1 Thiab nim no, tau muaj tias tom qab Anpinadais tau hais tej lus no, nws xyab nws txhais tes thiab hais tias: Lub sij hawm yuav los thaum uas tag nrho sawv daws yuav pom tus Tswv txoj kev cawm seej; thaum txhua haiv neeg, txhua xeem neeg, txhua yam lus, thiab txhua yam neeg yuav pom tim ntsej tim muag thiab yuav lees txhaum rau Vajtswv tias nws tej kev txiav txim yeej ncaj ncees.

2 Thiab thaum ntawd cov neeg phem yuav raug ntiab tawm, thiab yuav raug tej yam uas ua rau lawv quaj nrov nrov, thiab nyiav, thiab quaj ntsuag, thiab ua rau lawv tom hniav qees; thiab li no los vim yog lawv tsis mloog tus Tswv lub suab; yog li ntawd tus Tswv tsis txhiv lawv dim.

3 Vim lawv nyiam sab cev nqaij daim tawv thiab ua li dab phem, thiab tus dab phem muaj hwj chim kav lawv; muaj tseeb tiag, twb yog tus nab txwj nab laug uas tau dag ntxias peb thawj nkawm niam txiv, uas tau ua rau nkawd poob; uas tau ua rau tib neeg sawv daws hloov los ua neeg ntshaw sab cev nqaij daim tawv, ua raws li cev nqaij daim tawv nyiam, ua li dab phem, paub qhov phem txawv qhov zoo, cia lawv tus kheej ywj rau tus dab phem.

4 Yog li ntawd tib neeg sawv daws yuam kev; thiab saib seb, ntshe lawv yuav yuam kev tas mus li yog hais tias Vajtswv tsis txhiv nws cov neeg dim ntawm lawv txoj kev yuam kev thiab txoj kev poob.

5 Tiam sis nco ntsoov tias tus uas tseem pheej ua neej nyob raws li nws sab cev nqaij daim tawv nyiam, thiab mus raws li txoj kev txhaum thiab txoj kev ntxeev siab tawm tsam Vajtswv, tus ntawd tseem poob rau kev txhaum thiab tus dab phem tseem muaj hwj chim tag nrho kav nws. Yog li ntawd, nws zoo li twb tsis tau muaj txoj kev txhiv dim li, vim nws yog ib tug yeeb ncuab rau Vajtswv; thiab tus dab phem los kuj yog ib tug yeeb ncuab rau Vajtswv thiab.

6 Thiab nim no yog hais tias Khetos tsis tau los rau hauv lub ntiaj teb, kuv hais txog tej uas tseem yuav muaj los yav tom ntej zoo li tej ntawd twb muaj tas los lawm, ces twb tsis muaj kev txhiv dim.

7 Thiab yog hais tias Khetos tsis tau sawv hauv qhov tuag rov qab los, los sis tsis tau ua rau kev tuag tej hlua tu xwv kom lub qhov ntxa tsis txhob muaj kev yeej, thiab xwv kom kev tuag tsis txhob muaj kuab, ces twb tsis muaj txoj kev sawv rov los.

8 Tiam sis muaj ib txoj kev sawv rov los, yog li ntawd lub qhov ntxa thiaj tsis muaj yeej, thiab Khetos kov yeej qhov uas kev tuag muaj kuab heev tas lawm.

9 Nws yog txoj kev kaj thiab txoj sia ntawm neeg ntiaj teb; muaj tseeb tiag, yog ib txoj kev kaj uas tsis txawj kawg, uas tsis muaj hnub yuav tsaus; muaj tseeb tiag, thiab kuj yog ib txoj sia uas tsis txawj kawg, xwv kom tsis txhob muaj kev tuag ntxiv lawm.

10 Tsis hais lub cev uas txawj tuag no yuav hloov los ua lub cev tsis txawj tuag, thiab lub cev uas txawj lwj yuav hloov los ua lub cev uas tsis txawj lwj, thiab yuav raug coj mus sawv ntawm Vajtswv lub rooj txiav txim, rau nws txiav txim raws li tej yam uas lawv tau ua, seb lawv ua zoo los sis lawv ua phem—

11 Yog hais tias lawv ua zoo, ces mus rau txoj kev sawv rov los ntawm txoj sia uas tsis txawj kawg thiab txoj kev zoo siab; thiab yog hais tias lawv ua phem, ces mus rau txoj kev sawv rov los ntawm kev raug txim uas tsis txawj kawg, thiab raug coj mus rau tus dab phem, tus uas tau kav lawv, uas yog kev raug txim—

12 Thiab tau ua raws li lawv tus kheej lub siab nyiam thiab lub siab xav txog sab cev nqaij daim tawv; thiab ib txwm tsis tau thov tus Tswv thaum ob txhais npab ntawm kev hlub tshua tseem ncav rau lawv; vim tus Tswv ncav nws ob txhais npab ntawm kev hlub tshua rau lawv, thiab lawv tsis kam txais; lawv twb raug ceeb toom txog lawv tej kev ua phem thiab tiam sis lawv tsis kam tso tej ntawd tseg; thiab tus Tswv txib lawv kom hloov siab lees txim thiab tiam sis lawv tsis kam hloov siab lees txim.

13 Thiab nim no, puas tsim nyog nej tshee hnyo thiab hloov siab lees txim rau nej tej kev txhaum, thiab nco ntsoov tias tsuas yog los ntawm Khetos xwb nej thiaj li yuav txais tau kev cawm dim?

14 Yog li ntawd, yog hais tias nej qhia Mauxes txoj kev cai, nej yuav tau qhia thiab hais tias Mauxes txoj kev cai yog ib tug yam ntxwv ntawm tej uas yuav muaj los—

15 Qhia rau cov neeg hais tias kev txhiv dim yog los ntawm tus Tswv Khetos, tus uas twb yog Leej Txiv uas Nyob Mus Ib Txhis. Amees.