1 Thiab tau muaj tias Yales tus tij laug, (nim no cov nkoj uas lawv tau npaj muaj yim lub) tawm mus rau saum lub roob, uas lawv muab hu ua lub roob Siles, vim lub roob ntawd siab heev, thiab muab ib lub pob zeb los nchuav ua kaum rau lub me nyuam pob zeb; thiab cov pob zeb ntawd dawb thiab ci lam thab, twb zoo ib yam li tej iav tshaj sab; thiab nws muab cov pob zeb ntawd nqa hauv nws txhais tes nyob saum lub ncov roob, thiab rov thov tus Tswv dua, hais tias:

2 Auj tus Tswv es, koj tau hais tias peb yeej yuav raug tej dej nyab ntawd vij ib puag ncig. Nim no saib seb, auj tus Tswv es, thiab tsis txhob npau taws rau koj tus tub qhe vim yog nws txoj kev qaug zog nyob ntawm koj xub ntiag; vim peb paub tias koj yeej dawb huv thiab nyob puag saum ntuj, thiab peb twb tsis tsim nyog txaus nyob ntawm koj xub ntiag; twb vim yog txoj kev poob peb tej xeeb ceem thiaj tau hloov los ua phem tsis tu ncua; txawm li ntawd los, auj tus Tswv es, koj twb muab ib lo lus txib rau peb kom peb yuav tsum thov koj, hais tias los ntawm koj peb yuav tau txais raws li peb siab xav.

3 Saib seb, auj tus Tswv es, koj tau rau txim rau peb vim yog peb txoj kev ua phem, thiab tau raws peb tawm mus, thiab peb tau nyob rau hauv roob moj sab qhua tau ntau xyoo npaum li no; txawm li ntawd los, koj tseem hlub tshua peb. Auj tus Tswv es, ntsia kuv nrog txoj kev khuv leej, thiab tig koj txoj kev npau taws tawm ntawm koj cov neeg no mus, thiab tsis txhob cia kom lawv yuav tau hla tus dej hiav txwv tob nphau nphwv no mus nyob hauv kev tsaus ntuj; tiam sis saib tej yam no uas kuv tau nchuav tawm ntawm lub pob zeb los.

4 Thiab kuv paub, auj tus Tswv es, hais tias koj muaj hwj chim tag nrho, thiab muaj peev xwm ua txhua yam uas koj xav ua los pab tib neeg; yog li ntawd, auj tus Tswv es, cia li xuas koj tus ntiv tes los kov cov pob zeb no, thiab npaj cov pob zeb kom yuav ci pom kev nyob hauv qhov tsaus ntuj; thiab cov pob zeb yuav ci pom kev rau peb nyob hauv cov nkoj uas peb tau npaj, xwv kom peb yuav muaj teeb pom kev thaum peb hla dej hiav txwv.

5 Saib seb, auj tus Tswv es, koj yeej ua tau li no. Peb paub tias koj yeej muaj peev xwm ua tau lub hwj chim loj tawm los, uas saib mas zoo li me me rau tib neeg txoj kev to taub.

6 Thiab tau muaj tias thaum Yales tus tij laug tau hais tej lus no tas, saib seb, tus Tswv ncav nws txhais tes tawm los thiab xuas nws tus ntiv tes kov cov pob zeb ib lub zuj zus. Thiab tau muab daim ntaub thaiv tshem tawm ntawm Yales tus tij laug lub qhov muag, thiab nws pom tus Tswv tus ntiv tes; thiab tus Tswv tus ntiv tes zoo li neeg tus ntiv tes, uas muaj nqaij thiab ntshav; thiab Yales tus tij laug vau rau ntawm tus Tswv xub ntiag, vim nws ntshai heev.

7 Thiab tus Tswv pom tias Yales tus tij laug tau vau rau hauv av; thiab tus Tswv hais rau nws tias: Cia li sawv, vim li cas koj thiaj li vau?

8 Thiab nws hais rau tus Tswv tias: Kuv pom tus Tswv tus ntiv tes, thiab kuv ntshai nyob tsam nws yuav nplawm kuv; vim kuv twb tsis paub tias tus Tswv muaj nqaij thiab ntshav.

9 Thiab tus Tswv hais rau nws tias: Vim yog koj txoj kev ntseeg koj thiaj pom tias kuv yuav los rau hauv lub cev uas yog nqaij thiab ntshav; thiab twb tsis tau muaj dua tib neeg tuaj cuag kuv es muaj kev ntseeg loj npaum li koj; yog tias tsis yog li ntawd ces koj yuav pom tsis tau kuv tus ntiv tes. Koj puas pom ntau tshaj nov?

10 Thiab nws teb tias: Tsis pom; tus Tswv, ua koj tus kheej rau kuv pom.

11 Thiab tus Tswv hais rau nws tias: Koj puas ntseeg tej lus uas kuv yuav hais?

12 Thiab nws teb tias: Muaj tseeb tiag, tus Tswv es, kuv paub tias koj yeej hais qhov tseeb, vim koj yog ib tug Vajtswv ntawm qhov tseeb, thiab yeej dag tsis tau.

13 Thiab thaum nws tau hais tej lus no tas, saib seb, tus Tswv ua nws tus kheej rau Yales tus tij laug pom, thiab hais tias: Vim koj paub tej no koj txais kev txhiv dim ntawm txoj kev poob lawm; yog li ntawd kuv coj tau koj rov qab los rau hauv kuv xub ntiag; yog li ntawd kuv ua kuv tus kheej rau koj pom.

14 Saib seb, kuv yog tus uas Leej Txiv tau npaj txij puag thaum ntuj tsim teb raug los txhiv kuv cov neeg dim. Saib seb, kuv yog Yexus Khetos. Kuv yog Leej Txiv thiab Leej Tub. Dhau los ntawm kuv tib neeg sawv daws yuav muaj txoj sia, yog txoj sia uas nyob mus ib txhis, twb yog lawv cov uas yuav ntseeg kuv lub npe; thiab lawv yuav hloov los ua kuv cov tub thiab kuv cov ntxhais.

15 Thiab kuv yeej ib txwm tsis tau ua kuv tus kheej rau tib neeg uas kuv tau tsim pom li, vim tsis tau muaj tib neeg ntseeg kuv ib yam li koj ntseeg. Koj pom tias tau tsim koj kom muaj tus yam ntxwv zoo li kuv yom? Muaj tseeb tiag, thaum chiv keeb twb tsim txhua tus tib neeg muaj tus yam ntxwv zoo li kuv.

16 Saib seb, lub cev no, uas koj pom ziag no, yog lub cev ntawm kuv tus ntsuj plig; thiab kuv tau tsim tib neeg zoo li kuv tus ntsuj plig lub cev; thiab tib yam li kuv tshwm sim los rau koj ntawm sab ntsuj plig kuv yuav tshwm sim los rau kuv cov neeg ntawm sab cev nqaij daim tawv.

17 Thiab nim no, ib yam li kuv, Maulaunais, hais tias kuv sau tsis tau tag nrho tej uas tau muab sau tseg no, yog li ntawd twb txaus lawm uas kuv hais tias Yexus tau ua nws tus kheej rau tus txiv neej no pom ntawm sab ntsuj plig, twb zoo raws li thiab muaj yam ntxwv zoo li tib lub cev uas nws ua nws tus kheej rau cov Neeg Nifais pom.

18 Thiab nws txhawb pab tus txiv neej no ib yam li nws tau txhawb pab cov Neeg Nifais; thiab tag nrho tej no, twb yog kom tus txiv neej no paub tias nws yog Vajtswv, vim yog tej hauj lwm ntau tseem ceeb uas tus Tswv tau ua rau nws pom.

19 Thiab vim yog tus txiv neej no paub, cheem tsis tau kom nws txhob pom dhau ntawm daim ntaub thaiv; thiab nws pom Yexus tus ntiv tes, uas thaum nws pom, txoj kev ntshai ua rau nws vau; vim nws paub tias yog tus Tswv tus ntiv tes; thiab nws tsis tas muaj kev ntseeg ntxiv lawm, vim nws twb paub lawm, tsis muaj dab tsi ua xyem xyav lawm.

20 Yog li ntawd, vim nws paub Vajtswv zoo tag nrho li no, thiaj cheem tsis tau nws nyob hauv daim ntaub thaiv; yog li ntawd nws pom Yexus; thiab Yexus tau los txhawb pab nws.

21 Thiab tau muaj tias tus Tswv hais rau Yales tus tij laug tias: Saib seb, koj yuav tsum tsis txhob cia tej uas koj tau pom thiab tau hnov no tawm mus rau neeg ntiaj teb, kom txog thaum lub sij hawm uas kuv yuav los ua rau kuv lub npe tau yeeb koob thaum muaj cev nqaij tawv tso; yog li ntawd, koj yuav tsum khaws tej uas koj tau pom thiab tau hnov cia kom zoo, thiab tsis txhob qhia rau tib neeg paub.

22 Thiab saib seb, thaum koj yuav los cuag kuv, koj yuav tsum muab tej ntawd sau cia thiab muab khi tseg cia, xwv kom tsis muaj leej twg txhais tau tej ntawd; vim koj yuav siv ib yam lus uas tsis muaj neeg nyeem tau los sau tej ntawd.

23 Thiab saib seb, kuv yuav muab ob lub pob zeb no rau koj, thiab koj yuav tsum muab ob lub pob zeb no khi tseg cia nrog tej uas koj yuav sau.

24 Vim saib seb, yam lus uas koj yuav siv los sau kuv twb muab ua kom tsis muaj neeg nkag siab; yog li ntawd thaum txog lub sij hawm kuv pom zoo kuv mam ua kom ob lub pob zeb no ua rau tib neeg lub qhov muag pom tseeb tej uas koj yuav sau no.

25 Thiab thaum tus Tswv tau hais tej lus no tas, nws ua rau Yales tus tij laug pom tag nrho cov neeg hauv lub ntiaj teb uas tau muaj tas los lawm, thiab tag nrho cov uas tseem yuav muaj; thiab nws twb tsis muab lawv nraim ntawm Yales tus tij laug lub qhov muag, twb yog tag nrho thoob plaws lub ntiaj teb.

26 Vim tus Tswv twb hais rau Yales tus tij laug ua ntej lawm, hais tias yog nws ntseeg tus Tswv ntseeg tias tus Tswv muaj peev xwm ua tau txhua yam rau nws pom—yuav muab tej ntawd ua rau nws pom; yog li ntawd tus Tswv tsis ceev tseg ib yam dab tsi tsis pub nws pom, vim nws paub tias tus Tswv yeej muaj peev xwm ua tau txhua yam rau nws pom.

27 Thiab tus Tswv hais rau nws tias: Cia li muab tej no sau tseg thiab muab tej no khi tseg cia; thiab thaum txog lub sij hawm kuv pom zoo kuv mam muab tej no ua rau noob neej pom.

28 Thiab tau muaj tias tus Tswv txib Yales tus tij laug kom nws muab ob lub pob zeb uas nws tau txais khi tseg cia, thiab tsis txhob cia rau leej twg pom, kom txog thaum tus Tswv yuav ua tej ntawd rau noob neej pom.