1 Nim no kuv, Maulaunais, sau me ntsis uas kuv xav hais tias zoo; thiab kuv sau rau kuv cov kwv tij, cov Neeg Lamas; thiab kuv xav kom lawv paub tias twb ntev tshaj li plaub puas nees nkaum xyoo tau dhau mus txij thaum tau muab lub cim txog Khetos txoj kev los.

2 Thiab kuv muab tej ceev xwm txheej no khi tseg cia, tom qab kuv hais ob peb lo lus los ntuas nej.

3 Saib seb, kuv yuav ntuas nej tias thaum nej nyeem tej no, yog hais tias yog Vajtswv lub tswv yim kom nej nyeem, kom nej yuav nco qab tias tus Tswv tau hlub tshua noob neej npaum li cas, txij thaum tsim Adas los txog rau lub sij hawm uas nej yuav tau txais tej no, thiab xav txog qhov no nyob hauv nej lub siab.

4 Thiab thaum nej yuav tau txais tej no, kuv xav ntuas nej kom nej thov Vajtswv, Leej Txiv tus uas Nyob Mus Ib Txhis, los ntawm Khetos lub npe, saib tej no puas muaj tseeb; thiab yog nej thov nrog lub siab dawb paug, nrog kev mob siab tiag, thiab muaj kev ntseeg Khetos, nws yuav qhia rau nej tias tej no muaj tseeb, los ntawm tus Vaj Ntsuj Plig Dawb Huv lub hwj chim.

5 Thiab los ntawm tus Vaj Ntsuj Plig Dawb Huv lub hwj chim nej yuav paub qhov tseeb ntawm txhua yam.

6 Thiab txhua yam uas zoo yeej ncaj thiab tseeb; yog li ntawd, txhua yam uas zoo yeej tsis xyeej Khetos, tiam sis lees paub hais tias muaj nws.

7 Thiab nej yuav paub hais tias muaj nws, los ntawm tus Vaj Ntsuj Plig Dawb Huv lub hwj chim; yog li ntawd kuv yuav ntuas nej kom nej tsis txhob xyeej Vajtswv lub hwj chim; vim nws ua hauj lwm los ntawm lub hwj chim, raws li noob neej txoj kev ntseeg, zoo tib yam hnub no thiab tag kis, thiab mus ib txhis.

8 Thiab ntxiv, kuv ntuas nej, kuv cov kwv tij, kom nej tsis txhob xyeej Vajtswv tej txiaj ntsim, vim tej txiaj ntsim ntawd muaj ntau; thiab tej txiaj ntsim ntawd yog los ntawm tib tug Vajtswv los. Thiab muaj ntau txoj kev uas Vajtswv muab tej txiaj ntsim no los pab; tiam sis twb yog tib tug Vajtswv ua hauj lwm txhua yam rau sawv daws; thiab tej txiaj ntsim ntawd twb yog muab los ntawm tej kev tshwm sim ntawm Vajtswv tus Ntsuj Plig rau tib neeg, kom pab tau lawv.

9 Vim saib seb, Vajtswv tus Ntsuj Plig muab rau ib tug, kom nws txawj qhia txoj lus ntawm kev muaj tswv yim;

10 Thiab rau lwm tus, kom nws txawj qhia txoj lus txawj ntse los ntawm tib tug Ntsuj Plig;

11 Thiab rau lwm tus, kom muaj kev ntseeg loj heev; thiab rau lwm tus, kom muaj tej txiaj ntsim kho mob zoo los ntawm tib tug Ntsuj Plig;

12 Thiab ntxiv, rau lwm tus, kom nws ua tau tej txuj ci tseem ceeb loj heev;

13 Thiab ntxiv, rau lwm tus, kom nws qhia tau tej yuav muaj los yav tom ntej ntsig txog txhua yam;

14 Thiab ntxiv, rau lwm tus, kom pom tau cov tim tswv thiab cov ntsuj plig uas los txhawb pab;

15 Thiab ntxiv, rau lwm tus, kom txawj hais txhua yam lus;

16 Thiab ntxiv, rau lwm tus, kom txawj txhais tej lus thiab lwm yam lus uas txawv.

17 Thiab tag nrho tej txiaj ntsim no yog los ntawm Khetos tus Ntsuj Plig los; thiab tej no los rau txhua tus neeg, raws li nws pom zoo.

18 Thiab kuv xav ntuas nej, kuv cov kwv tij uas kuv hlub, kom nej nco ntsoov tias txhua lub txiaj ntsim zoo yog los ntawm Khetos los.

19 Thiab kuv xav ntuas nej, kuv cov kwv tij uas kuv hlub, kom nej nco ntsoov tias nws zoo ib yam nag hmo, hnub no, thiab mus ib txhis, thiab tag nrho tej txiaj ntsim uas kuv tau hais txog, uas yog ntawm sab ntsuj plig, yeej tsis muaj hnub ploj mus li, ntev npaum li uas tseem muaj lub ntiaj teb, tsuas yog thaum noob neej tsis ntseeg lawm xwb.

20 Yog li ntawd, yeej yuav muaj kev ntseeg; thiab yog muaj kev ntseeg ces yeej yuav muaj kev cia siab; thiab yog hais tias muaj kev cia siab ces yeej yuav muaj kev siab hlub thiab.

21 Thiab tsuas yog nej muaj kev siab hlub xwb tsis li ntawd yeej yuav tsis muab nej cawm dim nyob hauv Vajtswv lub nceeg vaj; thiab kuj yuav tsis muab nej cawm dim nyob hauv Vajtswv lub nceeg vaj yog nej tsis muaj kev ntseeg; thiab nej kuj dim tsis taus yog nej tsis muaj kev cia siab.

22 Thiab yog nej tsis muaj kev cia siab ces twb yog nej muaj kev poob siab; thiab muaj kev poob siab los twb vim yog kev ua phem.

23 Thiab Khetos tau hais tseeb rau peb cov yawg koob tias: Yog nej muaj kev ntseeg ces nej yuav ua tau txhua yam uas kuv xav tias tsim nyog ua.

24 Thiab nim no kuv hais rau tag nrho cov neeg nyob thoob plaws lub ntiaj teb—hais tias yog txog hnub uas Vajtswv lub hwj chim thiab tej txiaj ntsim ploj tag nyob hauv nej lawm ces, twb vim yog kev tsis ntseeg.

25 Thiab kev txom nyem yuav raug noob neej yog muaj li no; vim yuav tsis muaj ib tug ua zoo nyob hauv nej li, tsis muaj ib tug li. Vim tias yog muaj ib tug nyob hauv nej uas ua zoo, ces twb yog nws ua hauj lwm los ntawm Vajtswv lub hwj chim thiab tej txiaj ntsim.

26 Thiab kev txom nyem yuav raug cov uas ua kom tej no ploj mus thiab tuag mus, vim lawv tuag thaum lawv tseem muaj kev txhaum, thiab muab tsis tau lawv cawm dim nyob hauv Vajtswv lub nceeg vaj; thiab kuv hais tej no raws li Khetos tej lus; thiab kuv tsis dag.

27 Thiab kuv ntuas nej kom nco ntsoov tej no; vim lub sij hawm yuav los sai heev uas nej yuav paub tias kuv tsis dag, vim nej yuav pom kuv nyob ntawm Vajtswv lub rooj txiav txim; thiab tus Tswv uas yog Vajtswv yuav hais rau nej tias: Puas yog kuv tsis tau tshaj tawm kuv tej lus rau nej, uas tus txiv neej no tau muab sau cia, zoo li ib tug uas qw nrov tawm hauv qhov tuag los, muaj tseeb tiag, twb zoo li ib tug uas hais tawm hauv av los?

28 Kuv tshaj tawm tej no xwv kom yuav muaj raws li tej kev qhia tej yuav muaj los yav tom ntej. Thiab saib seb, tej no yuav tawm ntawm tus Vajtswv uas kav ib txhis lub qhov ncauj los; thiab nws txoj lus yuav nrov ncha mus ntawm ib tiam neeg mus rau ib tiam neeg.

29 Thiab Vajtswv yuav ua rau nej paub tias, tej uas kuv tau sau yeej muaj tseeb.

30 Thiab ntxiv kuv yuav ntuas nej kom nej los cuag Khetos, thiab siv txhua lub txiaj ntsim uas zoo, thiab txhob kov lub txiaj ntsim phem, los sis qhov uas tsis huv.

31 Thiab cia li tsim los, thiab sawv hauv av los, auj Yeluxalees; muaj tseeb tiag, thiab cia li hnav nej tej tsoo tsho uas zoo nkauj, auj Xi-oos tus ntxhais es; thiab txho nej tej tswg kom khov thiab ua kom nej tej ciam teb dav mus ib txhis, xwv kom nej tsis txhob raug kev ntxhov hnyo ntxiv lawm, xwv kom yuav muaj raws li Leej Txiv tus uas Nyob Mus Ib Txhis tej kev khi lus uas nws tau khi rau nej, auj tsev neeg Ixayees.

32 Muaj tseeb tiag, cia li los cuag Khetos, thiab cia li los ua neeg zoo tag nrho vim yog los ntawm nws, thiab xyeej txhua yam uas tsis los ntawm Vajtswv tawm ntawm nej tus kheej mus; thiab yog nej yuav xyeej txhua yam uas tsis los ntawm Vajtswv tawm ntawm nej tus kheej mus, thiab hlub Vajtswv kawg nej lub siab thiab lub dag lub zog, ces nws txoj kev tshav ntuj yeej txaus rau nej, xwv kom nws txoj kev tshav ntuj yuav cia nej los ua neeg zoo tag nrho vim yog los ntawm Khetos; thiab yog Vajtswv txoj kev tshav ntuj cia nej los ua neeg zoo tag nrho vim yog los ntawm Khetos, ces nej yeej tsis muaj qhov xyeej Vajtswv lub hwj chim li.

33 Thiab ntxiv, yog Vajtswv txoj kev tshav ntuj cia nej ua neeg zoo tag nrho vim yog los ntawm Khetos, thiab nej tsis xyeej nws lub hwj chim, ces Vajtswv txoj kev tshav ntuj ua rau nej hloov ua dawb huv los ntawm Khetos, los ntawm qhov uas Khetos cov ntshav nrog, uas yog raws li Leej Txiv txoj kev khi lus kom yuav zam txim rau nej tej kev txhaum, xwv kom nej yuav dawb huv, tsis muaj qhov phem.

34 Thiab nim no kuv hais rau nej sawv daws, nyob zoo mog. Tsis ntev no kuv yuav mus so nyob hauv Vajtswv lub yeeb tsheej, kom txog thaum kuv tus ntsuj plig thiab lub cev yuav rov los sib koom ua ke; thiab tus Tswv coj kuv los saum tej cua yam li tus uas kov yeej, los ntsib nej nyob ntawm Yehauvas tus uas zoo kawg nkaus lub rooj txiav txim, tus Txiav Txim uas Nyob Mus Ib Txhis ntawm cov muaj sia thiab cov tuag. Amees.