Tshooj 6
Cov neeg uas hloov siab lees txim tau los ua kev cai raus dej thiab los sib raug zoo nrog cov ntseeg—Yuav zam txim rau cov mej zeej hauv lub koom txoos uas hloov siab lees txim—Cov thawj coj yuav coj tej kev sib ntsib los ntawm tus Vaj Ntsuj Plig Dawb Huv lub hwj chim. Kwv yees li 401–421 xyoos tom qab Yexus yug los.
1 Thiab nim no kuv hais txog kev ua kev cai raus dej. Saib seb, cov txwj laug, cov pov thawj, thiab cov xib hwb tau ua kev cai raus dej; thiab lawv tsis ua kev cai raus dej yog tias lawv tsis txi txiv zoo kom thiaj tsim nyog ua kev cai raus dej.
2 Thiab lawv twb tsis txais leej twg los ua kev cai raus dej yog tias lawv tsis los nrog ib lub siab mob thiab lub siab xav ua zoo, thiab ua tim khawv rau lub koom txoos tias lawv twb hloov siab lees txim rau tag nrho lawv tej kev txhaum lawm tiag.
3 Thiab twb tsis txais leej twg los ua kev cai raus dej tsuas yog lawv kam ris Khetos lub npe, thiab txiav txim siab los ua hauj lwm rau nws kom mus txog thaum kawg xwb.
4 Thiab tom qab tau txais lawv los ua kev cai raus dej, thiab tus Vaj Ntsuj Plig Dawb Huv lub hwj chim tau los tshoov lawv lub siab thiab ntxuav lawv lawm, cov ntseeg yuav suav lawv nrog cov neeg ntawm Khetos lub koom txoos; thiab cov ntseeg muab lawv lub npe sau cia, xwv kom yuav nco qab lawv thiab Vajtswv txoj lus zoo yuav los yug lawv, kom ceev tau lawv taug txoj kev yog, kom ceev tau lawv faj seeb tsis tu ncua rau txoj kev thov Vajtswv, cia siab ntsoov rau Khetos tej kev ua zoo xwb, tus uas yog lub hauv paus ntawm lawv txoj kev ntseeg thiab tus ua kom lawv txoj kev ntseeg tiav.
5 Thiab cov ntseeg tuaj sib ntsib ua ke tsis tu ncua, tuaj ua kev cai yoo mov thiab thov Vajtswv, thiab tuaj sib tham ib leeg nrog ib leeg ntsig txog txoj kev nyob zoo ntawm lawv tus ntsuj plig.
6 Thiab lawv tuaj sib ntsib ua ke tsis tu ncua, tuaj noj cov mov mog thiab haus cov cawv txiv hmab, nco txog tus Tswv Yexus.
7 Thiab lawv ceev faj saib kom tsis txhob muaj kev ua phem nyob hauv lawv; thiab yog pom leej twg ua kev phem, thiab muaj peb tug tim khawv ntawm lub koom txoos liam lawv rau ntawm cov txwj laug, thiab yog lawv tsis kam hloov siab lees txim, thiab tsis kam lees txhaum, lub koom txoos yuav muab lawv lub npe rho tawm, thiab cov ntseeg tsis suav lawv nyob hauv Khetos cov neeg.
8 Tiam sis lawv hloov siab lees txim thiab thov kev zam txim ntau npaum li cas, yog mob siab ua tiag tiag, los twb tau zam txim rau lawv.
9 Thiab cov ntseeg coj lawv tej kev sib ntsib raws li tus txheej txheem ntawm tus Ntsuj Plig tej kev tshoov siab, thiab los ntawm tus Vaj Ntsuj Plig Dawb Huv lub hwj chim; txawm tias tus Vaj Ntsuj Plig Dawb Huv lub hwj chim yuav coj lawv kom qhuab qhia, los sis ntuas, los sis thov Vajtswv, los sis thov txiaj ntsim, los sis hu nkauj, ces lawv twb ua li ntawd.