaj thiab sab hnub poob, thiab ua tej nroog loj thiab tej zos nyob thoob plaws tag nrho txhua ces kaum ntawm thaj av.

7 Thiab tus Tswv tau los xyuas lawv thiab ua rau lawv vam meej, thiab lawv los ua ib haiv neeg coob thiab nplua nuj.

8 Nim no tau suav Mauxiyas cov tub nrog cov uas tsis ntseeg; thiab Amas ib tug tub los kuj nrog lawv, nws hu ua Amas, raws li nws txiv; txawm li ntawd los, nws hloov los ua ib tug neeg phem heev thiab pe dab pe mlom. Thiab nws yog ib tug neeg muaj lus ntau, thiab tau hais lus dag ntxias ntau rau cov neeg; yog li ntawd nws coj tau cov neeg coob leej mus ua raws li nws tej kev ua phem.

9 Thiab nws los ua ib tug uas khaum kev heev rau txoj kev huaj vam ntawm Vajtswv lub koom txoos; thiab nws nyiag cov neeg lub siab coj mus; thiab ua kom muaj kev tsis sib haum xeeb ntau nyob hauv cov neeg; thiab ua rau Vajtswv tus yeeb ncuab muaj cib fim siv nws lub hwj chim kav lawv.

10 Thiab nim no tau muaj tias thaum nws tseem tab tom mus ncig rhuav Vajtswv lub koom txoos, vim nws mus ncig ntsiag to nrog Mauxiyas cov tub nrhiav kev ua kom lub koom txoos puas tsuaj, thiab mus coj tus Tswv cov neeg kom mus yuam kev, tsis txhob ua raws li Vajtswv tej lus txib, los sis tus vaj ntxwv—

11 Thiab ib yam li uas kuv tau hais rau nej lawm, thaum lawv tseem tab tom mus ncig ntxeev siab tawm tsam Vajtswv, saib seb, tus Tswv tus tim tswv tshwm sim los rau lawv; thiab nws nqis los zoo li nyob hauv ib tauv huab; thiab nws hais lus zoo li ib lub suab xob quaj, uas ua rau daim av co qeeg nkaws rau ntawm qhov uas lawv sawv;

12 Thiab lawv ceeb xav tsis tag li, uas ua rau lawv qaug rau hauv av, thiab tsis to taub tej lus uas nws hais rau lawv.

13 Txawm li ntawd los nws hais lus nrov dua hais tias: Amas, cia li sawv thiab sawv los, yog vim li cas koj thiaj li tsim txom Vajtswv lub koom txoos? Vim tus Tswv tau hais tias: Nov yog kuv lub koom txoos, thiab kuv yuav txhim tsa nws; thiab yuav tsis muaj ib yam dab tsi rhuav tshem tau kuv lub koom txoos, tsuas yog kuv cov neeg tej kev ua txhaum xwb.

14 Thiab tus tim tswv, rov qab hais dua tias: Saib seb, tus Tswv tau hnov nws cov neeg tej lus thov, thiab kuj hnov tej lus thov ntawm nws tus tub qhe, Amas, tus uas yog koj txiv; vim nws tau thov nrog kev ntseeg ntau heev ntsig txog koj xwv kom yuav coj tau koj los paub qhov tseeb; yog li ntawd, vim yog rau lub hom phiaj no kuv thiaj tau los ua kom koj paub txog Vajtswv lub hwj chim thiab txoj cai, xwv kom nws yuav teb tau nws cov tub qhe tej lus thov raws li lawv txoj kev ntseeg.

15 Thiab nim no saib seb, koj xyeej puas tau Vajtswv lub hwj chim? Vim saib seb, tsis yog kuv lub suab ua rau av qeeg nkaws los? Thiab puas yog koj twb pom kuv nyob ntawm koj xub ntiag? Thiab twb yog Vajtswv xa kuv los.

16 Nim no kuv hais rau koj tias: Cia li mus, thiab nco ntsoov koj cov yawg koob txoj kev poob cev qhev nyob hauv thaj av Helas, thiab nyob hauv thaj av Nifais; thiab nco ntsoov tej yam tseem ceeb uas nws tau ua rau lawv; vim lawv ua qhev, thiab nws tau tso lawv dim. Thiab nim no kuv hais rau koj, Amas, cia li mus, thiab tsis txhob nrhiav kev ua kom lub koom txoos puas tsuaj ntxiv lawm, xwv kom nws yuav teb lawv tej lus thov, thiab ua li no txawm hais tias koj yuav ua kom koj tus kheej raug ntiab tawm.

17 Thiab nim no tau muaj tias cov lus no yog cov lus kawg uas tus tim tswv hais rau Amas, thiab nws ncaim mus.

18 Thiab nim no Amas thiab cov uas nrog nws rov qab vau rau hauv av dua, vim lawv txoj kev xav tsis tag ntau heev li; vim lawv tau pom tus Tswv ib tug tim tswv ntawm lawv qhov muag kiag; thiab nws lub suab nrov cuag xob quaj, uas ua rau daim av co qeeg nkaws; thiab lawv paub tias tsuas yog Vajtswv lub hwj chim xwb thiaj ua tau daim av co qeeg nkaws thiab tshee qeeg nkaws zoo li twb yuav tawg.

19 Thiab nim no Amas txoj kev xav tsis tag muaj ceem heev uas ua rau nws hais tsis tau lus, ua rau nws qhib tsis tau nws lub qhov ncauj; muaj tseeb tiag, thiab nws qaug zog, ua rau nws txav tsis tau nws ob txhais tes; yog li ntawd cov uas nrog nws muab nws nqa, thiab ev nws yam qaug cev, twb mus txog thaum uas lawv muab nws tso rau ntawm nws txiv xub ntiag.

20 Thiab lawv qhia nws txiv txog txhua yam uas tau tshwm sim los rau lawv; thiab nws txiv zoo siab, vim nws paub tias yog Vajtswv lub hwj chim.

21 Thiab nws hais kom ib pab neeg coob coob sib sau tuaj ua ke xwv kom lawv yuav ua pov thawj rau qhov uas tus Tswv tau ua rau nws tus tub, thiab rau cov uas nrog nws.

22 Thiab nws hais kom cov pov thawj sib sau tuaj ua ke; thiab lawv pib yoo mov, thiab thov tus Tswv lawv tus Vajtswv xwv kom nws yuav qhib Amas lub qhov ncauj, xwv kom nws yuav hais tau lus, thiab xwv kom nws tes taw yuav rov muaj zog—xwv kom cov neeg qhov muag yuav qhib kom pom kev thiab paub txog Vajtswv txoj kev zoo thiab lub yeeb koob.

23 Thiab tau muaj tias tom qab lawv yoo mov thiab thov Vajtswv tau ncua li ob hnub ob hmos, Amas tes taw rov muaj zog tuaj, thiab nws sawv ntsug thiab pib hais lus rau lawv, qhia lawv kom cia li zoo siab:

24 Vim, nws hais tias, kuv tau hloov siab lees txim rau kuv tej kev txhaum, thiab tus Tswv tau txhiv kuv dim lawm; saib seb kuv yug los ntawm tus Ntsuj Plig.

25 Thiab tus Tswv hais rau kuv hais tias: Tsis txhob xav tsis thoob tias tib neeg sawv daws, muaj tseeb tiag, cov txiv neej thiab cov poj niam, tag nrho txhua haiv neeg, txhua xeem neeg, txhua yam lus thiab txhua yam neeg, yuav tsum yug dua tshiab; muaj tseeb tiag, yug los ntawm Vajtswv, hloov ntawm lawv lub siab nyiam sab cev nqaij daim tawv thiab txoj kev poob, mus rau kev ncaj ncees, uas Vajtswv tau muab lawv txhiv dim, los ua nws cov tub thiab cov ntxhais;

26 Thiab zoo li no lawv los ua neeg tshiab; thiab yog lawv tsis ua li no, ces lawv yeej yuav tsis tau Vajtswv lub nceeg vaj los ua lawv ntiag tug hlo li.

27 Kuv hais rau nej tias, tsuas yog ua li no xwb, tsis li ces lawv yuav raug ntiab tawm; thiab kuv paub li no, vim kuv twb yuav luag raug ntiab tawm.

28 Txawm li ntawd los, tom qab kuv ntsib kev txom nyem ntau, hloov siab lees txim yuav luag tuag, tus Tswv tau muaj siab hlub tshua pom zoo rub kuv tawm ntawm ib txoj kev kub hnyiab uas kav ib txhis, thiab kuv yug los ntawm Vajtswv.

29 Tus Tswv tau txhiv kuv tus ntsuj plig dim ntawm kev poob siab tag nrho thiab tej hlua ntawm kev ua phem. Kuv tau nyob hauv lub qhov uas tsaus ntuj tshaj plaws; tiam sis nim no kuv pom Vajtswv txoj kev kaj uas zoo kawg nkaus. Kuv tus ntsuj plig raug tsim txom nrog txoj kev tsim txom uas nyob mus ib txhis; tiam sis tus Tswv rub kuv dim, thiab kuv tus ntsuj plig tsis muaj mob ntxiv lawm.

30 Kuv xyeej kuv tus Txhiv Dim, thiab xyeej tej uas peb cov yawg koob tau hais; tiam sis nim no xwv kom tib neeg yuav paub ua ntej tias nws yuav los, thiab hais tias nws yeej nco ntsoov txhua yam muaj sia uas nws tau tsim, nws yuav ua nws tus kheej tshwm sim los rau txhua tus.

31 Muaj tseeb tiag, txhua lub hauv caug yuav txhos, thiab txhua tus nplaig yuav lees rau nws. Muaj tseeb tiag, twb yog thaum txog hnub kawg, thaum nws yuav txiav txim rau txhua tus neeg, thaum ntawd lawv yuav lees tias nws yog Vajtswv; thaum ntawd lawv, cov uas ua neej tsis muaj Vajtswv, yuav lees tias txoj kev txiav txim ntawm kev rau txim uas kav ib txhis yeej ncaj rau lawv; thiab lawv yuav qeeg, thiab tshee hnyo, thiab caws rau ntawm nws lub qhov muag uas pom tas txhua yam.

32 Thiab nim no tau muaj tias Amas pib mus qhia cov neeg txij lub sij hawm no mus, thiab cov uas nrog Amas thaum lub sij hawm tus tim tswv tshwm sim los rau lawv, mus ncig thoob plaws rau txhua thaj av, tshaj tawm rau tag nrho cov neeg txog tej xwm uas lawv tau hnov thiab tau pom, thiab qhuab qhia Vajtswv txoj lus thaum lawv raug txoj kev txom nyem ntau, vim lawv raug tsim txom heev los ntawm cov uas tsis ntseeg, vim coob leej muab lawv ntaus.

33 Tiam sis txawm tias muaj tag nrho tej no los, lawv tseem faib ntau yam kev nplij siab rau cov ntseeg, ua rau lawv txoj kev ntseeg ruaj khov kho, thiab ntuas kom lawv ua siab ntev nyiaj thiab tiv tiag tiag kom ua raws li Vajtswv tej lus txib.

34 Thiab plaub tug ntawm cov uas nrog Amas yog Mauxiyas cov tub; thiab lawv tej lub npe yog Amoos, thiab Aloos, thiab Oonaws, thiab Heenais; nov yog tej lub npe ntawm Mauxiyas cov tub.

35 Thiab lawv mus ncig thoob plaws thaj av Xalahelas, thiab tag nrho cov neeg uas yog vaj ntxwv Mauxiyas kav, rau siab ntso kho tag nrho tej uas lawv tau ua piam rau cov ntseeg, lees txim tag nrho rau lawv tej kev txhaum, thiab tshaj tawm tag nrho tej uas lawv tau pom, thiab piav txog tej kev qhia tej yuav muaj los yav tom ntej thiab tej vaj lug kub rau txhua tus uas kam mloog lawv.

36 Thiab xws li no lawv yog cov cuab yeej nyob hauv Vajtswv txhais tes uas coj tau ntau leej los paub txog qhov tseeb, muaj tseeb tiag, los paub txog lawv tus Txhiv Dim.

37 Thiab lawv tau koob hmoov kawg! Vim lawv tshaj tawm kev thaj yeeb; lawv tshaj tawm tej moo zoo; thiab lawv tshaj rau cov neeg tias tus Tswv yog tus kav.