1 Thiab tau muaj tias Aulaihas txiav txim ncaj ncees nyob hauv thaj av tag nrho nws lub neej, lub neej uas nyob ntev heev.

2 Thiab nws yug tau tub thiab ntxhais; muaj tseeb tiag, nws yug tau peb caug ib leeg, nyob hauv lawv muaj nees nkaum peb leeg tub.

3 Thiab tau muaj tias thaum nws hnub nyoog laus lawm nws kuj yug tau Khij. Thiab tau muaj tias Khij pauv nws qhov chaw los kav; thiab Khij yug tau Khaulihos.

4 Thiab thaum Khaulihos muaj peb caug ob xyoos nws ntxeev siab tawm tsam nws txiv, thiab tau mus nyob rau hauv thaj av Nihos; thiab nws yug tau tub thiab ntxhais, thiab lawv zoo nkauj zoo nraug heev; yog li ntawd Khaulihos rub tau coob leej mus raws nws qab.

5 Thiab thaum nws sau tau ib pab tub rog los ua ke lawm nws tau tuaj rau nram thaj av Mauloos qhov chaw uas tus vaj ntxwv nyob, thiab muab nws txhom, uas tau muaj raws li Yales tus tij laug tej lus hais tias lawv yuav raug kev poob cev qhev.

6 Nim no thaj av Mauloos, qhov chaw uas tus vaj ntxwv nyob, yog nyob ze thaj av uas cov Neeg Nifais muab hu ua Quav Poj.

7 Thiab tau muaj tias Khij nyob ua cev qhev, thiab Khaulihos uas yog nws tus tub kav nws cov neeg, txog rau thaum nws twb laus heev lawm; txawm li ntawd los Khij tseem yug tau Sulas thaum nws laus laus lawm, thaum nws tseem poob cev qhev.

8 Thiab tau muaj tias Sulas npau taws rau nws tus tij laug; thiab Sulas muaj zog zuj zus tuaj, thiab hloov los muaj zog raws li ntawm ib tug txiv neej lub zog; thiab nws kuj yog ib tug neeg txawj txiav txim.

9 Yog li ntawd, nws thiaj tuaj rau ntawm lub pov roob Efala-is, thiab nws nchuav tej quav hlau tawm ntawm lub pov roob los, thiab siv tej quav hlau ntaus ua ntaj rau cov uas nws yaum tau mus nrog nws; thiab tom qab nws tau muab ntaj rau lawv lawm nws thiaj rov qab mus rau tom lub nroog Nihos, thiab ua rog rau nws tus tij laug Khaulihos, nws thiaj txeeb tau lub teb chaws thiab rov muab txum tim rau nws txiv uas yog Khij.

10 Thiab nim no vim yog tej uas Sulas tau ua, nws txiv thiaj muab lub nceeg vaj rau nws; yog li ntawd nws pib pauv nws txiv qhov chaw los kav.

11 Thiab tau muaj tias nws txiav txim ncaj ncees; thiab nws ua kom nws lub nceeg vaj mus thoob plaws rau hauv thaj av, vim cov neeg tau muaj coob heev tuaj.

12 Thiab tau muaj tias Sulas kuj yug tau ntau tus tub thiab ntxhais.

13 Thiab Khaulihos tau hloov siab lees txim rau ntau yam phem uas nws tau ua; yog li ntawd Sulas thiaj muab hwj chim rau nws nyob hauv nws lub nceeg vaj.

14 Thiab tau muaj tias Khaulihos yug tau ntau tus tub thiab ntxhais. Thiab ntawm Khaulihos cov tub muaj ib tug uas npe hu ua Nau-as.

15 Thiab tau muaj tias Nau-as ntxeev siab tawm tsam Sulas, uas yog tus vaj ntxwv, thiab nws txiv Khaulihos, thiab rub tau nws tus tij laug Khauhos, thiab tag nrho nws cov kwv tij thiab coob leej ntawm cov neeg.

16 Thiab nws ua rog rau Sulas, uas yog tus vaj ntxwv, nws thiaj li txeeb tau thaj av uas yog lawv thawj thawj qhov qub txeeg qub teg; thiab nws tau los ua tus vaj ntxwv kav feem av ntawd.

17 Thiab tau muaj tias nws rov qab ua rog dua rau Sulas, uas yog tus vaj ntxwv; thiab nws txhom tau Sulas, uas yog tus vaj ntxwv, thiab cab nws mus ua qhev rau hauv Mauloos.

18 Thiab tau muaj tias thaum nws tab tom yuav muab Sulas tua, Sulas cov tub nyiag nkag mus rau hauv Nau-as lub tsev thaum tsaus ntuj thiab muab nws tua tuag, thiab tsoo lub qhov rooj ntawm lub tsev kaw tawg thiab coj tau lawv txiv tawm los, thiab muab nws tso rau saum nws lub rooj theej kiab hauv nws lub nceeg vaj.

19 Yog li ntawd Nau-as tus tub thiaj pauv Nau-as qhov chaw los txhim kho nws lub nceeg vaj; txawm li ntawd los lawv twb tsis muaj hwj chim kov yeej vaj ntxwv Sulas ntxiv lawm, thiab cov neeg uas vaj ntxwv Sulas kav tau vam meej heev thiab muaj zog tuaj.

20 Thiab lub teb chaws tau sib faib; thiab muaj ob lub nceeg vaj, Sulas lub nceeg vaj, thiab Khauhos, uas yog Nau-as tus tub, lub nceeg vaj.

21 Thiab Khauhos, uas yog Nau-as tus tub, hais kom nws cov neeg ua rog rau Sulas, Sulas thiaj tau kov yeej lawv thiab muab Khauhos tua tuag.

22 Thiab nim no Khauhos muaj ib tug tub uas npe hu ua Nimelaus; thiab Nimelaus muab Khauhos lub nceeg vaj rau Sulas, thiab nws ua rau Sulas nyiam nws; yog li ntawd Sulas tau muab ntau yam zoo rau nws, thiab nws ua tau raws li nws siab xav nyob hauv Sulas lub nceeg vaj.

23 Thiab nyob hauv Sulas txoj kev kav kuj muaj cov yaj saub tuaj rau hauv cov neeg, cov uas yog tus Tswv xa los, qhia tej yuav muaj los yav tom ntej hais tias cov neeg txoj kev phem thiab txoj kev pe dab pe mlom tab tom coj ib txoj kev foom tsis zoo los rau hauv thaj av, thiab lawv yuav raug puas tsuaj yog tias lawv tsis hloov siab lees txim.

24 Thiab tau muaj tias cov neeg hais lus phem tawm tsam cov yaj saub, thiab ua saib tsis taus lawv. Thiab tau muaj tias vaj ntxwv Sulas txiav txim tawm tsam tag nrho cov uas hais lus cem tawm tsam cov yaj saub.

25 Thiab nws tsa ib txoj kev cai thoob plaws tag nrho thaj av, uas muab hwj chim rau cov yaj saub tias lawv yuav mus txhua qhov uas lawv xav mus; thiab ua rau cov neeg thiaj hloov siab lees txim.

26 Thiab vim cov neeg tau hloov siab lees txim rau lawv tej kev ua phem thiab kev pe dab pe mlom tus Tswv thiaj tseg lawv, thiab lawv pib rov vam meej dua nyob hauv thaj av. Thiab tau muaj tias Sulas yug tau tub thiab ntxhais thaum nws twb laus lawm.

27 Thiab nyob hauv Sulas lub neej twb tsis muaj kev ua rog ntxiv lawm; thiab nws nco ntsoov tej yam tseem ceeb uas tus Tswv ua rau nws cov yawg koob thaum nws coj lawv hla tej dej tob heev tuaj rau thaj av uas cog lus cia; yog li ntawd nws tau txiav txim ncaj ncees tag nrho nyob hauv nws lub neej.