Ib zaj Lus Piav Me Ntsis txog Phau Ntawv Maumoos

Phau Ntawv Maumoos yog ib phau ceev xwm txheej dawb ceev txog cov neeg uas nyob hauv thaj av Amelikas txheej thaum ub thiab tau muab sau rau saum cov phiaj kub thiab tooj. Cov phiaj uas tau siv los sau phau ceev xwm txheej no muaj raws li no:

1. Nifais cov Phiaj, uas muaj ob yam: cov phiaj me thiab cov phiaj loj. Thawj co yog cov uas hais txog tej yam xwm ntawm sab ntsuj plig thiab cov yaj saub tej hauj lwm qhuab qhia thiab tej lus qhia, cov tom qab ho hais ntau zog txog keeb kwm kev noj kev haus ntawm tej laj mej pej xeem (1 Nifais 9:2–4). Txawm li ntawd los, txij li Mauxiyas lub caij nyoog, cov phiaj loj kuj muaj tej yam tseem ceeb dawb ceev ntawm sab ntsuj plig thiab.

2. Maumoos cov Phiaj, uas yog tej ntsiab lus uas Maumoos muab los ntawm Nifais cov phiaj loj los tso ua ke, nrog ntau zaj lus qhia ntxiv rau. Cov phiaj no kuj muaj tej keeb kwm txuas ntxiv uas yog Maumoos thiab nws tus tub Maulaunais tau muab ntxiv rau hauv thiab.

3. Ethaws cov Phiaj, uas qhia txog cov Neeg Yales tej keeb kwm. Maulaunais tau sau ntsiab lus txog ib txhia ntawm phau ceev xwm txheej no, nws tau muab nws tej lus qhia ntxiv rau hauv thiab muab phau ceev xwm txheej coj los xyaw nrog zaj keeb kwm uas yog sawv daws li uas hu ua “Phau Ntawv Ethaws.”

4. Cov Phiaj Toog uas yog Lihais cov neeg nqa tawm hauv Yeluxalees tuaj 600 xyoo ua ntej Yexus yug los. Cov no muaj “Mauxes tsib phau ntawv, … thiab cov Neeg Yudais ib phau ceev xwm txheej txij thaum chiv keeb los, … txog rau thaum Xedekiyas, Yudas tus vaj ntxwv, pib sawv los kav teb chaws; thiab cov yaj saub dawb huv tej lus qhia txog tej yuav muaj los yav tom ntej” (1 Nifais 5:11–13). Ntau cov lus los ntawm cov phiaj no, tseem hais txog Yaxayas cov lus thiab lwm cov yaj saub cov lus uas muaj nyob hauv phau Npaivnpaum thiab cov uas tsis muaj nyob hauv phau Npaivnpaum, puav leej muaj nyob hauv Phau Ntawv Maumoos.

Phau Ntawv Maumoos muaj kaum tsib feem los yog zaj uas tseem ceeb, uas yog phau ntawv, yuav luag txhua zaj muaj npe tis raws li tus uas sau, tsuas yog ib zaj xwb thiaj tsis muaj. Thawj pawg ntawv (thawj rau phau ntawv, uas xaus rau phau Oonis) yog txhais los ntawm Nifais cov phiaj me los. Ntawm nruab nrab phau Oonis thiab phau Mauxiyas muaj ib zaj lus hu ua Maumoos cov Lus coj los sau rau haud. Zaj lus no muab phau ceev xwm txheej uas sau rau saum cov phiaj me txuas nrog rau cov ntsiab lus ntawm cov phiaj loj uas Maumoos tau muab ib txhia txiav tawm.

Pawg ntawv uas ntev tshaj plaws, txij ntawm Mauxiyas mus rau Maumoos tshooj 7, yog muab txhais los ntawm Nifais cov phiaj loj uas Maumoos tau sau ntsiab lus txog. Pawg ntawv xaus, txij ntawm Maumoos tshooj 8 mus rau tom kawg ntawm phau ntawv, yog Maumoos tus tub Maulaunais sau txaug cia, tus uas, tom qab tau sau tiav phau ceev xwm txheej uas hais txog nws txiv lub neej, tau muab cov Neeg Yales phau ceev xwm txheej ib txhia txiav tawm (hu ua phau ntawv Ethaws) thiab tom qab tau ntxiv ntau zaj uas hu ua phau ntawv Maulaunais.

Nyob rau los sis kwv yees li thaum xyoo 421 tom qab Yexus yug los, Maulaunais, uas yog cov Neeg Nifais tus yaj saub thiab tus neeg sau keeb kwm kawg, tau muab phau ceev xwm txheej dawb ceev no khi cia thiab tau muab coj mus zais rau tus Tswv, kom rho tau tawm rov qab los nyob hauv hnub nyoog kawg raws li Vajtswv lub suab tau qhia tseg los ntawm Nws cov yaj saub thaum ub. Thaum xyoo 1823 tom qab Yexus yug los, tib tug Maulaunais no, tus uas sawv rov los lawm, tau los xyuas tus yaj saub Joseph Smith thiab tom qab ntawd tau muab cov phiaj txaug no rau nws.

Hais txog phau luam no: Phab ntawv qhia npe qub, uas muaj tom qab kiag phab qhia tej yam muaj nyob hauv, yeej yog los ntawm cov phiaj thiab yog ib feem ntawm cov ntawv dawb ceev no. Tej zaj lus piav uas sau ntawv tsis qaij, xws li 1 Nifais thiab ua ntej kiag pib Mauxiyas tshooj 9, kuj yog ib feem ntawm cov ntawv dawb ceev thiab. Tej zaj lus piav uas sau ntawv qaij, xws li cov lus piav lub ntsiab ntawm tej tshooj, tsis yog los ntawm cov phiaj tiam sis tau sau rau hauv kom pab kawm ntawv thiaj yooj yim rau yus nyeem.

Yav tas dhau los tau muaj qee lo lus sau yuam kev nyob hauv Phau Ntawv Maumoos uas tau muab luam ua lus Akiv. Phau no tau muab kho kom tsim nyog raws nraim li cov ntawv uas tau sau ua ntej muab phau no luam tawm thiab tej phau luam uas tus Yaj Saub Joseph Smith tau kho.