Phau Ntawv Ethaws
Cov Neeg Yales phau ceev xwm txheej, uas tau muab ntawm nees nkaum plaub daig phiaj los, uas yog Leehais cov neeg mus nrhiav tau nyob rau Vaj Ntxwv Mauxiyas lub caij.
Tshooj 1
Maulaunais muab Ethaws tej ntsiab lus uas nws sau txiav los tso ua ke—Qhia txog Ethaws zaj qhia caj ceg—Tus Tswv tsis ua rau cov Neeg Yales yam lus kom tsis sib nkag siab nyob rau ntawm tus Pej Thuam Npanpees—Tus Tswv cog lus tias yuav coj lawv mus rau ib thaj av zoo thiab ua kom lawv los ua ib haiv neeg zoo heev.
1 Thiab nim no kuv, Maulaunais, yuav pib qhia ib zaj txog cov tib neeg thaum ub uas tus Tswv txhais tes tau ua kom puas tsuaj nyob rau hauv thaj chaw sab qaum teb no.
2 Thiab kuv muab kuv zaj los ntawm nees nkaum plaub daig phiaj uas Leehais cov neeg mus nrhiav tau, uas yog hu ua Phau Ntawv Ethaws.
3 Thiab vim kuv xav tias thawj feem ntawm phau ceev xwm txheej no, uas hais txog txoj kev tsim lub ntiaj teb, thiab hais txog Adas, thiab ib zaj txij li lub caij ntawd los txog rau tus pej thuam loj, thiab txhua yam uas tau tshwm sim nyob hauv noob neej los mus txog rau lub sij hawm ntawd, twb muaj nyob hauv cov Neeg Yudais lawm—
4 Yog li ntawd kuv yuav tsis sau tej uas tau tshwm sim txij li Adas lub caij nyoog los txog rau lub sij hawm ntawd; tiam sis tej ntawd yeej muaj nyob hauv cov phiaj; thiab tus uas nrhiav tau tej ntawd, tus ntawd yuav muaj peev xwm tau tag nrho zaj ntawd.
5 Tiam sis saib seb, kuv yuav tsis qhia tag nrho zaj ntawd, tiam sis kuv tsuas qhia ib feem ntawm zaj ntawd xwb, txij li tus pej thuam los txog thaum lawv raug puas tsuaj.
6 Thiab kuv yuav qhia zaj ntawd raws li no. Tus uas sau phau ceev xwm txheej no yog Ethaws, thiab nws yog ib tug xeeb ntxwv ntawm Khauli-ataws.
7 Khauli-ataws yog Mauloos tus tub.
8 Thiab Mauloos yog Eethas tus tub.
9 Thiab Eethas yog Ahav tus tub.
10 Thiab Ahav yog Xej tus tub.
11 Thiab Xej yog Sinploos tus tub.
12 Thiab Sinploos yog Khoos tus tub.
13 Thiab Khoos yog Khauli-atoos tus tub.
14 Thiab Khauli-atoos yog Anikhadas tus tub.
15 Thiab Anikhadas yog Aloos tus tub.
16 Thiab Aloos yog ib tug xeeb ntxwv ntawm Hethes, tus uas yog Hiathoos tus tub.
17 Thiab Hiathoos yog Lis tus tub.
18 Thiab Lis yog Khis tus tub.
19 Thiab Khis yog Khauloos tus tub.
20 Thiab Khauloos yog Levis tus tub.
21 Thiab Levis yog Kis tus tub.
22 Thiab Kis yog Mauli-atoos tus tub.
23 Thiab Mauli-atoos yog ib tug xeeb ntxwv ntawm Lilakis.
24 Thiab Lilakis yog Ses tus tub.
25 Thiab Ses yog Hethes tus tub.
26 Thiab Hethes yog Khoos tus tub.
27 Thiab Khoos yog Khauli-atoos tus tub.
28 Thiab Khauli-atoos yog Emaws tus tub.
29 Thiab Emaws yog Aumaws tus tub.
30 Thiab Aumaws yog Sulas tus tub.
31 Thiab Sulas yog Khij tus tub.
32 Thiab Khij yog Aulaihas tus tub, tus uas ho yog Yales tus tub;
33 Tus Yales uas tau tawm tuaj nrog rau nws tus tij laug thiab nkawd ob tsev neeg, nrog rau lwm cov thiab lawv tej tsev neeg, tim tus pej thuam loj tuaj, nyob rau lub caij thaum tus Tswv ua rau cov neeg yam lus tsis sib nkag siab, thiab npau taws cog lus tias lawv yuav raug tawg khiav ri niab mus thoob plaws hauv lub ntiaj teb; thiab raws li tus Tswv txoj lus cov neeg tau tawg khiav ri niab.
34 Thiab vim Yales tus tij laug yog ib tug neeg loj thiab muaj zog, thiab yog ib tug neeg uas tus Tswv txaus siab heev rau, Yales, nws tus kwv, hais rau nws tias: Cia li thov tus Tswv, kom nws tsis txhob hloov peb yam lus kom peb tsis nkag siab peb tej lus.
35 Thiab tau muaj tias Yales tus tij laug tau thov tus Tswv, thiab tus Tswv tau muaj kev khuv leej rau Yales; yog li ntawd nws thiaj tsis hloov Yales yam lus; thiab Yales thiab nws tus tij laug tej lus thiaj tsis raug hloov.
36 Tom qab ntawd Yales hais rau nws tus tij laug tias: Rov qab thov tus Tswv dua, thiab tej zaum nws yuav tig nws txoj kev npau taws tawm ntawm cov uas yog wb cov phooj ywg mus, kom nws tsis txhob hloov lawv yam lus.
37 Thiab tau muaj tias Yales tus tij laug tau thov tus Tswv, thiab tus Tswv muaj kev khuv leej rau nkawd cov phooj ywg thiab lawv tsev neeg, ua rau lawv tej lus tsis raug hloov.
38 Thiab tau muaj tias Yales rov hais rau nws tus tij laug dua, hais tias: Cia li mus thiab thov tus Tswv saib nws puas kom peb khiav tawm ntawm thaj av mus, thiab yog tias nws kom peb khiav tawm ntawm thaj av mus, thov nws saib peb yuav mus rau qhov twg. Thiab twb tsis muaj neeg paub tej zaum tus Tswv yuav coj peb mus rau hauv ib thaj av uas yog thaj zoo tshaj plaws txhua thaj hauv lub ntiaj teb? Thiab yog ho muaj li ntawd, cia peb rau siab ntseeg tus Tswv, xwv kom peb yuav tau txais thaj av ntawd los ua peb qub txeeg qub teg.
39 Thiab tau muaj tias Yales tus tij laug tau thov tus Tswv raws li tej uas Yales lub qhov ncauj tau hais.
40 Thiab tau muaj tias tus Tswv tau hnov Yales tus tij laug, thiab muaj kev khuv leej rau nws, thiab hais rau nws tias:
41 Cia li mus thiab sau koj tej tsiaj los ua ke, tsis hais tej maum thiab tej txiv, txhua yam; thiab tej noob txhua yam ntawm lub ntiaj teb; thiab koj tsev neeg; thiab koj tus kwv Yales thiab nws tsev neeg; thiab koj cov phooj ywg thiab lawv tsev neeg, thiab Yales cov phooj ywg thiab lawv tsev neeg.
42 Thiab thaum koj tau ua li no lawm koj cia li ua lawv ntej mus rau nram lub hav uas nyob rau sab qaum teb. Thiab kuv mam ntsib koj nyob rau qhov chaw ntawd, thiab kuv yuav mus ua koj ntej mus rau hauv ib thaj av uas zoo tshaj lwm thaj av tag nrho hauv lub ntiaj teb.
43 Thiab nyob rau qhov chaw ntawd kuv yuav foom koob hmoov rau koj thiab koj cov tub ki, thiab los ntawm koj cov tub ki, thiab los ntawm koj tus kwv cov tub ki, thiab los ntawm cov uas yuav nrog koj mus, kuv yuav tsa ib haiv neeg zoo heev los rau kuv. Thiab nyob rau hauv thoob plaws lub ntiaj teb yuav tsis muaj lwm haiv neeg zoo tshaj haiv neeg uas kuv yuav tsa los rau kuv los ntawm koj cov tub ki. Thiab kuv yuav ua li no rau koj vim yog koj tau thov kuv ntev npaum li no.