1 Thiab tau muaj tias Leehais thiab nws cov neeg rov qab mus rau tom lub nroog Nifais, thiab rov qab pib muaj kev thaj yeeb nyob hauv thaj av.

2 Thiab tau muaj tias tom qab ntau hnub, cov thawj coj ntawm cov Neeg Lamas rov pib txhaub kom lawv cov neeg npau taws rau cov Neeg Nifais, thiab lawv pib tuaj rau hauv tej ciaj ciam ntawm thaj av ib puag ncig.

3 Nim no lawv tsis kam tua cov Neeg Nifais, vim yog tej lus uas lawv tus vaj ntxwv tau lav rau Leehais; tiam sis lawv pheej ntaus Leehais cov neeg tej plhu, thiab yuam cai rau lawv; thiab pib muab tej nra hnyav rau lawv lub nraub qaum, thiab tsav lawv ib yam li lawv tsav ib tug luj hais tsis tau lus—

4 Muaj tseeb tiag, tau muaj tag nrho tej no xwv kom yuav muaj raws li tus Tswv txoj lus.

5 Thiab nim no cov Neeg Nifais tej kev txom nyem hnyav heev, thiab yeej tsis muaj kev rau lawv khiav dim ntawm cov Neeg Lamas tes, vim cov Neeg Lamas tau vij lawv nyob rau txhua txhia sab.

6 Thiab tau muaj tias cov Neeg Nifais pib yws rau tus vaj ntxwv vim yog lawv tej kev txom nyem; thiab lawv pib xav mus tawm tsam ua rog nrog cov Neeg Lamas. Thiab lawv tej lus yws ua rau tus vaj ntxwv xeeb txob heev; yog li ntawd nws cia lawv mus ua raws li lawv siab xav.

7 Thiab lawv sib sau tuaj ua ke dua, thiab hnav lawv tej cuab yeej ua rog, thiab tawm mus tawm tsam cov Neeg Lamas, mus raws kom lawv khiav tawm ntawm lawv thaj av mus.

8 Thiab tau muaj tias cov Neeg Lamas kov yeej lawv, thiab ua rau lawv thim rov qab, thiab tua lawv tuag coob leej.

9 Thiab nim no muaj ib txoj kev nyiav thiab kev quaj ntsuag loj nyob hauv Leehais cov neeg, tus poj ntsuam quaj ntsuag rau nws tus txiv, tus tub thiab tus ntxhais quaj ntsuag rau nkawd txiv, thiab cov kwv tij quaj ntsuag rau lawv cov kwv tij.

10 Nim no muaj poj ntsuam coob heev nyob hauv thaj av, thiab lawv quaj heev ib hnub dhau ib hnub, vim txoj kev ntshai heev txog cov Neeg Lamas tau los rau lawv.

11 Thiab tau muaj tias lawv tej kev quaj tsis tu ncua txhaub Leehais cov neeg uas tseem tshuav kom npau taws rau cov Neeg Lamas; thiab lawv rov qab mus ua rog dua, tiam sis cov Neeg Lamas ua rau lawv thim rov qab dua, thiab lawv tuag coob leej.

12 Muaj tseeb tiag, lawv rov mus dua uas yog zaum peb, thiab raug ib yam nkaus li qub; thiab cov uas tsis tuag rov qab los rau tom lub nroog Nifais.

13 Thiab lawv txo lawv lub hwj chim mus ti nkaus rau hauv av, muab lawv tus kheej ywj rau tus quab ntawm kev ua qhev, cia lawv tus kheej raug ntaus, thiab raug tav mus rau ub rau no, thiab ris nra hnyav, raws li lawv cov yeeb ncuab lub siab nyiam.

14 Thiab lawv tau txo lawv lub hwj chim twb txo hwj chim kom kawg siab kawg ntsws; thiab lawv thov kawg siab kawg ntsws rau Vajtswv; muaj tseeb tiag, lawv twb thov tas hnub rau lawv tus Vajtswv xwv kom nws yuav coj lawv dim ntawm lawv tej kev txom nyem.

15 Thiab nim no tus Tswv qeeb hnov lawv tej lus thov vim yog lawv tej kev ua phem; txawm li ntawd los tus Tswv yeej hnov lawv tej lus thov, thiab pib ua rau cov Neeg Lamas lub siab mos muag, uas ua rau lawv pib txo kom lawv tej nra sib me ntsis; tiam sis tus Tswv tsis tau pom zoo coj lawv dim ntawm kev ua qhev.

16 Thiab tau muaj tias lawv maj mam pib vam meej nyob hauv thaj av, thiab pib cog noob qoob loos nplua mias ntau ntxiv, thiab yug tej pab tsiaj, thiab tsiaj txhu, xwv kom lawv thiaj tsis tau nyiaj tshaib yoo nqhis.

17 Nim no muaj poj niam coob, coob dua li muaj txiv neej; yog li ntawd vaj ntxwv Leehais txib kom txhua tus txiv neej yuav tsum faib kev noj haus rau cov poj ntsuam thiab lawv cov me nyuam, xwv kom lawv thiaj tsis tuag tshaib; thiab lawv ua li no vim yog lawv muaj coob leej uas raug tua tuag.

18 Nim no Leehais cov neeg nyob ua ib pab npaum li uas lawv muaj cuab kav ua, thiab saib xyuas lawv tej qoob loos thiab lawv tej tsiaj;

19 Thiab vaj ntxwv Leehais twb tsis tso siab cia nws tus kheej mus rau sab ntsa loog sab nraud, tsuas yog hais tias nws coj nws cov tub zov nyas nrog nws mus, ntshai hais tias tsam muaj tej yam dab tsi ho ua rau nws poob mus rau hauv cov Neeg Lamas tes.

20 Thiab nws txib kom nws cov neeg yuav tsum zov thaj av ib puag ncig, seb los ntawm tej yam dab tsi lawv puas yuav txhom tau cov pov thawj uas khiav mus rau hauv hav zoov, cov uas tau nyiag cov Neeg Lamas tej ntxhais, thiab tau txob kom muaj kev puas tsuaj loj los rau lawv.

21 Vim lawv xav txhom cov pov thawj ntawd xwv kom lawv yuav rau txim rau lawv; vim cov pov thawj ntawd tau los rau hauv thaj av Nifais thaum tsaus ntuj, thiab nyiag lawv tej qoob loos thiab lawv tej khoom muaj nuj nqis ntau yam nqa mus; yog li ntawd lawv thiaj li nkaum tos lawv.

22 Thiab tau muaj tias tsis muaj kev kub ntxhov ntxiv ntawm cov Neeg Lamas thiab Leehais cov neeg, twb mus txog rau thaum Amoos thiab nws cov kwv tij tuaj rau hauv thaj av.

23 Thiab vim vaj ntxwv Leehais thiab nws cov tub zov nyas tau mus rau sab rooj vag sab nraud ntawm lub nroog, lawv mus pom Amoos thiab nws cov kwv tij; thiab xav hais tias lawv yog Nau-as cov pov thawj yog li ntawd nws thiaj txib kom muab lawv txhom thiab khi, thiab muab tso rau hauv lub tsev kaw. Thiab yog hais tias lawv yog Nau-as cov pov thawj ces ntshe nws twb txib kom muab lawv tua.

24 Tiam sis thaum nws paub hais tias lawv tsis yog, tiam sis hais tias lawv yog nws cov kwv tij, thiab tau tuaj nram thaj av Xalahelas tuaj, nws xyiv fab heev kawg nkaus li.

25 Nim no vaj ntxwv Leehais tau xa, ua ntej Amoos tuaj, ib pab neeg tsawg mus nrhiav thaj av Xalahelas; tiam sis lawv mus nrhiav tsis tau, thiab lawv tau poob zoo hauv hav zoov.

26 Txawm li ntawd los, lawv nrhiav tau ib thaj av uas muaj neeg nyob; muaj tseeb tiag, ib thaj av uas muaj pob txha qhuav nyob thoob plaws; muaj tseeb tiag, ib thaj av uas tau muaj neeg nyob thiab tau raug puas tsuaj; thiab vim lawv xav hais tias thaj av ntawd yog thaj av Xalahelas, lawv thiaj rov qab los rau thaj av Nifais, lawv los txog tej ciaj ciam ntawm thaj av ua ntej ob peb hnub Amoos tuaj.

27 Thiab lawv nqa tau ib phau ceev xwm txheej nrog lawv los, twb yog ib phau ceev xwm txheej ntawm cov neeg uas lawv mus pom tej pob txha; thiab phau ceev xwm txheej yog muab sau rau saum cov phiaj quav hlau.

28 Thiab nim no Leehais rov qab xyiv fab dua thaum Amoos qhia rau nws hais tias vaj ntxwv Mauxiyas muaj ib lub txiaj ntsim los ntawm Vajtswv, uas nws thiaj muaj peev xwm txhais tau tej lus sau ntawd; muaj tseeb tiag, thiab Amoos los kuj zoo siab.

29 Tiam sis Amoos thiab nws cov kwv tij tu siab puv npo vim lawv cov kwv tij coob coob leej raug tua tuag;

30 Thiab vim yog vaj ntxwv Nau-as thiab nws cov pov thawj tau ua rau cov neeg ua ntau yam txhaum thiab ntau yam phem tawm tsam Vajtswv; thiab lawv kuj quaj ntsuag hais tias Anpinadais tuag lawm; thiab quaj ntsuag hais tias Amas thiab cov neeg uas nrog nws tau khiav mus, cov uas tau tsa Vajtswv ib lub koom txoos los ntawm Vajtswv lub zog thiab lub hwj chim, thiab los ntawm kev ntseeg rau tej lus uas Anpinadais tau hais.

31 Muaj tseeb tiag, lawv quaj ntsuag hais tias lawv tau khiav mus, vim lawv tsis paub xyov lawv khiav mus dua twg lawm. Nim no, yog mus tau, ces lawv twb zoo siab hlo mus koom nrog lawv, vim lawv tus kheej twb tau khi lus nrog Vajtswv los ua hauj lwm rau nws thiab coj nws tej lus txib.

32 Thiab nim no txij thaum Amoos tuaj, vaj ntxwv Leehais thiab coob leej ntawm nws cov neeg kuj tau khi lus nrog Vajtswv, kom ua hauj lwm rau nws thiab ua raws li nws tej lus txib.

33 Thiab tau muaj tias vaj ntxwv Leehais thiab coob leej ntawm nws cov neeg xav ua kev cai raus dej; tiam sis tsis muaj leej twg nyob hauv thaj av uas muaj txoj cai los ntawm Vajtswv los. Thiab Amoos tsis kam ua yam no, vim nws xav tias nws yog ib tug tub qhe uas tsis tsim nyog.

34 Yog li ntawd lub sij hawm ntawd vaj ntxwv Leehais thiab nws cov neeg tsis tau tsa ib lub koom txoos rau lawv tus kheej, tos ntsoov tus Tswv tus Ntsuj Plig. Nim no lawv xav kom lawv zoo ib yam li Amas thiab cov neeg uas nrog nws, cov uas tau khiav mus rau hauv hav zoov.

35 Lawv xav ua kev cai raus dej los ua tim khawv thiab ua pov thawj hais tias lawv txaus siab los ua hauj lwm rau Vajtswv nrog tag nrho lawv lub siab; txawm li ntawd los lawv tseem tau ncua lub sij hawm; thiab mam qhia ib zaj txog qhov uas lawv ua kev cai raus dej tom qab no.

36 Thiab nim no tag nrho tej kev tawm tswv yim ntawm Amoos thiab nws cov neeg, thiab ntawm vaj ntxwv Leehais thiab nws cov neeg, yog npaj los kom coj tau lawv khiav dim ntawm cov Neeg Lamas tes thiab ntawm kev poob cev qhev.