1 Thiab tau muaj tias nws yug tau Aumaws, thiab Aumaws pauv nws qhov chaw los kav. Thiab Aumaws yug tau Yales; thiab Yales yug tau tub thiab ntxhais.

2 Thiab Yales ntxeev siab tawm tsam nws txiv, thiab los nyob rau hauv thaj av Hethes. Thiab tau muaj tias nws ntxias tau coob leej, vim yog nws tej lus dag ntxias, txog rau thaum nws ntxias tau ib nrab ntawm lub nceeg vaj.

3 Thiab thaum nws ntxias tau ib nrab ntawm lub nceeg vaj lawm nws thiaj ua rog rau nws txiv, thiab nws cab tau nws txiv mus rau hauv kev poob cev qhev, thiab muab nws ua qhev;

4 Thiab nim no, ib nrab ntawm Aumaws lub caij kav yog nws poob cev qhev. Thiab tau muaj tias nws yug tau tub thiab ntxhais, nyob hauv cov no los muaj Henroos thiab Khauli-athumaws;

5 Thiab nkawd npau taws heev vim yog tej uas Yales nkawd tus tij laug tau ua, npaum li uas nkawd tau tsa ib pab tub rog thiab tau ua rog rau Yales. Thiab tau muaj tias nkawd tau ua rog rau nws thaum tsaus ntuj.

6 Thiab tau muaj tias thaum nkawd tau tua Yales cov tub rog tuag tag lawv twb yuav luag tua nws thiab; thiab nws thov nkawd kom nkawd tsis txhob tua nws, thiab nws yuav muab lub nceeg vaj rau nws txiv. Thiab tau muaj tias nkawd pub nws txoj sia rau nws.

7 Thiab nim no Yales tu siab heev vim yog txoj kev poob lub nceeg vaj, vim nws tau muab nws lub siab tso rau lub nceeg vaj thiab rau neeg ntiaj teb lub yeeb koob.

8 Nim no Yales tus ntxhais yog ib tug txawj ntse heev, thiab vim nws pom nws txiv tej kev tu siab, nws thiaj xav npaj ib lub tom txwv kom nws yuav txhiv tau lub nceeg vaj dim rau nws txiv.

9 Nim no Yales tus ntxhais zoo nkauj heev. Thiab tau muaj tias nws nrog nws txiv tham, thiab hais rau nws tias: Vim li cas kuv txiv yuav muaj kev tu siab ntau ua luaj? Puas yog nws tsis tau nyeem phau ceev xwm txheej uas peb cov yawg koob tau nqa tuaj hla tej dej tob heev? Saib seb, tsis yog muaj ib zaj ntsig txog lawv cov thaum ub, uas los ntawm lawv lub tswv yim ntsiag to lawv txeeb tau tej nceeg vaj thiab muaj yeeb koob heev no los?

10 Thiab nim no, yog li ntawd, cia kuv txiv xa xov mus rau Akis, uas yog Khinaws tus tub, kom nws tuaj; thiab saib seb, kuv twb zoo nkauj, thiab kuv yuav seev cev rau nws saib, thiab kuv yuav ua kom nws txaus siab, kom nws xav yuav kuv ua poj niam; yog li ntawd yog tias nws xav kom koj muab kuv rau nws yuav ua poj niam, ces koj hais tias: Kuv yuav muab nws rau koj yog tias koj nqa tau kuv txiv, uas yog tus vaj ntxwv, lub taub hau los rau kuv.

11 Thiab nim no Aumaws yog Akis ib tug phooj ywg; yog li ntawd, thaum Yales hu tau Akis tuaj, Yales tus ntxhais los seev cev rau nws saib uas Yales tus ntxhais ua rau nws txaus siab heev, npaum li uas nws xav yuav Yales tus ntxhais ua poj niam. Thiab tau muaj tias Akis hais rau Yales tias: Muab nws rau kuv yuav ua poj niam.

12 Thiab Yales hais rau nws tias: Kuv yuav muab nws rau koj, yog koj nqa tau kuv txiv, uas yog tus vaj ntxwv, lub taub hau los rau kuv.

13 Thiab tau muaj tias Akis sau tag nrho nws tej neeg txheeb ze tuaj rau hauv Yales lub tsev, thiab hais rau lawv tias: Nej puas cog lus rau kuv tias nej yuav koom nrog kuv tsis tu tsis tseg ua qhov uas kuv xav kom nej ua?

14 Thiab tau muaj tias lawv tag nrho tau cog lus rau nws, los ntawm tus Vajtswv saum ntuj ceeb tsheej, thiab kuj yog los ntawm lub ntuj, thiab kuj yog los ntawm lub ntiaj teb, thiab los ntawm lawv lub taub hau, hais tias yog leej twg tsis ua raws li qhov uas Akis xav kom ua tus ntawd yuav raug txiav taub hau; thiab yog leej twg qhia tawm tej yam uas Akis yuav qhia rau lawv paub, tus ntawd yuav xiam nws txoj sia.

15 Thiab tau muaj tias lawv tau yeem li no nrog Akis. Thiab Akis kom lawv ua kev cai lav lus uas yog muab los ntawm cov neeg txheej thaum ub uas xav tau hwj chim, uas tau muab cev los pib ntawm Kayees, tus uas yog ib tug neeg tua neeg txij thaum chiv keeb los.

16 Thiab tus dab phem txhawb nqa tej kev lav lus ntawd los ua tej kev cai lav lus no rau cov neeg, los ceev kom tau lawv nyob hauv kev tsaus ntuj, los pab cov uas ntshaw hwj chim kom tau hwj chim, thiab los tua neeg, thiab los tua txeeb tej khoom, thiab los dag, thiab los ua txhua yam kev phem thiab kev sib daj sib deev.

17 Thiab twb yog Yales tus ntxhais uas tau muab tej no tso rau hauv nws lub siab kom mus tshawb xyuas tej uas yog txheej thaum ub no; thiab Yales muab tej no tso rau hauv Akis lub siab; yog li ntawd, Akis thiaj ua kev cai lav lus rau nws cov neeg txheeb ze thiab cov phooj ywg, ntxias tau lawv lub siab los ntawm tej kev cog lus uas ntxim nyiam heev, mus ua txhua yam uas nws xav tau.

18 Thiab tau muaj tias lawv txhim tsa ib pab neeg tuav hauv ntsiag to ua ke, ib yam li lawv txheej thaum ub; uas yog ib txoj kev tuav hauv uas txaus ntxub thiab phem tshaj plaws, nyob ntawm Vajtswv lub qhov muag;

19 Vim tus Tswv twb tsis ua hauj lwm los ntawm tej kev tuav hauv ntsiag to, thiab nws twb tsis xav kom tib neeg ua kom ntshav nrog, tiam sis tau txwv tag nrho tej yam no, txij thaum chiv keeb ntawm tib neeg los.

20 Thiab nim no kuv, Maulaunais, twb tsis sau txog lawv tej kev lav lus thiab kev tuav hauv saib zoo li cas, vim twb tau ua rau kuv paub tias yeej muaj tej ntawd nyob hauv txhua haiv neeg, thiab twb muaj nyob hauv cov Neeg Lamas.

21 Thiab tej kev lav lus thiab kev tuav hauv ntawd tau ua rau cov neeg uas kuv tab tom hais txog no puas tsuaj, thiab kuj tau ua rau Nifais cov neeg puas tsuaj.

22 Thiab txhua haiv neeg uas txhawb nqa tej kev tuav hauv ntsiag to ntawd, los ua kom muaj hwj chim thiab nplua nuj, kom txog thaum lawv yuav ri mus thoob rau hauv haiv neeg, saib seb, haiv neeg ntawd yuav raug puas tsuaj; vim tus Tswv yuav tsis cia kom nws cov ntseeg tej ntshav, uas lawv ua kom nrog, yuav thov tas mus li tawm hauv av tuaj rau nws kom muaj kev pauj raug lawv thiab nws tseem tsis ua pauj rau cov ntseeg thiab.

23 Yog li ntawd, auj nej cov uas yog Lwm Haiv Neeg es, twb yog Vajtswv lub tswv yim kom yuav tsum muab tej no ua rau nej paub, xwv kom nej thiaj yuav hloov siab lees txim rau nej tej kev txhaum, thiab tsis txhob cia kom tej kev tuav hauv tua neeg no yuav kov yeej nej, tej uas yog ua los kom muaj hwj chim thiab nplua nuj—thiab txoj hauj lwm, muaj tseeb tiag, twb yog txoj hauj lwm ntawm kev puas tsuaj los raug nej, muaj tseeb tiag, twb yog rab ntaj ntawm txoj kev txim lij ntawm tus Vajtswv uas Nyob Mus Ib Txhis yuav viag los raug nej, los ua rau nej puas tsuaj puas ntsoog yog tias nej yuav cia kom muaj tej no.

24 Yog li ntawd, tus Tswv txib nej, thaum nej yuav pom tej no los rau hauv nej kom nej yuav ras paub txog nej lub neej uas phem heev, vim yog txoj kev tuav hauv ntsiag to no uas yuav muaj los rau hauv nej; los sis kev txom nyem yuav raug txoj kev tuav hauv ntsiag to ntawd, vim yog cov uas raug tua tuag lawm cov ntshav; vim lawv thov tawm hauv av tuaj kom muaj ua pauj rau txoj kev tuav hauv ntawd, thiab kuj yog rau cov uas txhim tsa txoj kev tuav hauv ntawd.

25 Vim yuav muaj tias tus uas txhim tsa txoj kev tuav hauv ntawd nrhiav kev ntxeev txoj kev ywj pheej ntawm tag nrho tej av, tej haiv neeg, thiab tej teb chaws; thiab yuav ua rau tag nrho cov neeg puas tsuaj, vim txoj kev tuav hauv ntawd twb yog txhim tsa los ntawm tus dab phem, tus uas yog leej txiv ntawm txhua yam kev dag; twb yog tib tug neeg dag uas tau ntxias peb thawj nkawm niam txiv, muaj tseeb tiag, twb yog tib tug neeg dag uas tau ua rau tib neeg tua neeg txij thaum chiv keeb los; tus uas tau ua rau tib neeg lub siab tawv kom lawv muab cov yaj saub tua, thiab xuas pob zeb ntaus lawv, thiab muab lawv ntiab tawm txij thaum chiv keeb los.

26 Yog li ntawd, tus Tswv thiaj txib kuv, Maulaunais, kom sau tej no xwv kom kev phem yuav ploj mus, thiab kom lub sij hawm yuav los uas Dab Ntxwg Nyoog yuav tsis muaj hwj chim kov yeej noob neej lub siab, tiam sis kom yaum tau lawv los ua zoo tsis tu ncua, xwv kom lawv yuav los rau ntawm qhov chaw txhawv tag nrho tej kev ncaj ncees thiab txais kev cawm seej.