Phau Ntawv Maumoos

Yog li ntawd, zaj no yog ib zaj ntsiab lus ntawm Nifais cov neeg phau ceev xwm txheej, thiab cov Neeg Lamas thiab—Tau sau rau cov Neeg Lamas, cov uas yog ib co uas seem tshuav los ntawm tsev neeg Ixayees; thiab kuj sau rau cov Neeg Yudais thiab Lwm Haiv Neeg—Tau sau raws li txoj kev txib ua, thiab kuj sau los ntawm lub txiaj ntsim qhia tau tej yuav muaj los yav tom ntej thiab lub txiaj ntsim txais tau kev tshwm sim—Tau sau tseg thiab tau khi cia, thiab tau muab zais cia rau tus Tswv, kom cov phiaj no txhob raug puas tsuaj—Xwv kom yuav tawm los los ntawm Vajtswv lub txiaj ntsim thiab lub hwj chim mus rau txoj kev muab txhais lus—Maulaunais txhais tes tau muab khi cia, thiab tau muab zais cia rau tus Tswv, kom yuav tawm los thaum lub sij hawm uas tau pom zoo los ntawm Lwm Haiv Neeg los—Kev muab cov phiaj txhais lus los ntawm Vajtswv lub txiaj ntsim.

Ib zaj ntsiab lus uas tau muab los ntawm Phau Ntawv Ethaws los thiab, uas yog cov Neeg Yales ib phau ceev xwm txheej, cov neeg uas raug ua tawg khiav ri niab thaum lub caij tus Tswv ua rau cov neeg yam lus tsis sib nkag siab, thaum lawv tseem tab tom tsa ib tug pej thuam mus rau saum ntuj—Los qhia rau cov uas seem tshuav ntawm tsev neeg Ixayees kom paub hais tias tus Tswv tau ua tej yam tseem ceeb li cas rau lawv cov yawg koob lawm; thiab xwv kom lawv yuav paub tus Tswv tej kev khi lus, hais tias lawv twb tsis raug muab pov tseg mus ib txhis li—Thiab yog qhov uas yaum cov Neeg Yudais thiab Lwm Haiv Neeg hais tias Yexus yog tus Khetos, tus Vajtswv uas Nyob Mus Ib Txhis, uas tshwm sim nws tus kheej los rau txhua haiv neeg—Thiab nim no, yog muaj tej qho tsis yog tej ntawd tsuas yog neeg tej kev yuam kev xwb; yog li ntawd, tsis txhob thuam tej yam uas los ntawm Vajtswv, xwv kom nej thiaj tsis muaj qhov phem nyob ntawm Khetos lub rooj txiav txim.