1 Thiab nim no kuv, Maulaunais, rov muab phau ceev xwm txheej txog Yales thiab nws tus tij laug qhia ntxiv.

2 Vim tau muaj tias tom qab uas tus Tswv tau npaj cov pob zeb uas Yales tus tij laug tau nqa mus rau saum lub roob, Yales tus tij laug nqis tawm saum lub roob los, thiab nws muab tej pob zeb ntawd tso rau hauv cov nkoj uas tau npaj, ib lub rau ib tog ntawm cov nkoj; thiab saib seb, cov pob zeb ntawd ci pom kev rau cov nkoj.

3 Thiab li no tus Tswv tau ua rau cov pob zeb ci pom kev nyob hauv qhov tsaus ntuj, kom ci pom kev rau cov txiv neej, cov poj niam, thiab cov me nyuam, xwv kom lawv tsis tas hla cov dej loj nyob hauv kev tsaus ntuj.

4 Thiab tau muaj tias thaum lawv npaj tau txhua yam zaub mov, xwv kom lawv thiaj yuav nyob muaj sia rau saum dej, thiab kuj npaj zaub noj rau lawv tej pab yaj thiab tej tsiaj txhu, thiab txhua yam tsiaj qus los sis tsiaj nyeg los sis noog uas lawv yuav coj nrog lawv—thiab tau muaj tias thaum lawv tau ua tag txhua yam no lawm lawv nce mus rau hauv lawv cov nkoj, thiab tawm mus rau hauv hiav txwv, muab lawv tus kheej cob rau tus Tswv lawv tus Vajtswv.

5 Thiab tau muaj tias tus Tswv uas yog Vajtswv tau ua kom muaj ib nthw cua loj ntsawj rau saum nplaim dej hiav txwv, mus rau tim thaj av uas cog lus cia; thiab yog li ntawd lawv tau raug ntsawj nyob saum tej ntshuas dej hiav txwv los ntawm tej cua.

6 Thiab tau muaj tias muaj ntau zaus lawv raug faus mus tob tob hauv dej hiav txwv, vim yog tej nthwv dej luaj roob uas tau tawg los npog lawv, thiab vim yog tej cua daj cua dub loj thiab txaus ntshai uas yog los ntawm tej cua hlob.

7 Thiab tau muaj tias thaum lawv raug faus nyob hauv dej tob tob twb tsis muaj cov dej uas yuav ua tau rau lawv raug mob, vim lawv cov nkoj ntom ib yam li ib lub ntim, thiab cov nkoj kuj ntom ib yam li Nau-as lub nkoj; yog li ntawd thaum cov dej hiav txwv vij lawv ib puag ncig lawv tau thov tus Tswv, thiab nws rov coj lawv tawm rau saum nplaim dej dua.

8 Thiab tau muaj tias tej cua yeej tshuab tsis tu mus rau tim thaj av uas cog lus cia thaum lawv tseem nyob rau saum cov dej; thiab yog li ntawd lawv raug ntsawj los ntawm tej cua.

9 Thiab lawv hu nkauj qhuas tus Tswv; muaj tseeb tiag, Yales tus tij laug tau hu nkauj qhuas tus Tswv, thiab nws ua tsaug thiab qhuas tus Tswv tag nrho ib hnub; thiab thaum tsaus ntuj tuaj, lawv tseem qhuas tus Tswv tsis tu tsis tseg.

10 Thiab li no lawv raug ntsawj mus; thiab twb tsis muaj tej tsiaj phem nyob hauv hiav txwv uas yuav tsoo tau lawv tawg, thiab tej ntses loj los twb tsis muaj peev xwm ua rau lawv puas tau; thiab lawv muaj qhov ci pom kev mus tsis tu ncua, tsis hais nyob saum nplaim dej los sis hauv qab thu dej.

11 Thiab li no lawv raug ntsawj mus, peb puas plaub caug plaub hnub nyob saum cov dej.

12 Thiab lawv mus sua rau ntawm ntug dej ntawm thaj av uas cog lus cia. Thiab thaum lawv muab lawv ko taw mus tsuj rau saum ntug dej ntawm thaj av uas cog lus cia lawv khoov lawv tus kheej ti nkaus rau hauv av, thiab txo lawv lub hwj chim rau ntawm tus Tswv, thiab los kua muag ntawm kev xyiv fab rau tus Tswv, vim yog nws txoj kev hlub tshua uas muaj nplua mias rau lawv.

13 Thiab tau muaj tias lawv tawm mus rau hauv thaj av, thiab pib mus ncaws teb.

14 Thiab Yales muaj plaub tug tub; thiab lawv hu ua Yakhaus, thiab Nkinkas, thiab Mahas, thiab Aulaihas.

15 Thiab Yales tus tij laug los kuj yug tau tub thiab tau ntxhais.

16 Thiab Yales cov phooj ywg thiab nws tus tij laug cov phooj ywg muaj kwv yees li nees nkaum ob leeg; thiab lawv los kuj muaj tub thiab muaj ntxhais ua ntej lawv tuaj txog rau thaj av uas cog lus cia; thiab yog li ntawd lawv pib huaj vam.

17 Thiab Yales thiab nws tus tij laug qhia kom lawv txo hwj chim taug kev rau tus Tswv pom; thiab Vajtswv kuj qhia lawv thiab.

18 Thiab tau muaj tias lawv pib ri mus rau ntawm thaj av, thiab pib huaj vam thiab pib mus ncaws teb; thiab lawv muaj zog zuj zus tuaj nyob rau hauv thaj av.

19 Thiab Yales tus tij laug pib laus lawm, thiab pom tias tsis ntev nws yuav tsum nqis mus rau hauv lub qhov ntxa; yog li ntawd nws hais rau Yales tias: Cia wb sau wb cov neeg tuaj ua ke xwv kom wb yuav suav txheeb lawv, xwv kom wb yuav paub los ntawm lawv saib lawv xav tau dab tsi ntawm wb ua ntej wb nqis mus rau hauv wb ob lub qhov ntxa.

20 Thiab raws nraim li ntawd cov neeg tau sib sau tuaj ua ke. Nim no Yales tus tij laug cov tub thiab cov ntxhais muaj nees nkaum ob leeg; thiab Yales cov tub thiab cov ntxhais muaj kaum ob leeg, thiab nws muaj plaub leeg tub.

21 Thiab tau muaj tias nkawd tau suav nkawd cov neeg; thiab tom qab nkawd tau suav lawv tas, nkawd xav paub txog lawv saib lawv xav kom nkawd ua dab tsi rau lawv ua ntej nkawd nqis mus rau hauv nkawd ob lub qhov ntxa.

22 Thiab tau muaj tias cov neeg thov kom nkawd pleev roj tsa nkawd ib tug tub los ua tus vaj ntxwv kav lawv.

23 Thiab nim no saib seb, qhov no ua rau nkawd nyuaj siab heev. Thiab Yales tus tij laug hais rau lawv tias: Muaj tseeb qhov no yuav ua kom muaj kev poob cev qhev.

24 Tiam sis Yales hais rau nws tus tij laug tias: Cia rau lawv muaj ib tug vaj ntxwv. Thiab yog li ntawd nws thiaj hais rau lawv tias: Nej cia li xaiv wb ib tug tub los ua tus vaj ntxwv, txawm yog tus twg los nyob ntawm nej.

25 Thiab tau muaj tias lawv xaiv Yales tus tij laug tus tub hlob; thiab nws lub npe hu ua Pankas. Thiab tau muaj tias nws tsis lees thiab tsis kam ua lawv tus vaj ntxwv. Thiab cov neeg xav kom nws txiv txhib nws ua, tiam sis nws txiv tsis kam txhib nws; thiab nws hais rau lawv tias lawv yuav tsum tsis txhob txhaub ib tug neeg los ua lawv tus vaj ntxwv.

26 Thiab tau muaj tias lawv xaiv tag nrho Pankas cov kwv tij, thiab lawv tsis kam ua.

27 Thiab tau muaj tias tag nrho Yales cov tub los kuj tsis kam, tsuas yog tshuav ib tug xwb; thiab Yales tus tij laug tau pleev roj tsa Aulaihas los ua vaj ntxwv kav cov neeg.

28 Thiab nws pib kav, thiab cov neeg pib vam meej; thiab lawv hloov los ua neeg nplua nuj heev.

29 Thiab tau muaj tias Yales tuag, thiab nws tus tij laug los kuj tib yam.

30 Thiab tau muaj tias Aulaihas tau txo hwj chim taug kev rau tus Tswv pom, thiab nco ntsoov tej yam tseem ceeb uas tus Tswv tau ua rau nws txiv, thiab kuj qhia nws cov neeg hais tias tus Tswv tau ua tej yam tseem ceeb rau lawv cov yawg koob.