1 Kuv txiv Maumoos ib tsab ntawv, uas sau rau kuv, Maulaunais; thiab tsab ntawv no yog sau rau kuv tom qab tsis ntev uas tau hu kuv los qhuab qhia. Thiab nws sau rau kuv zoo li no, hais tias:

2 Kuv tus tub Maulaunais, uas kuv hlub, kuv zoo siab heev uas koj tus Tswv Yexus Khetos tseem nco ntsoov txog koj, thiab tau hu koj los rau nws txoj kev qhuab qhia, thiab rau nws txoj hauj lwm dawb huv.

3 Kuv yeej nco ntsoov txog koj tas mus li thaum kuv thov Vajtswv, thov Vajtswv uas yog Leej Txiv tsis tu ncua los ntawm nws tus Me Nyuam Dawb Huv lub npe, Yexus, kom nws, los ntawm nws txoj kev zoo thiab txoj kev tshav ntuj uas tsis muaj qhov kawg, yuav tsom kwm koj los ntawm qhov uas koj ntseeg nws lub npe kom tiv tau mus txog thaum kawg.

4 Thiab nim no, kuv tus me tub es, kuv hais rau koj txog tej uas ua rau kuv nyuaj siab heev; vim ua rau kuv nyuaj siab tias ho pib muaj kev sib cav sib ceg nyob hauv nej.

5 Vim hais tias, yog tias qhov uas kuv kawm muaj tseeb, ces muaj kev sib cav sib ceg nyob hauv nej txog txoj kev muab nej cov me nyuam yaus ua kev cai raus dej.

6 Thiab nim no, kuv tus me tub, kuv thov kom koj rau siab ntso ua hauj lwm, xwv kom yuav tshem tau qhov yuam kev loj no tawm ntawm nej mus; vim, twb yog rau lub hom phiaj no kuv thiaj tau sau tsab ntawv no.

7 Vim tom qab kiag uas kuv paub txog tej no ntawm nej kuv thov tus Tswv ntsig txog qhov teeb meem ntawd. Thiab tus Tswv txoj lus los rau kuv los ntawm tus Vaj Ntsuj Plig Dawb Huv lub hwj chim, hais tias:

8 Cia li mloog Khetos tej lus, nej tus Txhiv Dim, nej tus Tswv thiab nej tus Vajtswv. Saib seb, kuv los rau hauv lub ntiaj teb tsis yog los hu cov ncaj ncees tiam sis los hu cov ua txhaum kom hloov siab lees txim; cov uas nyob zoo tsis tas yuav tau kws kho mob, tiam sis yog cov uas muaj mob; yog li ntawd, me nyuam yaus twb dawb huv, vim lawv tsis tau txawj ua txhaum; yog li ntawd Adas txoj kev raug foom tsis zoo twb raug tshem tawm ntawm lawv mus vim yog los ntawm kuv, ua rau txoj kev foom tsis zoo ntawd twb tsis muaj hwj chim kav lawv; thiab txoj kev cai txiav twb ua tiav tag vim yog los ntawm kuv.

9 Thiab tus Vaj Ntsuj Plig Dawb Huv tau ua Vajtswv txoj lus tshwm sim los rau kuv raws li tus txheej txheem no; yog li ntawd, kuv tus tub uas kuv hlub es, kuv paub tias qhov uas nej muab me nyuam yaus ua kev cai raus dej yog qhov ua saib tsis taus Vajtswv.

10 Saib seb kuv hais rau koj tias koj yuav tsum qhia qhov no—kev hloov siab lees txim thiab kev ua kev cai raus dej rau cov uas paub tab thiab txawj ua txhaum; muaj tseeb tiag, qhia cov niam thiab cov txiv kom lawv hloov siab lees txim thiab ua kev cai raus dej, thiab txo lawv lub hwj chim ib yam li lawv cov me nyuam yaus, thiab yuav muab lawv txhua tus cawm dim nrog lawv cov me nyuam yaus.

11 Thiab lawv cov me nyuam yaus tsis tas hloov siab lees txim, thiab tsis tas ua kev cai raus dej. Saib seb, kev cai raus dej twb yog los ntawm kev hloov siab lees txim kom ua raws li tej lus txib thiaj muaj kev zam txim rau tej kev txhaum.

12 Tiam sis me nyuam yaus twb muaj sia vim yog los ntawm Khetos, txij puag thaum ntuj tsim teb raug los; yog tsis muaj li ntawd, ces Vajtswv twb yog ib tug Vajtswv uas tsis ncaj, thiab kuj yog ib tug Vajtswv uas txawj hloov, thiab yog ib tug uas saib neeg ntsej muag; vim muaj pes tsawg leej me nyuam yaus uas tau tuag lawm es tsis tau ua kev cai raus dej!

13 Yog li ntawd, yog hais tias cawm tsis tau cov me nyuam yaus vim tsis tau ua kev cai raus dej, ces cov no yeej yuav mus rau hauv ntuj txiag teb tsaus uas tsis muaj qhov kawg lawm.

14 Saib seb kuv hais rau nej tias, tus uas xav tias yuav tsum muab cov me nyuam yaus ua kev cai raus dej twb poob siab tag nrho thiab raug tej hlua ntawm kev ua phem; vim nws twb tsis muaj kev ntseeg, kev cia siab, thiab kev siab hlub; yog li ntawd, nws yuav raug txiav tawm thaum tseem xav li no, nws yeej yuav nqis mus rau hauv ntuj txiag teb tsaus.

15 Vim qhov uas xav hais tias Vajtswv cawm ib tug me nyuam vim yog kev cai raus dej, thiab lwm tus me nyuam yuav piam sij vim nws tsis tau ua kev cai raus dej, yog qhov uas phem heev.

16 Kev txom nyem yuav raug cov uas yuav hloov tus Tswv tej kev li no, vim lawv yuav piam sij tsuas yog tias lawv hloov siab lees txim xwb. Saib seb, kuv hais yam tsis ntshai li, vim kuv muaj txoj cai los ntawm Vajtswv los; thiab kuv twb tsis ntshai tej uas tib neeg muaj peev xwm ua; vim txoj kev hlub uas zoo tag nrho yeej ntiab tau txhua txoj kev ntshai tawm.

17 Thiab kuv muaj txoj kev siab hlub puv npo, uas yog txoj kev hlub uas kav ib txhis; yog li ntawd, txhua tus me nyuam yaus yeej zoo tib yam rau kuv; yog li ntawd, kuv hlub cov me nyuam yaus nrog ib txoj kev hlub uas zoo tag nrho; thiab lawv txhua tus yeej zoo ib yam thiab yog cov uas tau txais txoj kev cawm seej.

18 Vim kuv paub tias Vajtswv tsis yog ib tug Vajtswv uas tsis ncaj, thiab tsis yog ib tug uas txawj hloov; tiam sis nws yog tus uas tsis hloov nyob tag nrho ib txhiab mus tag nrho ib txhis.

19 Me nyuam yaus hloov siab lees txim tsis tau; yog li ntawd, yog kev phem heev uas yuav xyeej Vajtswv tej kev hlub tshua dawb paug tsis pub rau lawv, vim lawv txhua tus twb muaj sia los ntawm nws vim yog nws txoj kev hlub tshua.

20 Thiab tus uas hais tias yuav tsum muab me nyuam yaus ua kev cai raus dej ces tus ntawd xyeej Khetos tej kev hlub tshua, thiab saib nws txoj kev theej txhoj thiab lub hwj chim ntawm nws txoj kev txhiv dim tsis muaj nqis.

21 Kev txom nyem yuav raug cov ntawd, vim ntshai tsam lawv yuav raug kev tuag, ntuj txiag teb tsaus, thiab kev tsim txom uas tsis muaj qhov kawg. Kuv hais tej no yam tsis ntshai li; Vajtswv tau txib kuv. Cia li mloog thiab ua raws tej lus no, tsis li ntawd ces tej lus no yuav nyob nraim tawm tsam nej nyob rau ntawm Khetos lub rooj txiav txim.

22 Vim saib seb tag nrho cov me nyuam yaus yeej muaj sia los ntawm Khetos, thiab cov uas tsis muaj txoj kev cai. Vim lub hwj chim ntawm kev txhiv dim yeej los rau txhua tus uas tsis muaj txoj kev cai; yog li ntawd, tus uas tsis raug txim, los sis tus uas tsis raug txoj kev raug txim, tsis tas yuav hloov siab lees txim; thiab rau cov no kev cai raus dej twb tsis muaj nuj nqis dab tsi—

23 Tiam sis kev xav li no saib tsis taus Vajtswv, thiab xyeej Khetos tej kev hlub tshua, thiab nws tus Ntsuj Plig Dawb Huv lub hwj chim, thiab tso siab rau tej hauj lwm uas tuag lawm.

24 Saib seb, kuv tus me tub, tsis tsim nyog muaj li no; vim kev hloov siab lees txim yog rau cov uas raug txim thiab raug foom tsis zoo ntawm kev txhaum cai.

25 Thiab thawj thawj cov txiv ntoo ntawm kev hloov siab lees txim yog kev cai raus dej; thiab kev cai raus dej twb yog los ntawm kev ntseeg kom ua raws li tej lus txib; thiab txoj kev ua raws li tej lus txib coj tau kev zam txim rau tej kev txhaum los;

26 Thiab txoj kev zam txim rau tej kev txhaum coj tau kev ua siab mos siab muag, thiab kev txo siab txo ntsws los; thiab vim yog kev ua siab mos siab muag thiab kev txo siab txo ntsws tus Vaj Ntsuj Plig Dawb Huv thiaj li los xyuas, uas yog tus Nplij Siab uas muaj kev cia siab thiab kev hlub uas zoo tag nrho puv npo, txoj kev hlub uas tiv tau los ntawm kev rau siab ntso thov Vajtswv, kom txog thaum qhov kawg yuav los, thaum uas tag nrho cov ntseeg yuav nrog Vajtswv nyob.

27 Saib seb, kuv tus me tub, kuv yuav rov sau ntawv rau koj dua yog tias kuv tsis tau mus tawm tsam cov Neeg Lamas sai. Saib seb, haiv neeg no txoj kev muab hlob, los sis cov neeg ntawm cov Neeg Nifais, tau ua rau lawv raug puas tsuaj yog tias lawv yuav tsis hloov siab lees txim.

28 Thov Vajtswv pab lawv, kuv tus me tub, kom kev hloov siab lees txim yuav los rau lawv. Tiam sis saib seb, kuv ntshai nyob tsam tus Ntsuj Plig tau tsum tsis nrog lawv nyob lawm; thiab nyob rau feem av ntawm no lawv kuj tab tom nrhiav kev muab tag nrho lub hwj chim thiab txoj cai uas yog los ntawm Vajtswv los tso tseg; thiab lawv tab tom xyeej tus Vaj Ntsuj Plig Dawb Huv.

29 Thiab tom qab lawv xyeej kev txawj ntse ntau npaum li no, kuv tus me tub, tsis ntev no lawv yeej yuav piam sij, kom muaj raws li tej kev qhia tej yuav muaj los yav tom ntej uas cov yaj saub tau hais, thiab raws li peb tus Cawm Seej kiag tej lus.

30 Nyob zoo, kuv tus me tub, kom txog thaum kuv yuav sau ntawv rau koj, los sis rov ntsib koj dua. Amees.