Phau Ntawv Mauxiyas

1 Thiab nim no tsis muaj kev sib cav sib ceg ntxiv nyob thoob plaws hauv thaj av Xalahelas, nyob thoob plaws cov neeg uas yog vaj ntxwv Npeyamis cov, vaj ntxwv Npeyamis thiaj muaj kev thaj yeeb tsis tu ncua nyob tag nrho hauv nws lub neej uas tseem tshuav.

2 Thiab tau muaj tias nws muaj peb leeg tub; thiab nws hu lawv lub npe ua Mauxiyas, thiab Hilaulas, thiab Hilamas. Thiab nws ua kom lawv yuav kawm tag nrho nws cov yawg koob yam lus hais, xwv kom lawv thiaj yuav los ua cov txiv neej uas txawj to taub; thiab xwv kom lawv yuav paub txog tej uas yuav muaj los yav tom ntej uas lawv cov yawg koob tej qhov ncauj tau hais, uas tus Tswv txhais tes tau coj los rau lawv.

3 Thiab nws kuj tau qhia lawv txog cov ceev xwm txheej uas tau muab sau rau saum cov phiaj toog, hais tias: Kuv cov tub, kuv xav kom nej nco ntsoov tias yog tsis muaj cov phiaj no, uas muaj cov ceev xwm txheej no thiab cov lus txib no, ces ntshe peb yeej yuav tsis paub, tsis hais lub sij hawm no los yog, es tsis paub txog tej txuj ci uas neeg tsis paub txog Vajtswv.

4 Vim yeej muaj tsis tau hais tias peb txiv, Lihais, yuav nco tau tag nrho tej yam no, uas tau muab qhia rau nws cov me nyuam, tsuas yog muaj cov phiaj no los pab xwb; vim nws tau kawm cov neeg Iyiv yam lus yog li ntawd nws txawj nyeem cov ntawv kos no, thiab qhia lawv rau nws cov me nyuam, xwv kom lawv thiaj yuav txawj qhia tej ntawd rau lawv cov me nyuam, thiab ua kom muaj raws li Vajtswv tej lus txib, los txog rau lub sij hawm nim no.

5 Kuv hais rau nej, kuv cov tub es, yog tsis muaj tej no, uas tau muab ceev thiab tshwj tseg los ntawm Vajtswv txhais tes, xwv kom peb yuav tau nyeem thiab to taub txog nws tej txuj ci uas neeg paub tsis txog, thiab muaj nws tej lus txib nyob ntawm peb tej qhov muag tas mus li, ces ntshe peb tej yawg koob los twb tso kev ntseeg tseg lawm, thiab ntshe peb twb zoo li peb cov kwv tij, cov Neeg Lamas, cov uas tsis paub ib yam dab tsi li txog tej yam no, los sis twb tsis ntseeg tej ntawd thaum muab qhia rau lawv, vim yog lawv cov yawg koob tej kab lis kev cai, uas yuam kev.

6 Auj kuv cov tub es, kuv xav kom nej nco ntsoov tias tej lus hais no muaj tseeb, thiab cov ceev xwm txheej no los kuj muaj tseeb. Thiab saib seb, thiab Nifais cov phiaj, uas ntim cov ceev xwm txheej thiab peb cov yawg koob tej lus hais txij li lub sij hawm lawv tau ncaim Yeluxalees los txog nim no, thiab nco ntsoov tias Nifais cov phiaj yeej muaj tseeb; thiab peb yeej paub tias cov phiaj ntawd muaj tseeb vim peb twb pom kiag ntawm peb qhov muag.

7 Thiab nim no, kuv cov tub es, kuv xav kom nej nco ntsoov rau siab ntso tshawb hauv Nifais cov phiaj, xwv kom cov phiaj yuav pab tau nej; thiab kuv xav kom nej ua raws li Vajtswv tej lus txib, xwv kom nej yuav vam meej nyob hauv thaj av raws li cov lus cog tseg uas tus Tswv cog rau peb cov yawg koob.

8 Thiab vaj ntxwv Npeyamis tau qhia ntau yam ntxiv rau nws cov tub, uas tsis tau muab sau rau hauv phau ntawv no.

9 Thiab tau muaj tias tom qab vaj ntxwv Npeyamis tau qhia nws cov tub tas lawm, nws laus zuj zus, thiab nws pom tias tsis ntev no nws yeej yuav mus rau txoj kev uas tag nrho neeg ntiaj teb mus; yog li ntawd, nws tau xav tias tsim nyog uas nws yuav tsum muab lub teb chaws tso rau nws ib tug tub.

10 Yog li ntawd, nws txib kom coj Mauxiyas los rau nws; thiab cov lus no yog cov uas nws tau hais rau Mauxiyas, hais tias: Kuv tus tub, kuv xav kom koj xa ib zaj lus tshaj tawm mus thoob plaws thaj av no rau tag nrho cov neeg no, los sis Xalahelas cov neeg, thiab Mauxiyas cov neeg uas nyob hauv thaj av, kom lawv sib sau tuaj ua ib ke; vim tag kis los ntawm kuv tus kheej lub qhov ncauj rau kuv cov neeg no kuv tshaj tawm hais tias koj yog ib tug vaj ntxwv thiab ib tug kav cov neeg no, cov uas tus Tswv peb tus Vajtswv tau muab rau peb.

11 Thiab tsis tas li ntawd, kuv yuav tis ib lub npe rau cov neeg no, xwv kom lawv yuav txawv ntawm tag nrho cov neeg uas tus Tswv uas yog Vajtswv tau coj tawm ntawm thaj av Yeluxalees tuaj; thiab kuv ua li no vim lawv tau ua ib co neeg uas rau siab ua raws li tus Tswv tej lus txib.

12 Thiab kuv tis ib lub npe rau lawv uas yuav tsis raug rho tawm ib zaug li, tsuas yog los ntawm kev ua txhaum xwb.

13 Muaj tseeb tiag, thiab kuv hais rau koj ntxiv dua, yog hais tias tus Tswv cov neeg uas tau koob hmoov nplua mias no poob mus rau kev ua txhaum, thiab los ua ib co neeg phem thiab ib co neeg deev luag poj luag txiv, ces tus Tswv yuav muab lawv tshem tawm, xwv kom lawv thiaj yuav hloov los qaug zog zoo li lawv cov kwv tij; thiab nws yuav tsis tsom kwm lawv ntxiv los ntawm nws lub hwj chim uas loj tshaj txhua yam thiab zoo kawg nkaus, ib yam li nws tau tsom kwm peb cov yawg koob los txog rau nim no.

14 Vim kuv hais rau koj tias, yog nws tsis tau ncav nws txhais npab los tsom kwm peb cov yawg koob ces ntshe lawv yeej yuav poob rau hauv cov Neeg Lamas tes, thiab raug tsim txom los ntawm cov Neeg Lamas txoj kev ntxub.

15 Thiab tau muaj tias tom qab vaj ntxwv Npeyamis tau hais cov lus no rau nws tus tub tas lawm, nws tau muab hauj lwm saib xyuas txhua yam dej num ntawm lub teb chaws rau nws.

16 Thiab tsis tas li ntawd, nws kuj tau muab hauj lwm saib xyuas cov ceev xwm txheej uas tau muab sau rau saum cov phiaj toog rau nws; thiab Nifais cov phiaj thiab; thiab, Lanpas rab ntaj thiab, thiab lub pob los sis lub taw kev, uas tau coj peb cov yawg koob dhau hauv roob moj sab qhua, uas tus Tswv txhais tes tau npaj xwv kom yuav coj tau lawv, txhua tus raws li txoj kev mloog lus thiab kev rau siab ntso uas lawv ua rau nws.

17 Yog li ntawd, thaum lawv tsis muaj kev ntseeg lawv tsis huaj vam thiab tsis vam meej thaum lawv taug kev mus, tiam sis lawv raug thawb rov qab, thiab ua rau Vajtswv tsis zoo siab rau lawv; thiab yog li ntawd lawv thiaj raug kev tshaib nqhis thiab kev txom nyem mob heev, txhaub kom lawv nco ntsoov txog lawv tej dej num.

18 Thiab nim no, tau muaj tias Mauxiyas tau mus thiab ua li nws txiv tau txib kom nws ua, thiab tshaj tawm rau tag nrho cov neeg uas nyob hauv thaj av Xalahelas xwv kom lawv yuav sib sau tuaj ua ke, mus rau pem lub tuam tsev mus mloog tej lus uas nws txiv yuav hais rau lawv.