1 Thiab nim no pib muaj kev foom tsis zoo loj heev nyob thoob plaws hauv thaj av vim yog cov neeg txoj kev ua phem, yog li ntawd, yog ib tug neeg muab nws tej cuab yeej los sis nws rab ntaj tso rau saum nws lub txee, los sis rau ntawm qhov chaw uas nws ceev tej ntawd, saib seb, nyob rau hnub tom qab, nws twb nrhiav tsis tau tej ntawd, vim txoj kev foom tsis zoo uas nyob hauv thaj av phem heev.

2 Yog li ntawd txhua tus neeg tuav rawv tej uas yog nws tug, siv nws txhais tes, thiab nws yeej tsis kam qiv los sis tsis kam txais; thiab txhua tus neeg yeej tuav rawv nws rab ko ntaj rau ntawm nws sab tes xis, npaj rawv tiv thaiv nws tej cuab tam thiab nws txoj sia thiab nws tus poj niam thiab cov me nyuam.

3 Thiab nim no, tom qab ncua tau ob xyoos, thiab tom qab Seles tuag lawm, saib seb, Seles ib tug kwv tij tau los thiab ua rog rau Khauli-athumaws, nyob hauv kev ua rog ntawd Khauli-athumaws tau kov yeej nws thiab muab nws raws mus txog rau lub hav zoov Akis.

4 Thiab tau muaj tias Seles tus kwv tij tau ua rog rau nws nyob hauv lub hav zoov Akis; thiab npluav rog los pib muaj kev nyuaj siab ntxhov plawv heev, thiab muaj ntau txhiab leej tau vau los ntawm rab ntaj.

5 Thiab tau muaj tias Khauli-athumaws tau mus vij lub hav zoov; thiab Seles tus kwv tij tau tawm hauv lub hav zoov los thaum tsaus ntuj thiab muab ib feem ntawm Khauli-athumaws cov tub rog tua tuag, thaum lawv tseem qaug cawv.

6 Thiab nws tawm mus rau thaj av Mauloos, thiab muab nws tus kheej tso rau saum Khauli-athumaws lub rooj theej kiab.

7 Thiab tau muaj tias Khauli-athumaws nrog rau nws cov tub rog nyob hauv hav zoov ncua tau ob xyoos, ua rau nws tau txais zog ntau heev rau nws cov tub rog.

8 Nim no Seles tus kwv tij, uas npe hu ua Nkile-as, kuj tau txais zog ntau heev rau nws cov tub rog, vim yog tej kev tuav hauv ntsiag to.

9 Thiab tau muaj tias nws tus pov thawj hlob muab nws tua thaum nws zaum saum nws lub rooj theej kiab.

10 Thiab tau muaj tias ib tug ntawm cov neeg tuav hauv ntsiag to siv ib txoj kev uas tsis muaj neeg paub muab nws tua, thiab txeeb tau lub nceeg vaj los rau nws tus kheej; thiab nws lub npe hu ua Lis; thiab Lis yog ib tug neeg siab heev, tshaj lwm tus nyob hauv tag nrho cov neeg.

11 Thiab tau muaj tias nyob hauv thawj xyoos ntawm Lis, Khauli-athumaws tau tuaj rau hauv thaj av Mauloos, thiab ua rog rau Lis.

12 Thiab tau muaj tias nws sib ntaus sib tua nrog Lis, thaum ntawd Lis tua raug nws txhais caj npab ua rau nws raug mob; txawm li ntawd los, Khauli-athumaws cov tub rog tau txiv mus rau tom Lis, ua rau nws khiav mus rau ntawm tej ciam teb uas nyob ntawm ntug dej hiav txwv.

13 Thiab tau muaj tias Khauli-athumaws raws nws qab; thiab Lis ua rog rau nws nyob ntawm ntug dej hiav txwv.

14 Thiab tau muaj tias Lis tua Khauli-athumaws cov tub rog, ua rau lawv rov khiav mus rau lub hav zoov Akis.

15 Thiab tau muaj tias Lis caum nws mus txog rau thaum nws mus txog rau ntawm lub tiaj Ankos. Thiab thaum Khauli-athumaws khiav ua ntej Lis nyob hauv lub ces kaum av uas nws khiav ntawd, nws tau coj tag nrho cov neeg nrog nws mus.

16 Thiab thaum nws mus txog rau ntawm lub tiaj Ankos nws ua rog rau Lis, thiab nws muab Lis ntaus txog rau thaum nws tuag; txawm li ntawd los, Lis ib tug kwv tij tau pauv Lis qhov chaw tuaj tawm tsam Khauli-athumaws, thiab npluav rog los muaj kev nyuaj siab ntxhov plawv heev, ua rau Khauli-athumaws rov khiav ua ntej Lis tus kwv tij cov tub rog dua.

17 Nim no Lis tus kwv tij lub npe hu ua Siv. Thiab tau muaj tias Siv caum Khauli-athumaws qab mus, thiab nws ua rau ntau lub nroog puas tsuaj, thiab nws tau tua cov poj niam thiab cov me nyuam huv tib si, thiab hlawv tej nroog.

18 Thiab tau muaj kev ntshai Siv heev mus thoob plaws rau hauv thaj av; muaj tseeb tiag, muaj kev quaj tawm mus thoob plaws rau hauv thaj av—Yuav muaj leej twg nres tau Siv cov tub rog? Saib seb, nws muab cov neeg ntiaj teb uas thaiv nws kev tshoob mus!

19 Thiab tau muaj tias cov neeg pib khiav tuaj koom ua tej pab tub rog ua ke, nyob thoob plaws hauv thaj av.

20 Thiab cov neeg sib faib; thiab ib feem ntawm lawv khiav mus rau Siv cov tub rog, thiab ib feem ntawm lawv khiav mus rau Khauli-athumaws cov tub rog.

21 Thiab npluav rog loj heev thiab tsis txawj kawg, thiab txoj kev nqaij ntuag ntshav nrog thiab txoj kev puas tsuaj puas ntsoog tau muaj ntev heev, ua rau cov tuag tej cev yeej nyob thoob plaws rau hauv thaj av.

22 Thiab npluav rog ceev thiab nrawm heev thiaj li tsis muaj leej twg los faus cov tuag, tiam sis lawv taug kev mus ntawm ib qho chaw nqaij ntuag ntshav nrog mus rau ib qho chaw nqaij ntuag ntshav nrog, tso cov txiv neej, cov poj niam, thiab cov me nyuam tej cev ua sab ua sua rau hauv thaj av, cia rau tej kas ntawm cev nqaij daim tawv noj.

23 Thiab tus ntxhiab ntawd tsw tawm mus rau hauv thaj av, twb yog mus thoob plaws rau hauv thaj av; yog li ntawd cov neeg thiaj ntxhov siab nruab hnub thiab hmo ntuj, vim yog tus ntxhiab tsw ntawd.

24 Txawm li ntawd los, Siv twb tsis tsum caum Khauli-athumaws; vim nws tau cog lus lawm tias nws tus kheej yuav ua pauj ntawm Khauli-athumaws rau nws tus kwv tij cov ntshav, tus uas raug tua tuag, thiab tus Tswv txoj lus uas los rau Ethaws hais tias Khauli-athumaws yuav tsis vau los ntawm rab ntaj.

25 Thiab yog li ntawd peb pom tias tus Tswv tau los xyuas lawv nrog tag nrho nws txoj kev npau taws, thiab lawv txoj kev phem thiab tej kev qias tau npaj ib txoj kev rau lawv txoj kev puas tsuaj uas kav ib txhis.

26 Thiab tau muaj tias Siv caum Khauli-athumaws mus rau sab hnub tuaj, twb yog mus txog rau tej ciam teb ze ntug dej hiav txwv, thiab nyob rau qhov chaw ntawd nws ua rog rau Siv ncua tau li peb hnub.

27 Thiab txoj kev puas tsuaj nyob hauv Siv cov tub rog txaus ntshai kawg nkaus ua rau cov neeg pib ntshai heev, thiab pib khiav ua ntej Khauli-athumaws cov tub rog; thiab lawv khiav mus rau tom thaj av Khaulihos, thiab muab cov neeg hauv tshoob mus, tag nrho cov uas tsis kam koom lawv.

28 Thiab lawv rub lawv tej tsev pheeb suab ntaub nyob hauv lub hav Khaulihos; thiab Khauli-athumaws rub nws tej tsev pheeb suab ntaub nyob hauv lub hav Sawm. Nim no lub hav Sawm nyob ze ntawm lub pov roob Khaunos; yog li ntawd, Khauli-athumaws sib sau nws cov tub rog los ua ke rau saum lub pov roob Khaunos, thiab tshuab ib lub raj hlau nrov rau Siv cov tub rog caw kom lawv tuaj ua rog.

29 Thiab tau muaj tias lawv tawm tuaj, tiam sis raug thawb rov qab dua; thiab lawv tuaj zaum ob, thiab raug thawb rov qab dua zaum ob. Thiab tau muaj tias lawv rov tuaj dua zaum peb, thiab npluav rog los muaj kev nyuaj siab ntxhov plawv heev.

30 Thiab tau muaj tias Siv tua raug Khauli-athumaws uas ua rau nws raug ntau qhov mob tob; thiab Khauli-athumaws, vim nws los ntshav ntau, tau tsaus muag, thiab nws cov neeg muab nws kwv mus yam li nws twb tuag lawm.

31 Nim no cov txiv neej, poj niam thiab me nyuam ntawm ob tog uas tau tuag muaj coob heev, Siv thiaj li txib nws cov neeg kom lawv tsis txhob caum Khauli-athumaws cov tub rog lawm; yog li ntawd, lawv thiaj rov qab mus rau lawv lub yeej.