1 Thiab tau muaj tias Ethaws ua neej nyob rau thaum Khauli-athumaws lub caij; thiab Khauli-athumaws yog tus vaj ntxwv kav tag nrho thaj av.

2 Thiab Ethaws yog tus Tswv ib tug yaj saub; yog li ntawd Ethaws thiaj tawm tuaj rau thaum Khauli-athumaws lub caij, thiab pib qhia tej yuav muaj los yav tom ntej rau cov neeg, vim nws tav tsis tau nws tus kheej vim yog tus Tswv tus Ntsuj Plig uas nyob hauv nws.

3 Vim nws tshaj tawm puag thaum sawv ntxov, mus txog rau thaum hnub poob, ntuas cov neeg kom ntseeg Vajtswv thiaj li yuav hloov siab lees txim nyob tsam lawv raug puas tsuaj, hais rau lawv tias yuav muaj raws li txhua yam los ntawm kev ntseeg—

4 Yog li ntawd, tus uas ntseeg Vajtswv yeej yuav muaj kev cia siab rau ib lub ntiaj teb uas zoo dua, muaj tseeb tiag, twb yog ib qho chaw nyob ntawm Vajtswv sab tes xis, txoj kev cia siab ntawd twb yog los ntawm kev ntseeg los, yog qhov uas txheem tib neeg tus ntsuj plig, uas yuav ua rau lawv ruaj thiab khov kho, ua tej yam uas zoo tas mus li, uas coj lawv mus qhuas Vajtswv.

5 Thiab tau muaj tias Ethaws qhia tej yuav muaj los yav tom ntej txog tej yam tseem ceeb thiab zoo kawg nkaus rau cov neeg, tej uas lawv tsis ntseeg, vim lawv tsis pom.

6 Thiab nim no, kuv, Maulaunais, yuav hais me ntsis ntsig txog tej no; kuv yuav ua rau neeg ntiaj teb paub tias kev ntseeg yog tej uas yus cia siab rau tiam sis tsis pom; yog li ntawd tsis txhob cam vim nej tsis pom, vim nej yuav tsis txais kev ua tim khawv kom txog thaum twb sim nej txoj kev ntseeg lawm tso.

7 Vim twb yog los ntawm kev ntseeg uas Khetos ua nws tus kheej rau peb cov yawg koob pom, tom qab nws tau sawv hauv qhov tuag rov qab los; thiab nws twb tsis ua nws tus kheej rau lawv pom txog rau thaum tom qab lawv twb ntseeg nws; yog li ntawd, yeej yuav tsum muaj ib txhia uas ntseeg nws, vim nws twb tsis ua nws tus kheej rau neeg ntiaj teb pom.

8 Tiam sis twb vim yog tib neeg txoj kev ntseeg nws thiaj ua nws tus kheej rau neeg ntiaj teb pom, thiab ua rau Leej Txiv lub npe muaj yeeb koob, thiab npaj tau ib txoj kev xwv kom lwm tus thiaj yuav txais tau lub txiaj ntsim ceeb tsheej, xwv kom lawv yuav cia siab rau tej uas lawv tsis tau pom.

9 Yog li ntawd, nej los kuj yuav muaj tau txoj kev cia siab, thiab txais tau lub txiaj ntsim ntawd, yog hais tias nej muaj kev ntseeg xwb.

10 Saib seb twb yog los ntawm kev ntseeg uas tus Tswv hu lawv cov txheej thaum ub raws li Vajtswv tus txheej txheem dawb huv.

11 Yog li ntawd, los ntawm kev ntseeg Vajtswv thiaj tau muab Mauxes txoj kev cai los. Tiam sis los ntawm lub txiaj ntsim uas yog nws Leej Tub Vajtswv tau npaj ib txoj kev uas zoo dua; thiab twb yog los ntawm kev ntseeg uas ua kom muaj raws li tej kev cai ntawd tiav lawm.

12 Yog tsis muaj kev ntseeg nyob hauv noob neej ces Vajtswv twb ua tsis tau tej txuj ci tseem ceeb nyob hauv lawv; yog li ntawd, nws thiaj tsis ua nws tus kheej rau lawv pom txog rau thaum tom qab lawv ntseeg tso.

13 Saib seb, twb yog Amas thiab Amulej nkawd txoj kev ntseeg uas ua rau lub tsev kaw tawg vau rau hauv av.

14 Saib seb, twb yog Nifais thiab Lihais nkawd txoj kev ntseeg uas ua rau cov Neeg Lamas hloov, lawv thiaj li ua kev cai raus ntawm hluav taws thiab ntawm tus Vaj Ntsuj Plig Dawb Huv.

15 Saib seb, twb yog Amoos thiab nws cov kwv tij lawv txoj kev ntseeg uas ua ib qho txuj ci tseem ceeb loj heev nyob hauv cov Neeg Lamas.

16 Muaj tseeb tiag, thiab tag nrho cov uas tau ua tej txuj ci tseem ceeb twb yog ua tej ntawd los ntawm kev ntseeg, cov uas nyob ua ntej Khetos thiab cov uas nyob tom qab los kuj tib yam.

17 Thiab twb yog los ntawm kev ntseeg es peb tug thwj tim thiaj tau txais lus cog tseg tias lawv yuav tsis saj txoj kev tuag; thiab lawv twb tsis txais lus cog tseg ntawd txog rau thaum tom qab lawv ntseeg tso.

18 Thiab ib txwm tsis tau muaj dua leej twg ua tau tej txuj ci tseem ceeb txog rau thaum tom qab lawv ntseeg tso; yog li ntawd, lawv thiaj xub ntseeg Vajtswv Leej Tub.

19 Thiab twb muaj ntau tus uas txoj kev ntseeg muaj zog heev, twb yog ua ntej thaum Khetos los, cov uas cheem tsis tau lawv kom nyob hauv daim ntaub thaiv, tiam sis lawv lub qhov muag tau pom tiag tiag tej uas lawv tau pom los ntawm lub qhov muag ntawm kev ntseeg, thiab ua rau lawv zoo siab.

20 Thiab saib seb, peb tau pom nyob hauv phau ceev xwm txheej no tias ib tug ntawm cov no twb yog Yales tus tij laug; vim nws txoj kev ntseeg Vajtswv muaj zog heev, ua rau thaum Vajtswv cev nws tus ntiv tes los nws zais tsis tau ntawm Yales tus tij laug lub qhov muag, vim yog nws txoj lus uas nws tau hais rau Yales tus tij laug, txoj lus uas Yales tus tij laug tau los ntawm kev ntseeg.

21 Thiab tom qab Yales tus tij laug tau pom tus Tswv tus ntiv tes, vim yog txoj lus cog tseg uas Yales tus tij laug tau los ntawm kev ntseeg, tus Tswv thiaj zais tsis tau ib yam dab tsi ntawm nws lub qhov muag; yog li ntawd tus Tswv thiaj ua rau nws pom txhua yam, vim twb ceev tsis tau kom nws nyob sab nraum daim ntaub thaiv ntxiv lawm.

22 Thiab twb yog los ntawm kev ntseeg uas kuv cov yawg koob tau txais lo lus cog tseg tias tej no yuav los rau lawv cov kwv tij los ntawm Lwm Haiv Neeg; yog li ntawd tus Tswv tau txib kuv, muaj tseeb tiag, twb yog Yexus Khetos.

23 Thiab kuv hais rau nws tias: Tus Tswv es, Lwm Haiv Neeg yuav thuam tej no, vim peb tsis tshua txawj sau ntawv; vim tus Tswv koj tau ua rau peb txawj hais lus heev los ntawm kev ntseeg, tiam sis koj twb tsis ua kom peb txawj sau ntawv; vim koj tau ua rau tag nrho cov neeg no kom lawv muaj peev xwm hais lus zoo, vim yog tus Vaj Ntsuj Plig Dawb Huv uas koj tau muab rau lawv;

24 Thiab koj tsuas yog ua kom peb txawj sau ntawv me ntsis xwb, vim yog txoj kev txhav ntawm peb txhais tes. Saib seb, koj twb tsis ua kom peb txawj sau ntawv zoo li Yales tus tij laug, vim koj tau ua rau nws kom tej uas nws sau muaj hwj chim ib yam li koj, ua tau rau tib neeg yuav tsum los nyeem tej uas nws sau ntawd.

25 Koj kuj tau ua rau peb tej lus muaj hwj chim thiab zoo heev, ua rau peb tsis muaj peev xwm muab sau cia; yog li ntawd, thaum peb sau peb pom peb txoj kev qaug zog, thiab dawm taw vim yog txoj kev tso peb tej lus ua ke; thiab kuv ntshai nyob tsam Lwm Haiv Neeg yuav thuam peb tej lus.

26 Thiab thaum kuv tau hais li no tas, tus Tswv hais rau kuv, hais tias: Cov neeg ruam thiaj li thuam, tiam sis lawv yuav nyiav; thiab kuv lub hwj chim yeej txaus rau cov neeg uas muaj siab mos siab muag, xwv kom lawv tsis txhob ua li cas rau nej txoj kev qaug zog.

27 Thiab yog tias tib neeg los cuag kuv, kuv yuav ua kom lawv paub txog lawv txoj kev qaug zog. Kuv muab txoj kev qaug zog rau tib neeg xwv kom lawv yuav txo hwj chim; thiab kuv lub hwj chim yeej txaus rau tib neeg txhua tus uas txo lawv lub hwj chim rau kuv; yog tias lawv txo lawv lub hwj chim rau kuv, thiab ntseeg kuv, ces kuv yuav ua kom tej uas qaug zog los ua tej uas muaj zog rau lawv.

28 Saib seb, kuv yuav ua kom Lwm Haiv Neeg paub lawv txoj kev qaug zog, thiab kuv yuav ua kom lawv paub tias kev ntseeg, kev cia siab thiab kev siab hlub yuav coj tau lawv los cuag kuv—uas yog qhov txhawv ntawm tag nrho kev ncaj ncees.

29 Thiab kuv, Maulaunais, tom qab kuv hnov tej lus no, thiaj muaj kev nplij siab, thiab hais tias: Auj tus Tswv es, thov kom muaj raws li koj siab xav uas ncaj ncees, vim kuv paub tias koj ua hauj lwm rau noob neej raws li lawv txoj kev ntseeg;

30 Vim Yales tus tij laug hais rau lub roob Xelees tias, Txav—thiab lub roob txawm cia li txav. Thiab yog tias nws tsis muaj kev ntseeg ces lub roob twb tsis txav; yog li ntawd koj ua hauj lwm tom qab tib neeg muaj kev ntseeg.

31 Vim li no koj tau ua koj tus kheej tshwm sim los rau koj cov thwj tim; vim twb yog tom qab lawv muaj kev ntseeg, thiab hais lus los ntawm koj lub npe, koj tau ua koj tus kheej rau lawv pom nrog lub hwj chim loj heev.

32 Thiab kuv kuj nco qab tias koj tau hais tias koj tau npaj ib lub tsev rau tib neeg, muaj tseeb tiag, twb yog ib lub tsev uas nyob hauv koj Leej Txiv tej chaw nyob, qhov uas ua rau tib neeg yuav muaj kev cia siab zoo dua; yog li ntawd tib neeg yuav tsum cia siab, tsis li ntawd lawv yuav tsis tau txais ib qho qub txeeg qub teg nyob hauv qhov chaw uas koj tau npaj lawm.

33 Thiab ntxiv, kuv nco qab koj tau hais tias koj hlub neeg ntiaj teb, npaum li uas koj muab koj txoj sia tso rau neeg ntiaj teb, xwv kom koj yuav rov tau koj txoj sia dua mus npaj ib qho chaw rau noob neej.

34 Thiab nim no kuv paub tias txoj kev hlub no uas koj tau muaj rau noob neej twb yog kev siab hlub; yog li ntawd, tsuas yog tib neeg yuav muaj kev siab hlub xwb tsis li ntawd lawv yuav tsis tau qhov chaw uas koj tau npaj nyob hauv koj Leej Txiv tej chaw nyob los ua koj tug.

35 Yog li ntawd, kuv paub los ntawm tej uas koj tau hais no hais tias, yog Lwm Haiv Neeg tsis muaj kev siab hlub, vim yog peb txoj kev qaug zog, ces koj yuav sim lawv, thiab muab lawv choj nyiaj tshem mus, muaj tseeb tiag, tej uas lawv tau txais lawm, thiab muab rau cov uas yuav muaj ntau zog.

36 Thiab tau muaj tias kuv thov tus Tswv kom nws muab kev tshav ntuj rau Lwm Haiv Neeg, xwv kom lawv yuav muaj kev siab hlub.

37 Thiab tau muaj tias tus Tswv hais rau kuv tias: Yog lawv tsis muaj kev siab hlub los twb tsis ua li cas rau koj, koj twb rau siab ntseeg lawm; yog li ntawd, tus Tswv yuav ua kom koj tej tsoos tsho huv. Thiab vim koj twb pom koj txoj kev qaug zog, tus Tswv yuav ua kom koj muaj zog, kom tau zaum saum qhov chaw uas kuv tau npaj nyob hauv kuv Txiv tej chaw nyob.

38 Thiab nim no kuv, Maulaunais, thov hais ncaim mus zoo rau Lwm Haiv Neeg, muaj tseeb tiag, thiab kuj hais rau kuv cov kwv tij uas kuv hlub, mus txog thaum peb yuav sib ntsib rau ntawm Khetos lub rooj txiav txim, uas txhua tus tib neeg yuav paub tias nej cov ntshav twb tsis tsuas kuv tej tsoos tsho.

39 Thiab thaum ntawd nej yuav paub tias kuv tau pom Yexus, thiab paub tias nws tau nrog kuv tham tim ntsej tim muag, thiab paub tias nws hais rau kuv yam txo hwj chim heev, ib yam li ib tug neeg hais rau lwm tus los ntawm kuv yam lus, ntsig txog tej no;

40 Thiab kuv tsuas sau tau qhov me ntsis xwb, vim kuv tsis tshua txawj sau ntawv.

41 Thiab nim no, kuv xav kom nej nrhiav tus Yexus no, tus uas cov yaj saub thiab cov thwj tim tau sau txog, xwv kom Vajtswv uas yog Leej Txiv, thiab tus Tswv Yexus Khetos, thiab tus Vaj Ntsuj Plig Dawb Huv, uas ua tim khawv txog nkawd, lawv txoj kev tshav ntuj yuav muaj nyob hauv nej mus ib txhis. Amees.