1 Thiab nim no kuv, Maulaunais, yuav hais ntxiv kom tas kuv phau ceev xwm txheej ntsig txog txoj kev puas tsuaj ntawm cov neeg uas kuv tau sau txog.

2 Vim saib seb, lawv xyeej tag nrho Ethaws tej lus; vim nws qhia rau lawv tseeb txog txhua yam, txij thaum chiv keeb los; thiab qhia tias tom qab tej dej tau lau saum thaj av no lawm, thaj av no tau hloov los ua ib thaj av zoo tshaj tag nrho lwm thaj av, uas yog tus Tswv ib thaj av tau xaiv tseg; yog li ntawd tus Tswv thiaj xav kom txhua tus neeg uas nyob rau ntawm thaj av ntawd yuav tsum teev tiam nws;

3 Thiab qhia tias thaj av ntawd yog qhov chaw ntawm lub Yeluxalees Tshiab, uas yuav nqis tawm saum ntuj ceeb tsheej los, thiab yog tus Tswv qhov chaw dawb huv.

4 Saib seb, Ethaws pom Khetos lub caij, thiab nws hais txog ib lub Yeluxalees Tshiab nyob rau ntawm thaj av no.

5 Thiab nws kuj hais txog tsev neeg Ixayees, thiab lub Yeluxalees uas Lihais yuav tawm tuaj—tom qab lub nroog raug puas tsuaj lawm yuav rov txhim tsa lub nroog no dua, ua ib lub nroog dawb huv rau tus Tswv; yog li ntawd, yuav ua tsis tau ib lub Yeluxalees tshiab vim twb muaj lub nroog no nyob txheej thaum ub los; tiam sis yuav txhim tsa lub nroog no dua, thiab hloov los ua ib lub nroog dawb huv ntawm tus Tswv; thiab yuav txhim tsa lub nroog no los rau tsev neeg Ixayees—

6 Thiab qhia tias yuav txhim tsa ib lub Yeluxalees Tshiab rau ntawm thaj av no, los rau cov seem tshuav ntawm Yauxej cov tub ki, vim tej no twb tau muaj ib lub cim lawm.

7 Vim ib yam li Yauxej tau coj nws txiv mus rau hauv thaj av Iyiv, nws tau tuag nyob rau nrad; yog li ntawd, tus Tswv coj ib co seem tshuav ntawm Yauxej cov tub ki tawm ntawm thaj av Yeluxalees mus, xwv kom nws yuav hlub tshua rau Yauxej cov tub ki kom lawv tsis piam sij, ib yam li nws twb hlub tshua Yauxej txiv kom nws tsis piam sij.

8 Yog li ntawd, yuav txhim tsa cov seem tshuav ntawm Yauxej tsev neeg rau hauv thaj av no; thiab thaj no yuav ua ib thaj av rau lawv tej qub txeeg qub teg; thiab lawv yuav txhim tsa ib lub nroog dawb huv rau tus Tswv, zoo li lub Yeluxalees thaum ub; thiab yuav tsis ua kom lawv raug kev ntxhov hnyo ntxiv lawm, kom txog thaum qhov kawg thaum uas lub ntiaj teb yuav dhau mus.

9 Thiab yuav muaj dua ib lub ntuj tshiab thiab ib lub ntiaj teb tshiab; thiab ob lub no yuav zoo li ob lub qub tsuas yog tias ob lub qub twb dhau mus lawm xwb, thiab txhua yam tau hloov los ua tshiab.

10 Thiab tom qab ntawd lub Yeluxalees Tshiab yuav los; thiab cov uas nyob hauv tau koob hmoov, vim lawv twb yog cov uas tej ris tsho dawb los ntawm tus Me Nyuam Yaj cov ntshav; thiab lawv yog cov uas yuav suav nrog cov seem tshuav ntawm Yauxej cov tub ki, uas yog los ntawm tsev neeg Ixayees.

11 Thiab tom qab ntawd lub Yeluxalees thaum ub los kuj yuav los; thiab cov neeg nyob hauv, lawv tau koob hmoov, vim tau muab lawv ntxuav nyob hauv tus Me Nyuam Yaj cov ntshav; thiab lawv yog cov uas tus Tswv ua kom tawg khiav ri niab thiab sau ua ke ntawm plaub ceg kaum ntuj, thiab ntawm tej chaw pem sab qaum teb los ua ke, thiab lawv yog cov uas txais koob hmoov los ntawm qhov uas tau muaj raws li txoj kev khi lus uas Vajtswv tau khi nrog lawv tus yawg koob, Anplaham.

12 Thiab thaum muaj tej no los, twb muaj raws li tej vaj lug kub uas hais tias, lawv cov uas los ua ntej, yuav los tom qab; thiab lawv cov uas los tom qab, yuav los ua ntej.

13 Thiab kuv twb yuav luag sau ntxiv, tiam sis tus Tswv txwv kuv; tiam sis Ethaws tej kev qhia tej yuav muaj los yav tom ntej yeej tseem ceeb thiab zoo kawg nkaus; tiam sis lawv saib nws yam tsis muaj nuj nqis, thiab muab nws ntiab tawm; thiab thaum nruab hnub nws mus nkaum hauv ib lub qhov tsua, thiab thaum hmo ntuj nws tawm mus saib tej uas yuav los raug cov neeg.

14 Thiab thaum nws nyob hauv lub qhov tsua nws thiaj sau qhov tseem tshuav ntawm phau ceev xwm txheej no, vim nws tau mus saib tej kev puas tsuaj uas los raug cov neeg, thaum hmo ntuj.

15 Thiab tau muaj tias nyob hauv tib xyoos uas nws raug ntiab tawm hauv cov neeg, pib muaj ib npluav rog loj heev nyob hauv cov neeg, vim muaj ntau tus uas tau sawv, uas yog neeg muaj zog, thiab nrhiav kev los ua kom Khauli-athumaws puas tsuaj los ntawm lawv tej tswv yim ntsiag to uas phem, uas tau hais txog lawm.

16 Thiab nim no Khauli-athumaws, vim nws tus kheej tau kawm tag nrho tej tswv yim ntawm kev ua rog thiab tag nrho kev ntxias ntawm lub ntiaj teb, yog li ntawd nws thiaj ua rog rau cov uas nrhiav kev ua kom nws puas tsuaj.

17 Tiam sis nws tsis hloov siab lees txim, nws cov tub thiab cov ntxhais uas zoo nkauj zoo nraug los tib yam; Khauhos cov tub thiab cov ntxhais uas zoo nkauj zoo nraug los tib yam; Khaulihos cov tub thiab cov ntxhais uas zoo nkauj zoo nraug los tib yam; thiab lub ntsiab yog li no, twb tsis muaj ib tug tub thiab ib tug ntxhais uas zoo nkauj zoo nraug ntawm tag nrho lub ntiaj teb hloov siab lees txim ntawm lawv tej kev txhaum li.

18 Yog li ntawd, tau muaj tias nyob hauv thawj xyoos uas Ethaws mus nyob hauv lub qhov tsua, muaj coob leej neeg raug tua tuag los ntawm cov uas tuav hauv ntsiag to ntawd tej ntaj, sib tua tawm tsam Khauli-athumaws seb lawv puas txeeb tau lub nceeg vaj.

19 Thiab tau muaj tias Khauli-athumaws cov tub sib ntaus sib tua heev thiab ntshav nrog ntau heev.

20 Thiab nyob hauv xyoo ob tus Tswv txoj lus tau los rau Ethaws, kom nws yuav tsum mus thiab qhia tej yuav muaj los yav tom ntej rau Khauli-athumaws tias, yog nws thiab tag nrho nws tsev neeg yuav hloov siab lees txim, tus Tswv yuav muab nws lub nceeg vaj rau nws thiab tseg cov neeg—

21 Tsis li ntawd lawv thiab tag nrho nws tsev neeg yuav raug puas tsuaj, tsuas yog tshuav nws tus kheej xwb. Thiab nws tsuas yuav nyob kom pom qhov uas yuav muaj raws li tej kev qhia tej yuav muaj los yav tom ntej uas hais tias yuav muaj lwm cov neeg tau thaj av mus ua lawv qub txeeg qub teg; thiab lawv yuav yog cov uas muab Khauli-athumaws faus; thiab txhua txhia tus neeg yuav raug puas tsuaj tsuas yog tshuav Khauli-athumaws xwb.

22 Thiab tau muaj tias Khauli-athumaws tsis kam hloov siab lees txim, nws tsev neeg los tsis kam, cov neeg los tsis kam; thiab tej kev ua rog tsis tsum; thiab lawv nrhiav kev muab Ethaws tua, tiam sis nws khiav tawm ntawm lawv mus thiab rov mus nkaum hauv lub qhov tsua dua.

23 Thiab tau muaj tias Seles tau sawv los, thiab nws los kuj ua rog rau Khauli-athumaws; thiab nws kov yeej Khauli-athumaws, nyob hauv xyoo peb nws thiaj coj tau Khauli-athumaws mus rau hauv kev poob cev qhev.

24 Thiab Khauli-athumaws cov tub, nyob hauv xyoo plaub, kov yeej Seles, thiab rov txeeb tau lub nceeg vaj los rau lawv txiv.

25 Nim no pib muaj ib npluav rog nyob thoob plaws rau ntawm thaj av, txhua tus txiv neej nrog rau nws pab neeg sib tua rau tej uas nws xav tau.

26 Thiab muaj cov tub sab, thiab lub ntsiab yog li no, muaj txhua yam kev phem nyob thoob plaws rau hauv thaj av.

27 Thiab tau muaj tias Khauli-athumaws npau taws heev rau Seles, thiab nws nrog rau nws cov tub rog tau mus ua rog rau Seles; thiab lawv tuaj sib ntsib yam npau taws heev, thiab lawv tuaj sib ntsib hauv lub hav Nkilenkas; thiab npluav rog tau los muaj kev nyuaj siab ntxhov plawv heev.

28 Thiab tau muaj tias Seles sib tua tawm tsam nws ncua tau peb hnub. Thiab tau muaj tias Khauli-athumaws kov yeej nws, thiab caum nws mus txog rau thaum nws mus txog rau lub tiaj Heloos.

29 Thiab tau muaj tias Seles rov ua rog rau nws nyob rau ntawm tiaj; thiab saib seb, nws kov yeej Khauli-athumaws, thiab muab nws thawb rov qab mus rau tom lub hav Nkilenkas.

30 Thiab Khauli-athumaws rov ua rog dua rau Seles nyob hauv lub hav Nkilenkas, nws thiaj kov yeej Seles thiab muab nws tua tuag.

31 Thiab Seles ua rau Khauli-athumaws raug mob ntawm nws sab ncej puab, nws thiaj li tsis rov mus ua rog ncua tau li ob xyoos, thaum lub sij hawm ntawd tag nrho cov neeg nyob hauv thaj av ua rau nqaij ntuag ntshav nrog, thiab twb tsis muaj leej twg cheem lawv.