1 Thiab tau muaj tias thaum Khauli-athumaws tau rov qab zoo ntawm nws tej mob los, nws pib nco qab txog tej lus uas Ethaws tau hais rau nws.

2 Nws pom tias nws cov neeg uas raug rab ntaj tua tuag lawm yuav luag muaj txog ob plhom, thiab nws pib tu siab heev; muaj tseeb tiag, muaj txog ob plhom ntawm cov neeg uas muaj zog, thiab lawv cov poj niam thiab lawv cov me nyuam raug tua tuag.

3 Nws pib hloov siab lees txim rau txoj kev phem uas nws tau ua; nws pib nco qab txog tej lus uas cov yaj saub lub qhov ncauj tau hais, thiab nws pom tias twb muaj raws li tej lus ntawd los txog txij no, txhua txhua lo; thiab nws tus ntsuj plig pib quaj ntsuag thiab tsis kam txais kev nplij siab.

4 Thiab tau muaj tias nws sau ib tsab ntawv mus rau Siv, thov kom Siv tseg cov neeg, thiab nws yuav muab lub nceeg vaj tso tseg kom cawm tau cov neeg txoj sia.

5 Thiab tau muaj tias thaum Siv txais tau nws tsab ntawv, Siv sau ib tsab ntawv mus rau Khauli-athumaws, hais tias yog Khauli-athumaws kam nyoo nws tus kheej, xwv kom Siv tau xuas nws rab ntaj kiag tua nws, ces Siv yuav tseg cov neeg txoj sia.

6 Thiab tau muaj tias cov neeg tsis kam hloov siab lees txim ntawm lawv txoj kev ua phem; thiab Khauli-athumaws cov neeg raug txhaub kom npau taws tawm tsam Siv cov neeg; thiab Siv cov neeg raug txhaub kom npau taws tawm tsam Khauli-athumaws cov neeg; yog li ntawd, Siv cov neeg thiaj ua rog rau Khauli-athumaws cov neeg.

7 Thiab thaum Khauli-athumaws pom tias nws twb yuav swb nws thiaj rov khiav dua ua ntej Siv cov neeg.

8 Thiab tau muaj tias nws los txog rau ntawm cov dej Lipli-ankas, uas txhais hais tias, loj heev, los sis loj tshaj tag nrho; yog li ntawd, thaum lawv los txog ntawm cov dej no lawv thiaj rub lawv tej tsev pheeb suab ntaub; thiab Siv kuj rub nws tej tsev pheeb suab ntaub nyob ze ntawm lawv; thiab yog li ntawd nyob rau hnub tom qab lawv thiaj tuaj ua rog.

9 Thiab tau muaj tias lawv sib tua nyob hauv ib npluav rog uas mob heev, nyob hauv npluav rog ntawd Khauli-athumaws rov qab raug mob dua, thiab nws tsaus muag vim nws xiam ntshav ntau.

10 Thiab tau muaj tias Khauli-athumaws cov tub rog tau txiv mus rau Siv cov tub rog lawv thiaj kov yeej Siv cov tub rog, ua rau Siv cov tub rog khiav ua ntej lawv; thiab Siv cov tub rog tau khiav mus rau sab qab teb, thiab rub lawv tej tsev pheeb suab ntaub nyob hauv ib qho chaw uas hu ua Ankas.

11 Thiab tau muaj tias Khauli-athumaws cov tub rog rub lawv tej tsev pheeb suab ntaub nyob ze ntawm lub pov roob Lamos; thiab twb yog tib lub roob uas kuv txiv Maumoos tau muab cov ceev xwm txheej uas dawb ceev zais rau tus Tswv.

12 Thiab tau muaj tias Siv thiab Khauli-athumaws nkawd sib sau tag nrho cov neeg uas nyob hauv thaj av tuaj ua ke, cov uas tsis tau raug tua, tsuas yog tshuav Ethaws xwb.

13 Thiab tau muaj tias Ethaws tau pom tag nrho tej uas cov neeg ua; thiab nws pom tias cov neeg uas yeem rau Khauli-athumaws sib sau ua ke mus rau Khauli-athumaws pab tub rog; thiab cov neeg uas yeem rau Siv sib sau ua ke mus rau Siv pab tub rog.

14 Yog li ntawd, nkawd sib sau cov neeg tuaj ua ke ncua tau li plaub xyoos, xwv kom nkawd yuav sau tau tag nrho cov uas nyob hauv thaj av, thiab xwv kom nkawd yuav tau txais tag nrho tej zog uas nkawd muaj peev xwm txais tau.

15 Thiab tau muaj tias thaum tag nrho cov neeg tau sib sau tuaj ua ke lawm, txhua txhua tus mus rau pab tub rog uas nws xaiv, nrog rau lawv cov poj niam thiab lawv cov me nyuam—tsis hais txiv neej, poj niam thiab me nyuam yaus los puav leej nqa tej cuab yeej ua rog, muaj tej phiaj hlau, thiab tej daim thaiv hauv siab, thiab tej kaus mom hlau, thiab hnav ris tsho raws li tus txheej txheem mus ua rog—lawv taug kev tawm mus ib leeg mus ua rog rau ib leeg; thiab lawv sib tua tas hnub ntawd, thiab tsis muaj tog yeej.

16 Thiab tau muaj tias thaum hmo ntuj lawv lim heev, thiab rov mus so rau tom lawv tej yeej; thiab tom qab lawv rov mus so rau tom lawv tej yeej, lawv tau quaj nrov nrov thiab nyiav vim txoj kev ploj ntawm lawv cov neeg uas raug tua tuag; thiab lawv quaj, lawv qw thiab lawv nyiav nrov heev, ua rau tej suab ntawd ncha nroo ntws rau saum nruab ntug.

17 Thiab tau muaj tias nyob rau hnub tom qab lawv rov mus ua rog dua, thiab hnub ntawd sib tua loj thiab txaus ntshai heev; txawm li ntawd los, lawv tsis muaj tog yeej, thiab thaum rov tsaus ntuj dua lawv lub suab quaj ncha nroo ntws rau saum nruab ntug, thiab lawv lub suab qw, thiab lawv lub suab quaj ntsuag, vim txoj kev ploj ntawm lawv cov neeg uas raug tua tuag.

18 Thiab tau muaj tias Khauli-athumaws rov sau dua ib tsab ntawv mus rau Siv, uas nws thov kom Siv tsis txhob tuaj ua rog ntxiv lawm, tiam sis kom nws cia li txais yuav lub nceeg vaj, thiab tseg cov neeg txoj sia.

19 Tiam sis saib seb, tus Tswv tus Ntsuj Plig twb tsum tsis nrog lawv nyob lawm, thiab Dab Ntxwg Nyoog twb muaj hwj chim tag nrho kav cov neeg lub siab; vim lawv tau ywj rau lawv lub siab tawv, thiab lawv txoj kev tsis thoob tsib to nrog uas ua rau lawv yuav raug puas tsuaj; yog li ntawd lawv rov mus ua rog dua.

20 Thiab tau muaj tias lawv sib tua hnub ntawd ib hnub nkaus, thiab thaum tsaus ntuj tuaj lawm lawv pw tsaug zog nrog lawv tej ntaj.

21 Thiab nyob rau hnub tom qab lawv sib tua txog rau thaum tsaus ntuj tuaj.

22 Thiab thaum tsaus ntuj tuaj lawv vwm nrog txoj kev npau taws, ib yam li ib tug neeg vwm cawv txiv hmab; thiab lawv rov pw tsaug zog nrog lawv tej ntaj.

23 Thiab nyob rau hnub tom qab lawv rov sib tua dua; thiab thaum tsaus ntuj tuaj lawv txhua tus tau vau los ntawm rab ntaj tsuas yog tshuav tsib caug ob leeg ntawm Khauli-athumaws cov neeg, thiab rau caum cuaj leeg ntawm Siv cov neeg.

24 Thiab tau muaj tias hmo ntawd lawv pw tsaug zog nrog lawv tej ntaj, thiab nyob rau hnub tom qab lawv rov sib tua dua, thiab lawv sib tawm tsam siv lawv tej ntaj thiab siv lawv tej phiaj hlau kom tas lawv lub zog, tag nrho hnub ntawd.

25 Thiab thaum tsaus ntuj tuaj tshuav peb caug ob leeg ntawm Siv cov neeg, thiab nees nkaum xya leej ntawm Khauli-athumaws cov neeg.

26 Thiab tau muaj tias lawv noj mov thiab pw tsaug zog, thiab npaj rau kev tuag nyob rau hnub tom qab. Thiab lawv yog neeg loj thiab muaj zog yog muab piv rau tej neeg lub zog.

27 Thiab tau muaj tias lawv sib tua ncua tau li peb teev, thiab lawv tsaus muag vim xiam ntshav ntau.

28 Thiab tau muaj tias thaum Khauli-athumaws cov neeg tau txais zog txaus uas lawv mus taus kev, lawv twb yuav luag khiav kom dim lawv txoj sia; tiam sis saib seb, Siv, thiab nws cov neeg tau sawv los, thiab nws cog lus los ntawm nws txoj kev npau taws tias nws yuav tua kom tau Khauli-athumaws los sis nws yuav piam sij los ntawm rab ntaj.

29 Yog li ntawd, nws caum lawv mus, thiab nyob rau hnub tom qab nws caum tau lawv; thiab lawv rov xuas ntaj sib tua dua. Thiab tau muaj tias thaum lawv txhua tus tau vau los ntawm rab ntaj, tsuas yog tshuav Khauli-athumaws thiab Siv xwb, saib seb Siv tau tsaus muag vim xiam ntshav ntau.

30 Thiab tau muaj tias thaum Khauli-athumaws tau pheeb rau ntawm nws rab ntaj, es nws tau so me ntsis, nws muab Siv lub taub hau txiav.

31 Thiab tau muaj tias tom qab nws muab Siv lub taub hau txiav lawm, Siv xuas nws ob txhais tes txheem sawv thiab cia li vau; thiab tom qab nws tau ntswj huas pa, nws tau tuag.

32 Thiab tau muaj tias Khauli-athumaws vau rau hauv av, thiab zoo li nws tsis muaj sia.

33 Thiab tau muaj tias tus Tswv hais lus rau Ethaws, thiab hais rau nws tias: Cia li tawm mus. Thiab nws tawm mus, thiab pom tias tau muaj raws li tus Tswv tej lus tag nrho; thiab nws xaus nws phau ceev xwm txheej; (thiab kuv twb sau tsis tau ib feem pua ntawm Ethaws phau ceev xwm txheej) thiab nws muab phau ceev xwv txheej zais raws li tus txheej txheem uas Leehais cov neeg mus nrhiav tau.

34 Nim no cov lus kawg uas Ethaws tau sau yog cov no: Txawm tias tus Tswv yuav kom kuv plhis, los sis kom kuv tiv li tus Tswv lub siab nyiam nyob hauv cev nqaij daim tawv, twb tsis tseem ceeb, tsuas yog Vajtswv cawm kuv nyob hauv Vajtswv lub nceeg vaj xwb. Amees.