1 Nim no tus Tswv tau ceeb toom Amas tias vaj ntxwv Nau-as cov tub rog yuav tuaj tawm tsam lawv, thiab vim Amas tau qhia rau nws cov neeg paub, yog li ntawd lawv sau lawv tej pab tsiaj los ua ke, thiab sau lawv tej qoob loos, thiab khiav mus rau hauv hav zoov ua ntej vaj ntxwv Nau-as cov tub rog.

2 Thiab tus Tswv txhawb lawv lub dag lub zog, xwv kom vaj ntxwv Nau-as cov neeg tsis muaj peev xwm tuaj caum tau lawv rhuav kom lawv puas tsuaj.

3 Thiab lawv khiav tau yim hnub ke mus rau hauv hav zoov.

4 Thiab lawv mus txog rau ib thaj av, muaj tseeb tiag, twb yog ib thaj av uas zoo nkauj heev thiab xis nyob heev, ib thaj av uas muaj dej huv huv.

5 Thiab lawv rub lawv tej tsev pheeb suab ntaub, thiab pib mus ncaws teb, thiab pib ua vaj ua tsev; muaj tseeb tiag, lawv nquag, thiab sib zog khwv heev li.

6 Thiab cov neeg xav kom Amas ua lawv tus vaj ntxwv, vim nws cov neeg hlub nws heev.

7 Tiam sis nws hais rau lawv tias: Saib seb, tsis tsim nyog uas peb yuav muaj ib tug vaj ntxwv; vim tus Tswv hais li no: Nej tsis txhob saib ib tug neeg siab dua lwm tus, los sis ib tug tsis txhob xav tias nws zoo dua lwm tus; yog li ntawd kuv hais rau nej tias tsis tsim nyog uas nej yuav muaj ib tug vaj ntxwv.

8 Txawm li ntawd los, yog ua tau, es nej muaj cov neeg ncaj ncees los ua nej tej vaj ntxwv tas mus li, ces yuav zoo rau nej muaj ib tug vaj ntxwv.

9 Tiam sis nco ntsoov txog vaj ntxwv Nau-as thiab nws cov pov thawj tej kev ua phem; thiab kuv tus kheej tau mag ib rooj ntxiab, thiab tau ua ntau yam uas txaus ntxub raws li tus Tswv lub qhov muag pom, uas ua rau kuv hloov siab lees txim mob heev;

10 Txawm li ntawd los, tom qab muaj kev txom nyem ntau, tus Tswv tau hnov kuv lub suab taij, thiab tau teb kuv tej lus thov, thiab tau muab kuv ua ib rab cuab yeej nyob hauv nws txhais tes coj tau nej coob coob leej los paub txog nws qhov tseeb.

11 Txawm li ntawd los, qhov no kuv tsis khav, vim kuv tsis tsim nyog khav txog kuv tus kheej.

12 Thiab nim no kuv hais rau nej tias, nej raug vaj ntxwv Nau-as quab yuam, thiab raug ua tauj ua qhev rau nws thiab nws cov pov thawj, thiab raug lawv coj mus ua ntau yam phem; yog li ntawd tej hlua ntawm kev ua phem tau khi nej.

13 Thiab nim no vim Vajtswv lub hwj chim tau tso nej dim ntawm tej hlua no; muaj tseeb tiag, twb dim ntawm vaj ntxwv Nau-as thiab nws cov neeg tes, thiab dim ntawm tej hlua ntawm kev ua phem, yog li ntawd kuv thov kom nej nyob ruaj nrees rau ntawm txoj kev ywj pheej no uas tus Tswv tau ua rau nej nyob ywj siab, thiab kom nej tsis txhob tso siab rau ib tug neeg twg los ua ib tug vaj ntxwv kav nej.

14 Thiab tsis txhob tso siab rau ib tug neeg twg los ua nej tus xib hwb los sis tus qhuab qhia, tsuas yog hais tias nws yog ib tug neeg ntawm Vajtswv, uas taug ntshis nws tej kev thiab ua raws li nws tej lus txib.

15 Amas tau qhia nws cov neeg li no, kom txhua tus neeg hlub nws tus neeg zej zog ib yam li nws tus kheej, xwv kom tsis txhob muaj kev sib cav sib ceg nyob hauv lawv.

16 Thiab nim no, Amas yog lawv tus pov thawj hlob, vim nws yog tus tsim lawv lub koom txoos.

17 Thiab tau muaj tias tsis muaj leej twg txais tau txoj cai los tshaj tawm los sis qhuab qhia tsuas yog Vajtswv muab los ntawm Amas. Yog li ntawd nws tsa tag nrho lawv cov pov thawj thiab tag nrho lawv cov xib hwb; thiab nws tsis tau tsa ib tug twg tsuas yog lawv yog neeg ncaj ncees xwb.

18 Yog li ntawd lawv tau saib xyuas lawv cov neeg, thiab tau qhia lawv ntau yam txog kev ncaj ncees.

19 Thiab tau muaj tias lawv pib vam meej heev nyob hauv thaj av; thiab lawv muab thaj av hu ua Helas.

20 Thiab tau muaj tias lawv tau huaj vam thiab vam meej heev nyob hauv thaj av Helas; thiab lawv ua ib lub nroog, uas lawv muab hu ua lub nroog Helas.

21 Txawm li ntawd los, tus Tswv pom tias tsim nyog qhuab ntuas nws cov neeg; muaj tseeb tiag, nws sim lawv kev ua siab ntev thiab lawv txoj kev ntseeg.

22 Txawm li ntawd los—tus uas tso siab rau tus Tswv, tus Tswv yuav muab tus ntawd tsa sawv thaum txog hnub kawg. Muaj tseeb tiag, thiab tau muaj li no rau cov neeg no.

23 Vim saib seb, kuv qhia rau nej paub tias cov Neeg Lamas coj lawv mus rau kev ua cev qhev, thiab tsis muaj leej twg yuav tso tau lawv dim tsuas yog tus Tswv lawv tus Vajtswv xwb, muaj tseeb tiag, twb yog Anplaham thiab Ixaj thiab Yakhauj tus Vajtswv.

24 Thiab tau muaj tias nws tau tso lawv dim, thiab tau ua rau lawv pom nws lub hwj chim uas loj kawg nkaus, thiab lawv tej kev zoo siab mas ntau kawg li.

25 Vim saib seb, tau muaj tias thaum lawv nyob hauv thaj av Helas, muaj tseeb tiag, nyob hauv lub nroog Helas, thaum tab tom ua teb ib ncig, saib seb cov Neeg Lamas ib pab tub rog nyob rau ntawm thaj av tej ciaj ciam.

26 Nim no tau muaj tias Amas cov kwv tij khiav ntawm lawv tej teb, thiab sib sau ua ke mus rau hauv lub nroog Helas; thiab lawv ntshai heev vim yog cov Neeg Lamas tau tuaj.

27 Tiam sis Amas tawm mus sawv nrog lawv, thiab ntuas lawv kom lawv tsis txhob ntshai, tiam sis kom lawv nco ntsoov tus Tswv lawv tus Vajtswv thiab nws yeej yuav cawm lawv dim.

28 Yog li ntawd lawv thiaj tsum lawv tej kev ntshai, thiab pib thov tus Tswv kom ua rau cov Neeg Lamas lub siab muag, xwv kom cov Neeg Lamas yuav tseg lawv, thiab lawv cov poj niam, thiab lawv cov me nyuam txoj sia.

29 Thiab tau muaj tias tus Tswv tau ua rau cov Neeg Lamas lub siab muag. Thiab Amas thiab nws cov kwv tij tawm mus thiab tso lawv tus kheej rau hauv cov Neeg Lamas tes; thiab cov Neeg Lamas muab thaj av Helas los ua lawv tug.

30 Nim no cov Neeg Lamas cov tub rog, uas mus raws vaj ntxwv Leehais cov neeg qab, tau poob zoo rau hauv hav zoov tau ntau hnub.

31 Thiab saib seb, lawv mus nrhiav tau vaj ntxwv Nau-as cov pov thawj, nyob hauv ib qho chaw uas lawv muab hu ua Amuloos; thiab lawv tau pib nyob hauv thaj av Amuloos thiab tau pib ncaws teb.

32 Nim no tus thawj coj ntawm cov pov thawj ntawd muaj npe hu ua Amuloos.

33 Thiab tau muaj tias Amuloos tau thov cov Neeg Lamas; thiab nws kuj xa lawv cov poj niam, uas yog cov Neeg Lamas tej ntxhais, mus thov lawv cov nus, xwv kom cov Neeg Lamas tsis txhob ua rau lawv cov txiv puas tsuaj.

34 Thiab cov Neeg Lamas muaj kev khuv leej rau Amuloos thiab nws cov kwv tij, thiab tsis ua rau lawv puas tsuaj, vim yog lawv cov poj niam.

35 Thiab Amuloos thiab nws cov kwv tij tau koom nrog cov Neeg Lamas, thiab lawv tau mus nrhiav thaj av Nifais nyob hauv hav zoov thaum lawv mus pom thaj av Helas, uas Amas thiab nws cov kwv tij nyob.

36 Thiab tau muaj tias cov Neeg Lamas cog lus rau Amas thiab nws cov kwv tij tias, yog lawv qhia txoj kev uas coj mus rau thaj av Nifais rau lawv ces lawv yuav tseg lawv txoj sia thiab txoj kev ywj pheej rau lawv.

37 Tiam sis tom qab Amas qhia txoj kev uas coj mus rau thaj av Nifais rau lawv cov Neeg Lamas tsis ua raws li lawv tej lus cog tseg; tiam sis lawv tso tub zov nyas zov ib puag ncig ntawm thaj av Helas, zov Amas thiab nws cov kwv tij.

38 Thiab cov uas tseem tshuav ntawm cov Neeg Lamas mus rau tom thaj av Nifais; thiab ib feem ntawm cov uas mus rau tom thaj av Nifais rov qab los rau thaj av Helas, thiab lawv coj tau cov poj niam thiab cov me nyuam ntawm cov tub zov nyas uas tseem nyob hauv thaj av.

39 Thiab cov Neeg Lamas tus vaj ntxwv cia rau Amuloos ua ib tug vaj ntxwv thiab ib tug kav nws cov neeg, uas yog nyob hauv thaj av Helas; txawm li ntawd los nws tsis muaj hwj chim ua dab tsi uas txawv ntawm cov Neeg Lamas tus vaj ntxwv lub siab nyiam.