1 Thiab tus Tswv txib kom Yales tus tij laug nqis saum roob tawm ntawm tus Tswv xub ntiag mus, thiab sau cia tej uas nws tau pom; thiab txwv tsis pub tej ntawd los rau noob neej kom txog thaum tom qab nws raug dai rau saum tus ntoo khaub lig tso; thiab twb vim yog lub ntsiab no vaj ntxwv Mauxiyas thiaj ceev tej ntawd tseg, xwv kom tsis txhob cia tej ntawd los rau lub ntiaj teb kom txog thaum tom qab Khetos ua nws tus kheej los rau nws cov neeg pom tso.

2 Thiab tom qab Khetos tau ua nws tus kheej los rau nws cov neeg pom tseeb lawm nws thiaj txib kom muab tej ntawd ua tshwm sim los.

3 Thiab nim no, tom qab ntawd, lawv txhua tus tau tso kev ntseeg tseg zuj zus; thiab twb tsis tshuav leej twg li tsuas yog tshuav cov Neeg Lamas xwb, thiab lawv tau xyeej Khetos txoj moo zoo; yog li ntawd tus Tswv txib kuv kom rov muab tej ntawd zais rau hauv av dua.

4 Saib seb, kuv tau sau tej uas Yales tus tij laug tau pom kiag rau ntawm cov phiaj no; thiab tus Tswv twb tsis tau ua ib yam dab tsi tshwm sim los uas yuav tseem ceeb tshaj tej uas tau ua tshwm sim los rau Yales tus tij laug.

5 Yog li ntawd tus Tswv thiaj txib kom kuv muab tej ntawd sau cia; thiab kuv tau muab tej ntawd sau cia. Thiab nws txib kom kuv muab tej ntawd khi tseg cia; thiab kuj txib kom kuv muab tej lus txhais tej ntawd khi tseg cia thiab; yog li ntawd kuv thiaj muab tej cuab yeej txhais lus zwm tseg cia, raws li tus Tswv txoj lus txib.

6 Vim tus Tswv hais rau kuv tias: Yuav tsis pub tej ntawd tawm mus rau Lwm Haiv Neeg kom txog thaum lawv yuav hloov siab lees txim rau lawv txoj kev ua phem tso, thiab hloov los ua neeg huv rau ntawm tus Tswv xub ntiag.

7 Thiab nyob rau hnub ntawd yog tias lawv yuav muab siab rau ntseeg kuv, tus Tswv hais li, ib yam li Yales tus tij laug, xwv kom lawv yuav hloov los ua neeg dawb huv los ntawm kuv, thaum ntawd kuv mam ua tej uas Yales tus tij laug tau pom tshwm sim los rau lawv, twb yuav qhib tag nrho kuv tej kev tshwm sim los rau lawv, Yexus Khetos hais li, tus uas yog Vajtswv Leej Tub, uas yog Leej Txiv ntawm lub ntuj thiab ntawm lub ntiaj teb, thiab txhua yam uas nyob rau haud.

8 Thiab tus uas yuav tawm tsam tus Tswv txoj lus, cia kom nws raug foom tsis zoo; thiab tus uas yuav xyeej tej no, cia kom nws raug foom tsis zoo; vim kuv yuav tsis ua tej uas tseem ceeb dua rau lawv pom, Yexus Khetos hais li; vim kuv yog tus uas hais.

9 Thiab raws li kuv txib lub ntuj twb cia li qhib thiab cia li kaw; thiab raws li kuv txoj lus lub ntiaj teb yuav ua zog koog; thiab raws li kuv txib cov neeg uas nyob hauv yuav tuag mus, twb yog li ntawd los ntawm hluav taws kub.

10 Thiab tus uas tsis ntseeg kuv tej lus yeej tsis ntseeg kuv cov thwj tim; thiab nej xav seb kuv puas yog tus uas hais lus; vim thaum txog hnub kawg, nej yuav paub tias kuv twb yog tus uas hais lus.

11 Tiam sis tus uas ntseeg tej uas kuv tau hais no, kuv yuav los xyuas tus ntawd nrog tej kev tshwm sim ntawm kuv tus Ntsuj Plig, thiab nws yuav paub thiab ua tim khawv. Rau qhov vim yog kuv tus Ntsuj Plig nws yuav paub tias tej no muaj tseeb; vim tej no yaum tib neeg kom ua zoo.

12 Thiab txhua yam uas yaum tib neeg kom ua zoo yog los ntawm kuv los; vim qhov zoo twb tsis yog los ntawm leej twg tsuas yog los ntawm kuv xwb. Kuv twb yog tus uas coj tib neeg mus rau txhua yam zoo; tus uas tsis ntseeg kuv tej lus yeej tsis ntseeg kuv—hais tias muaj kuv; thiab tus uas yuav tsis ntseeg kuv yeej tsis ntseeg Leej Txiv tus uas txib kuv los. Vim saib seb, kuv yog Leej Txiv, kuv yog txoj kev kaj, thiab yog txoj sia, thiab yog qhov tseeb ntawm neeg ntiaj teb.

13 Cia li los cuag kuv, auj nej cov uas yog Lwm Haiv Neeg es, thiab kuv yuav ua rau nej pom tej uas tseem ceeb dua, tej kev txawj ntse uas tau muab zais cia vim yog kev tsis ntseeg.

14 Cia li los cuag kuv, auj nej cov uas yog tsev neeg Ixayees es, thiab yuav qhia rau nej paub tej yam tseem ceeb uas Leej Txiv tau tseg cia rau nej, txij puag thaum ntuj tsim teb raug los; thiab tej ntawd tseem tsis tau los rau nej, vim yog kev tsis ntseeg.

15 Saib seb, thaum nej yuav dua daim ntaub thaiv ntawm kev tsis ntseeg uas pheej ua rau nej nyob hauv nej txoj kev phem kawg nkaus, thiab txoj kev ua siab tawv, thiab tsis thoob tsib to nrog, tom qab ntawd tej yam tseem ceeb thiab zoo kawg nkaus uas tau muab zais ntawm nej txij puag thaum ntuj tsim teb raug los—muaj tseeb tiag, thaum nej yuav thov Leej Txiv los ntawm kuv lub npe, nrog ib lub siab mob thiab lub siab xav ua zoo, thaum ntawd nej yuav paub tias Leej Txiv yeej nco qab txog txoj kev khi lus uas nws khi nrog nej cov yawg koob, auj tsev neeg Ixayees es.

16 Thiab thaum ntawd kuv tej kev tshwm sim uas kuv tau hais kom kuv tus tub qhe Yauhas muab sau cia los yuav muab tej ntawd qhib los rau tag nrho cov neeg tej qhov muag pom. Nco ntsoov, thaum nej pom tej no, nej yuav paub tias twb txog lub sij hawm lawm uas yuav muab txhua qhov ntawm tej ntawd ua tshwm sim los.

17 Yog li ntawd, thaum nej tau txais phau ceev xwm txheej no nej yuav paub tias Leej Txiv txoj hauj lwm twb tau pib nyob txhua txhia qhov chaw ntawm thaj av lawm.

18 Yog li ntawd, cia li hloov siab lees txim nej txhua tus uas nyob thoob plaws lub ntiaj teb, thiab cia li los cuag kuv, thiab ntseeg kuv txoj moo zoo, thiab ua kev cai raus dej los ntawm kuv lub npe; vim tus uas ntseeg thiab ua kev cai raus dej yuav txais kev cawm dim; tiam sis tus uas tsis ntseeg yuav raug txim; thiab tej cim yuav muaj nrog cov uas ntseeg kuv lub npe.

19 Thiab tus uas rau siab ntseeg kuv lub npe thaum txog hnub kawg yuav tau koob hmoov, vim yuav muab tus ntawd tsa sawv mus nyob hauv lub nceeg vaj uas tau npaj rau nws txij puag thaum ntuj tsim teb raug los. Thiab saib seb kuv twb yog tus uas tau hais tej ntawd. Amees.