1 Thiab nyob hauv Khoos lub caij kuj muaj ntau tus yaj saub los, thiab qhia tej yuav muaj los yav tom ntej txog cov neeg coob ntawd txoj kev puas tsuaj tsuas yog tias lawv yuav hloov siab lees txim, thiab tig rov mus cuag tus Tswv, thiab muab lawv tej kev tua neeg thiab tej kev phem tso tseg xwb.

2 Thiab tau muaj tias cov neeg xyeej cov yaj saub, thiab lawv khiav mus kom Khoos pab, vim cov neeg nrhiav kev ua kom lawv puas tsuaj.

3 Thiab lawv qhia tej yuav muaj los yav tom ntej ntau yam rau Khoos; thiab nws tau koob hmoov nyob tag nrho hauv nws lub neej uas tseem tshuav.

4 Thiab nws ua neej nyob muaj hnub nyoog laus, thiab yug tau Sinplos; thiab Sinplos pauv nws qhov chaw los kav. Thiab Sinplos ib tug kwv tij ntxeev siab tawm tsam nws, thiab pib muaj ib npluav rog loj heev nyob tag nrho hauv thaj av.

5 Thiab tau muaj tias Sinplos tus kwv tij hais kom muab tag nrho cov yaj saub tua pov tseg, cov uas tau qhia tej yuav muaj los yav tom ntej txog cov neeg txoj kev puas tsuaj;

6 Thiab tau muaj kev txom nyem loj nyob tag nrho hauv thaj av, vim lawv tau ua tim khawv tias kev foom tsis zoo loj yuav los raug thaj av, thiab raug cov neeg, thiab hais tias yuav muaj kev puas tsuaj loj nyob hauv lawv, xws li kev puas tsuaj uas ib txwm tsis tau muaj dua nyob rau hauv lub ntiaj teb, thiab lawv cov pob txha yuav zoo li tej pawg av nyob rau ntawm thaj av tsuas yog lawv yuav hloov siab lees txim rau lawv txoj kev phem xwb.

7 Thiab lawv tsis mloog tus Tswv lub suab, vim yog lawv tej kev tuav hauv ua phem; yog li ntawd, thiaj pib muaj tej kev ua rog thiab tej kev sib cav sib ceg nyob tag nrho hauv thaj av, thiab kuj muaj tej kev tshaib nqhis thiab tej kab mob phem ntau, ua rau muaj kev puas tsuaj loj, xws li kev puas tsuaj uas ib txwm tsis tau paub dua nyob rau hauv lub ntiaj teb; thiab tau muaj tag nrho tej no nyob hauv Sinplos lub caij.

8 Thiab cov neeg pib hloov siab lees txim rau lawv txoj kev ua phem; thiab npaum li lawv ua li ntawd tus Tswv tau muaj kev hlub tshua rau lawv.

9 Thiab tau muaj tias Sinplos raug tua tuag, thiab Xej raug coj mus rau hauv kev poob cev qhev, thiab tau nyob ua cev qhev tag nws lub neej.

10 Thiab tau muaj tias nws tus tub, Ahav, tau lub nceeg vaj; thiab nws los kav cov neeg tag nrho nws lub neej. Thiab nws ua txhua yam kev phem nyob hauv nws lub neej, nws thiaj ua kom nqaij ntuag ntshav nrog ntau; thiab nws txoj sia tsis ntev.

11 Thiab Eethas, vim nws yog Ahav ib tug xeeb ntxwv, tau lub nceeg vaj; thiab nws los kuj ua tej uas phem nyob hauv nws lub neej.

12 Thiab tau muaj tias nyob hauv Eethas lub caij muaj ntau tus yaj saub los, thiab rov qab qhia tej yuav muaj los yav tom ntej dua rau cov neeg; muaj tseeb tiag, lawv qhia tej yuav muaj los yav tom ntej tias tus Tswv yuav ua kom lawv puas tsuaj huv tib si tawm hauv lub ntiaj teb mus tsuas yog lawv yuav hloov siab lees txim ntawm lawv tej kev ua phem xwb.

13 Thiab tau muaj tias cov neeg ua lawv lub siab tawv, thiab tsis kam mloog cov yaj saub tej lus; thiab cov yaj saub tau quaj ntsuag thiab ncaim tawm hauv cov neeg mus.

14 Thiab tau muaj tias Eethas txiav txim raws li kev phem tag nws lub neej; thiab nws yug tau Mauloos. Thiab tau muaj tias Mauloos pauv nws qhov chaw los kav; thiab Mauloos ua tej uas phem nyob ntawm tus Tswv xub ntiag.

15 Thiab tau muaj tias tau pib muaj kev ntxeev siab nyob hauv cov neeg, vim yog txoj kev tuav hauv ntsiag to uas tau txhim tsa los kom muaj hwj chim thiab nplua nuj; thiab muaj ib tug txiv neej nyob hauv lawv uas muaj hwj chim ua kev phem, thiab ua rog rau Mauloos, nws thiaj li txeeb tau ib nrab ntawm lub nceeg vaj; thiab nws tswj tuav tau ib nrab ntawm lub nceeg vaj tau ntau xyoo.

16 Thiab tau muaj tias Mauloos ntxeev tau nws, thiab rov txeeb tau lub nceeg vaj dua.

17 Thiab tau muaj tias tau muaj dua ib tug txiv neej uas muaj hwj chim; thiab nws yog Yales tus tij laug ib tug xeeb ntxwv.

18 Thiab tau muaj tias nws ntxeev tau Mauloos thiab txeeb tau lub nceeg vaj; yog li ntawd, Mauloos tau poob cev qhev tag nws lub neej uas tseem tshuav; thiab nws yug tau Khauli-ataws.

19 Thiab tau muaj tias Khauli-ataws tau poob cev qhev tag nws lub neej.

20 Thiab nyob hauv Khauli-ataws lub caij kuj muaj ntau tus yaj saub los, thiab qhia tej yuav muaj los yav tom ntej uas tseem ceeb thiab zoo kawg nkaus, thiab qhia kom cov neeg hloov siab lees txim, thiab tsuas yog lawv yuav hloov siab lees txim xwb tsis li ntawd tus Tswv uas yog Vajtswv yuav txiav txim tawm tsam lawv kom lawv puas tsuaj huv tib si mus.

21 Thiab hais tias tus Tswv uas yog Vajtswv yuav xa los sis coj lwm cov neeg tuaj nyob hauv thaj av, los ntawm nws lub hwj chim, raws li tus yam ntxwv uas nws tau coj lawv cov yawg koob tuaj.

22 Thiab lawv xyeej tag nrho cov yaj saub tej lus, vim yog lawv txoj kev tuav hauv ntsiag to thiab tej kev phem qias.

23 Thiab tau muaj tias Khauli-ataws yug tau Ethaws, thiab nws tuag, vim nws tau poob cev qhev tag nws lub neej.