1 Thiab nim no kuv, Maulaunais, txuas kuv phau ceev xwm txheej ntxiv. Yog li ntawd, saib seb, tau muaj tias vim yog tej kev ua ke tuav hauv ntawm Akis thiab nws cov phooj ywg. Saib seb, lawv ntxeev tau Aumaws lub teb chaws.

2 Txawm li ntawd los, tus Tswv tseem tau hlub tshua rau Aumaws, thiab rau nws tej tub thiab rau nws tej ntxhais cov uas tsis tau nrhiav ua kom nws puas tsuaj.

3 Thiab tus Tswv tau ceeb toom Aumaws nyob hauv ib zag npau suav kom nws ncaim tawm ntawm thaj av mus; yog li ntawd Aumaws tau ncaim tawm ntawm thaj av nrog nws tsev neeg, thiab tau tsiv mus ntau hnub, thiab tau los txog thiab tau hla ze ntawm lub roob See, thiab tau los txog ze ntawm qhov chaw uas cov Neeg Nifais tau raug puas tsuaj, thiab mus ntawm qhov ntawd mus rau sab hnub tuaj, thiab tau los txog ib qho chaw uas hu ua Anploos, ze ntawm ntug hiav txwv, thiab nyob qhov ntawd nws tau rub nws lub tsev pheeb suab ntaub, thiab nws tej tub thiab tej ntxhais, thiab tag nrho nws tsev neeg, tsuas yog tshuav Tsales thiab nws tsev neeg xwb.

4 Thiab tau muaj tias Tsales tau raug pleev roj tsa ua vaj ntxwv kav cov neeg los ntawm kev phem tej tes; thiab nws tau muab nws tus ntxhais rau Akis ua poj niam.

5 Thiab tau muaj tias Akis tau nrhiav nws yawm txiv txoj sia; thiab nws tau thov rau cov uas nws tau lav lus los ntawm cov neeg txheej thaum ub tej lus sib cog, thiab lawv muab tau nws yawm txiv lub taub hau, thaum nws tseem zaum saum nws lub rooj zaum, tab tom muab lus rau nws cov neeg.

6 Vim txoj kev ri ntawm txoj kev phem no thiab pab neeg ua hauj lwm ntsiag to tau loj heev ces tau ua rau tag nrho tej neeg tej siab phem tuaj; yog li ntawd Tsales tau raug tua tuag nyob saum nws lub rooj zaum, thiab Akis tau los kav nyob hauv nws qhov chaw.

7 Thiab tau muaj tias Akis tau pib khib txog nws tus tub, yog li ntawd nws tau muab nws xauv rau hauv qhov taub, thiab tau muab zaub mov me ntsis los sis tsis muab li rau nws mus txog thaum nws tau tuag tshaib.

8 Thiab nim no tus kwv ntawm nws tus uas tau tuag tshaib, (thiab nws lub npe yog Nilas) tau npau taws nrog nws txiv vim yog tej uas nws txiv tau ua rau nws tus tij lauglawm.

9 Thiab tau muaj tias Nilas tau sau ib pab neeg tsis coob tuaj ua ke, thiab tau khiav tawm ntawm thaj av, thiab tau los thiab nyob nrog Aumaws.

10 Thiab tau muaj tias Akis yug tau lwm cov tub, thiab lawv tau kov yeej cov neeg tej siab, txawm tias lawv tau cog lus rau nws tias yuav ua tag nrho txhua yam kev phem raws li tej uas nws siab xav yuav.

11 Nim no cov neeg ntawm Akis tau xav kom nplua nuj, twb tib yam li Akis tau xav kom muaj hwj chim; yog li ntawd, tej tub ntawm Akis tau muab nyiaj rau lawv, los ntawm qhov ua li no lawv rub tau cov neeg feem ntau raws lawv qab.

12 Thiab tau pib muaj ib npluav rog nyob nruab nrab ntawm Akis tej tub thiab Akis, uas tau ntev ncua ntau xyoo, muaj tseeb tiag, twb muaj txoj kev puas tsuaj yuav luag tag rau tag nrho cov neeg ntawm lub teb chaws, muaj tseeb tiag, twb yuav luag tag nrho, tsuas tshuav peb caug leej xwb, thiab lawv cov uas tau khiav nrog Aumaws tsev neeg.

13 Yog li ntawd, Aumaws tau rov qab los txum tim dua rau thaj av ntawm nws qub txeeg, qub teg.

14 Thiab tau muaj tias Aumaws tau pib laus; txawm li ntawd los, thaum nws muaj hnub nyoog laus nws tseem yug tau Emawj; thiab nws tau tsa Emawj ua vaj ntxwv kav nyob hauv nws qhov chaw.

15 Thiab tom qab uas nws tau pleev roj tsa Emawj ua vaj ntxwv lawm nws tau pom kev nyab xeeb nyob hauv thaj av tau ncua ob xyoos, thiab nws tau tuag lawm, tau pom ntau lub caij heev, uas tau muaj kev tu siab puv nkaus. Thiab tau muaj tias Emawj tau kav nyob hauv nws qhov chaw, thiab tau ua raws nws txiv tau kav lawm tag nrho.

16 Thiab tus Tswv tau rov pib tshem tej kev foom tsis zoo tawm ntawm thaj av mus, thiab Emawj tsev neeg tau vam meej heev kawg nyob hauv qab ntawm Emawj txoj kev kav; thiab nyob hauv ncua li rau caum thiab ob xyoo lawv tau rais los mus muaj zog heev, kawg tias lawv tau rais los mus nplua nuj heev—

17 Tau muaj txhua yam txiv hmab txiv ntoo, thiab txhua yam noob, thiab txhua yam paj, thiab txhua yam ntaub zoo, thiab kub, thiab nyiaj dawb, thiab tej yam muaj nuj nqis;

18 Thiab kuj tau muaj txhua yam nyuj twm, tej heev nyuj, thiab tej maum nyuj, thiab yaj, thiab npua, thiab tej tshis, thiab kuj muaj lwm yam tsiaj ntau uas zoo siv rau neeg ua zaub noj.

19 Thiab lawv kuj muaj tej nees, thiab tej zag, thiab tau muaj tej ntxhw thiab tej khawliloos thiab tej khumas; tag nrho uas yog cov zoo rau neeg siv, thiab cov tseem ceeb tshaj yog cov ntxhw thiab cov khawliloos thiab cov khumas.

20 Thiab li no tus Tswv tau nchuav nws tej koob hmoov rau saum thaj av no, uas tau yog thaj uas zoo dua li tag nrho lwm thaj av; thiab nws tau txib tias txhua tus uas yuav nyob hauv thaj av yuav tsum nyob pe hawm tus Tswv, los sis lawv yuav raug puas tsuaj thaum lawv tau raug siav nyob hauv txoj kev tsis ncaj; tus Tswv hais rau tej uas zoo li ntawd tias: Kuv yuav nchuav tag nrho kuv txoj kev npau taws los.

21 Thiab Emawj tau txiav txim ncaj ncees nyob tag nrho hauv nws lub neej, thiab nws yug tau ntau tus tub thiab ntxhais; thiab nws yug tau Khauli-atoos, thiab nws tau pleev roj tsa Khauli-atoos kav nyob hauv nws qhov chaw.

22 Thiab tom qab uas nws tau pleev roj tsa Khauli-atoos kav nyob hauv nws qhov chaw lawm nws tau nyob plaub xyoo ntxiv, thiab nws tau pom kev nyab xeeb nyob hauv thaj av; muaj tseeb tiag, thiab nws twb tau pom Leej Tub ntawm txoj kev Ncaj Ncees, thiab tau zoo siab thiab qhuas nyob hauv nws lub neej; thiab nws tau tuag nrog kev nyab xeeb.

23 Thiab tau muaj tias Khauli-atoos tau mus ua li nws txiv tau ua, thiab tau ua ntau lub nroog loj, thiab tau qhuab qhia tej uas zoo rau nws cov neeg nyob tag nrho hauv nws lub neej. Thiab tau muaj tias nws tsis muaj me nyuam mus txog thaum uas nws twb tau laus heev lawm.

24 Thiab tau muaj tias nws tus poj niam tau tuag, tau muaj ib puas thiab ob xyoos. Thiab tau muaj tias Khauli-atoos tau yuav ib tug poj niam hluas los ua poj niam, thaum nws hnub nyoog laus, thiab yug tau tej tub thiab ntxhais; yog li ntawd nws tau nyob mus txog thaum nws muaj ib puas thiab plaub caug thiab ob xyoos.

25 Thiab tau muaj tias nws yug tau Khoos, thiab Khoos tau kav nyob hauv nws qhov chaw; thiab nws tau kav plaub caug thiab cuaj xyoos, thiab nws yug tau Hes; thiab nws kuj yug tau lwm cov tub thiab ntxhais thiab.

26 Thiab cov neeg tau rov ri dua mus rau saum thaj av tag nrho, thiab tau rov pib muaj txoj phem heev kawg nkaus dua rau saum thaj av, thiab Hes tau pib puag tej kev ua hauj lwm ntsiag to thaum ub, los ua kom nws txiv puas tsuaj.

27 Thiab tau muaj tias nws tau tshem nws txiv tawm saum nws lub rooj zaum, vim nws xuas nws rab ntaj kiag tua nws txiv; thiab nws tau kav nyob hauv nws qhov chaw.

28 Thiab tau rov muaj tej yaj saub tuaj rau hauv thaj av dua, tau qhuab qhia txoj kev hloov siab lees txim rau lawv—kom lawv yuav tsum npaj tus Tswv txoj kev los sis yuav muaj ib qho kev foom tsis zoo los rau saum thaj av; muaj tseeb tiag, twb yuav muaj ib qho kev tshaib nqhis loj heev, uas lawv yuav raug puas tsuaj yog lawv tsis kam hloov siab lees txim.

29 Tiam sis cov neeg tsis kam ntseeg cov yaj saub tej lus, lawv tau ntiab lawv tawm; thiab lawv tau muab lawv cov no ib txhia pov rau hauv tej qhov thiab tau cia lawv piam sij mus. Thiab tau muaj tias lawv tau ua tag nrho tej yam no raws li vaj ntxwv Hes tej lus txib.

30 Thiab tau muaj tias tau pib muaj ib qho kev zaub mov tsis txaus noj nyob rau saum thaj av, thiab tej neeg tau pib raug puas tsuaj nrawm heev li vim yog txoj kev tsis muaj zaub mov txaus, vim tsis tau muaj nag los rau saum thaj av.

31 Thiab kuj tau muaj tej nab muaj taug los rau saum thaj av, thiab tau tom ntau tus neeg. Thiab tau muaj tias lawv tej pab tsiaj tau khiav ntawm tej nab muaj taug, mus rau thaj av qab teb, uas cov Neeg Nifais hu ua Xalahelas.

32 Thiab tau muaj tias tau muaj ntau tus ntawm lawv uas tau piam sij ntawm tog kev; tiam sis, tau muaj ib txhia uas tau khiav mus txog rau hauv thaj av qab teb.

33 Thiab tau muaj tias tus Tswv tau ua kom tej nab tsis txhob raws lawv ntxiv lawm, tiam sis kom lawv thaiv kev kom neeg yuav hla tsis tau, xwv kom txhua tus uas sim hla yuav raug tej nab muaj taug tom tuag.

34 Thiab tau muaj tias cov neeg tau raws tej tsiaj ntawd txoj kev, thiab tau noj tej tsiaj uas tau tuag ntawm kev tej cev, mus txog thaum uas lawv tau noj lawv tag. Nim no thaum cov neeg tau pom tias lawv yuav tsum piam sij lawv tau pib hloov siab lees txim txog lawv tej kev tsis ncaj thiab quaj thov rau tus Tswv.

35 Thiab tau muaj tias thaum lawv tau txo lawv tej hwj chim txaus rau tus Tswv lawm nws tau xa nag los rau saum thaj av; thiab cov neeg tau pib ciaj sia dua, thiab tau pib muaj txiv hmab txiv ntoo nyob rau tej teb chaws qaum teb, thiab nyob rau tag nrho tej teb chaws uas nyob ib ncig. Thiab tus Tswv tau ua nws lub hwj chim tawm rau lawv pom nyob hauv txoj kev cawm lawv dim ntawm txoj tshaib nqhis.