1 Thiab tau muaj tias tom qab Mauxiyas tau ua tiav li nws txiv tau txib nws, thiab tau xa ib zaj lus tshaj tawm mus thoob plaws rau hauv thaj av, kom cov neeg thoob plaws hauv thaj av sib sau tuaj ua ke, kom lawv mus lawm pem lub tuam tsev mus mloog tej lus uas vaj ntxwv Npeyamis yuav hais rau lawv.

2 Thiab tau muaj neeg coob heev, coob heev ua rau vaj ntxwv Npeyamis thiab Mauxiyas thiaj tsis suav lawv; vim lawv tau huaj vam heev kawg li thiab muaj coob heev nyob rau hauv thaj av.

3 Thiab lawv kuj coj thawj tug me nyuam ntawm lawv tej tsiaj txhu tuaj, xwv kom lawv yuav ua tau kev cai txi thiab hlawv tsiaj txi raws li Mauxes txoj kev cai;

4 Thiab xwv kom lawv yuav tau ua tsaug rau tus Tswv lawv tus Vajtswv, tus uas tau coj lawv tawm ntawm thaj av Yeluxalees, thiab tus uas tau cawm lawv tawm ntawm lawv cov yeeb ncuab tes, thiab tau tsa cov neeg ncaj ncees los ua lawv cov xib hwb, thiab ib tug neeg ncaj ncees los ua lawv tus vaj ntxwv thiab, tus uas tau tsim kev thaj yeeb nyob rau hauv thaj av Xalahelas, thiab tus uas tau qhia lawv ua raws li Vajtswv tej lus txib, xwv kom lawv yuav zoo siab thiab muaj kev hlub puv npo rau Vajtswv thiab tib neeg txhua tus.

5 Thiab tau muaj tias thaum lawv tuaj txog ntawm lub tuam tsev, lawv tau rub lawv tej tsev pheeb suab ntaub rau ib puag ncig, txhua tus txiv neej raws li nws tsev neeg, uas muaj nws tus poj niam, thiab nws cov tub, thiab nws cov ntxhais, thiab lawv cov tub, thiab lawv cov ntxhais, txij li tus hlob mus rau tus yau, txhua tsev neeg nyob nrug lwm tsev neeg.

6 Thiab lawv tau rub lawv tej tsev pheeb suab ntaub ncig lub tuam tsev, txhua tus txiv neej muab nws lub qhov rooj tsev pheeb suab ntaub tig mus rau lub tuam tsev, xwv kom lawv thiaj yuav nyob hauv lawv tej tsev pheeb suab ntaub thiab hnov tej lus uas vaj ntxwv Npeyamis yuav hais rau lawv;

7 Vim cov neeg coob heev ua rau vaj ntxwv Npeyamis qhia tsis taus lawv txhua tus nyob rau hauv lub tuam tsev tej ntsa loog, yog li ntawd nws thiaj tau txib kom tsa ib tug pej thuam, xwv kom nws cov neeg thiaj yuav hnov tau tej lus uas nws yuav hais rau lawv.

8 Thiab tau muaj tias nws nyob saum tus pej thuam pib hais lus rau nws cov neeg; thiab lawv ib txhia tsis hnov nws cov lus vim pawg neeg coob heev; yog li ntawd nws thiaj li txib kom muab cov lus uas nws hais sau cia thiab muab xa mus rau cov uas tsis hnov nws lub suab, xwv kom lawv yuav tau txais nws cov lus thiab.

9 Thiab tej no yog tej lus uas nws tau hais thiab tau txib kom muab sau cia, hais tias: Kuv cov kwv tij, tag nrho nej cov uas tau sib sau tuaj ua ke, nej cov uas hnov kuv tej lus uas kuv yuav hais rau nej hnub no; vim kuv tsis tau txib kom nej tuaj ntawm no tuaj saib tsis taus tej lus uas kuv yuav hais, tiam sis kom nej mloog kuv, thiab cuab nej lub pob ntseg xwv kom nej yuav hnov, thiab qhib nej lub siab xwv kom nej yuav to taub, thiab qhib nej lub cim xeeb xwv kom tej txuj ci uas neeg tsis paub txog Vajtswv yuav qhib los rau nej pom.

10 Kuv tsis tau txib kom nej tuaj ntawm no xwv kom nej yuav ntshai kuv, los sis xwv kom nej yuav xav tias kuv tsis yog ib tug neeg uas txawj ploj txawj tuag.

11 Tiam sis kuv zoo tib yam li nej, uas raug ywj rau tag nrho tej kev qaug zog ntawm lub cev thiab nruab siab; txawm li ntawd los cov neeg no tau xaiv kuv, thiab kuv txiv tau tsa kuv, thiab tus Tswv txhais tes tau cia rau kuv los ua ib tug kav thiab ib tug vaj ntxwv rau cov neeg no; thiab nws lub hwj chim uas loj tshaj txhua yam, tau ceev thiab tsom kwm kuv, los pab nej kom kawg lub siab thiab lub dag lub zog uas tus Tswv tau muab rau kuv.

12 Kuv hais rau nej hais tias ib yam li tus Tswv tau cia kuv siv kuv lub neej ua hauj lwm pab nej, twb los txog rau lub sij hawm no, thiab twb tsis tau kom nej them kub los sis nyiaj los sis ib yam muaj nuj nqis dab tsi rau kuv li.

13 Thiab kuv twb tsis tau cia nej raug kaw rau hauv qhov taub, los sis cia nej ib leeg ua ib leeg qhev, los sis cia nej tua neeg, los sis tua txeeb tej khoom, los sis ua tub sab tub nyiag, los sis deev luag poj luag txiv; thiab kuv twb tsis tau cia nej ua ib yam kev phem dab tsi li, thiab tau qhia nej kom yuav tsum ua raws li tus Tswv tej lus txib, ua txhua yam uas nws tau txib nej—

14 Thiab, kuv tus kheej kiag, twb tau siv kuv txhais tes los ua hauj lwm xwv kom kuv yuav pab tau nej, thiab xwv kom nej txhob tau them se hnyav, thiab xwv kom txhob muaj ib yam dab tsi los rau nej uas nyuaj heev rau nej ris—thiab txhua yam uas kuv tau hais los no, nej sawv daws ua pov thawj rau hnub no.

15 Tiam sis, kuv cov kwv tij, kuv tsis tau ua tej yam no xwv kom kuv tau khav, thiab kuv tsis qhia tej yam no xwv kom kuv thiaj cem tau nej; tiam sis kuv qhia nej tej yam no xwv kom nej yuav paub tias kuv paub tseeb kuv muaj lub siab huv nyob rau ntawm Vajtswv lub xub ntiag.

16 Saib seb, kuv hais rau nej tias vim kuv hais rau nej tias kuv tau siv kuv lub neej ua hauj lwm pab nej, kuv tsis xav khav, vim kuv tsuas yog ua hauj lwm rau Vajtswv xwb.

17 Thiab saib seb, kuv qhia nej tej yam no xwv kom nej yuav kawm tau tswv yim; xwv kom nej yuav kawm tau hais tias thaum nej ua hauj lwm pab nej cov neeg zej zog ces nej tsuas yog ua hauj lwm rau nej tus Vajtswv xwb.

18 Saib seb, nej tau hu kuv ua nej tus vaj ntxwv; thiab yog hais tias kuv, tus uas nej hu ua nej tus vaj ntxwv, ua hauj lwm pab nej, yog li ntawd puas tsim nyog nej ib leeg ua hauj lwm pab ib leeg?

19 Thiab kuj saib seb, yog tias kuv, tus uas nej hu ua nej tus vaj ntxwv, uas tau siv nws lub neej ua hauj lwm pab nej, tiam sis nws tsuas yog ua hauj lwm rau Vajtswv, yog tsim nyog uas nej ua kuv tsaug, auj haj yam tsim nyog uas nej ua nej tus Vaj Ntxwv saum ntuj ceeb tsheej tsaug!

20 Kuv hais rau nej, kuv cov kwv tij, hais tias yog nej yuav hais tag nrho tej kev ua tsaug thiab tej lus qhuas uas muaj nyob hauv nej tus ntsuj plig kom tas nej lub hwj chim, rau Vajtswv tus uas tau tsim nej, thiab tau ceev thiab tsom kwm nej, thiab tau ua kom nej zoo siab, thiab tau pub kom nej ib leeg yuav nrog ib leeg nyob muaj kev thaj yeeb—

21 Kuv hais rau nej hais tias yog nej ua hauj lwm rau tus uas tau tsim nej txij li thaum chiv keeb los, thiab tsom kwm nej ib hnub dhau ib hnub, qiv txoj pa rau nej, xwv kom nej yuav ciaj sia thiab mus taus thiab ua tau raws li nej lub siab xav, thiab twb txhawb nqa nej ib ntus dhau ib ntus—kuv hais tias, txawm yog nej yuav ua hauj lwm rau nws nrog tag nrho nej lub siab huv tib si los, nej tseem yog cov tub qhe uas tsis muaj nuj nqis.

22 Thiab saib seb, nws tsuas yog xav kom nej ua raws li nws tej lus txib; thiab nws tau cog lus rau nej tias yog nej ua raws li nws tej lus txib nej yuav vam meej nyob rau hauv thaj av; thiab nws yeej tsis hloov tej uas nws tau hais ib zaug li; yog li ntawd, yog nej ua raws li nws tej lus txib nws yuav foom koob hmoov rau nej thiab ua kom nej vam meej.

23 Thiab nim no, qhov thib ib, nws tau tsim nej, thiab pub txoj sia rau nej, es nej thiaj tshuav nws nqi.

24 Thiab thib ob, nws xav kom nej ua raws li nws tau txib nej; vim yog tias nej ua li ntawd, nws yuav foom koob hmoov kiag rau nej; thiab yog li ntawd nws twb tau them nej lawm. Thiab nej tseem tshuav nws nqi, thiab yeej tshuav, thiab yuav tshuav, mus ib txhiab thiab ib txhis li; yog li ntawd, muaj dab tsi uas nej khav tau?

25 Thiab nim no kuv nug tias, nej puas muaj cuab kav hais zam nej tus kheej? Kuv teb nej tias, Tsis muaj. Nej twb tsis muaj cuab kav hais tau hais tias nej muaj nuj nqis dua tej hmoov av hauv pem teb; txawm li ntawd los twb tsim nej los ntawm tej hmoov av ntawm lub ntiaj teb; tiam sis saib seb, tej hmoov av los twb yog tus uas tau tsim nej li.

26 Thiab kuv, kuv kiag, tus uas nej hu ua nej tus vaj ntxwv, twb tsis zoo dua nej sawv daws; vim kuv kuj yog los ntawm tej hmoov av los thiab. Thiab nej pom tias kuv laus lawm, thiab tsis ntev yuav tso lub cev uas txawj ploj txawj tuag no rov mus rau nws niam av.

27 Yog li ntawd, ib yam li kuv hais rau nej tias kuv tau pab nej, ua lub neej nrog ib lub siab huv rau Vajtswv, yog li ntawd lub sij hawm no kuv tau txib kom nej sib sau tuaj ua ke, xwv kom Vajtswv yuav pom tias kuv tsis muaj txim, thiab kom nej cov ntshav tsis txhob los rau kuv, thaum kuv yuav los sawv rau Vajtswv txiav txim rau tej uas nws tau txib kuv ntsig txog nej.

28 Kuv hais rau nej tias kuv tau txib kom nej tuaj sib sau ua ke xwv kom kuv yuav tau ntxuav nej cov ntshav tawm ntawm kuv tej tsoos tsho, nyob rau lub caij no thaum kuv twb yuav nqis mus rau hauv kuv lub qhov ntxa, xwv kom kuv yuav nyob kaj siab lug nqis mus, thiab kom kuv tus ntsuj plig uas tsis txawj ploj tsis txawj tuag yuav tau koom nrog pawg hu nkauj uas nyob saum ntuj hu nkauj qhuas tus Vajtswv uas ncaj ncees.

29 Thiab tsis tas li ntawd, kuv hais rau nej tias kuv tau txib kom nej sib sau tuaj ua ib ke, xwv kom kuv yuav tshaj tawm rau nej tias kuv ua tsis taus nej tus xib hwb thiab tus vaj ntxwv ntxiv lawm;

30 Vim lub sij hawm no, kuv lub cev twb tshee hnyo heev kawg li thaum tab tom hais lus rau nej; tiam sis tus Tswv uas yog Vajtswv txhawb nqa kuv, thiab cia kuv hais lus rau nej, thiab tau txib kom kuv tshaj tawm rau nej hnub no tias, kuv tus tub Mauxiyas yog ib tug vaj ntxwv thiab ib tug saib xyuas kav nej.

31 Thiab nim no, kuv cov kwv tij, kuv xav kom nej ua li nej tau ua los txog nim no. Ib yam li nej tau ua raws li kuv tej lus txib, thiab kuv txiv tej lus txib, thiab tau vam meej, thiab Vajtswv tau ceev tsis pub nej poob mus rau hauv nej cov yeeb ncuab tes, yuav zoo ib yam li ntawd yog tias nej ua raws li kuv tus tub tej lus txib, los sis Vajtswv tej lus txib uas nws yuav muab rau nej, nej yuav vam meej nyob hauv thaj av, thiab nej cov yeeb ncuab yuav tsis muaj hwj chim kov yeej nej.

32 Tiam sis, auj kuv cov neeg es, ceev faj tsam ho muaj kev sib cav sib ceg nyob hauv nej, thiab nej ho xaiv mus mloog tus ntsuj plig phem lus, tus uas kuv txiv Mauxiyas tau hais txog.

33 Vim saib seb, muaj ib txoj kev txom nyem uas tau muab foom rau tus uas xaiv mus mloog tus ntsuj plig ntawd lus; vim yog tias nws xaiv mus mloog tus ntsuj plig ntawd lus, thiab nyob thiab tuag thaum tseem muaj nws tej kev txhaum, tus ntawd haus kev raug txim rau nws tus kheej tus ntsuj plig; vim nws yuav tau txais txoj kev rau txim uas kav ib txhis los ua nws nqi zog, vim nws ua txhaum Vajtswv txoj kev cai tsis raws li tej yam uas nws paub.

34 Kuv hais rau nej tias, tsuas yog tshuav nej cov me nyuam yaus uas tsis tau kawm txog tej yam no, tsis muaj ib tug twg uas nyob hauv nej, uas tsis paub hais tias nej tshuav Leej Txiv saum ntuj ceeb tsheej nqi mus ib txhis li, kom muab tag nrho tej uas nej muaj thiab nej yog huv tib si rau nws; thiab kuj tau kawm txog cov ceev xwm txheej uas muaj tej kev qhia tej yuav muaj los yav tom ntej uas cov yaj saub dawb huv tau hais, twb los txog rau lub sij hawm uas peb txiv, Lihais, tau ncaim Yeluxalees;

35 Thiab, tag nrho tej uas peb cov yawg koob tau hais los txog niaj hnub nim no thiab. Thiab saib seb, lawv kuj hais tej uas tus Tswv tau txib kom lawv hais; yog li ntawd, cov ceev xwm txheej thiaj ncaj thiab tseeb.

36 Thiab nim no, kuv hais rau nej, kuv cov kwv tij, hais tias tom qab nej tau paub thiab tau kawm tej yam no, yog hais tias nej yuav ua txhaum thiab ua tsis raws li tej uas tau hais lawm, ces nej rho nej tus kheej tawm ntawm tus Tswv tus Ntsuj Plig, kom nws tsis muaj chaw nyob hauv nej los coj nej kev raws li laj lim tswv yim xwv kom nej yuav tau koob hmoov, kev vam meej, thiab kev tsom kwm—

37 Kuv hais rau nej tias, tus neeg uas ua li no, nws yeej tab meeg ntxeev siab tawm tsam Vajtswv; yog li ntawd nws xaiv mloog tus ntsuj plig phem lus, thiab los ua ib tug yeeb ncuab rau tag nrho txoj kev ncaj ncees; yog li ntawd, tus Tswv tsis muaj chaw nyob hauv nws, vim tus Tswv tsis nyob hauv tej tuam tsev uas tsis dawb huv.

38 Yog li ntawd yog hais tias tus neeg ntawd tsis hloov siab lees txim, thiab nyob thiab tuag li ib tug yeeb ncuab rau Vajtswv, ces tej nqi ntawm txoj kev txim lij saum ntuj yuav tsa kom nws tus ntsuj plig uas tsis txawj tuag los paub tseeb txog nws lub txim, uas ua rau nws txav tawm ntawm tus Tswv lub xub ntiag mus, thiab ua nws lub hauv siab muaj kev txhaum puv npo, thiab kev mob, thiab kev ntxhov siab, uas zoo li ib lub cub tawg tsis txawj tuag, uas muaj nplaim sawv mus ib txhiab thiab ib txhis li.

39 Thiab nim no kuv hais rau nej tias, tsis muaj kev hlub tshua rau tus neeg ntawd; yog li ntawd nws txoj hmoov thaum kawg yog tiv txoj kev tsim txom uas tsis txawj kawg.

40 Auj, tag nrho nej cov neeg laus, thiab nej cov neeg hluas, thiab nej cov me nyuam yaus uas to taub kuv tej lus, vim kuv tau hais yooj yim heev rau nej xwv kom nej yuav to taub, kuv thov Vajtswv kom nej tsim los rau txoj kev nco ntsoov txog qhov txaus ntshai heev ntawm cov uas tau poob mus rau kev ua txhaum.

41 Thiab tsis tas li ntawd, kuv thov kom nej xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig; thiab yog lawv rau siab ntseeg mus kom txog thaum kawg Vajtswv yuav txais lawv mus rau hauv ceeb tsheej, xwv kom lawv thiaj yuav nrog Vajtswv nyob hauv qhov chaw uas muaj kev zoo siab tsis txawj kawg. Auj nco ntsoov, nco ntsoov tias tej no yeej muaj tseeb; vim tus Tswv uas yog Vajtswv tau hais li.