Zaj Lus Piav

Phau Ntawv Maumoos yog ib phau vaj lug kub dawb huv uas zoo li phau Npaivnpaum. Yog ib phau ceev xwm txheej ntawm Vajtswv tej dej num nrog cov neeg thaum ub uas nyob cov teb chaws Amelikas thiab muaj qhov txhij txhua ntawm txoj moo zoo uas kav ib txhis li.

Ntau tus yaj saub txheej thaum ub tau sau phau ntawv no los ntawm lub txiaj ntsim qhia tau tej yuav muaj los yav tom ntej thiab kev tshwm sim. Ib tug yaj saub thiab kws sau keeb kwm hu ua Maumoos tau muab lawv cov lus, uas sau rau hauv cov phiaj kub, coj los sau raws nraim thiab sau ntsiab lus tso ua ke. Phau ceev xwm txheej no piav ib zaj txog ob pab neeg loj. Ib pab tau tuaj ntawm lub nroog Yeluxalees tuaj 600 xyoo ua ntej Yexus yug los thiab tom qab ntawd txawm tau ncaim ua ob haiv neeg, uas muaj npe hu ua cov Neeg Nifais thiab cov Neeg Lamas. Hos ib pab twb xub tuaj ua ntej puag thaum tus Tswv ua rau cov neeg yam lus tsis sib nkag siab tim tus Pej Thuam Npanpees. Pab no yog pab hu ua cov Neeg Yales. Tom qab ntau txhiab xyoo, tag nrho cov neeg no tau raug puas tsuaj tas tsuas tshuav cov Neeg Lamas xwb, thiab lawv cov no yog cov neeg Qhab Amelikas cov poj koob yawm txwv.

Zaj xwm txheej tseem ceeb tshaj nyob hauv Phau Ntawv Maumoos yog tus Tswv Yexus Khetos txoj kev qhuab qhia cov Neeg Nifais tsis ntev tom qab uas Nws sawv rov los. Phau no piav txog txoj moo zoo tej lus qhuab qhia, qhia txog txoj kev cawm seej, thiab qhia rau tib neeg kom paub tias lawv yuav tsum ua li cas thiaj yuav tau txais txoj kev kaj siab lug hauv lub neej no thiab tau txoj kev cawm seej nyob mus ib txhis nyob hauv lub neej yuav los yav tom ntej.

Tom qab uas Maumoos sau nws cov lus tiav, nws muab cov phiaj rau nws tus tub Maulaunais, tus uas tau ntxiv nws cov lus me ntsis rau hauv thiab tau muab cov phiaj coj mus zais rau hauv lub Pov Roob Khumaulas. Thaum lub Cuaj Hlis ntuj hnub tim 21, 1823, tus Maulaunais no, tus uas tau yeeb koob thiab tau sawv rov los lawm, tshwm sim los rau tus Yaj Saub Joseph Smith pom thiab qhia rau nws paub txog phau ceev xwm txheej thaum ub thiab txoj kev yuav muab los txhais ua lus Akiv.

Thaum txog sij hawm lawm Maulaunais kuj muab cov phiaj rau Joseph Smith, tus uas tau muab cov phiaj no txhais los ntawm Vajtswv lub txiaj ntsim thiab lub hwj chim. Nim no tau muab phau ceev xwm txheej no luam tawm ua ntau yam lus los ua ib zaj lus tim khawv tshiab thiab ib zaj ntxiv hais tias Yexus Khetos yog Vajtswv tus uas muaj txoj sia nyob Leej Tub thiab hais tias tag nrho cov uas los cuag Nws thiab ua raws li Nws txoj moo zoo tej kev cai thiab kab ke yuav txais kev cawm dim.

Tus Yaj Saub Joseph Smith tau hais txog phau ceev xwm txheej no tias: “Kuv tau hais rau cov kwv tij tias Phau Ntawv Maumoos yog phau uas raug tshaj txhua phau ntawv nyob hauv ntiaj teb no, thiab yog lub plawv zeb ntawm peb txoj kev teev ntuj, thiab tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv.”

Ntxiv rau Joseph Smith, tus Tswv tau pub rau kaum ib leeg ntxiv pom cov phiaj kub thiab los ua cov tim khawv tshwj xeeb tias Phau Ntawv Maumoos yeej muaj tseeb thiab yog los ntawm Vajtswv los. Lawv cov lus tim khawv muab sau cia nyob rau hauv no hu ua “Zaj Lus Tim Khawv ntawm Peb tug Tim Khawv” thiab “Zaj Lus Tim Khawv ntawm Yim tus Tim Khawv.”

Peb caw tag nrho tib neeg nyob txhua txhia qhov chaw los nyeem Phau Ntawv Maumoos, los muab zaj xov xwm nyob hauv phau ntawv no ua tib zoo xav hauv lawv lub siab, thiab tom qab ntawd nug Vajtswv, Leej Txiv uas Nyob Mus Ib Txhis, los ntawm Yexus Khetos lub npe saib phau ntawv no puas tseeb tiag. Cov uas ua li no thiab thov nrog kev ntseeg yuav tau ib zaj lus tim khawv los ntawm tus Vaj Ntsuj Plig Dawb Huv lub hwj chim hais tias phau no muaj tseeb thiab yog los ntawm Vajtswv los. (Saib Maulaunais 10:3–5)

Cov uas tau kev ua tim khawv tseem ceeb los ntawm tus Ntsuj Plig Dawb Huv no kuj yuav paub los ntawm tib lub hwj chim ntawd tias Yexus Khetos yog neeg ntiaj teb tus Cawm Seej, paub tias Joseph Smith yog Nws tus txais kev tshwm sim thiab yog Nws tus yaj saub hauv hnub nyoog kawg no, thiab paub tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tus Tswv lub nceeg vaj uas tsa dua rov qab los ib zaug ntxiv nyob hauv lub ntiaj teb, los npaj tos tus Mexiyas txoj Kev Los Zaum Ob.