1 Thiab tau muaj tias Yales thiab nws tus tij laug, thiab nkawd ob tsev neeg, thiab Yales thiab nws tus tij laug cov phooj ywg thiab lawv tsev neeg, tau mus rau nram lub hav uas yog nyob sab qaum teb, (thiab lub hav ntawd hu ua Nimelaus, uas yog tis raws li tus neeg tua tsiaj uas muaj suab npe) nrog rau lawv tej tsiaj uas lawv tau sau los ua ke, tej maum thiab tej txiv, txhua yam.

2 Thiab lawv kuj tau cuab ntxiab thiab txhom tau tej noog saum nruab ntug; thiab lawv kuj tau npaj ib lub thoob, uas nyob rau hauv yog ntim lawv cov ntses ntawm tej dej.

3 Thiab lawv kuj nqa dexiles nrog lawv, uas yog muab txhais ces yog ib co ntab muaj zib; thiab yog li ntawd lawv nqa nas ntab nrog lawv, thiab txhua yam ntawm tej uas muaj nyob hauv thaj av, tej noob txhua yam.

4 Thiab tau muaj tias thaum lawv los txog rau hauv lub hav Nimelaus tus Tswv tau nqis los thiab tham nrog Yales tus tij laug; thiab nws nyob hauv cov huab, thiab Yales tus tij laug tsis pom nws.

5 Thiab tau muaj tias tus Tswv txib lawv kom lawv yuav tsum tawm mus rau hauv roob moj sab qhua, muaj tseeb tiag, rau hauv feem uas tsis tau muaj neeg mus dua li. Thiab tau muaj tias tus Tswv mus ua lawv ntej, thiab tham nrog lawv thaum nws sawv nyob hauv cov huab, thiab qhia kev saib lawv yuav tsum mus qhov twg.

6 Thiab tau muaj tias lawv tau mus ib qho rau ib qho nyob hauv roob moj sab qhua, thiab tau txua tej nkoj, rau lawv hla ntau tus dej, thiab tus Tswv txhais tes yeej coj lawv kev tsis tu ncua.

7 Thiab tus Tswv twb tsis xav kom lawv cia li nres ntawm tus ntug dej hiav txwv sab tid nyob hauv roob moj sab qhua, tiam sis nws xav kom lawv yuav tsum tuaj kom txog rau thaj av uas cog lus cia, uas yog thaj av zoo tshaj lwm thaj av, uas tus Tswv uas yog Vajtswv tau tshwj tseg rau ib co neeg ncaj ncees.

8 Thiab nws tau cog lus rau Yales tus tij laug nrog nws txoj kev npau taws, hais tias tus uas yuav tuaj nyob hauv thaj av uas cog lus cia no, txij lub sij hawm ntawd lawm yav tom ntej thiab mus ib txhis, yuav tsum teev tiam nws, uas yog tus Vajtswv tseeb thiab tib leeg xwb, tsis li ces lawv yuav raug tshoob mus thaum nws txoj kev npau taws tag nrho yuav los raug lawv.

9 Thiab nim no, peb pom tau Vajtswv tej lus ceeb toom ntsig txog thaj av no, hais tias thaj no yog ib thaj av uas cog lus cia; thiab txhua haiv neeg uas tuaj nyob hauv thaj av no yuav tsum teev tiam Vajtswv, tsis li ces lawv yuav raug tshoob mus thaum nws txoj kev npau taws tag nrho yuav los raug lawv. Thiab qhov puv npo ntawm nws txoj kev npau taws tag nrho yuav los raug lawv thaum lawv txoj kev ua phem siav lawm.

10 Vim saib seb, nov yog ib thaj av uas zoo tshaj tag nrho lwm thaj av; yog li ntawd tus uas nyob hauv thaj av no yuav tsum teev tiam Vajtswv tsis li ces yuav raug tshoob mus; vim qhov no twb yog Vajtswv cov lus tshaj tawm uas kav ib txhis. Thiab lawv yuav tsis raug tshoob mus kom txog thaum muaj tej kev ua phem tag nrho nyob hauv cov me nyuam ntawm thaj av tso.

11 Thiab qhov no yog muab los rau nej, auj nej cov uas yog Lwm Haiv Neeg es, xwv kom nej yuav paub txog Vajtswv tej lus ceeb toom—xwv kom nej yuav hloov siab lees txim, thiab tsis txhob ua phem mus ntxiv kom txog thaum tej kev ua phem tag nrho yuav los, xwv kom nej tsis txhob coj tau tag nrho Vajtswv txoj kev npau taws los rau nej ib yam li cov neeg uas nyob ntawm thaj av tau ua los lawm.

12 Saib seb, thaj no yog ib thaj av zoo, thiab txhua haiv neeg uas tuaj nyob rau hauv thaj av no yuav dim ntawm kev ua qhev, thiab ntawm kev poob cev qhev, thiab ntawm tag nrho lwm haiv neeg uas nyob hauv qab ntuj, tsuas yog tias lawv yuav teev tiam tus Vajtswv ntawm thaj av, uas yog Yexus Khetos, tus uas twb tau tshwm sim los, los ntawm tej uas peb tau muab sau cia.

13 Thiab nim no kuv yuav hais mus ntxiv txog kuv phau ceev xwm txheej; vim saib seb, tau muaj tias tus Tswv tau coj Yales thiab nws tus tij laug tawm mus txog rau tus dej hiav txwv loj uas faib tej av. Thiab thaum lawv mus txog rau ntawm tus dej hiav txwv lawv rub lawv tej tsev pheeb suab ntaub; thiab lawv muab qhov chaw ntawd hu ua Mali-akhumaws; thiab lawv nyob hauv tej tsev pheeb suab ntaub, thiab nyob hauv tej tsev pheeb suab ntaub ntawm ntug dej hiav txwv tau ncua li plaub xyoos.

14 Thiab tau muaj tias thaum kawg ntawm plaub xyoos tus Tswv rov los rau Yales tus tij laug dua, thiab sawv nyob hauv ib tauv huab thiab nrog nws tham. Thiab tus Tswv tau nrog Yales tus tij laug tham tau ncua li peb teev, thiab qhuab ntuas nws vim nws tsis nco qab hu txog tus Tswv lub npe.

15 Thiab Yales tus tij laug hloov siab lees txim ntawm txoj kev phem uas nws tau ua, thiab nws hu txog tus Tswv lub npe kom pab nws cov kwv tij uas nrog nws. Thiab tus Tswv hais rau nws tias: Kuv yuav zam txim rau koj thiab koj cov kwv tij ntawm lawv tej kev txhaum; tiam sis nej tsis txhob ua txhaum ntxiv lawm, vim nej yuav nco ntsoov tias kuv tus Ntsuj Plig yuav tsis tshoov neeg lub siab tas mus li; yog li ntawd, yog tias nej yuav ua txhaum kom txog thaum nej siav tas lawm nej yuav raug txiav tawm ntawm tus Tswv xub ntiag mus. Thiab tej no yog kuv tej kev xav ntsig txog thaj av uas kuv yuav muab rau nej ua nej tej qub txeeg qub teg; vim thaj av no yuav yog ib thaj av uas zoo tshaj tag nrho lwm thaj av.

16 Thiab tus Tswv hais tias: Cia li mus ua hauj lwm thiab txua, tej nkoj raws li tej uas nej tau txua tas los no. Thiab tau muaj tias Yales tus tij laug tau mus ua hauj lwm, thiab nws cov kwv tij los tib yam, thiab txua tej nkoj zoo li tej uas lawv tau txua tas los lawm, raws li tus Tswv tej kev qhia. Thiab tej nkoj ntawd me me, thiab tej nkoj ntawd sib sib nyob rau saum nplaim dej, twb sib ib yam li ib tug noog nyob rau saum nplaim dej.

17 Thiab tau txua cov nkoj ntawd raws tus yeeb yam uas ua rau cov nkoj ntom heev, ua rau cov nkoj ntim tau dej li ib lub ntim; thiab hauv qab los ntom ib yam li ib lub ntim; thiab ntawm ib sab los ntom li ib lub ntim; thiab tom ob tog kawg ntse hau; thiab sab saud kuj ntom li ib lub ntim; thiab qhov ntev yog ntev li ib tug ntoo; thiab lub qhov rooj ntawd, thaum muab kaw, kuj ntom li ib lub ntim.

18 Thiab tau muaj tias Yales tus tij laug thov tus Tswv, hais tias: Auj tus Tswv es, kuv tau ua txoj hauj lwm uas koj tau txib kuv, thiab kuv tau txua cov nkoj raws li qhov uas koj tau hais kom kuv txua.

19 Thiab saib seb, auj tus Tswv es, tsis muaj teeb pom kev nyob hauv cov nkoj ntawd; es peb yuav tsav mus rau qhov twg? Thiab peb kuj yuav piam sij, vim peb ua tsis taus pa nyob hauv cov nkoj, tsuas yog muaj pa uas nyob haud xwb; yog li ntawd peb yuav piam sij.

20 Thiab tus Tswv hais rau Yales tus tij laug tias: Saib seb, koj cia li tho ib lub qhov rau sab saud, thiab rau hauv qab; thiab thaum koj xav cia cua los koj cia li qhib lub qhov thiab cia cua nkag los. Thiab yog tias dej ho nkag los rau hauv nej, saib seb, nej cia li kaw lub qhov, xwv kom nej thiaj tsis piam sij nyob hauv dej nyab.

21 Thiab tau muaj tias Yales tus tij laug tau ua li ntawd, raws li tus Tswv tau txib.

22 Thiab nws rov thov tus Tswv dua hais tias: Auj tus Tswv es, saib seb kuv twb tau ua raws li koj tau txib kuv; thiab kuv tau npaj cov nkoj rau kuv cov neeg, thiab saib seb twb tsis muaj teeb pom kev nyob haud. Saib seb, auj tus Tswv es, koj puas yuav cia peb hla cov dej loj no nyob hauv kev tsaus ntuj nti?

23 Thiab tus Tswv hais rau Yales tus tij laug tias: Koj xav kom kuv ua dab tsi es nej thiaj li muaj teeb pom kev nyob hauv nej cov nkoj? Vim saib seb, nej muaj tsis tau qhov rais, vim cov nkoj yuav tawg ua dwb daim; thiab nej yuav nqa tsis tau hluav taws nrog nej, vim nej tsis txhob cia hluav taws coj nej kev.

24 Vim saib seb, nej yuav zoo li ib tug ntses loj loj nyob hauv plawv hiav txwv; vim tej nthwv dej luaj roob yuav los ntaus nej. Txawm li ntawd los, kuv mam coj nej tawm hauv qab thu dej hiav txwv rov los; vim tej cua tau tawm ntawm kuv lub qhov ncauj mus, thiab kuv kuj tau xa tej nag thiab tej dej nyab tawm mus.

25 Thiab saib seb, kuv npaj nej rau tej yam no; vim nej yuav tsis muaj peev xwm hla tej dej tob heev no tsuas yog kuv yuav npaj nej rau tej nthwv dej ntawm dej hiav txwv, thiab tej cua uas tau tawm mus, thiab tej dej nyab uas yuav los. Yog li ntawd koj xav kom kuv npaj dab tsi rau nej xwv kom nej yuav muaj teeb pom kev thaum nej raug nqos hauv qab thu dej hiav txwv?