1 Kuv tus me tub uas kuv hlub es, kuv rov sau ntawv rau koj dua kom koj yuav paub tias kuv tseem muaj sia nyob; tiam sis kuv sau me ntsis txog tej uas tu siab heev.

2 Vim saib seb, kuv tau muaj ib npluav rog mob heev nrog cov Neeg Lamas, uas yog npluav uas peb tsis yeej; thiab Aki-eetus tau vau los ntawm rab ntaj, thiab Lulas thiab Eloos los tib yam; muaj tseeb tiag, thiab peb tau xiam peb ib co neeg zoo heev.

3 Thiab nim no saib seb, kuv tus me tub, kuv ntshai nyob tsam cov Neeg Lamas yuav ua rau cov neeg no puas tsuaj; vim lawv tsis hloov siab lees txim, thiab Dab Ntxwg Nyoog txhaub lawv kom ib leeg npau taws rau ib leeg tsis tu ncua.

4 Saib seb, kuv tab tom ua hauj lwm nrog lawv tsis tu ncua; thiab thaum kuv hais Vajtswv txoj lus yam nruj heev rau lawv, lawv tshee na thiab npau taws tawm tsam kuv; thiab thaum kuv tsis hais lus nruj rau lawv, lawv ua lawv lub siab tawv tawm tsam tej ntawd; yog li ntawd, kuv ntshai nyob tsam tus Tswv tus Ntsuj Plig tau tsum tsis nrog lawv nyob lawm.

5 Vim lawv npau taws heev kawg nkaus uas kuv saib yam li lawv twb tsis ntshai tuag; thiab lawv twb tsis muaj kev hlub, ib leeg rau ib leeg; thiab lawv xav xav tua neeg thiab xav ua pauj mus tsis tu ncua.

6 Thiab nim no, kuv tus me tub uas kuv hlub es, txawm tias lawv muaj siab tawv los, cia peb rau siab ntso ua hauj lwm; yog tias peb tsum tsis ua hauj lwm, peb yuav raug txim; vim peb muaj ib txoj hauj lwm ua thaum tseem nyob hauv lub cev av no, xwv kom peb yuav kov yeej tus yeeb ncuab ntawm tag nrho kev ncaj ncees, thiab peb tus ntsuj plig tau so nyob hauv Vajtswv lub nceeg vaj.

7 Thiab nim no kuv sau me ntsis ntsig txog cov neeg no tej kev txom nyem. Vim raws li zaj lus uas kuv tau txais los ntawm Amauloos, saib seb, cov Neeg Lamas txhom tau coob leej raug txim, uas lawv txhom tom tus pej thuam Selixas los; thiab cov neeg raug txim no muaj txiv neej, poj niam, thiab me nyuam yaus.

8 Thiab lawv muab cov poj niam cov txiv thiab cov me nyuam txiv tua; thiab lawv muab lawv cov txiv tej nqaij rau cov poj niam noj, thiab muab lawv txiv tej nqaij rau cov me nyuam noj; thiab lawv twb tsis muab dej, tsuas yog me ntsis xwb, rau lawv haus.

9 Thiab txawm hais tias cov Neeg Lamas ua txoj kev qias loj npaum li no los, twb tsis npaum li tej uas peb cov neeg tau ua nyob hauv Mauli-atus. Vim saib seb, lawv txhom tau cov Neeg Lamas ntau tus ntxhais los ua neeg raug txim; thiab tom qab tau muab lawv yuam ntawm qhov uas tshua tshaj thiab muaj nuj nqis tshaj txhua yam huv tib si, uas yog kev coj dawb huv thiab kev tsim txiaj—

10 Thiab tom qab lawv tau ua li no tas, lawv muab lawv tua yam phem kawg nkaus, muab lawv tsim txom txog rau thaum tuag kiag; thiab tom qab lawv tau ua li no tas, lawv muab lawv cov nqaij noj zoo ib yam li tej tsiaj qus, vim yog lawv lub siab tawv; thiab lawv ua tej no ua ib lub cim hais tias lawv ua siab loj.

11 Auj kuv tus me tub uas kuv hlub es, ua cas ib co neeg zoo li no, uas tsis muaj kev vam meej—

12 (Thiab nyuam qhuav ob peb xyoos dhau mus xwb, txij thaum lawv yog ib co neeg vam meej thiab ntxim nyiam)

13 Tiam sis auj kuv tus me tub, ua cas ib co neeg zoo li no, cov uas nyiam kev qias tag npaud—

14 Yuav ua cas peb thiaj hais tau kom Vajtswv tseg nws txhais tes tsis txhob txiav txim tawm tsam peb?

15 Saib seb, kuv lub siab qw hais tias: Kev txom nyem raug cov neeg no. Cia li los txiav txim, auj Vajtswv es, thiab zais lawv tej kev txhaum, thiab tej kev phem, thiab tej kev qias tawm ntawm koj lub ntsej muag!

16 Thiab ntxiv, kuv tus me tub, muaj ntau tus poj ntsuam thiab lawv cov ntxhais uas tseem nyob hauv Selixas; thiab feem zaub mov noj ntawd uas cov Neeg Lamas tsis nqa mus, saib seb, Xenefais cov tub rog twb muab nqa mus, thiab cia lawv mus yos nrhiav zaub mov noj rau ub rau no; thiab muaj ntau tus poj niam laus tau tsaus muag tom tej kev thiab tuag.

17 Thiab pab tub rog uas nrog kuv twb tsis muaj zog; thiab cov Neeg Lamas cov tub rog yog nyob nruab nrab ntawm Selixas thiab kuv; thiab tag nrho cov uas tau khiav mus rau Aloos cov tub rog tau poob mus rau lawv tej kev tsim txom uas phem kawg nkaus.

18 Auj kuv cov neeg txoj kev phem qias! Lawv nyob tsis muaj kev cai thiab tsis muaj kev hlub tshua. Saib seb, kuv tsuas yog ib tug neeg xwb, thiab kuv tsuas muaj zog li ib tug neeg xwb, thiab kuv twb tsis muaj peev xwm hais kom lawv mloog kuv tej lus ntxiv lawm.

19 Thiab lawv txoj kev lim hiam tau hloov kom muaj zog; thiab lawv yeej phem ib yam nkaus, tsis tseg leej twg li, tsis hais tus laus los yog tus hluas; thiab lawv nyiam txhua yam tsuas yog tshuav tej uas zoo xwb; thiab peb cov poj niam thiab cov me nyuam txoj kev txom nyem yeej tshaj txhua yam nyob hauv thaj av no; muaj tseeb tiag, tus nplaig twb hais tsis tau, thiab sau tsis tau cia.

20 Thiab nim no, kuv tus me tub, kuv yuav tsis piav txog txoj kev phem no ntxiv lawm. Saib seb, koj yeej paub cov neeg no txoj kev phem. Koj yeej paub tias lawv nyob tsis muaj kev cai thiab lub siab tsis xeev li; thiab lawv txoj kev phem twb tshaj cov Neeg Lamas.

21 Saib seb, kuv tus me tub, kuv tsis muaj tej yam zoo txog lawv hais rau Vajtswv nyob tsam nws muab kuv nplawm.

22 Tiam sis saib seb, kuv tus me tub, kuv muaj tej yam zoo txog koj hais rau Vajtswv, thiab kuv tso siab rau Khetos tias koj yuav txais kev cawm dim; thiab kuv thov Vajtswv kom nws yuav tseg koj txoj sia, kom ua tim khawv rau qhov uas nws cov neeg yuav tig rov mus cuag nws, los sis rau lawv txoj kev puas tsuaj huv tib si; vim kuv paub tias lawv yeej yuav piam sij yog tias lawv tsis hloov siab lees txim thiab tig rov mus cuag nws.

23 Thiab yog tias lawv piam sij ces yuav zoo li cov Neeg Yales, vim yog tej uas lawv lub siab xav ua tiag tiag, tshawb nrhiav ntshav thiab kev ua pauj.

24 Thiab yog tias lawv piam sij, peb paub tias peb cov kwv tij coob leej tau khiav mus koom nrog cov Neeg Lamas, thiab muaj coob leej ntxiv tseem yuav mus koom lawv thiab; yog li ntawd, sau me ntsis ob peb yam, yog tias Vajtswv tseg koj thiab kuv piam sij thiab tsis pom koj; tiam sis kuv tso siab tias nyaj kuv yuav tau pom koj tsis ntev no; vim kuv muaj tej ceev xwm txheej dawb ceev uas kuv xav muab rau koj.

25 Kuv tus me tub, cia siab ntsoov rau Khetos; thiab tsis txhob cia tej uas kuv tau sau ua rau koj nyuaj siab, kom tsuam koj ntog rau txoj kev tuag; tiam sis thov kom Khetos tsa koj sawv, thiab thov kom nws tej kev txom nyem thiab kev tuag thiab kev ua nws lub cev los rau peb cov yawg koob pom, thiab nws txoj kev hlub tshua thiab txoj kev ua siab ntev nyiaj, thiab txoj kev cia siab ntawm nws lub yeeb koob thiab ntawm txoj sia nyob mus ib txhis, nyob rawv hauv koj lub siab mus ib txhis.

26 Thiab thov kom Vajtswv txoj kev tshav ntuj, uas yog Leej Txiv, tus uas lub rooj theej kiab nyob siab puag saum ntuj, thiab peb tus Tswv Yexus Khetos, tus uas zaum ntawm sab tes xis ntawm nws lub hwj chim, kom txog thaum txhua yam los ywj rau nws, nyob nrog koj, thiab nyob nrog nraim koj mus ib txhis li. Amees.