1 Thiab tau muaj tias tus vaj ntxwv cov tub rog tau rov qab los, vim lawv nrhiav tsis pom tus Tswv cov neeg.

2 Thiab nim no saib seb, tus vaj ntxwv cov tub rog tsis coob, vim muaj tub rog tsawg dua li qub, thiab pib muaj kev sib cais ntawm cov neeg uas tseem nyob.

3 Thiab cov neeg feem tsawg pib hais lus tawm tsam tus vaj ntxwv, thiab pib muaj kev sib cav sib ceg hnyav nyob hauv lawv.

4 Thiab nim no muaj ib tug txiv neej nyob hauv lawv uas muaj npe hu ua Nkide-oos, thiab nws yog ib tug txiv neej muaj zog thiab ib tug yeeb ncuab rau tus vaj ntxwv, yog li ntawd nws rho nws rab ntaj, thiab nws npau taws cog lus tias nws yuav muab tus vaj ntxwv tua.

5 Thiab tau muaj tias nws nrog tus vaj ntxwv sib tawm tsam; thiab thaum tus vaj ntxwv s pom tias Nkide-oos yuav kov yeej nws, nws tso tes plhuav thiab khiav mus rau saum tus pej thuam uas nyob ze lub tuam tsev.

6 Thiab Nkide-oos raws nws qab thiab yuav luag mus rau saum tus pej thuam mus tua tus vaj ntxwv, thiab tus vaj ntxwv tsa nws qhov muag ntsia ib puag ncig mus rau lub nroog Seloos, thiab saib seb, cov Neeg Lamas cov tub rog twb tuaj nyob hauv tej ciaj ciam ntawm thaj av.

7 Thiab nim no tus vaj ntxwv thov nrov nrov nrog kev ntxhov siab, hais tias: Nkide-oos, txhob tua kuv, vim cov Neeg Lamas twb tuaj tawm tsam peb, thiab lawv yuav ua kom peb puas tsuaj; muaj tseeb tiag, lawv yuav ua kom kuv cov neeg puas tsuaj.

8 Thiab nim no tus vaj ntxwv twb tsis txhawj txog nws cov neeg npaum li nws txhawj txog nws tus kheej txoj sia; txawm li ntawd los, Nkide-oos tau tseg nws txoj sia.

9 Thiab tus vaj ntxwv txib kom cov neeg khiav ntawm cov Neeg Lamas, thiab nws tus kheej tau khiav ua ntej lawv, thiab lawv tau khiav mus rau hauv hav zoov, nrog lawv cov poj niam thiab lawv cov me nyuam.

10 Thiab tau muaj tias cov Neeg Lamas tau caum lawv, thiab txhom tau lawv, thiab pib muab lawv tua.

11 Nim no tau muaj tias tus vaj ntxwv txib kom tag nrho cov txiv neej yuav tsum tso tseg lawv cov poj niam thiab cov me nyuam, thiab khiav ntawm cov Neeg Lamas.

12 Nim no tau muaj ntau leej uas tsis kam tso lawv tseg, tiam sis yeem nyob thiab piam sij nrog lawv. Thiab cov seem tshuav tau tso lawv cov poj niam thiab lawv cov me nyuam tseg thiab khiav mus.

13 Thiab tau muaj tias cov uas nyob nrog lawv cov poj niam thiab lawv cov me nyuam hais kom lawv cov ntxhais uas zoo nkauj sawv los mus thiab thov kom cov Neeg Lamas tsis txhob muab lawv tua.

14 Thiab tau muaj tias cov Neeg Lamas muaj kev khuv leej rau lawv, vim qhov uas lawv cov poj niam zoo nkauj ntxim cov Neeg Lamas lub siab.

15 Yog li ntawd cov Neeg Lamas tau tseg lawv txoj sia, thiab txhom lawv thiab coj lawv rov qab mus rau tom thaj av Nifais, thiab txaus siab cia lawv nyob hauv thaj av, yog hais tias lawv muab vaj ntxwv Nau-as mus rau hauv cov Neeg Lamas tes, thiab muab lawv tej khoom, ib nrab kiag ntawm tag nrho tej uas lawv muaj, ib nrab ntawm lawv tej kub, thiab lawv tej nyiaj, thiab tag nrho lawv tej khoom uas muaj nuj nqis, thiab li no lawv yuav tau them se rau cov Neeg Lamas tus vaj ntxwv ib xyoos dhau ib xyoos.

16 Thiab nim no ntawm tus vaj ntxwv cov tub, muaj ib tug nrog cov uas raug txhom, nws lub npe hu ua Leehais.

17 Thiab nim no Leehais tsis xav kom nws txiv raug puas tsuaj; txawm li ntawd los, Leehais yeej paub txog nws txiv tej kev ua phem, vim nws tus kheej yog ib tug neeg ncaj.

18 Thiab tau muaj tias Nkide-oos nyiag xa ib co neeg mus rau hauv hav zoov, mus nrhiav tus vaj ntxwv thiab cov uas nrog nws. Thiab tau muaj tias lawv ntsib tag nrho cov neeg nyob hauv hav zoov, tsuas yog tshuav tus vaj ntxwv thiab nws cov pov thawj.

19 Nim no lawv tau cog lus rau hauv lawv lub siab hais tias lawv yuav rov qab mus rau tom thaj av Nifais, thiab yog hais tias lawv cov poj niam thiab lawv cov me nyuam, thiab cov uas nrog lawv nyob raug tua tuag tas lawm, ces lawv yuav nrhiav kev ua pauj, thiab ua kom lawv piam sij nrog lawv.

20 Thiab tus vaj ntxwv txib kom lawv tsis txhob rov qab mus; thiab lawv npau taws rau tus vaj ntxwv, thiab ua kom nws raug tsim txom, twb xuas hluav taws hlawv kom nws tuag.

21 Thiab lawv tab tom yuav txhom cov pov thawj thiab muab lawv tua, thiab cov pov thawj khiav dim ntawm lawv mus.

22 Thiab tau muaj tias lawv tab tom yuav rov qab mus rau tom thaj av Nifais, thiab lawv ntsib Nkide-oos cov neeg. Thiab Nkide-oos cov neeg qhia rau lawv tag nrho tej uas tau muaj rau lawv cov poj niam thiab lawv cov me nyuam; thiab hais tias cov Neeg Lamas txaus siab cia lawv nyob hauv thaj av yog lawv them se rau cov Neeg Lamas ib nrab ntawm tag nrho tej uas lawv muaj.

23 Thiab cov neeg qhia rau Nkide-oos cov neeg tias lawv tau muab tus vaj ntxwv tua lawm, thiab nws cov pov thawj tau khiav dim mus deb rau hauv hav zoov.

24 Thiab tau muaj tias tom qab lawv tau sib ntsib, lawv rov qab mus rau tom thaj av Nifais, zoo siab hlo, vim lawv cov poj niam thiab cov me nyuam tsis raug tua; thiab lawv qhia rau Nkide-oos qhov uas lawv tau ua rau vaj ntxwv Nau-as.

25 Thiab tau muaj tias cov Neeg Lamas tus vaj ntxwv lav lus rau lawv, hais tias nws cov neeg yuav tsis muab lawv tua.

26 Thiab Leehais, tus uas yog vaj ntxwv Nau-as tus tub, vim cov neeg muab lub teb chaws rau nws kav, lav lus rau cov Neeg Lamas tus vaj ntxwv hais tias nws cov neeg yuav them se rau nws, twb yog ib nrab ntawm tag nrho tej uas lawv muaj.

27 Thiab tau muaj tias Leehais pib txhim tsa lub teb chaws thiab tsim kev thaj yeeb nyob hauv nws cov neeg.

28 Thiab cov Neeg Lamas tus vaj ntxwv tso ib co tub zov nyas tuaj zov ib puag ncig thaj av, xwv kom nws yuav ceev tau Leehais cov neeg nyob hauv thaj av, xwv kom lawv yuav tsis khiav mus rau hauv hav zoov; thiab nws muab cov se uas nws tau txais ntawm cov Neeg Nifais los yug nws cov tub zov nyas.

29 Thiab nim no vaj ntxwv Leehais muaj kev thaj yeeb tsis tu ncua nyob hauv nws lub teb chaws tau li ob xyoos, uas cov Neeg Lamas tsis thab lawv los sis nrhiav kev ua kom lawv puas tsuaj.