1 Thiab tau muaj tias Ses, tus uas yog Hethes ib tug xeeb ntxwv—vim Hethes tau piam sij los ntawm txoj kev tshaib nqhis, thiab tag nrho nws tsev neeg tsuas yog tshuav Ses xwb—yog li ntawd, Ses thiaj rov pib txhim tsa dua ib co neeg uas tawg tas.

2 Thiab tau muaj tias Ses nco txog txoj kev puas tsuaj ntawm nws cov yawg koob, thiab nws txhim tsa ib lub nceeg vaj uas ncaj ncees; vim nws nco ntsoov tej uas tus Tswv tau ua thaum nws coj Yales thiab nws tus tij laug hla hiav txwv; thiab nws twb taug mus raws tus Tswv tej kev; thiab nws yug tau tub thiab ntxhais.

3 Thiab nws tus tub hlob, uas npe hu ua Ses, ntxeev siab tawm tsam nws; tiam sis Ses raug ib tug tub sab muab tua tuag, vim yog nws txoj kev nplua nuj heev, uas rov coj tau kev thaj yeeb los rau nws txiv dua.

4 Thiab tau muaj tias nws txiv txhim tsa tau ntau lub nroog rau hauv thaj av, thiab cov neeg rov pib ri dua mus thoob plaws rau hauv thaj av. Thiab Ses ua neej nyob mus txog thaum muaj hnub nyoog laus heev; thiab nws yug tau Lilakis. Thiab nws tuag, thiab Lilakis pauv nws qhov chaw los kav.

5 Thiab tau muaj tias Lilakis tsis ua tej uas ncaj rau tus Tswv lub qhov muag pom, vim nws muaj ntau tus poj niam thiab niam yau, thiab muab tej nra hnyav tso rau saum cov neeg lub xub pwg ris; muaj tseeb tiag, nws sau lawv se hnyav heev; thiab los ntawm tej se ntawd nws ua tau ntau lub tsev uas dav heev.

6 Thiab nws tsa tau ib lub rooj theej kiab uas zoo nkauj heev rau nws; thiab nws ua tau ntau lub tsev kaw, thiab leej twg uas tsis kam them se nws muab tso rau hauv lub tsev kaw; thiab leej twg uas them tsis taus se nws muab tso rau hauv lub tsev kaw; thiab nws hais kom lawv yuav tsum ua hauj lwm tsis tu ncua rau lawv txoj kev noj haus; thiab leej twg uas tsis kam ua hauj lwm nws hais kom muab tua.

7 Yog li ntawd nws thiaj tau tag nrho nws tej khoom zoo, muaj tseeb tiag, twb yog nws tej kub zoo, nws hais kom muab coj mus nchuav nyob hauv lub tsev kaw; thiab txhua yam uas muaj tus qauv tes zoo nws hais kom coj mus ua nyob hauv lub tsev kaw. Thiab tau muaj tias nws ua rau cov neeg txom nyem los ntawm nws tej kev sib daj sib deev thiab tej kev qias.

8 Thiab thaum nws kav tau plaub caug ob xyoos cov neeg tau sawv ntxeev siab tawm tsam nws; thiab rov pib muaj kev ua rog dua nyob hauv thaj av, thaum kawg Lilakis thiaj raug tua tuag, thiab nws tej xeeb leej xeeb ntxwv raug muab raws tawm ntawm thaj av mus.

9 Thiab tau muaj tias tom qab ncua tau ntau xyoo, Mauli-atoos, (nws yog Lilakis ib tug xeeb ntxwv) sib sau ua ke tau ib pab tub rog ntawm cov neeg sab nraud, thiab tawm mus thiab ua rog rau cov neeg; thiab nws txeeb tau ntau lub nroog; thiab npluav rog tau pib ua rau neeg nyuaj siab ntxhov plawv, thiab ncua mus tau ntau xyoo; thiab nws muaj hwj chim kov yeej tag nrho thaj av, thiab muab nws tus kheej txhim tsa los ua vaj ntxwv kav tag nrho thaj av.

10 Thiab tom qab nws txhim tsa nws tus kheej los ua vaj ntxwv lawm nws ua rau cov neeg lub nra sib, uas los ntawm qhov ntawd nws ua tau rau cov neeg nyiam nws, thiab lawv thiaj tsa nws los ua lawv tus vaj ntxwv.

11 Thiab nws ua ncaj ncees rau cov neeg, tiam sis tsis ua rau nws tus kheej vim yog nws tej kev sib daj sib deev ntau; yog li ntawd nws thiaj raug txiav tawm ntawm tus Tswv lub xub ntiag mus.

12 Thiab tau muaj tias Mauli-atoos ua tau ntau lub nroog, thiab cov neeg los ua neeg nplua nuj heev thaum nws kav, muaj vaj muaj tsev, thiab muaj kub muaj nyiaj dawb, thiab txawj cog qoob loos, thiab muaj tej pab yaj, thiab tej tsiaj txhu, thiab tej uas Mauli-atoos muab txum tim rov qab los rau lawv.

13 Thiab Mauli-atoos ua neej nyob muaj hnub nyoog laus kawg nkaus li, thiab tom qab ntawd nws yug tau Kis; thiab Kis pauv nws txiv qhov chaw los kav; thiab nws los kav tau yim xyoo, thiab nws txiv tau tuag. Thiab tau muaj tias Kis tsis kav raws li kev ncaj ncees, yog li ntawd tus Tswv tsis txaus siab rau nws.

14 Thiab nws tus kwv tij tau sawv ntxeev siab tawm tsam nws, nws thiaj coj tau Kis mus rau hauv kev poob cev qhev; thiab Kis tau poob cev qhev tas nws lub neej; thiab nws yug tau tub thiab ntxhais nyob hauv kev kev poob cev qhev, thiab thaum nws hnub nyoog laus lawm nws yug tau Levis; thiab nws tuag.

15 Thiab tau muaj tias Levis tau ua hauj lwm thaum poob cev qhev tom qab nws txiv tuag lawm, tau ncua li plaub caug thiab ob xyoos. Thiab nws ua rog tawm tsam tus vaj ntxwv ntawm thaj av, nws thiaj txeeb tau lub nceeg vaj los rau nws tus kheej.

16 Thiab tom qab nws txeeb tau lub nceeg vaj los rau nws tus kheej lawm nws ua tej uas yog rau tus Tswv qhov muag pom; thiab cov neeg tau vam meej nyob hauv thaj av; thiab nws ua neej nyob muaj hnub nyoog laus, thiab yug tau tub thiab ntxhais; thiab nws kuj yug tau Khauloos, tus uas nws pleev roj tsa los pauv nws qhov chaw ua vaj ntxwv.

17 Thiab tau muaj tias Khauloos ua tej uas zoo nyob ntawm tus Tswv lub qhov muag tag nrho nws lub neej; thiab nws yug tau ntau tus tub thiab ntxhais; thiab tom qab nws ua neej tau ntau hnub nws tau tuag, zoo ib yam li sawv daws ntawm lub ntiaj teb; thiab Khisaws pauv nws qhov chaw los kav.

18 Thiab tau muaj tias Khisaws los kuj tuag, thiab Lis pauv nws qhov chaw los kav.

19 Thiab tau muaj tias Lis los kuj ua tej uas zoo rau tus Tswv qhov muag pom. Thiab nyob rau Lis lub caij cov nab muaj taug raug puas tsuaj tas. Yog li ntawd lawv thiaj mus tau rau nram thaj av sab qab teb, mus plob nqaij rau cov neeg ntawm thaj av, vim thaj av muaj tej tsiaj hav zoov puv nkaus. Thiab Lis tus kheej los kuj los ua ib tug neeg plob zoo heev.

20 Thiab lawv ua tau ib lub nroog loj nyob ze ntawm ntu av nqaim ntawm thaj av, nyob ze ntawm qhov chaw uas cov dej hiav txwv kem thaj av.

21 Thiab lawv tshwj thaj av sab qab teb ua ib thaj hav zoov qus, cia mus tua tsiaj. Thiab tag nrho thaj av sab qaum teb muaj neeg nyob puv nkaus.

22 Thiab lawv txawj tsim ub tsim no heev, thiab lawv yuav khoom thiab muag khoom thiab ib leeg ua lag ua luam rau ib leeg, xwv kom lawv yuav muaj nyiaj nplua nuj.

23 Thiab lawv ua txhua yam quav hlau, thiab lawv ua tau kub, thiab nyiaj dawb, thiab hlau, thiab tooj dag, thiab txhua yam hlau, thiab lawv khawb tej ntawd tawm hauv av los; yog li ntawd, lawv khawb tej pawg av loj heev kom muab tau quav hlau, kub, thiab nyiaj dawb, thiab hlau, thiab tooj liab. Thiab lawv ua txhua yam khoom zoo.

24 Thiab lawv muaj ntaub yaj pwm, thiab ntaub npuag; thiab lawv ua txhua yam ntaub, xwv kom lawv yuav muaj ris tsho npog lawv tej kev liab qab.

25 Thiab lawv ua tau txhua yam cuab yeej mus ncaws teb, tsis hais mus laij thiab mus cog, thiab mus sau thiab mus khawb, thiab mus ntaus.

26 Thiab lawv ua tau txhua yam cuab yeej los siv ua hauj lwm nrog lawv tej tsiaj.

27 Thiab lawv ua tau txhua yam cuab yeej ua rog. Thiab lawv ua tau txhua yam uas muaj tus qauv tes zoo kawg li.

28 Thiab ib txwm tsis tau muaj ib co neeg tau koob hmoov, thiab tus Tswv txhais tes tau ua rau vam meej ntau npaum li lawv. Thiab lawv nyob hauv ib thaj av uas zoo tshaj txhua thaj av, vim tus Tswv tau hais li.

29 Thiab tau muaj tias Lis ua neej nyob tau ntau xyoo, thiab yug tau tub thiab ntxhais; thiab nws kuj yug tau Hiathoos.

30 Thiab tau muaj tias Hiathoos pauv nws txiv qhov chaw los kav. Thiab thaum Hiathoos los kav tau nees nkaum plaub xyoos, saib seb, lub nceeg vaj raug txeeb ntawm nws mus. Thiab nws ua hauj lwm tau ntau xyoo thaum poob cev qhev, muaj tseeb tiag, twb yog tag nrho lub caij uas tshuav ntawm nws lub neej.

31 Thiab nws yug tau Hethes, thiab Hethes ua neej nyob ua cev qhev tag nws lub neej. Thiab Hethes yug tau Aloos, thiab Aloos poob cev qhev tag nws lub neej; thiab nws yug tau Anikhadas, thiab Anikhadas los kuj nyob ua cev qhev tag nws lub neej; thiab nws yug tau Khauli-atoos, thiab Khauli-atoos nyob ua cev qhev tag nws lub neej; thiab nws yug tau Khoos.

32 Thiab tau muaj tias Khoos txeeb tau ib nrab ntawm lub nceeg vaj. Thiab nws kav ib nrab ntawm lub nceeg vaj tau plaub caug ob xyoos; thiab nws mus ua rog tawm tsam tus vaj ntxwv, Ankis, thiab lawv sib tua tau ncua ntau xyoo, nyob rau lub sij hawm ntawd Khoos kov yeej Ankis, thiab txeeb tau lub nceeg vaj qhov uas tseem tshuav.

33 Thiab nyob hauv Khoos lub caij pib muaj tub sab nyob hauv thaj av; thiab lawv muab tej qub tswv yim coj los siv, thiab ua kev cai lav lus raws li tus txheej txheem puag thaum ub, thiab rov nrhiav kev dua ua kom lub nceeg vaj puas tsuaj.

34 Nim no Khoos sib tua tawm tsam cov tub sab ntawd ntau zaus; tiam sis nws kov tsis yeej lawv.